Skip to main content

பட்டப்பகலில் பெண்ணைக் கொலை செய்து சாலையில் கொளுத்தியக் கொடூரம்!  

Published on 04/05/2022 | Edited on 04/05/2022

 

Woman passed away in nellai police investigation

 

நெல்லைப் பகுதியின் பேட்டையிலுள்ள ரொட்டிக்கடை பஸ் ஸ்டாப்பிலிருந்து பழையபேட்டைக்குச் செல்லும் ஆதம் நகர் எதிர் சாலையோரம் நேற்று மதியம் சுமார் 2 மணி வாக்கில் சடலம் ஒன்று தீயில் எரிந்து கொண்டிருந்த தகவல் பேட்டை காவல் நிலையத்திற்குத் தெரிவிக்கப்பட்டது. சம்பவ இடத்திற்கு விரைந்து வந்த இன்ஸ்பெக்டர் ஹரிஹரன் உள்ளிட்ட போலீசார் தீயை அணைத்து விட்டு முழுவதுமாக எரிந்து கருகிய நிலையில் கிடந்த சடலத்தைக் கைப்பற்றி நெல்லை அரசு மருத்துவக் கல்லூரி மருத்துவமனைக்கு உடற் பரிசோதனைக்கு அனுப்பிவைத்தவர்கள். மேலும், வழக்குப் பதிவு செய்து தொடர்ந்து விசாரணை நடத்தியிருக்கின்றனர்.


ஆரம்ப கட்ட விசாரணையில் தீயில் கருகியவர் சுமார் 50 வயது மதிக்கத்தக்க பெண் என்பதும். அவரது கழுத்தில் பதிந்த தடயத்தால், அவர் துப்பட்டாவால் கழுத்து நெரித்துக் கொலை செய்து பின் தீ வைத்து எரித்தது தெரியவந்துள்ளது. ஆனாலும், அந்தப் பெண் யார்? எந்த ஊரைச் சேர்ந்தவர். எதற்காக அவர் கொலை செய்யப்பட்டு எரிக்கப்பட்டார் என்பன குறித்த தகவல் கிடைக்கவில்லையாம்.


இதைத் தொடர்ந்து இன்ஸ்பெக்டர் ஹரிஹரன் மற்றும் குற்றப் பிரிவு இன்ஸ்பெக்டர் ராஜா சுந்தர் தலைமையில் அமைக்கப்பட்ட மூன்று தனிப்படையினர் அந்த வழியோர சி.சி.டி.வி.களில் பதிவான காட்சிகளை ஆய்வு செய்தனர். மேலும், அப்பகுதி பொதுமக்களிடமும் விசாரணை மேற்கொண்டனர். இந்த நிலையில் நேற்று மதியம் பழைய பேட்டைப் பகுதியிலிருந்து ஆட்டோ ஒன்றில் வந்திறங்கிய இரு பெண்களில் ஒருவர் மற்றொரு பெண்ணைக் கையைப் பிடித்து திமிரவிடாமல் ரோட்டில் தர தர வென்று இழுந்து கொண்டு சென்று கொலை செய்து பின் பெட்ரோல் ஊற்றி, தீவைத்து எரித்து விட்டு தனியாக வெளியே வந்தவள், பின் ஆட்டோவில் ஏறிச் சென்று விட்டதாக அப்பகுதி மக்கள் தெரிவித்திருக்கிறார்கள்.


அதனப்படையில் விசாரணையை மேற்கொண்ட தனிப்படையினர் அந்தப் பெண், அவருக்கு உடந்தையாகச் செயல்பட்டவர்களைத் தீவிரமாகத்தேடி வருகின்றனர். மேலும், அந்தப் பகுதியின் செல் டவர்லைனில் சம்பவ நேரத்திற்கு முன்னும், பின்னும் பதிவான நம்பர்களையும் ட்ரேஸ் செய்து விசாரணையைத் தீவிரப்படுத்தியுள்ளனர். குற்றவாளிகள் விரைவில் சிக்குவர் என்று காவல் துறை தரப்பில் சொல்லப்படுகிறது.

 

பட்டப் பகலில் ரோட்டில் ஒரு பெண்னை, ஒரு பெண் எரித்துக் கொன்ற சம்பவம் நெல்லைப் பேட்டைப் பகுதியை அதிரவைத்துள்ளது.

 

 

சார்ந்த செய்திகள்

 

Next Story

ஆந்திராவில் இருந்து தென்மாநிலங்களுக்குக் கடத்தப்படும் கஞ்சா; சுற்றிவளைத்த தமிழக போலீஸ்

Published on 13/07/2024 | Edited on 13/07/2024
cannabis smuggled from Andhra, Telangana to Tamil Nadu, Karnataka, Kerala by car and train

ஆந்திராவில் இருந்து தமிழகத்திற்குக் கஞ்சா கடத்திய வரப்படுவதாக வந்த ரகசியத் தகவல் போலீசாருக்கு கிடைத்துள்ளது. அதனடிப்படையில் மாவட்ட காவல் கண்காணிப்பாளர் மணிவண்ணன் உத்தரவின் பேரில் தமிழக ஆந்திர எல்லையோரம் உள்ள வேலூர் மாவட்டம் சைணகுண்டா சோதனை சாவடி அருகே குடியாத்தம் தாலுகா போலீசார் தீவிர வாகன தணிக்கையில் ஈடுபட்டனர்.

அப்போது கர்நாடகா பதிவு எண் கொண்ட சொகுசு காரை தடுத்து நிறுத்தி சோதனை செய்த போது அதில் 12 கிலோ கஞ்சா கடத்திவரப்பட்டது தெரியவந்தது.  கஞ்சாவைக் கடத்தி வந்த குடியாத்தம் பகுதியைச் சேர்ந்த குடியரசன் (24) கோகுல்குமார் ( 26) மாதேஷ் (21) மற்றும் பெரம்பலூர் மாவட்டத்தைச் சேர்ந்த வெங்கடேசன்( 23) ஆகிய நான்கு பேரையும் கைது செய்து கடத்தலுக்குப் பயன்படுத்தப்பட்ட காரை பறிமுதல் செய்த குடியாத்தம் தாலுகா போலீசார் வழக்குப் பதிவு செய்து விசாரணை மேற்கொண்டு வருகின்றனர். இதில் கைது செய்யப்பட்ட குடியரசன் மற்றும் கோகுல்குமார் ஆகிய இருவரும் மீது கொலை வழக்கு உள்ளிட்ட பல்வேறு வழக்குகள் நிலுவையில் உள்ளது குறிப்பிடத்தக்கது.

இதேபோல் ராணிப்பேட்டை மாவட்டம் அரக்கோணம் வழியாக டாடா நகர் பகுதியில் இருந்து எர்ணாகுளம் செல்லும் எர்ணாகுளம் எக்ஸ்பிரஸில் கஞ்சா கடத்தப்படுவதாக வேலூர் மதுவிலக்கு மற்றும் அமலாக்கப் பிரிவு காவல்துறையினருக்கு ரகசியத் தகவல் கிடைத்தது. அதன் பேரில் அரக்கோணம் மதுவிலக்கு மற்றும் அமலாக்கப் பிரிவு காவல் துறையினருடன் இணைந்து ரயிலில் சோதனை மேற்கொண்டனர். 

முன்பக்க சாதாரண பெட்டியில் சந்தேகம் அளிக்கக் கூடிய வகையிலிருந்த நபர்களைப் பிடித்து விசாரணை மேற்கொண்ட போது கஞ்சா கடத்தி வருவது தெரியவந்தது. அவர்களிடம் இருந்து 10 பாண்டல்களில் இருந்த சுமார் 14 கிலோ எடையுள்ள கஞ்சாவை பறிமுதல் செய்த காவல்துறையினர் கஞ்சா கடத்திய குற்றத்திற்காக கர்நாடகா மாநிலம் பெங்களூரைச் சேர்ந்த சுப்ரமணியம் (21) மற்றும் அப்துல் (18) ஆகிய இருவரைக் கைது செய்து விசாரணை மேற்கொண்டு வருகின்றனர்.

ஆந்திரா மற்றும் தெலுங்கானாவில் வனப்பகுதிகளில் இருந்து கடத்தி வரப்படும் கஞ்சா தமிழ்நாடு, கர்நாடகா பகுதிகளுக்குள் நுழைந்து மாநில இளைஞர்களைப் போதைக்கு அடிமையாக்கி வருகிறது. இதனைத் தடுக்க காவல்துறை பெரும் முயற்சிகள் எடுத்தாலும் கஞ்சா கடத்தி வருவதற்காக அனுப்பப்படும் குருவிகளுக்குத் தரப்படும் ஆயிரக்கணக்கான ரூபாய் பணம் அவர்களை இந்த தொழிலைக் கச்சிதமாகச் செய்யவைக்கிறது. 

Next Story

சாராயம் காய்ச்சி குடித்த நபர்கள் மருத்துவமனையில் அனுமதி!

Published on 12/07/2024 | Edited on 13/07/2024
People admitted to hospital after drinking liquor

செங்கல்பட்டு மாவட்டம் மதுராந்தகம் அருகே மழுவங்கரணை கிராமத்தைச் சேர்ந்தவர் தேவன்(65).  அடுப்புக்கரி வியாபாரம் செய்து வரும் இவர் தன்னிடம் வேலை செய்யும் தொழிலாளர்களுக்காக சாராயம் காய்ச்சி வந்ததாகக் கூறப்படுகிறது. இது குறித்த தகவல் மேல்மருவத்தூர் காவல் ஆய்வாளர் ஏழுமலைக்குத் தெரியவர, உடனடியாக  மதுவிலக்கு அமல் பிரிவு போலீசாருடன் தேவன் வீட்டிற்குச் சென்று சோதனை நடத்தியுள்ளார்.

சோதனையில்  சாராயம் காய்ச்சுவதற்காக வைத்திருந்த ஊறல் மற்றும் காய்ச்சி வைத்திருந்த 20 லிட்டர் சாராயத்தைக் கைப்பற்றினர். மேலும் தேவனை போலீசார் கைது செய்து விசாரணை நடத்தியபோது, சாராயத்தைக் காய்ச்சி தன்னிடம் வேலை செய்யும் மணி, பெருமாள், அய்யனார், ராதா கிருஷ்ணன், மதுரை ஆகிய 5 பேருக்கு குடிக்கக் கொடுத்ததாகத் தெரிவித்தார்.

இதனைத் தொடர்ந்து மருத்துவ குழுவினர் அதில் 3 பேரை  பிடித்து முழு மருத்துவ பரிசோதனை செய்தனர். மூவருக்கும் எந்த பாதிப்பு ஏற்படவில்லை என்று  மருத்துவர்கள் தெரிவித்தனர். இருப்பினும் முன்னெச்சரிக்கைக்காக அவர்கள் செங்கல்பட்டு அரசு மருத்துவமனையில் அனுமதிக்கப்பட்டு கண்காணிக்கப்பட்டு வருகின்றனர். எஞ்சியுள்ள 2 பேருடன் சேர்த்து 5 பேரும் நலமுடன் இருப்பதாகத் தெரிவிக்கப்பட்டுள்ளது.