Skip to main content

பேருந்துக் கட்டண உயர்வைத் தாங்குமா தமிழகம்?- மாற்றி யோசிக்குமா தமிழக அரசு!

Published on 15/05/2022 | Edited on 15/05/2022

 

Will Tamil Nadu withstand the bus fare hike? - Will the Tamil Nadu government change its mind!


தமிழகத்தில் பேருந்து கட்டணம் உயரப்போகிறது என்ற தகவல் அடித்தட்டு மக்களை கவலை கொள்ளச் செய்திருக்கிறது. ஆந்திர, கர்நாடக மாநிலங்களை ஒப்பிட்டு, அந்த மாநிலங்களைக் காட்டிலும் தமிழகத்தில் பேருந்துக் கட்டணம் குறைவுதான் என்ற ஒப்பீட்டுக் கணக்கினை, அன்றாடச் செலவுகளுக்கே அல்லாடும் சாமானிய மக்கள் ஏற்றுக்கொள்ளமாட்டார்கள். 

 

அ.தி.மு.க. ஒருங்கிணைப்பாளர் ஓ.பன்னீர்செல்வமும் “மக்களைப் பாதிக்காத வகையில் பேருந்துக் கட்டணத்தை உயர்த்துவதாகச் சொல்வதை ஏற்கமுடியாது. கட்டணத்தை உயர்த்தினால் பொதுமக்கள் வெகுவாகப் பாதிக்கப்படுவார்கள்” எனக் கூறுகிறார். 

 

தமிழ்நாடு முழுவதும் அரசுப் போக்குவரத்துக்கழகத்தின் கட்டுப்பாட்டில் இயங்கும் சாதாரண கட்டண நகரப் பேருந்துகளில், உயர்கல்வி பயிலும் மாணவியர் உள்ளிட்ட அனைத்து மகளிரும் கட்டணமில்லாமல், பேருந்துப் பயண அட்டை இல்லாமல் பயணம் செய்யலாம் என ‘மாற்றி யோசித்து’ அரசாணை பிறப்பித்த திமுக அரசாங்கத்தால், பயன்பெற்ற பெண்களின் எண்ணிக்கை 115 கோடி எனத் தரவுகள் தெரிவிக்கின்றன. 


2021-22 நிதியாண்டில், அரசுப் போக்குவரத்துக் கழகங்களின் கூடுதல் செலவினம் ரூபாய் 4,443 கோடி என்றும், ரூபாய் 2,732 கோடி வருவாய் இழப்பென்றும், நிர்வாகச் சிக்கலை தமிழக அரசு எடுத்துக்கூறினாலும், அது மக்களின் செவிகளை எட்டாமல், அதிருப்தியே மேலோங்கும்.     

 

டெல்லி அரசாங்கம் என்ன செய்திருக்கிறது? பொதுப் போக்குவரத்தில் 1,500 தாழ்தள மின்சாரப் பேருந்துகளை அறிமுகம் செய்திட, டெல்லி அரசு ஒப்புதல் அளித்துள்ளது. உத்தரப்பிரதேசம், ராஜஸ்தான், பஞ்சாப் உள்ளிட்ட 5 மாநிலங்களுக்கு, 11 வழித்தடங்களில் தாழ்தள மின்சாரப் பேருந்துகளை இயக்கவுள்ளனர். 

 

நஷ்டத்திலிருந்து தமிழ்நாடு அரசுப் போக்குவரத்துக் கழகங்களை மீட்க, வல்லுனர் குழு அமைத்தது, எரிபொருளைச் சிக்கனப்படுத்தும் நடவடிக்கைகளில் இறங்குவதெல்லாம் சரிதான்! ஆனாலும், ஒருபுறம் மகளிர்க்கு அரசுப் பேருந்துகளில் இலவசப் பயணம், இன்னொருபுறம் பேருந்துக் கட்டண உயர்வு என்பது, ‘ஒரு கண்ணில் வெண்ணை, ஒரு கண்ணில் சுண்ணாம்பு’ வைப்பதை போல் இருக்கிறது என்று விமர்சிக்கப்படுகிறது. 

 

சார்ந்த செய்திகள்

Next Story

அரசுப் பேருந்து ஓட்டுநர், நடத்துநர் மீது தாக்குதல்; விசாரணையில் வெளியான பகீர் தகவல்! 

Published on 22/04/2024 | Edited on 22/04/2024
Govt Bus Driver Conductor incident information released in the investigation

தஞ்சாவூர் மாவட்டம் கும்பகோணம் அருகே பழைய பாலக்கரை பகுதியில் பந்தநல்லூரில் இருந்து கும்பகோணம் நோக்கி அரசு நகரப் பேருந்து ஒன்று வந்து கொண்டிருந்தது. அப்போது 8 பேர் கொண்ட இளைஞர் கும்பல் ஒன்று இந்த பேருந்தை வழிமறித்துள்ளனர். அதனைத் தொடர்ந்து பேருந்தின் ஓட்டுநர் மற்றும் நடத்துநரிடம் வாக்குவாதத்தில் ஈடுட்டனர். மேலும் ஆத்திரமடைந்த இளைஞர்கள் பேருந்துக்குள் சென்று ஓட்டுநரை தகாத வார்த்தைகளால் திட்டி வாக்குவாதத்தில் ஈடுபட்டனர்.

அப்போது ஓட்டுநரை பேருந்துக்கு வெளியே இழுத்து வந்து அவரை சரமாரியாக அடித்து உதைத்துள்ளனர். இதனை தடுக்க முயன்ற நடத்துநர் மீதும் சரமாரியாக தாக்குதல் நடத்தியுள்ளனர். அருகில் இருந்தவர்கள் இதனை தடுக்க முயன்ற போது இந்த இளைஞர்கள் அவர்களையும் தகாத வார்த்தைகளால் திட்டி கொலை மிரட்டல் விடுத்து தாக்கியுள்ளனர். அதே சமயம் அந்த வழியே வந்த தனியார் தொலைக்காட்சி செய்தியாளர்கள் இருவர் இந்த சம்பவத்தை படம் எடுத்தபோது அவர்களையும் தகாத வார்த்தைகளால் பேசி தாக்க முயன்றுள்ளனர்.

இந்த சம்பவத்தில் படுகாயமடைந்த பேருந்து ஓட்டுநர், நடத்துநர் மற்றும் இருவர் என 4 பேரும் மருத்துவமனையில் சிகிச்சைக்காக அனுமதிக்கப்பட்டு அவர்களுக்கு சிகிச்சை அளிக்கப்பட்டு வருகிறது. இந்த கொடூர சம்பவத்தில் ஈடுபட்ட 2 பேரை பொதுமக்கள் பிடித்து போலீசில் ஒப்படைத்தனர். 6 பேர் அங்கிருந்து தப்பி ஓடிவிட்டனர். கைது செய்யப்பட்ட இருவரிடமும் போலீசார் நடத்திய விசாரணையில் இந்த தாக்குதல் சம்பவத்தில் ஈடுபட்ட 8 பேரும் கஞ்சா போதையில் இருந்தனர் என்ற பகீர் தகவல் வெளியாகியுள்ளது.  இத்தகைய சூழலில் மேலும் 4 பேரை  போலீசார் கைது செய்துள்ளனர். தலைமறைவாக உள்ள இருவரையும் போலீசார் தீவிரமாக தேடி வருகின்றனர். 

Next Story

சித்ரா பௌர்ணமி; அரசு போக்குவரத்துக் கழகம் முக்கியத் தகவல்! 

Published on 21/04/2024 | Edited on 21/04/2024
Chitira Poornami Govt Transport Corporation Important Information

சித்ரா பௌர்ணமியை முன்னிட்டு திருவண்ணாமலைக்கு தமிழ்நாடு அரசு போக்குவரத்துக் கழகங்கள் மூலம் சிறப்பு பேருந்துகள் இயக்கப்பட உள்ளன என அரசு விரைவுப் போக்குவரத்துக் கழக மேலாண் இயக்குநர் தெரிவித்துள்ளார்.

இது குறித்து வெளியிடப்பட்டுள்ள செய்திக் குறிப்பில், “23.04.2024 (செவ்வாய் கிழமை) சித்ரா பௌர்ணமியை முன்னிட்டு திருவண்ணாமலைக்கு 22/04/2024 மற்றும் 23/04/2024 ஆகிய நாட்களில் சென்னையிலிருந்து திருவண்ணாமலைக்கும் மற்றும் பல்வேறு இடங்களிலிருந்து திருவண்ணாமலைக்கும் கூடுதலான பயணிகள் பயணம் மேற்கொள்வார்கள் என எதிர்பார்க்கப்படுகிறது. இதனை கருத்தில் கொண்டு தமிழ்நாடு அரசு போக்குவரத்துக் கழகங்கள் மூலம் தினசரி இயக்கப்படும் பேருந்துகளுடன் கூடுதலாக சிறப்பு பேருந்துகளை இயக்க திட்டமிடப்பட்டுள்ளது. அதன்படி சென்னை கிளாம்பாக்கத்திலிருந்து 22/04/2024 அன்று 527 பேருந்துகளும் மற்றும் 23/04/2024 அன்று 628 பேருந்துகளும்  இயக்கப்பட உள்ளன.

மேலும் சென்னை மாதவரத்திலிருந்து 22/04/2024 அன்று 30 பேருந்துகளும் 23/04/2024 அன்று 30 பேருந்துகளும் தினசரி இயக்கக்கூடிய பேருந்துகளுடன் கூடுதலாக இயக்கப்படும். அதே போன்று தமிழகத்தின் பல்வேறு இடங்களிலிருந்து திருவண்ணாமலைக்கு 22/04/2024 அன்று 910 பேருந்துகளும் 23/04/2024 அன்று 910 பேருந்துகளும் தினசரி இயக்கக்கூடிய பேருந்துகளுடன் கூடுதலாக இயக்கப்படும்.

அரசு விரைவுப் போக்குவரத்துக் கழகம் மூலமாக இருக்கை மற்றும் படுக்கை வசதி கொண்ட குளிர்சாதனம் கொண்ட 40 பேருந்துகள் சென்னை கிளாம்பாக்கத்திலிருந்து திருவண்ணாமலைக்கு 22/04/2024 மற்றும் 23/04/2024 ஆகிய நாட்களில் இயக்க நடவடிக்கை மேற்கொள்ளப்பட்டுள்ளது. மேலும், சென்னை, மதுரை, சேலம், கோயம்புத்தூர், ஈரோடு, திருப்பூர், திருநெல்வேலி, நாகர்கோவில், தென்காசி, தூத்துக்குடி மற்றும் பெங்களூரு ஆகிய இடங்களிலிருந்து திருவண்ணாமலைக்கு அரசு பேருந்துகளில் முன்பதிவு செய்து பயணிக்கவும் வழிவகை செய்யப்பட்டுள்ளது. பயணிகள் கூட்ட நெரிசலைத் தவிர்க்கும் பொருட்டு தங்களது பயணத்திற்கு www.tnstc.in மற்றும் Mobile App மூலம் முன்பதிவு செய்து பயணிக்க கேட்டுக்கொள்ளப்படுகிறார்கள்.

இச்சிறப்பு பேருந்து இயக்கத்தினை கண்காணிக்க அனைத்து பேருந்து நிலையங்களிலும் போதிய அலுவலர்கள் நியமிக்கப்பட்டுள்ளனர். எனவே, பயணிகள் மேற்கூறிய வசதியினை பயன்படுத்தி தங்களது பயணத்தினை மேற்கொள்ள இதன் மூலம் தெரிவிக்கப்படுகிறது” எனத் தெரிவிக்கப்பட்டுள்ளது.