Skip to main content

மலையா... கள்ளச்சாராய குடோனா? - அதிர்ச்சி அடைந்த டி.ஐ.ஜி

Published on 05/06/2023 | Edited on 05/06/2023

 

Vellore Sathkar hill liquor issue
மாதிரி படம்  

 

தமிழகத்தில் கள்ளச்சாராயத்தால் 23 பேர் உயிரிழந்த சம்பவத்தைத் தொடர்ந்து தமிழகம் முழுவதும் கள்ளச்சாராயத் தடுப்பு வேட்டை தீவிரப்படுத்தப்பட்டு வருகிறது. அந்த வகையில் வேலூர் மாவட்டத்தில் கள்ளச்சாராயத்தை முழுவதுமாக ஒழிக்கும் நோக்கில் தொடர் சோதனைகள் மேற்கொண்டு வருகின்றனர். 

 

வேலூர் மாவட்டம், பேர்ணாம்பட்டு அடுத்த சாத்கர் மலைப் பகுதியில், வேலூர் சரக டி.ஐ.ஜி. முனைவர் முத்துசாமி, எஸ்.பி மணிவண்ணன் ஆகியோர் கூட்டாக சுமார் நூறு காவலர்களுடன் மலைப் பகுதி முழுவதும் அதிடியாகத் திடீர் சோதனை மேற்கொண்டனர். அப்போது ட்ரோன் கேமிரா உதவியுடன் சோதனை செய்தபோது மலைப் பகுதிகளில் பல இடங்களில் சாராய அடுப்பு, ஊறல் இருப்பது கண்டறியப்பட்டு அதனை அடித்து உடைத்த காவல்துறையினர் தீயிட்டும் கொளுத்தினர். 

 

மேலும் சாராயம் காய்ச்சி சுடச்சுடப் பேரல், பல இடங்களில் மண்ணில் குழி தோண்டி ஊற வைக்கப்பட்ட சாராய ஊரல்களை காவல்துறையினர் கீழே ஊற்றி அழித்தபோது காட்டுக்குள் சாராய ஆறு ஓடுவது போல் காட்சியளித்தது. அந்த இடங்கள் பல காலமாகச் சாராயம் காய்ச்சப் பயன்படுத்தப்படும் இடங்களைப் போன்று இருந்தது. மேலும் தொடர்ந்து மலைப் பகுதியில் ஆய்வு மேற்கொண்ட நிலையில் பல குழிகளும் அடுப்புகளும் தொடர்ந்து கண்டறியப்பட்டு வருகிறது.

 

டி.ஐ.ஜி. மற்றும் எஸ்.பி. மேற்கொண்ட ஆய்வின் போது மட்டுமே சுமார் 10,000 லிட்டருக்கு மேலான சாராய ஊரல்கள், ட்யூபுகளில் இருந்த கள்ளச்சாராயம், மூலப் பொருட்கள் உள்ளிட்டவற்றைக் கீழே ஊற்றியும் தீயிட்டுக் கொளுத்தியும் அழித்தனர். சாராயம் காய்ச்சுவதிலும் விற்பனை செய்வதிலும் ஈடுபடுபவர்கள் மீது கடுமையான நடவடிக்கை எடுக்கப்படும் என எஸ்.பி எச்சரிக்கை செய்தார். மேலும், சாராயம் காய்ச்ச மூலப்பொருட்களை வழங்குவோர் மீதும் நடவடிக்கை எடுக்கப்படும். மறுவாழ்வு வேண்டும் என விரும்புவோர் நேரடியாக எங்களை அணுகலாம் என்றார். 

 

 

சார்ந்த செய்திகள்

Next Story

“என்ன எல்லாரும் பளபளன்னு இருக்கீங்க... ஆயிரம் ரூபாய் வந்துடுச்சா” - கதிர் ஆனந்த் பிரச்சாரம்

Published on 28/03/2024 | Edited on 28/03/2024
Kathir Anand campaign in Vellore

வேலூர் மாவட்டம் கே.வி.குப்பம் சட்டமன்றத் தொகுதிக்குட்பட்ட பரதராமி, கல்லப்பாடி, கொண்டசமுத்திரம்,  பி.கே.புரம் உள்ளிட்ட பல்வேறு இடங்களில் வேலூர் பாராளுமன்றத் தொகுதி திமுக வேட்பாளர் கதிர் ஆனந்த் பிரச்சாரம் மேற்கொண்டார்

அப்போது பேசிய கதிர் ஆனந்த், ட்ரைவர் வண்டி மேல இருக்க ஹெட் லைட் எல்லாம் ஆஃப் பண்ணுப்பா. என் மூஞ்சு தெரியமாட்டுதாம் என்று கூற, உடனடியாக ட்ரைவரும் லைட் ஆஃப் பண்ண, மக்களை பார்த்து இப்போது எனது முகம் தெளிவாக தெரிகிறதா? என்று கேட்டார். அதற்கு மக்களும் தொண்டர்களும் தெரியுது தெரியுது என்று சிரித்துக்கொண்டே கூற தனது பேச்சைத் தொடங்கினார்.

அந்த கலகலப்பு குறையாமல் இருக்க மக்களைப் பார்த்து, என்ன எல்லாரும் பல பளபளன்னு இருக்கீங்க... எல்லாம் ஃபுல்லா மேக்கப் போட்டு வந்து இருக்கீங்களா... ஃபேரன் லவ்லி, ஸ்டிக்கர் பொட்டு எல்லாம் போட்டு ஜம்முன்னு வந்திருக்கீங்களா... என்று கேட்க கூட்டத்தில் இருந்தவர்கள் சிரிக்க ஆரம்பிக்க, அதைவிட உங்க முகத்தை பார்க்கும் போது ஒரு புன்னகை, சந்தோஷம் தெரிகிறது.

நான் வந்தவுடனே சீதாராமன் கிட்ட கேட்டேன், “என்னாங்க எல்லார் மத்திலயும் ஒரு சந்தோஷம் இருக்குதே என்னா காரணம்னு கேட்டேன். அதுக்கு அவரு சொன்னாரு எல்லாருக்கும் மாசம் மாசம் ரூ. 1000 பணம் கொடுக்குறாங்களாம். அதான் எல்லாரும் ஹாப்பியா இருக்காங்களாமானு சொன்னாரு...’ என்ன உண்மையா அது? என்று பெண்களை பார்த்து கேட்க, அவர்களும் ஆம் என்று கூச்சலிட்டனர். அப்பொழுது சிலர் இன்னும் எங்களுக்கு வரவில்லை என கூறினர். அதற்கு இந்த தேர்தல் முடிந்தவுடன் அனைவருக்கும் கலைஞர் மகளிர் ஊக்கத்தொகை வழங்கப்படும் என்று  மக்களிடையே தனது கலகலப்பான பேச்சை தொடர்ந்து பிரச்சாரம் மேற்கொண்டார்.

இருப்பினும், ஃபேரன் லவ்லி போட்டீங்களா? பொட்டு வச்சீங்களா? பளபளன்னு இருக்கீங்க என கதிர் ஆனந்த் கேட்டது பெண்களிடம் முகச்சுழிப்பை ஏற்படுத்தியுள்ளது. இதனை எதிர்க்கட்சிகள், பெண்களை கொச்சைப்படுத்தி பேசுகிறார் வேட்பாளர். இது மேட்டிமைத்தனம், ஆயிரம் ரூபாய் இல்லை என்றால் பெண்கள் என்ன பொட்டு வைக்கக் கூடாதா? தங்களை அழகுபடுத்திக் கொள்ளக் கூடாதா? எனக் கேள்வி எழுப்பி விமர்சனம் செய்து வருகின்றனர்.

Next Story

கதிர் ஆனந்த் வேட்புமனு தாக்கல் 

Published on 25/03/2024 | Edited on 25/03/2024
Kathir Anand filed nomination

வேலூர் நாடாளுமன்றத் தொகுதியில் இந்தியா கூட்டணி சார்பில் போட்டியிடும் திமுக வேட்பாளர் கதிர் ஆனந்த் இன்று வேட்புமனு தாக்கல் செய்தார். இதற்காக அவர், அமைச்சர் துரைமுருகன், சட்டமன்ற உறுப்பினர் நந்தகுமார், சட்டமன்ற உறுப்பினர் கார்த்தி உள்ளிட்ட 2000க்கும் மேற்பட்ட இந்தியா கூட்டணிக் கட்சித் தொண்டர்களுடன் ஊர்வலமாக வந்து மாவட்டத் தேர்தல் நடத்தும் அலுவலர் சுப்புலட்சுமியிடம் வேட்புமனு தாக்கல் செய்தார்.

அதற்கு முன்னதாக வேலூர் அண்ணா சாலையில் உள்ள வேலூர் மாநகர் திமுக அலுவலகத்தில் கலைஞர் சிலைக்கு மாலை அணிவித்துவிட்டு, தொடர்ச்சியாக ஊர்வலமாகச் சென்று அண்ணா சிலை, பெரியார் சிலை, காந்தி சிலை, அம்பேத்கர் சிலை ஆகியவற்றிற்கு மாலை அணிவித்துவிட்டு சத்துவாச்சாரியில் உள்ள மாவட்ட ஆட்சியர் அலுவலகத்திற்கு ஊர்வலமாக வந்து தனது வேட்பு மனுவைத் தாக்கல் செய்தார்.

அதற்கு முன்னதாக இந்தியா கூட்டணி தொண்டர்கள் ஆரவாரத்துடன் கதிர் ஆனந்த் வேட்புமனு தாக்கல் செய்வதற்கு உற்சாக வரவேற்பு அளித்தனர். வழிநெடுக பட்டாசுகள் வெடித்து கரகாட்டம், ஒயிலாட்டம், மயிலாட்டம் எனப் பல்வேறு மேள தளங்கள் இசைத்து ஊர்வலமாக வந்தனர். பின்னர் மாவட்ட ஆட்சியரும், தேர்தல் அதிகாரியுமான சுப்புலட்சுமியிடம் வேட்பு மனுவைத் தாக்கல் செய்தார்.