Skip to main content

ஒரே இரவில் நடந்த பயங்கரம்! - பீதியில் ஒட்டுமொத்த கிராமம்! 

Published on 15/12/2023 | Edited on 15/12/2023
serial theft near tiruttani

திருவள்ளூர் மாவட்டம், திருத்தணி தொகுதி ஆர்.கே.பேட்டை வட்டம், சின்னநாகபூடி கிராமத்தில் 2000க்கும் மேற்பட்ட வீடுகள் உள்ளன. இந்த கிராமத்தில் ஒரே இரவில் கொள்ளையர்கள் எட்டு வீடுகளில் திருட்டு சம்பவங்களில் ஈடுபட்டுள்ளனர். 

மேற்கண்ட அந்த கிராமத்தில் ஓய்வு பெற்ற ஆசிரியர் ஆனந்த வடிவேல், அவரது மனைவி சாந்தி ஆகியோர் வசித்து வந்துள்ளனர். இவர்கள் வீட்டில் நள்ளிரவு நேரத்தில் பின்பக்க கதவை உடைத்து உள்ளே கொள்ளையர்கள் சென்றுள்ளனர். வீட்டில் எதுவும் கிடைக்காததால், ஆனந்த வடிவேல் தூங்கிக் கொண்டிருந்த அறை பகுதிக்குச் சென்று அவரை உருட்டுக் கட்டையால் தாக்கி மிரட்டி அவரது மனைவி கழுத்தில் இருந்த 5 சவரன் தங்கத் தாலி சங்கிலியைப் பறித்துக் கொண்டு அவரையும் கடுமையான முறையில் தாக்கிவிட்டுத் தப்பி ஓடி உள்ளனர்.

இதேபோல் அதே கிராமத்தில் இரண்டு கிலோமீட்டர் தள்ளி உள்ள கணபதி என்பவரது வீட்டுக்குள் கொள்ளையர்கள் நுழைந்துள்ளனர். கணபதி ஒரு கல்யாணத்திற்காக வெளியூர் சென்றிருந்த நிலையில், அவரது வீட்டில் 20,000 பணத்தை கொள்ளையடித்துச் சென்றுள்ளனர். இந்த வீட்டிற்கு நேர் எதிரில் உள்ள கஜேந்திரன் என்பவர் பெங்களூரில் வசித்து வருகிறார். வாரத்தில் மூன்று முறை இந்த வீட்டிற்கு வருவார். தற்போது இவர் வீட்டில் இல்லாததை தெரிந்து கொண்ட திருடர்கள், அவரது வீட்டிற்குள் சென்று 2 சவரன் மற்றும் ரூ. 12,000, வெள்ளி கொலுசு ஆகியவற்றை கொள்ளையடித்துச் சென்றுள்ளனர்.

அங்கிருந்து சிறிது தொலைவில் முன்னாள் ராணுவ வீரர் வெங்கடேசன் என்பவரின் வீடு உள்ளது. இவரும் வெளியூருக்குச் சென்றிருந்தார். இதனைத் தெரிந்து கொண்ட கொள்ளையர்கள், அவரது வீட்டின் பூட்டை உடைத்து வீட்டுக்குள் இருந்த ரூ. 5 ஆயிரம் பணத்தை கொள்ளை அடித்துச் சென்றுள்ளனர். மேலும் இதேபோல், அந்தப் பகுதியில் வெளியூர்களுக்குச் சென்றிருந்தவர்களின் வீடுகளிலும் கொள்ளையடிக்க முயற்சித்துள்ளனர். ஆனால், அங்கு எதுவும் இல்லாத காரணத்தினால் கொள்ளை சம்பவம் ஏதும் நடைபெறவில்லை. 

ஒரே இரவில் 7 சவரன் நகை, 37 ஆயிரம் ரூபாய் பணம் மற்றும் வெள்ளிப் பொருட்களை கொள்ளையடித்துச் சென்றுள்ளனர். இப்படி ஒரே இரவில் பல வீடுகளில் கொள்ளையர்கள் கைவரிசை காட்டியது, அந்த கிராமத்தில் வசிக்கும் பொது மக்களை பீதி அடையச் செய்துள்ளது.

சார்ந்த செய்திகள்

Next Story

பிரச்சாரத்தில் பணப்பட்டுவாடா; பாஜக நிர்வாகி மீது வழக்குப்பதிவு!

Published on 12/04/2024 | Edited on 12/04/2024
pay for campaigning Case filed against BJP executive

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாக தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது.

இத்தகையை சூழலில் திருவள்ளூரில் உள்ள ஆரம்பாக்கத்தில் பாஜக வேட்பாளரை ஆதரித்து பிரச்சாரத்தில் ஈடுபடும் பெண்களுக்கு, ஐந்து பேருக்கு 500 ரூபாய் என்ற ரீதியில் பணம் விநியோகம் செய்தது தொடர்பான வீடியோ காட்சிகள் இணையத்தில் வைரலாகியது. திருவள்ளூர் பாஜக வேட்பாளர் பொன். பாலகணபதியை ஆதரித்து கும்மிடிப்பூண்டி அருகே பிரச்சாரத்தில் ஈடுபட்ட பொழுது பாஜக கொடியை ஏந்திச் செல்லும் பெண்கள் ஒவ்வொருவருக்கும் தலா 100 ரூபாய் என ஐந்து பேருக்கு மொத்தமாக 500 ரூபாய் கொடுக்கப்படும் காட்சி இணையத்தில் வைரலானது.

சுமார் 30 க்கும் மேற்பட்ட பெண்களுக்கு 500 ரூபாய் நோட்டுகளை பாஜகவினர் கொடுக்கும் அந்த வீடியோ காட்சிகள் வெளியாகி மக்கள் மத்தியில் பரபரப்பை ஏற்படுத்தி இருந்தது. இந்நிலையில் இது குறித்து கும்மிடிப்பூண்டி சட்டமன்றத் தொகுதியின் தேர்தல் பறக்கும் படை அதிகாரி சம்பத் ஆரம்பாக்கம் போலீசில் புகார் அளித்தார். இந்த புகாரின் பேரில் நொச்சிக்குப்ப்பத்தைச் சேர்ந்த பாஜக நிர்வாகி குமார் மீது வழக்குப்பதிவு செய்யப்பட்டுள்ளது. 

Next Story

திருவள்ளூர் பா.ஜ.க. வேட்பாளர் மீது வழக்குப்பதிவு!

Published on 05/04/2024 | Edited on 05/04/2024
Tiruvallur BJP Prosecution against the candidate

நாடாளுமன்ற மக்களவைத் தேர்தல் ஏழு கட்டங்களாக நடைபெற உள்ளது. அதன்படி, முதற்கட்டமாக ஏப்ரல் 19 ஆம் தேதி தமிழகத்தில் வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே, அரசியல் கட்சிகள் தேர்தல் பணிகளில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது. அதே சமயம் தமிழக அரசியல் கட்சிகள் வேட்பாளர்களை அறிவித்து பிரச்சாரங்களை தொடங்கியுள்ளன.

இத்தகைய சூழலில் திருவள்ளூர் மக்களவைத் தொகுதியின் பா.ஜ.க. வேட்பாளர் பாலகணபதி திருவள்ளூர் அடுத்த மெய்யூர் கிராமத்தில் தேர்தல் பிரசாரத்தின் போது தேசியக்கொடியை பயன்படுத்தி இருந்தார். அவருடன் பிரச்சாரத்திற்கு அழைத்து வந்த பெண்களின் கைகளில் பா.ஜ.க. கொடியுடன் சேர்த்து தேசிய கொடியும் இடம் பெற்றிருந்தது. இந்த சம்பவம் மக்கள் மத்தியில் சர்ச்சையையும், பரபரப்பையும் ஏற்படுத்தி இருந்தது. அதே சமயம் இது தொடர்பாக பா.ஜ.க.வினர் மீது தேர்தல் ஆணையம் உரிய நடவடிக்கை எடுக்கவும் கோரிக்கை எழுந்திருந்தது.

இந்நிலையில், தேர்தல் பிரச்சாரத்தில் தேசிய கொடியை பயன்படுத்திய பா.ஜ.க. வேட்பாளர் பாலகணபதி உள்ளிட்ட 3 பேர் மீது போலீசார் வழக்குப் பதிவு செய்துள்ளனர். திருவள்ளூர் மாவட்டம் வேளகாபுரம் வருவாய் ஆய்வாளர் பாலாஜி அளித்த புகாரின் பேரில் பாலகணபதி, அக்கட்சியின் மாவட்ட தலைவர் சீனிவாசன், ஒன்றிய தலைவர் சாந்தி ஆகியோர் மீது வழக்குப்பதிவு செய்யப்பட்டுள்ளது.