Skip to main content

கொள்ளிடம் ஆற்றில் மணல்குவாரி அமைக்கலாமா? ஆய்வுகுழுவிடம் நிலமையை சொன்ன மக்கள்!!

Published on 09/11/2018 | Edited on 09/11/2018

தமிழகஅரசு திருவையாறு அருகில் கொள்ளிடம் ஆற்றில் மணல் குவாரி அமைக்கத் திட்டமிடப்பட்டுள்ள இடத்தை உயர் நீதிமன்றம் நியமித்துள்ள வல்லுநர்குழுவினர் ஆய்வுசெய்தனர். அவர்களிடம் தங்களுக்கு ஏற்படும் பாதிப்புகள் குறித்து பொதுமக்கள்  ஒவ்வொருவரும் தனித்தனியே மனுக்களை கொடுத்து அரசுக்கு அதிர்ச்சிவைத்தியம் கொடுத்துள்ளனர்.

 

​ sand

 

தஞ்சை மாவட்டம் திருவையாறு அருகே விளாங்குடியில் உள்ள கொள்ளிடம் ஆற்றில் மணல் குவாரி அமைக்க அரசுத் திட்டமிட்டு ஆயத்தப்பணிகளில் ஈடுபட்டது. அதற்கு  அப்பகுதி மக்கள் கடும் எதிர்ப்பை தெரிவித்து, ஆற்றில் குடியேறுதல், அரசு அதிகாரிகளை சிறைப்பிடித்தல், மணல் அள்ளும் பொக்லைன் இயந்திரங்களை சிறைப்பிடித்தல் என பல்வேறு கட்ட போராட்டங்களை நடத்தினர். அதோடு இதுதொடர்பாக உயர் நீதிமன்ற மதுரை கிளையில் வழக்கு ஒன்றையும் தொடுத்தனர். 

 

 

அந்த வழக்கில் நீதிமன்ற ஆணைப்படி, நியமிக்கப்பட்ட தமிழ்நாடு சாலைப்பிரிவு திட்ட இயக்குநர் அருண்தம்புராஜ், அண்ணாமலை பல்கலைக்கழக முன்னாள் பேராசிரியர் கணபதி சுப்பிரமணியன்,  விலங்கியல் பேராசிரியர் புகழேந்தி  உள்ளிடோர் கொண்ட குழுவினர் விளாங்குடியில் உள்ள கொள்ளிடம் ஆற்றில் ஆய்வு செய்தனர். 

 

sand

 

இதை தெரிந்துகொண்ட அப்பகுதிமக்கள் நூற்றுக்கும் அதிகமானோர், அதிகாரிகளிடம், ‘’ இங்கு குவாரி அமைக்கப்பட்டால் ஏற்படும் பாதிப்புகளை சுட்டிக்காட்டி ஒவ்வொருவரும் மனுக்களை அளித்தனர். அதில் ’’ஐயா இங்கு மணல் குவாரி அமைத்தால் எங்களுடைய வாழ்வாதாரம் முற்றிலும் பாதிக்கப்படும்,  குடிநீருக்கே தண்ணீர் கிடைக்காமல் போய்விடும்    ஆடு, மாடுகள் பாதிப்புக்குள்ளாகும்,  நிலத்தடி நீர் ஆதாரம் முற்றிலும் பாழாகி பல மடங்கு ஆழத்துக்குச் சென்று விவசாயம்  முழுமையாக அழிந்துவிடும். எங்கள் தொகுதியில் உள்ள அமைச்சரான வேளாண்மை துறை அமைச்சரின் சுயநல பணவெறியில் மக்களின் நலனை யோசிக்காமல், சுயநலத்துடன் செயல்படுகிறார். அவர் எங்கள் தொகுதியில் இருப்பதே சாபக்கேடாக நினைக்கிறோம், நாங்கள் அவரை நம்பவில்லை, மாறாக சட்டத்தையும் உங்களையும் நம்பியிருக்கிறோம், எங்களின் அடுத்த தலைமுறையை காப்பாற்றுங்கள் என குறிப்ப்ட்டதோடு விளக்கினர்.

 

பொதுப்பணித்துறை அதிகாரிகளோ இதைசற்றும் எதிர்ப்பார்த்திடவில்லை, இனிஎன்ன செய்வது என்கிற அடுத்தக்கட்டயோசனையில் இருக்கிறது அரசு. ஆய்வுகுழுவோ இங்கு நடந்ததை அப்படியே மேலே சமர்ப்பிப்பேன் என குறிப்பிட்டுள்ளது.

சார்ந்த செய்திகள்

 

Next Story

“மணல் கொள்ளையைத் தடுத்த கோட்டாட்சியரைக் கொல்ல முயற்சி” - அன்புமணி கண்டனம்

Published on 17/06/2024 | Edited on 17/06/2024
 Anbumani Ramadoss emphasized wants to crack down on sand mafia

தமிழகத்தில் ஆளும் கட்சி ஆதரவுடன் செயல்படும் மணல் மாஃபியாக்களை இரும்புக்கரம் கொண்டு ஒடுக்க வேண்டும் என்று பா.ம.க. தலைவர் அன்புமணி ராமதாஸ் வலியுறுத்தியுள்ளார்.

இது தொடர்பாக அவர் வெளியிட்ட அறிக்கையில், புதுக்கோட்டை மாவட்டம், இலுப்பூர் வட்டம் வளையப்பட்டி பகுதியில் சரக்குந்து மூலம் மணல் கடத்தப்படுவதாகக் கிடைத்த தகவலின் அடிப்படையில், கடத்தல் கும்பலைப் பிடிப்பதற்காக அங்கு விரைந்த இலுப்பூர்  கோட்டாட்சியர் தெய்வநாயகியின் மகிழுந்து மீது சரக்குந்தை மோதி கொலை செய்ய மணல் கடத்தல் கும்பல் முயற்சி செய்துள்ளது. மணல் சரக்குந்து மோதியதில் வட்டாட்சியர் பயணித்த மகிழுந்து சேதம் அடைந்த நிலையில்,  மணல் சரக்குந்தை பின்னோக்கி இயக்கி வந்து  மீண்டும் மோத மணல் கடத்தல் கும்பல் முயன்றுள்ளது. மகிழுந்தின் ஓட்டுநர் சாமர்த்தியமாகச்  செயல்பட்டு, மகிழுந்தை இடதுபுறமாகத் திருப்பியதால் கோட்டாட்சியரும், அவரது உதவியாளர்களும் தப்பியுள்ளனர். கோட்டாட்சியர் மீதான கொலை முயற்சி கண்டிக்கத்தக்கது.

தமிழ்நாட்டில் மணல் கடத்தல் கடந்த சில ஆண்டுகளாகத் தலைவிரித்து ஆடுகிறது. அதிகாரப்படிநிலையில் உயர்ந்த இடத்தில் உள்ள கோட்டாட்சியரையே கொலை செய்யும் அளவுக்கு மணல் கடத்தல் கும்பல் துணிகிறது என்றால் அவர்களுக்கு  எந்த அளவுக்கு ஆட்சியாளர்களின் ஆதரவு இருக்கும் என்பதைப் புரிந்து கொள்ள முடிகிறது. ஆளுங்கட்சியினர் கொடுக்கும் தைரியத்தால் தமிழ்நாட்டில் செயல்பட்டு வரும் மணல் கடத்தல் கும்பல்கள் மாஃபியாக்களாக மாறி வருகின்றனர். இது இயற்கை வளங்களுக்கு மட்டுமின்றி  சமுக அமைதிக்கும் மிகப்பெரிய  ஆபத்து ஆகும்.

மணல் மாஃபியாக்களால் தமிழ்நாட்டின் பொது அமைதி எந்த அளவுக்கு பாதிக்கப்படுகிறது என்பதற்கு ஏராளமான எடுத்துக்காட்டுகளைக் கூற முடியும். தூத்துக்குடி மாவட்டம் முறப்பநாடு பகுதியில் மணல் கொள்ளைக்கு எதிராக செயல்பட்ட கிராம நிர்வாக அலுவலர் லூர்து பிரான்சிஸ் கடந்த ஆண்டு ஏப்ரல் மாதத்தில் அவரது அலுவலகத்தில் வைத்துக் கொடூரமான முறையில் வெட்டிக் கொல்லப்பட்டார்.

அதன்பின் சேலம் மாவட்டம் மானாத்தாள் பகுதியில் மணல் கடத்தலில் ஈடுபட்டவர்களைப் பிடித்து காவல் நிலையத்தில் ஒப்படைத்தக் கிராம நிர்வாக அலுவலரை வெட்ட  கடத்தல் கும்பல் அரிவாளுடன் துரத்தியது. வேலூர் மாவட்டம் குடியாத்தம் அருகில் சின்ன தோட்டாளம் என்ற இடத்தில் மணல் கடத்தலை தடுக்க முயன்ற காவல்துறை சிறப்பு சார் ஆய்வாளர் மணவாளன் என்பவரை  மணல் கடத்தல் கும்பலைச் சேர்ந்தவர்கள் கடுமையாக தாக்கி கொலை செய்ய முயன்றது,  வேலூர் மாவட்டத்தின் அணைக்கட்டுப் பகுதியில் பொன்னையாற்றிலிருந்து மணல் கொள்ளையடிக்கப்படுவதைப் படம் பிடித்த ஓய்வு பெற்ற இராணுவ வீரர் உமாபதியை மணல் கடத்தல் கும்பல் அரிவாளால் வெட்டி காயப்படுத்தியது என மணல் கடத்தல் கும்பல்களின் அட்டகாசங்கள் தொடர்கின்றன.

இப்போதும் கூட இலுப்பூரில் வருவாய் கோட்டாட்சியரை கொலை செய்ய முயன்ற மணல் கடத்தல் கும்பலையும், அதன் பின்னணியில் இருப்பவர்களையும்  கைது செய்யவோ, அவர்கள் மீது நடவடிக்கை எடுக்கவோ தமிழக அரசும், காவல்துறையும் எந்த நடவடிக்கையும் மேற்கொள்ளவில்லை. மாறாக கோட்டாட்சியர் மீதான கொலை முயற்சி குறித்த செய்திகள் ஊடகங்களில் வராமல் தடுப்பதில்தான் ஆர்வம் காட்டினார்கள். முறப்பநாட்டில் மணல் கொள்ளையர்களால் கொல்லப்பட்ட கிராம நிர்வாக அலுவலருக்கு ரூ.1 கோடி நிதி கொடுத்ததைத் தவிர, மணல் கொள்ளையைத் தடுக்கவும், மாபியாக்களின் அட்டகாசத்தை ஒடுக்கவும் தமிழக அரசு எந்த நடவடிக்கையும் எடுக்கவில்லை.

மணல் கடத்தலை தடுக்க முயலும் அதிகாரிகளைக் கொல்ல முயற்சிகள் நடப்பதை அரசின் மீதான போராகக் கருதி தமிழக அரசு நடவடிக்கை எடுக்க வேண்டும். தமிழ்நாடு முழுவதும் அட்டகாசம் செய்யும் மணல் கொள்ளையர்களை இரும்புக் கரம் கொண்டு அரசு ஒடுக்க வேண்டும். மாறாக, அவர்களுக்கு ஆதரவாக செயல்பட்டால், ஆட்சியாளர்களுக்கு மக்கள் சரியான பாடம் புகட்டுவார்கள்” எனக் குறிப்பிட்டுள்ளார்.

Next Story

என் வண்டிய எதுக்கு பிடிக்கிறீங்க? மிரட்டும் ஊ.மன்ற தலைவர் - காணாமல் போகும் கமண்டல நாகநதி

Published on 31/05/2024 | Edited on 31/05/2024
panchayat president threatened officials who came to stop digging mud Kamandala river.

திருவண்ணாமலை மாவட்டம், ஆரணி ஒன்றியத்திலுள்ள ஒழுங்கம்பூண்டி கிராமத்தின் வழியாக செல்லும் ஆரணி கமண்டல நாகநதியின் ஆற்றில் தினமும் சுமார் 70 வண்டிகள் மணல் கடத்திக்கொண்டு செல்வதாக கூறப்படுகிறது. ஒரு டிராக்டர் மணல் 13 ஆயிரம் என விற்பனை செய்யப்படுகிறதாம். ஆற்றிலிருந்து பகலிலேயே மணல் கடத்துகிறார்கள் எனப் பொதுமக்களிடம் இருந்து வருவாய்த்துறைக்கு அடிக்கடி புகார் சென்றும் அவர்கள் மெத்தனமாக நடந்துகொள்வதாக கூறப்படுகிறது.

இந்நிலையில் மே 31ஆம் தேதி வருவாய்த்துறை அதிகாரிகளுக்கு மணல் கடத்துவதாக புகார் கூறியுள்ளனர். உடனே அந்தப் பகுதியைச் சேர்ந்த இரண்டு வருவாய்த்துறை அலுவலர்கள் அங்கு நேரடியாக விசாரணைக்கு சென்றதாக கூறப்படுகிறது. அப்போது ஆற்றிலிருந்து மணல் நிரப்பிக்கொண்டு ஒரு டிராக்டர் அங்கிருந்து செல்ல முயன்றதை அலுவலர்கள் தடுத்து நிறுத்தியுள்ளனர். அங்கு மண் அள்ளிக்கொண்டிருந்தவர்களிடம் டிராக்டர் ஓட்டுநர் சேர்ந்துகொண்டு, “அலுவலர்களிடம் இது யார் வண்டி தெரியுமா? மடக்கும் அளவுக்கு தைரியம் வந்துவிட்டதா...” எனச் சண்டையிட்டுள்ளனர். அந்த டிராக்டர் டிரைவர், நம்ம வண்டியை புடிச்சிட்டாங்க என யாருக்கோ செல்போனில் தகவல் சொன்னதும், மட்டதாரி ஊராட்சி மன்றத் தலைவர் பிரேம்குமார் சம்பவயிடத்துக்கு வந்துள்ளார்.

இது என்னோட வண்டிதான் எதுக்கு பிடிக்கறிங்க என எகிறியுள்ளார். அதன்பின் தான் சார்ந்த ஆளும்கட்சி முக்கிய நிர்வாகி ஒருவருக்கு போன் செய்து விவரத்தை கூறியுள்ளார். அவர் என்ன பதில் சொன்னார் எனத்தெரியவில்லை. உடனே டிராக்டரில் இருந்து ஊராட்சி மன்றத் தலைவரே டோரை திறந்து மணலை கீழே கொட்டிவிட்டு அங்கிருந்து வண்டியை எடுத்துக்கொண்டு சென்றதாக கூறுகின்றனர். அதிகாரிகள் தடுத்தும் கேட்காமல் டிராக்டர் வண்டி அங்கிருந்து சென்றுள்ளது. சமூக ஆர்வலர்கள் சிலர் அங்கு நடந்ததை வீடியோ எடுத்து சமூக ஊடகங்களில் வெளியிட்டுள்ளனர். இது ஆரணியில் பரபரப்பை ஏற்படுத்தியுள்ளது.

இது குறித்து ஆரணி காவல்நிலையத்துக்கு புகார் எதுவும் வரவில்லை என்கிறார்கள், ஆரணி கோட்டாச்சியர், தாசில்தார், கிராம நிர்வாக அலுவலர் போன்ற வருவாய்த்துறை அதிகாரிகள் அமைதி காக்கிறார்கள். ஆரணி கமண்டல நாகநதியில் விண்ணமங்களம், தச்சூர், வாழைப்பந்தல், சீசமங்களம் உட்பட சில இடங்களில் இப்படி இரவு – பகல் பாராமல் ஆற்று மணலைத் திருடி விற்பனை செய்கின்றனர். இதற்கு காவல்துறையும் உடந்தையாக இருக்கிறது எனக் குற்றம் சாட்டுகிறார்கள் விவரம் அறிந்தவர்கள்.

ஆரணியில் ஆளும்கட்சி, எதிர்கட்சி, சாதிகட்சி எனப் பாகுபாடு இல்லாமல் வருவாய்த்துறை, காவல்துறை அதிகாரிகளை மாதாமாதம் கப்பம் கட்டிவிட்டு ஆற்று மணலைக் கொள்ளையடிக்கிறார்கள். தடுக்க முயலும் ஒருசில வருவாய்த்துறை அலுவலர்களையும் மிரட்டுவதால், அவர்களுக்கு உயர் அதிகாரிகள் ஆதரவு இல்லாததால் அவர்களும் சைலண்ட் மோடுக்கு போய் விடுகிறார்கள். இந்தக் கொள்ளையை இப்போதாவது தடுக்காவிட்டால் கொஞ்ச காலத்தில் கமண்டலநதி காணாமல் போய்விடும் என்கிறார்கள் சமூக ஆர்வலர்கள்.