Skip to main content

புரட்சி பாரதம் நிர்வாகி வெட்டிக் கொலை! 

Published on 30/11/2023 | Edited on 30/11/2023

 

Puratchi Baratham party member passes away police investigation

 

திருவள்ளூர் மாவட்டம், திருத்தணி அருகே உள்ள தாழவேடு பகுதியில் சமத்துவபுரம் ஒன்று அமைந்துள்ளது. இதன் நுழைவு வாயில் முன்பு அதே ஊரைச் சேர்ந்த புரட்சி பாரதம் கட்சியின் திருவாலங்காடு மேற்கு ஒன்றிய செயலாளர் அசோக் என்பவர் நேற்று இரவு நடந்து வந்துகொண்டிருந்தார். அப்போது மூன்று பேர் கொண்ட மர்ம கும்பல் அங்கு வந்தது. அவர்கள் திடீரென தாங்கள் மறைத்து வைத்திருந்த பட்டா கத்தி உள்ளிட்ட கத்திகளைக் கொண்டு அசோக்கை சரமாரியாக வெட்டினர். இதில் சம்பவ இடத்திலேயே அசோக் ரத்த வெள்ளத்தில் பரிதாபமாக உயிரிழந்தார். மேலும், இந்தச் சம்பவத்தின்போது அங்கு கடை வைத்து நடத்தி வரும் கலையரசன் என்பவர் தடுக்க முயன்றுள்ளார். ஆனால், அந்த மர்ம கும்பல் அவரின் கையிலும் வெட்டிவிட்டு அங்கிருந்து தப்பியுள்ளது. 

 

இந்தத் தகவல் அறிந்து அங்கு வந்த அப்பகுதி மக்களும், அசோக்கின் மனைவி மற்றும் அவரது உறவினர்களும் அவரது உடலைப் பார்த்து கதறி அழுதனர். அதனைத் தொடர்ந்து அந்தப் பகுதியைச் சேர்ந்தவர்கள், திருத்தணி போலீசாருக்கு தகவல் அளித்தனர். அந்தத் தகவலின் அடிப்படையில் சம்பவ இடத்திற்கு வந்த போலீஸார், அசோக் உடலைக் கைப்பற்ற முயன்றனர். அப்போது அந்தப் பகுதி மக்களும், அசோக்கின் உறவினர்களும் இணைந்து கொலை செய்த நபர்களை கைது செய்த பிறகே உடலை இங்கிருந்து எடுக்க அனுமதிப்போம் என வாதிட்டனர். தொடர்ந்து போலீஸார் அவர்களிடம் நிச்சயம் நடவடிக்கை எடுக்கப்பட்டு அவர்கள் கைது செய்யப்படுவார்கள் என உறுதி அளித்ததின் பேரில் அவர்கள் சமாதானம் அடைந்தனர். பிறகு உடலைக் கைப்பற்றிய போலீஸார், திருத்தணி அரசு பொது மருத்துவமனைக்கு பிரேதப் பரிசோதனைக்காக அனுப்பி வைத்தனர். 

 

மேலும், இது தொடர்பாக வழக்குப் பதிவு செய்துள்ள போலீஸார், அசோக் கொலைக்கு முன்பகை காரணமா அல்லது வேறு ஏதேனும் காரணமா என விசாரித்து வருகின்றனர். தற்போது முதற்கட்ட விசாரணையில், அசோக்கை கொலை செய்த மூவரும் அவர் வசித்து வரும் அதே பகுதியைச் சேர்ந்தவர்கள்தான் என்பது தெரியவந்துள்ளது. மேலும், அவர்கள் தொடர்ந்து கஞ்சா கடத்தல் விற்பனை உள்ளிட்ட செயல்களில் ஈடுபட்டு வந்ததும், அது தொடர்பாக அசோக் போலீஸில் அவ்வப்பொழுது புகார் கொடுப்பதும் நடந்துள்ளது. எனவே அதன் காரணமாகக் கூட இந்தக் கொலை நடந்திருக்கலாம் என போலீஸ் தரப்பில் தெரிவிக்கப்பட்டுள்ளது. அதே சமயம், தப்பியோடிய மூவரும் கைது செய்யப்பட்ட பிறகே அசோக் கொலைக்கான உண்மையான காரணம் தெரியவரும் என போலீஸார் தெரிவிக்கின்றனர்.

 

 

சார்ந்த செய்திகள்

Next Story

தொடரும் கைது; அடுத்தடுத்து சிக்கும் வருவாய்த்துறை அலுவலர்கள்

Published on 23/02/2024 | Edited on 23/02/2024
Sethpattu taluk revenue officer arrested for taking bribe

திருவண்ணாமலை மாவட்டம் சேத்பட் தாலுகா செய்யானந்தல் கிராமத்தை சேர்ந்தவர் சகாதேவன் வரதராஜ். இவர் போட்டோகிராபராக வேலை செய்து வருகிறார். இவருடைய அண்ணன் முறை உறவினரும், எதிர் வீட்டில் வசிக்கும் ஹரிகிருஷ்ணன் கடந்த 2023 ஆம் ஆண்டு அதே ஊரைச் சார்ந்த சௌபாக்கியம் என்பவரிடம் இடம் வாங்கி கிரயம் செய்துள்ளார். அந்த இடம் உட்பிரிவுகள் செய்யாமல் கூட்டு பட்டாவாக வைக்கப்பட்டுள்ளது. தான் இடம் வாங்கி உள்ளதாகவும் அதனால் பட்டாவை உட்பிரிவு செய்து தனது பெயருக்கு மாற்றி தருமாறு 2023ல் மனு செய்துள்ளார். முறையான காரணமில்லாமல் இவரது மனு நிராகரிக்கப்பட்டுள்ளது. 

இதுப்பற்றி தன் தம்பி சகாதேவனிடம் கூறியுள்ளார். கடந்த பிப்ரவரி 16 ஆம் தேதி சேத்பட் தாலுகா அலுவலகம் வந்து சர்வேயர் தீனதயாளன் அவர்களைச் சந்தித்தார். அப்போது, நீங்கள் இடம் கிரயம் பெற்றால் மட்டும் போதுமா?  நீங்கள் ஏன் என்னை வந்து சந்திக்கவில்லை என்று கேட்டவர், அந்த இடம் மூன்று பட்டாவுக்கு பெயர் மாற்ற ரூ.4 ஆயிரம் வீதம் மொத்தம் மூன்று பட்டா பெயர் மாற்றத்திற்கு ரூ.12 ஆயிரம் லஞ்சமாக கேட்டுள்ளார். இவர்கள் அவ்வளவு பணம் கொடுக்க முடியாது என்று சொன்னவுடன் ரூபாய் 10,000 தர வேண்டும் என்று சொல்லி உள்ளார். அதற்கு அவர்கள் ரூபாய் 5000 வேண்டும் என்றால் முன்பணம் தருகிறோம், பின்பு பட்டா பெயர் மாற்றம் செய்த பிறகு தருகிறோம் என்று வந்து விட்டார்கள்.

இது சம்பந்தமாக ஹரி கிருஷ்ணனுடைய தம்பி சகாதேவன் கடந்த செவ்வாய்க்கிழமை மாலை திருவண்ணாமலை விஜிலென்ஸ் அலுவலகம் வந்து டி.எஸ்.பி வேல்முருகனிடம் புகாரை கொடுக்க, அவரும் முதல் தகவல் அறிக்கை பதிவு செய்து பிப்ரவரி 22 ஆம் தேதி மதியம் சுமார் 12.30 மணி அளவில் தாலுக்கா அலுவலகத்தில் வைத்து, சகாதேவன் லஞ்ச பணத்தை கொடுக்கும் போது, தன்னுடைய அலுவலகத்திலேயே வைத்து பணத்தை பெற்றுக் கொண்டார். அங்கிருந்த லஞ்ச ஒழிப்புத்துறை போலீசார், பணத்தோடு அவரை பிடித்து அவரிடம் விசாரணை நடத்தினர். அவரது வீட்டிலும் சோதனை நடத்தினர். ஒரு மாதத்திற்கு முன்பு தான் இதேபோல் போளூரில் வருவாய்த்துறை அலுவலகத்தில் லஞ்ச ஒழிப்புத்துறை அதிகாரிகள் ட்ராப் செய்து ஒரு அலுவலரை லஞ்சப்பணத்தோடு கைது செய்தனர். இந்த மாதம் சேத்துப்பட்டில் சர்வே அலுவலகத்தில் ட்ராப் செய்து சர்வேயரை கைது செய்துள்ளனர்.

லஞ்சம் வாங்கி வருவாய்த்துறையினர் அடுத்தடுத்து கைது செய்யப்படுகின்றனர். ஆனாலும் இவர்கள் மாறாமல் லஞ்சம் வாங்குவதிலேயே குறியாக இருக்கின்றனர். இந்த லஞ்ச கைதுகள் பொதுமக்களிடம் பெரும் வரவேற்பு பெற்றுள்ளது.

Next Story

சீர்காழியில் கரையொதுங்கிய மர்மப்பொருள் வெடிக்க வைத்து அழிப்பு

Published on 23/02/2024 | Edited on 23/02/2024
Detonation of mysterious object washed ashore in Sirkhazi

சீர்காழி அருகே கடற்கரையில் ஒதுங்கிய மர்மப் பொருள் பரபரப்பை ஏற்படுத்திய நிலையில் அதனை பாதுகாப்புடன் வெடிக்கவைத்து அழிக்கப்பட்டுள்ளது. 

மயிலாடுதுறை மாவட்டம் சீர்காழி நாயக்கர்குப்பம் மீனவ கிராமப் பகுதியில் கடந்த 12 ஆம் தேதி 'அபாயம் தொட வேண்டாம்' என ஆங்கில மொழியில் வாசகங்கள் இடம் பெற்ற உருளை ஒன்று கரை ஒதுங்கியது. பார்ப்பதற்கு கேஸ் சிலிண்டர் போன்ற அமைப்பில் இருக்கும் அந்த மர்மப் பொருள் பரபரப்பை ஏற்படுத்தியது. உடனடியாக இது தொடர்பாக அந்தப் பகுதி மீனவர்கள் கடலோர காவல் படைக்கு தகவல் தெரிவித்தனர்.

உடனடியாக அங்கு வந்த காவல்துறையினர் மற்றும் வெடிகுண்டு செயலிழப்பு நிபுணர்கள் ஆய்வு செய்தனர். சுமார் ஒன்றரை அடி நீளமும் 6 அங்குலம் விட்டமும் கொண்ட அந்த உருளை குறித்து விசாரணை செய்யப்பட்டதில், ஆபத்து நேரங்களில் நீர்மூழ்கிக் கப்பல்களில் இருந்து வண்ணப் புகையை உமிழ்ந்து சமிக்ஞைகளை வெளியேற்றுவதற்கு பயன்படுத்தப்படும் சிலிண்டர் இது என்பது எனத் தெரியவந்தது. இருப்பினும் அந்தப் பொருளை யாரும் தொட வேண்டாம் என தடுப்பு அமைத்து சென்றனர் போலீசார்.

Detonation of mysterious object washed ashore in Sirkhazi

இந்நிலையில் நீர்மூழ்கி கப்பலில் பயன்படுத்தப்படும் அந்த கருவியானது வெடிகுண்டு நிபுணர்கள் மூலம் பாதுகாப்பாக வெடித்து அழிக்கப்பட்டது. இதற்காக பெரிய அளவில் குழி தோண்டப்பட்டு அதனுள் அந்த கருவியை வைத்து வெடிக்க வைக்கப்பட்டது. இதனால் அந்தப்பகுதியில் மக்கள் அனுமதிக்கப்படவில்லை. பாதுகாப்பிற்காக போலீசாரும் இருந்தனர்.