Skip to main content

காவல்துறையில் வேலை வாங்கித்தருவதாக ரூ. 30 லட்சம் மோசடி! உதவிய கறுப்பாடுகள் யார்?  

Published on 23/06/2020 | Edited on 23/06/2020
thiruvannamalai police investigation

 

திருவண்ணாமலை மாவட்டம், கலசப்பாக்கம் தாலுகா, துருகம் கிராமத்தை சேர்ந்த மூர்த்தி மகன் 25 வயதான செல்வம், கலசப்பாக்கம் தாலுகா, எஸ்.எம். நகரைச் சேர்ந்த ஏழுமலை மகன் 25 வயதான சரவணராஜி ஆகிய இருவரும், கலசப்பாக்கம் தாலுகா, புதுப்பேட்டை கிராமத்தைச் சேர்ந்த முருகேசன் மகன் சிவகுமார் வயது 24 என்பவரிடம் காவல் துறையில் காவலர் வேலை வாங்கித்தருவதாக ரூபாய் 2,25,000 பணத்தை வாங்கிக்கொண்டு ஏமாற்றியுள்ளனர்.

இது தொடர்பாக சிவகுமார் அளித்த புகாரின் பேரில், மாவட்ட காவல் கண்காணிப்பாளர் சிபிசக்கரவர்த்தி உத்தரவின் அடிப்படையில், மாவட்ட குற்றப்பிரிவு துணை காவல் கண்காணிப்பாளர் (பொறுப்பு) சரவணகுமார் தலைமையில், திருவண்ணாமலை தாலுகா காவல் நிலைய ஆய்வாளர் கோவிந்தசாமி மற்றும் மாவட்ட குற்றப்பிரிவு போலீசார் இருவரையும் கைது செய்து விசாரித்ததின் பெயரில், இதேபோன்று 21 நபர்களிடம் காவல் துறையில் காவலர் பணி வாங்கித் தருவதாக ஏமாற்றி சுமார் 30 லட்சம் பணத்தை ஏமாற்றியது தெரியவந்தது. அவர்களிடமிருந்து 3 கார், 21 நபர்களின் அசல் பத்தாம் வகுப்பு மற்றும் 12ம் வகுப்பு மாற்றுச் சான்றிதழ்கள் கைப்பற்றப்பட்டது. அவர்களை சிறையில் அடைத்துள்ளனர். இவர்களை முறையாக விசாரித்தால், இந்த இளைஞர்களுக்கு பின்னால் உள்ள காவல்துறையை சேர்ந்த சில அதிகாரிகள் சிக்குவார்கள் என்கிறார்கள் விபரம் அறிந்த காவல்துறை அதிகாரிகள்.      

 

சார்ந்த செய்திகள்

 

Next Story

காதல் திருமணம் செய்த இரண்டே நாளில் சடலமாக மீட்கப்பட்ட இளைஞர்!

Published on 08/07/2024 | Edited on 08/07/2024
young man passed away two days after his love marriage

திருவண்ணாமலை மாவட்டம் ஆரணியை அடுத்த சொரக்காபாளையம் கிராமத்தைச் சேர்ந்தவர் தமிழரசன் மகன் அஜித். இவர் தனியார் வங்கியில் பணியாற்றி வருகிறார். உதகையை சேர்ந்த ஜான்சன் என்பவரின் மகள் ராதிகா சென்னையில் உள்ள ஒரு தனியார் நிறுவனத்தில் வேலைசெய்து வந்துள்ளார். இந்த நிலையில் அஜித்துக்கும் ராதிகாவிற்கும் பழக்கம் ஏற்பட்டுள்ளது. நாளடைவில் இந்தப் பழக்கம் காதலாக மாறியுள்ளது.

இதனைத் தொடர்ந்து கடந்த 3 ஆம் தேதி ராதிகாவை அஜித் தனது வீட்டிற்கு அழைத்து சென்றுள்ளார். பின்னர் அவர்களின் குலதெய்வம் கோவிலில் அஜிதிற்கும், ராஜிகாவிற்கும் தமிழரசன் திருமணம் செய்து வைத்துள்ளார். இதையடுத்து 5 ஆம் தேதி பதிவு திருமணம் செய்வதற்கான தகவல்களை விசாரித்து வருவதற்காக அஜித் வீட்டில் இருந்து கிளம்பி தனியாக சென்றுள்ளார். ஆனால் அவர் நீண்ட நேரமாகியும்  வீடு திரும்பாததால், சந்தேகமடைந்த போலீசார், ஆரணி தாலுகா காவல்நிலையத்தில் புகார் கொடுத்தனர். அதன் பேரில் வழக்குப் பதிவு செய்த போலீசார் காணமால் போன அஜித்தை தேடி வந்தனர். 

இந்த நிலையில் அத்திமூரை அருகே உள்ள காட்டுப்பகுதியில் இளைஞர் ஒருவரின் உடல் மரத்தில் தொங்கிக்கொண்டிருப்பதாக போலீசாருக்கு தகவல் கிடைத்துள்ளது. உடனடியாக சம்பவ இடத்திற்கு விரைந்து சென்று மரத்தில் தொங்கிக்கொண்டிருப்பது அஜித்  என்பதை உறுதிசெய்த போலீசார் உடலை மீட்டு பிரேதப் பரிசோதனைக்காக மருத்துவமனைக்கு அனுப்பி வைத்தனர்.

திருமணமான இரண்டே நாளில் அஜித் மரத்தில் பிணமாக தொங்கியது பெரும் பரபரப்பை ஏற்படுத்தியுள்ளது. அஜித் தற்கொலை செய்துகொண்டாரா? அல்லது வேறு எதாவது பிரச்சனையா என்று போலீசார் தீவிரமாக விசாரணை நடத்தி வருகின்றனர். 

Next Story

லஞ்சம் கேட்டதால் விவசாயி தீக்குளிப்பு; தி.மலையில் பரபரப்பு

Published on 02/07/2024 | Edited on 02/07/2024
 Farmer tried to set himself on fire after asking for bribe; There is excitement in T. Malai

தனது நிலத்திற்கு சிட்டா மற்றும் அடங்கல் கொடுக்க கிராம நிர்வாக அலுவலர் லஞ்சம் கேட்டதால் விவசாயி உடலில் பெட்ரோல் ஊற்றி தீக்குளிக்க முயன்ற சம்பவம் திருவண்ணாமலையில் பரபரப்பை ஏற்படுத்தியுள்ளது.

திருவண்ணாமலை அடுத்த தேவனாம்பட்டு கிராமத்தில் செயல்பட்டு வரும் கிராம நிர்வாக அலுவலகத்தில் ஊதிரம்பூண்டி கிராமத்தை சேர்ந்த விவசாயி ராமகிருஷ்ணன் என்பவர் தனது நிலத்துக்கான சிட்டா மற்றும் அடங்கல் கேட்டு மனு கொடுத்துள்ளார்.

ஊதிரம்பூண்டி கிராமத்தில் விவசாயி ராமகிருஷ்ணனுக்கு நான்கு ஏக்கர் விவசாய நிலம் உள்ளதாக கூறப்படுகிறது. நான்கு ஏக்கரில் ஆட்டுப் பண்ணை வைத்து விவசாயம் செய்து வருகிறார். கடந்த ஒரு மாதமாக தேவனாம்பட்டு கிராம நிர்வாக அலுவலர் காந்தி என்பவரிடம் சிட்டா மற்றும் அடங்கல் கேட்டு மனு கொடுத்துள்ளார். அந்த மனுவின் மீது எந்த நடவடிக்கையும் எடுக்காமல் கிராம நிர்வாக அலுவலர் கிடப்பில் போட்டுள்ளார்.

இந்நிலையில் இன்று மீண்டும் விவசாயி ராமகிருஷ்ணன் கிராம நிர்வாக அலுவலர் காந்தியை நேரில் சந்தித்து தனது நிலத்திற்கு சிட்டா மற்றும் அடங்கல் கொடுக்கும்படி வலியுறுத்தியுள்ளார். அதெல்லாம் கொடுக்க முடியாது, பணம் தந்தால் தான் வேலை நடக்கும் என சொன்னதோடு ஒருமையில் பேசியதால் மனமுடைந்த விவசாயி கிராம நிர்வாக அலுவலகத்திற்கு வெளியே தனது உடலில் பெட்ரோல் ஊற்றி தீக்குளித்துள்ளார்.

அவரின் அலறல் கேட்டு அக்கம் பக்கத்தில் இருந்தவர்கள் ஓடிவந்து உடலில் தீப்பற்றி எரிந்ததை கண்டு தீயை அணைத்து உடனடியாக வாழையிலை, வாழை சாறு உள்ளிட்டவற்றை உடல் மீது ஊற்றி திருவண்ணாமலை அரசு மருத்துவக்கல்லூரி மருத்துவமனைக்கு அழைத்து வந்து சிகிச்சைக்காக அனுமதித்தனர். அங்கு சிகிச்சை அளித்த மருத்துவர்கள் உடனடியாக வேலூர் சி.எம்.சி மருத்துவமனைக்கு மேல் சிகிச்சுக்காக அனுப்பி வைத்துள்ளனர்.

விவசாயி ராமகிருஷ்ணன் சிட்டா மற்றும் அடங்கல் கேட்டு கிராம நிர்வாக அலுவலர் காந்தி கொடுக்க மறுத்ததால் தீக்குளித்த சம்பவம் பெரும் பரபரப்பை ஏற்படுத்தி உள்ளது. மேலும் சம்பவம் குறித்து கலசப்பாக்கம் காவல் நிலைய போலீசார் வழக்குப்பதிவு செய்து விசாரணை மேற்கொண்டு வருகின்றனர்.

லஞ்சம் கேட்டு கிராம நிர்வாக அலுவலர் விவசாய நிலத்திற்கு சிட்டா மற்றும் அடங்கல் கொடுக்க மறுத்ததால் பெட்ரோல் ஊற்றி தீக்குளித்த சம்பவம் பெரும் பரபரப்பை ஏற்படுத்தியுள்ளது.