சென்னைதான் முன்மாதிரி என்ற நிலையை எய்துவதே நம் இலக்கு என முதல்வர் மு.க.ஸ்டாலின் தெரிவித்துள்ளார்.

தமிழக முதல்வர் மு.க. ஸ்டாலின் இன்று காலை சென்னை மாநகராட்சி, ஆலந்தூர் மண்டலத்திற்குட்பட்ட நங்கநல்லூர் பகுதியில் உள்ள எம்.ஜி.ஆர். சாலையில் மேற்கொள்ளப்பட்டு வரும் மழைநீர் வடிகால் பணிகளைப் பார்வையிட்டு ஆய்வு செய்தார். இதையடுத்து பழவந்தாங்கல் காவல் நிலையத்திற்கு சென்று திடீர் ஆய்வு மேற்கொண்டு, அங்கு பராமரிக்கப்பட்டு வரும் கோப்புகளைப் பார்வையிட்டு ஆய்வு செய்தார். அதன் பின்னர் போரூர் ஏரியில் புதிய ​மதகு​ அமைத்தல் மற்றும்​ போரூர் ஏரி முதல் இராமாபுரம் ஓடை வரை புதியதாக மூடிய வடிவிலான கால்வாய் அமைக்கும் பணிகளைப் பார்வையிட்டு ஆய்வு செய்தார். மேலும் அசோக் நகர் 4 ஆவது நிழற்சாலை மற்றும் அதனைச் சார்ந்த பகுதிகளில் மேற்கொள்ளப்பட்டு வரும் மழைநீர் வடிகால் அமைக்கும் பணிகளைப் பார்வையிட்டு ஆய்வு செய்தார். ஆய்வின்போது பணிகளை விரைந்து முடிக்க அதிகாரிகளுக்கு உத்தரவிட்டார்.

இந்நிலையில் முதல்வர் மு.க. ஸ்டாலின் இந்த ஆய்வுப் பணி குறித்து தனது டுவிட்டர் பக்கத்தில், “ஆட்சிக்கு வந்தபோதே கொரோனா என்ற பெருந்தொற்றை எதிர்கொண்டு கட்டுப்படுத்தினோம். தொடர்ந்து, அனைத்துத் துறைகளையும் முடுக்கி விட்டு, சென்னை முழுவதும் மழைநீர் வடிகால்களை ஆலோசனைக் குழுவின் துணையோடு ஆய்வின் அடிப்படையில் அமைத்தோம். அதன் பயனைக் கடந்த பருவமழைக் காலங்களில் கண்கூடாகப் பார்த்தோம். சிறுமழைக்கே நீர் தேங்கிய பகுதிகளில், தற்போது பெருமழை பெய்தாலும் சில மணி நேரங்களில் மழைநீர் வடிவதை மக்களும் ஊடகங்களும் எடுத்துரைத்தனர்.

மழைநீர் வடிகால் அமைக்கும் பணிகள் தீவிரமாக நடைபெற்று வரும் எஞ்சியுள்ள பகுதிகளிலும் இன்று ஆய்வு மேற்கொண்டேன். இந்தியப் பெருநகரங்கள் அனைத்துக்கும் வெள்ளத்தடுப்பு மேலாண்மையில் சென்னைதான் முன்மாதிரி என்ற நிலையை எய்துவதே நம் இலக்கு” எனத் தெரிவித்துள்ளார்.

கன்னியகுமாரி மாவட்டத்தைச் சேர்ந்த ராணுவ அதிகாரி இக்னேஷியஸ் டெலோஸ் புளோரா என்பவர் இந்திய ராணுவத்தில் மேஜர் ஜெனரலாக சமீபத்தில் பதவி உயர்வு பெற்றார். தமிழகத்தில் இருந்து மேஜர் ஜெனரலாக பதவி உயர்வு பெற்ற முதல் பெண் ராணுவ அதிகாரி இக்னேஷியஸ் டெலோஸ் புளோரா ஆவார். இந்த செய்தியை இந்திய ராணுவத்தின் வடக்கு பகுதி கமாண்டர் பிரிவு டுவிட்டரில் நேற்று பகிர்ந்து இருந்தனர்.

இந்த டுவீட்டை குறிப்பிட்டு தமிழக முதல்வர் மு.க.ஸ்டாலின் தனது பாராட்டை தெரிவித்திருந்தார். இதையடுத்து திடீரென வட கிழக்கு ராணுவம் அந்த பதிவை நீக்கியது. இந்த சம்பவம் பெரும் சர்ச்சையை ஏற்படுத்தி இருந்தது. மேலும் இந்த விவகாரம் குறித்து சென்னை மண்டல பாதுகாப்பு அமைச்சக செய்தி தொடர்பாளர், ஜம்மு காஷ்மீரில் உள்ள ராணுவ தலைமை அலுவலகத்திற்கு விளக்கம் கேட்டு கடிதம் அனுப்பி இருந்தார்.

இந்நிலையில் வடகிழக்கு ராணுவம் தற்போது அளித்துள்ள விளக்கத்தில், “தமிழ்நாட்டில் இருந்து தேர்வான முதல் பெண் ராணுவ ஜெனரலை வாழ்த்துகிறோம்.  ராணுவ அதிகாரிகள் தலைமையகத்துக்கு முன்பே வடக்கு கமாண்ட் பதிவிட்டதால் தான் அந்த குறிப்பிட்ட டுவீட் நீக்கப்பட்டது” என தெரிவித்துள்ளது. முன்னதாக நாடாளுமன்ற உறுப்பினர் கனிமொழி இந்த விவகாரம் குறித்து டுவிட்டரில், “தமிழ்நாடு முதலமைச்சர், தனது மாநிலத்திலிருந்து முதல் பெண்மணியாக மேஜர் ஜெனரல் பதவி உயர்வு பெற்றிருப்பவருக்கு வாழ்த்திய பதிவை வடக்கு மண்டல ராணுவ பிரிவு ஏன் நீக்க வேண்டும். இதன் பின்னணி என்ன” என கேள்வி எழுப்பி இருந்தது குறிப்பிடத்தக்கது.