Skip to main content

துடித்துக்கொண்டிருந்த உயிர்; ரயில் ஓட்டுநரின் நெகிழ்ச்சி செயல்! 

Published on 28/11/2023 | Edited on 28/11/2023

 

Person had injured near morapur railway station loco pilot ArunKumar save live
மாதிரி படம்  

 

ஜோலார்பேட்டை - ஈரோடு (06845) பயணிகள் ரயில் நேற்று காலை 6.40 மணிக்கு தருமபுரி மாவட்டம், அரூர் அருகே உள்ள தொட்டம்பட்டி ரயில் நிலையத்தில் இருந்து புறப்பட்டு மொரப்பூர் ரயில் நிலையம் நோக்கி சென்று கொண்டிருந்தது. இந்த ரயிலை அருண் குமார் என்பவர் இயக்கினார். மொரப்பூர் நோக்கி சென்று கொண்டிருந்த போது ரயில் தண்டவாளத்தின் ஓரத்தில் ஒரு நபர் ரத்த வெள்ளத்தில் கீழே விழுந்து உயிருக்குப் போராடிக் கொண்டிருந்தார். இதனைக் கண்ட ரயில் ஓட்டுநர் அருண் குமார், உடனடியாக ரயிலை நிறுத்தினார். திடீரென ரயில் நின்றதும் சிக்னலுக்காக நின்றிருக்கும் என பயணிகள் நினைத்துக் கொண்டிருந்தனர். 

 

ரயிலைவிடு இறங்கிய அருண்குமார் தண்டவாளத்தின் ஓரம் ரத்தவெள்ளத்தில் கிடந்த நபர் அருகே சென்று பார்த்தபோது அவருக்கு உயிர் இருந்ததை அறிந்தார். உடனடியாக ரயிலுக்கு சென்ற அவர் பயணிகளிடம், ‘ஒரு நபர் அடிபட்டு ரத்த வெள்ளத்தில் கிடக்கிறார். அவரை தூக்க வாருங்கள்’ என கூறியுள்ளார். இதனைக் கேட்டதும் சில பயணிகள் உடனே ரயிலில் இருந்து இறங்கி அருண் குமாருடன் சென்று அடிபட்டு கிடந்த அந்தப் பயணியைத் தூக்கி ரயிலில் ஏற்றியுள்ளனர். பிறகு ரயில் மொரப்பூரை நோக்கி விரைந்தது. 

 

மொரப்பூர் ரயில் நிலையம் வந்ததும், அருண்குமார் அங்கு பணியில் இருந்த ரயில்வே போலீஸ் வெங்கடாசலத்தை அழைத்து, தான் மீட்ட நபரை ஒப்படைத்தார். பிறகு அவரை உடனடியாக மருத்துவமனைக்கு அழைத்துச் செல்லவும் அறிவுறுத்தினார். மொரப்பூரில் இருந்து ரயில் மீண்டும் புறப்பட்டது. ரயில்வே போலீஸ் வெங்கடாசலம், உடனடியாக அந்த நபரை அருகே இருந்த அரூர் அரசு மருத்துவமனைக்கு ஆம்புலன்ஸ் உதவியுடன் அழைத்து சென்றார். அங்கு அவருக்கு முதலுதவி சிகிச்சை அளிக்கப்பட்டு பிறகு தருமபுரி அரசு மருத்துவமனைக்கு மாற்றப்பட்டார். அங்கு அவருக்கு தீவிர சிகிச்சை அளிக்கப்பட்டுவருகிறது. 

 

இந்த நிகழ்வு தொடர்பாக சேலம் ரயில்வே போலீஸ் எஸ்.ஐ. கோபண்ணாவுக்கு தகவல் கொடுக்கப்பட்டது. அந்தத் தகவலைத் தொடர்ந்து சம்பவ இடத்திற்கு விரைந்த ரயில்வே போலீஸ் எஸ்.ஐ. கோபண்ணா விசாரணை மேற்கொண்டார். அந்த விசாரணையில் அடிபட்டு மருத்துவமனையில் அனுமதிக்கப்பட்டுள்ள நபர் கேரளா மாநிலம், எர்ணாகுளம், தெற்கு பணம்பில்லா நகரைச் சேர்ந்த சதீஷ் (30) என்பது தெரியவந்துள்ளது. 

 

மேலும், சதீஷின் மனைவி சென்னையும், சதீஷ் கேரளாவிலும் பணியாற்றி வருகின்றனர். இந்நிலையில், சதீஷ் சென்னையில் உள்ள தனது மனைவியை பார்ப்பதற்கு வேலையில் விடுப்பு எடுத்துகொண்டு சென்னை நோக்கி ஒரு ரயிலில் வந்துள்ளார். அப்போது அவர் ரயிலில் படிக்கட்டில் பயணம் செய்துள்ளார். மொரப்பூர் அருகே  ரயிலில் இருந்து தவறி கீழே விழுந்துள்ளார். அதில் அவருக்கு பலத்த காயம் ஏற்பட்டுள்ளது. பிறகு அதே வழிதடத்தில், ஜோலார்பேட்டை - ஈரோடு பயணிகள் ரயிலை இயக்கி வந்துகொண்டிருந்த அருண்குமார் இவர் உயிருக்கு போராடிக் கொண்டிருப்பதைப் பார்த்து உடனடியாக ரயிலை நிறுத்தி அவரை காப்பாற்றியுள்ளார் என்பது தெரியவந்தது. 

 

இந்தச் சம்பவத்தில் ரயில் இருந்து தவறி விழுந்து உயிருக்கு போராடிக்கொண்டிருந்த சதீஷை காப்பாற்றிய ரயில் ஓட்டுநர் அருண்குமார் மற்றும் அவருக்கு உதவிய பயணிகளை ரயில்வே போலீஸாரும், பொதுமக்கள் வெகுவாக பாராட்டி வருகின்றனர். 

 

 

சார்ந்த செய்திகள்

 

Next Story

'இதுதான் எங்கள் தேர்தல் வெற்றியின் ரகசியம்' - முதல்வர் பேச்சு  

Published on 11/07/2024 | Edited on 11/07/2024
'We must not lose sight of any place' - Chief Minister's speech

தர்மபுரி மாவட்டத்தில் நலத்திட்ட உதவிகளை தொடங்கி வைப்பதற்காக தமிழக முதல்வர் சென்றுள்ள நிலையில் 'மக்களுடன் முதல்வர் திட்டம்' தமிழக முதல்வரால் தர்மபுரியில் உள்ள ஊரகப் பகுதிகளில் தொடங்கி வைக்கப்பட்டுள்ளது. இரண்டாவது நிகழ்வாக 445 கோடி ரூபாய் மதிப்பிலான பல்வேறு முடிவுற்ற பணிகளை பொதுமக்களின் பயன்பாட்டிற்கு தமிழக முதல்வர் தொடங்கி வைத்தார். தர்மபுரி - திருவண்ணாமலையில் நான்கு வழிச் சாலை, அடுக்குமாடி குடியிருப்பு கட்டிடங்கள் உள்ளிட்ட பல்வேறு துறைகளின் சார்பில் கட்டப்பட்டுள்ள முடிவுற்ற பணிகளை முதல்வர் தொடங்கி வைத்துள்ளார். பெண்களுக்கான 20 பேருந்துகளையும் தமிழக முதல்வர் தொடங்கி வைக்க இருக்கிறார். 56 கோடி ரூபாய் மதிப்பில் 2,637 பயனாளிகளுக்கு நலத்திட்ட உதவிகளை தமிழக முதல்வர் வழங்கவுள்ளார்.

தொடர்ந்து தர்மபுரியில் திட்டங்களை துவக்கி வைத்த பின் தமிழக முதல்வர் மு.க.ஸ்டாலின் உரையாற்றுகையில், ''ஆட்சிக்கு வந்த நூறு நாட்களுக்குள் இருக்கக்கூடிய எல்லா காரியங்களையும் நிறைவேற்றிக் காட்டுவேன் என்று சொன்னேன். உங்கள் முன்னாடி அந்தப் பெட்டியை பூட்டி திராவிட முன்னேற்றக் கழகத்தின் தலைமை நிலையமான அண்ணா அறிவாலயத்தில் பாதுகாப்பாக வைத்தோம். உடனடியாக எதிர்க்கட்சிகள் என்ன பேசினார்கள் 'இவர்கள் ஆட்சிக்கும் வரப்போவதில்லை; இந்த பெட்டியையும் திறக்கப் போவதில்லை' என்று இறுமாப்பில் கேலி செய்தார்கள், கிண்டல் செய்தார்கள். ஆனால் பொதுமக்களாகிய நீங்கள் திமுக மேல், என் மேல் நம்பிக்கை வைத்து அந்த கேலி மனிதர்களை தோற்கடித்து எங்களுக்கு பெரிய வெற்றியை தேடித் தந்தீர்கள்.

nn

ஆட்சிக்கு வந்ததும் உங்களுடைய மனுக்களை கவனிப்பதற்காக ஒரு புதிதாக ஒரு துறையை உருவாக்கினேன். அந்த துறையினுடைய பெயர் 'உங்கள் தொகுதியில் முதலமைச்சர்' என்னிடம் கொடுக்கப்பட்ட மனுக்கள் துறைவாரியாக பிரித்து அதிலிருந்து நடைமுறை சாத்தியமுள்ள 2, 29216 மனுக்களுக்கு உடனடியாக தீர்வு கண்டுள்ளோம். மக்கள் வைத்த கோரிக்கைகளில் சாத்தியம் உள்ள அனைத்தையும் நிறைவேற்றி இருக்கிறோம். தேர்தலுக்கு முன் வாங்கிய மனுக்களுக்கு தீர்வு கண்டதுடன் எங்களுடைய கடமை முடிந்துவிட்டது என்று நினைக்கவில்லை. இனிமேல் தான் கடமை தொடங்குகிறது என நினைத்து உழைப்பை கொடுக்கிறோம்.

அதனால்தான் தொடர்ந்து மனுக்களை வாங்கி வருகிறோம். அதை முறைப்படுத்த வேண்டும். எப்படி எல்லாம் முறைப்படுத்த வேண்டும் என்று சொன்னால் முதலமைச்சருடைய தனிப்பிரிவு; முதலமைச்சரின் உதவி மையம்; ஒருங்கிணைக்கப்பட்ட குறை தீர்ப்பு மேலாண்மை அமைப்பு; உங்கள் தொகுதியில் முதலமைச்சர் என எல்லாவற்றையும் ஒருங்கிணைத்து 'முதல்வரின் முகவரி' என்ற ஒரு புதிய துறையை உருவாக்கினோம். பொது மக்களுடைய கோரிக்கைகள் எந்த இடத்திலும் எங்களுடைய பார்வையில் இருந்து தவறி விடக்கூடாது என்பதற்காகத் தான் இவை எல்லாவற்றையும் ஒருங்கிணைத்தோம். முதலமைச்சர் தனிப்பிரிவில் பெறப்படக்கூடிய மனுக்கள் மட்டுமல்லாமல், இணையதளம், அஞ்சல், சமூக வலைத்தளம், மாவட்ட நிர்வாகத்தின் மூலம் பெறப்படும் மனுக்கள், அமைச்சர்கள் மற்றும் மக்கள் பிரதிநிதிகளிடம் கொடுக்கப்படும் மனுக்கள் இப்படி எல்லாம் மனுக்களையும் ஒரே இடத்தில் போய் சேருகிறது. மக்களால் தரப்படும் அனைத்து மனுக்களையும் ஒரு குடையின் கீழ் கொண்டு வந்தோம். எல்லா மக்களின் கோரிக்கைகளும் தலைமைச் செயலகத்திற்கு வந்து விட்டது. நான் முதலமைச்சராக பொறுப்பேற்றதும் 'முதல்வரின் முகவரி' துறையின் கீழ் இப்பொழுது வரைக்கும் பெறப்பட்ட 68,30,281 மனுக்களில் 66,65, 304 மணிகளுக்கு உரிய முறையான தீர்வு கண்டுள்ளோம்.

தமிழ்நாட்டில் தொடர்ந்து தோல்வியை கண்ட பிறகும் ஒன்றிய அரசு பாடம் கற்றுக் கொள்ளவில்லை. மத்திய அரசு விருப்பு வெறுப்பு இல்லாமல் செயல்பட வேண்டும். அனைவர் வீட்டிற்கும் ஏதோ ஒரு வகையில் அரசின் திட்டங்கள் சென்றடைய வேண்டும் என்ற எண்ணத்தில்தான் பணியாற்றி வருகிறோம். எல்லோருக்குமான அரசாக இருப்பது தான் எங்கள் தேர்தல் வெற்றியின் ரகசியம்'' என்றார்.

Next Story

'மக்களுடன் முதல்வர் திட்டம்'-தருமபுரியில் முகாமிடும் முதல்வர்

Published on 11/07/2024 | Edited on 11/07/2024
 makkaludan muthalvar scheme- Chief Minister camped at Dharampuri

தமிழக முதல்வர் தர்மபுரி மாவட்டத்தில் நலத்திட்ட உதவி தொடங்கி வைப்பதற்காக செல்லவிருக்கும் நிலையில் சேலம் ஓமலூர் விமான நிலையப் பகுதியில் ட்ரோன்கள் பறக்க நேற்றே தடை விதிக்கப்பட்டிருந்தது. இந்தநிலையில் போக்குவரத்து மாற்றமும் செய்யப்பட்டுள்ளது.

'மக்களுடன் முதல்வர் திட்டம்' இன்று தமிழக முதல்வரால் தர்மபுரியில் உள்ள ஊரகப் பகுதிகளில் தொடங்கி வைக்கப்பட இருக்கிறது. தர்மபுரி பாளையம்புதூரில் இன்று காலை 11.30 மணிக்கு  தமிழக முதல்வர் மு.க.ஸ்டாலின் தொடங்கி வைக்க இருக்கிறார். தமிழகத்தில் மொத்தமுள்ள 12,500 ஊராட்சிகளில் அடுத்தடுத்து 2500 முகாம்களை நடத்த அரசு திட்டமிட்டுள்ளது. அதேபோல் சேலம் கோட்டத்தில் பெண்களுக்காக 20 பேருந்துகளை தமிழக முதல்வர் இன்று தொடங்கி வைக்க இருக்கிறார்.

முதல்வரின் வருகை காரணமாக சேலத்தில் ட்ரோன்கள் பறக்கத் தடை விதிக்கப்பட்டுள்ளது. மேலும் போக்குவரத்து மாற்றம் செய்யப்பட்டுள்ளது. தர்மபுரியில் பல்வேறு நிகழ்ச்சிகளில் முதல்வர் பங்கேற்க இருப்பதால் காலை 8:30 முதல் நண்பகல் 1:30 வரை கிருஷ்ணகிரி- சேலம் தேசிய நெடுஞ்சாலையில் கனரக வாகனங்கள் செல்ல தடை விதிக்கப்பட்டுள்ளது. ஓசூர், கிருஷ்ணகிரியில் இருந்து மொரப்பூர், அரூர், காரிமங்கலம் வழியாக சேலம் செல்ல வேண்டும் என அறிவுறுத்தப்பட்டுள்ளது. அதேபோல் சேலத்தில் இருந்து கிருஷ்ணகிரி, பெங்களூர் செல்லும் கனரக வாகனங்கள் அரூர் வழியாக செல்ல வேண்டும் என அறிவுறுத்தப்பட்டுள்ளது. தர்மபுரியில் இருந்து இலகு ரக வாகனங்கள் பொம்மிடி, தீவட்டிப்பட்டி வழியாக சேலத்திற்கு செல்ல வேண்டும் எனவும் அறிவிக்கப்பட்டுள்ளது.