Skip to main content

தமிழகத்தில் புதிய கட்டுப்பாடுகள் அமல்!

Published on 06/05/2021 | Edited on 06/05/2021

 

tamilnadu government coronavirus prevention all shops and tasmac shops timing

 

தமிழகத்தில் கரோனா தொற்றுப் பரவலைக் கட்டுப்படுத்த தமிழக அரசு அறிவித்த புதிய கட்டுப்பாடுகள் அமலுக்கு வந்தன. தமிழகத்தில் மே 20ஆம் தேதி காலை 04.00 மணி வரை 15 நாட்களுக்குப் புதிய கட்டுப்பாடுகள் அமல்படுத்தப்படுகின்றன.

 

அதன்படி, 50% வாடிக்கையாளருடன் மளிகை, பலசரக்கு, காய்கறிக் கடைகள் ஆகியவை மதியம் 12.00 மணி வரை மட்டுமே இயங்கும்.

 

தேநீர் கடைகள் மதியம் 12.00 மணி வரை மட்டுமே செயல்பட அனுமதி அளிக்கப்பட்டுள்ளது; கடையில் உட்கார்ந்து தேநீர் அருந்த அனுமதி இல்லை.

 

விடுதிகளில் தங்கியுள்ள வாடிக்கையாளர்களுக்கு அவர்கள் தங்கியுள்ள அறைகளிலேயே உணவு வழங்கப்பட வேண்டும்.

 

அனைத்து அரசு அலுவலகங்களும் தனியார் அலுவலகங்களும் 50% பணியாளர்களுடன் மட்டுமே இயங்க அனுமதி அளிக்கப்பட்டுள்ளது.

 

மளிகை, பலசரக்கு, காய்கறி கடைகள் தவிர இதரக்கடைகள் அனைத்தையும் திறக்க மே 20ஆம் தேதி வரை தடை விதிக்கப்பட்டுள்ளது.

 

மெட்ரோ ரயில்கள், தனியார் பேருந்துகள், டாக்சி ஆகியவற்றில் 50% பேர் மட்டுமே பயணிக்கலாம்.

 

வணிக வளாகங்களில் உள்ள பலசரக்குக் கடைகள், காய்கறிக் கடைகள் ஆகியவை செயல்பட வரும் மே 20ஆம் தேதி வரை தடை விதிக்கப்பட்டுள்ளது.

 

மூன்றாயிரம் சதுர அடி கொண்ட பெரிய கடைகள், வணிக வளாகங்களுக்கான தடை தொடர்கிறது.

 

இறுதி ஊர்வலம், அதைச் சார்ந்த சடங்குகளில் இனி 25 பேருக்குப் பதில் 20 பேருக்கு மட்டுமே அனுமதி அளிக்கப்பட்டுள்ளது.

 

சமுதாயம், அரசியல், கல்வி, கலாச்சார நிகழ்வுகள் மற்றும் இதர விழாக்கள் ஆகியவற்றை நடத்த மே 20ஆம் தேதி வரை தடை விதிக்கப்பட்டுள்ளது.

 

முழு ஊரடங்கு நாள் உட்பட அனைத்து நாட்களிலும் திருமண விழாக்களில் 50 பேர் பங்கேற்க தொடர்ந்து அனுமதி அளிக்கப்படுகிறது.

 

ஊரகப் பகுதிகளிலும் அழகு நிலையங்கள், ஸ்பா போன்றவை இயங்க தடை விதிக்கப்பட்டுள்ளது.

 

மாற்றுத்திறனாளி அரசுப் பணியாளர்கள் வரும் மே20 ஆம் தேதி வரை பணிக்கு வருவதில் இருந்து விலக்கு அளிக்கப்பட்டுள்ளது.

 

மீன், இறைச்சிக் கடைகள் திங்கட்கிழமை முதல் வெள்ளிக்கிழமை வரை காலை 06.00 மணி முதல் நண்பகல் 12.00 மணி வரை மட்டுமே திறந்திருக்க வேண்டும்.

 

இரவு நேர ஊரடங்கு, ஞாயிற்றுக்கிழமைகளில் முழு நேர ஊரடங்கு போன்ற அறிவிப்புகள் மறு உத்தரவு வரும்வரை தொடர்ந்து நடைமுறையில் இருக்கும்.

 

உணவகங்களில் பார்சல் மட்டுமே வழங்க வேண்டும்.

 

மருந்தகங்கள், பால் விநியோகம், பெட்ரோல் பங்க்குகள் உள்ளிட்ட அத்தியாவசிய சேவைகளுக்கு மட்டும் ஊரடங்கு விதிகளிலிருந்து விலக்கு அளிக்கப்பட்டுள்ளது.

 

தமிழகத்தில் காலை 08.00 மணிமுதல் நண்பகல் 12.00 மணிவரை மட்டுமே டாஸ்மாக் மதுக்கடைகள் இயங்கும். 

 

சென்னை புறநகர் ரயில்களில் பொதுமக்கள் பயணம் செய்ய வரும் மே 20ஆம் தேதி வரை அனுமதி இல்லை. முன்களப் பணியாளர்கள், மாநகராட்சிப் பணியாளர்கள், வழக்கறிஞர்கள் புறநகர் ரயில்களில் பயணிக்கலாம். மத்திய மற்றும் மாநில அரசு ஊழியர்கள், உயர்நீதிமன்ற ஊழியர்கள், ஊடகத்துறையினர் புறநகர் ரயில்களில் பயணிக்கலாம். 

 

 

சார்ந்த செய்திகள்

 

Next Story

கிராமிய கலையைக் கற்றுத்தர அரசு புதிய முயற்சி; மகிழும் நாட்டுப்புற கலைஞர்கள்!

Published on 23/07/2024 | Edited on 23/07/2024
Government new initiative to teach rural art

வட தமிழ்நாட்டில் தெருக்கூத்து பிரபலம், கொங்குமண்டத்தில் வள்ளிக்கும்மி பிரபலம், மத்திய மண்டல மாவட்டங்களில் சாமியாட்டம், கரகாட்டம் பிரபலம். தென்மாவட்டங்களில் வில்லுப்பாட்டு, கரகாட்டம், கிராமியப்பாட்டு பிரபலம். ஒரு காலத்தில் ஆடி மாதம் வந்தாலே தெருக்கூத்து நடைபெறாத வடமாவட்டங்களே இருக்காது. பிறந்தநாள் விழாவுக்கு கிருஷ்ணர் பிறப்பு கூத்தும், ஒருவர் இறந்துவிட்டாள் கர்ண மோட்சம் நாடகமும் நடத்துவார்கள். திருவிழா நடைபெறும் நாட்களில் கொங்கு மண்டல மாவட்ட கிராமங்களில் வள்ளி கும்மி ஆட்டம் ஆடுவார்கள். இப்போது திருவிழா என்றாள் அறைகுறை ஆடைகளுடன் மேடை நடனங்களும், இசைக்கச்சேரிகளும் சிறிய கிராமங்கள் வரை நடக்கின்றன.  

இதனால் எங்காவது நாட்டுப்புற கலைகள் நடந்தால் அந்த வீடியோவை சமூக வலைத்தளங்களில் ஆச்சர்யத்துடன் பார்க்கின்றனர் இன்றைய இளம் தலைமுறையினர். இதனால் நாட்டுப்புற கலைஞர்கள் வழக்கொழிந்து வருகிறார்கள் என்கிற குற்றச்சாட்டு பல ஆண்டுகளாக உள்ளது. அதற்கு முக்கிய காரணம் நாட்டுப்புற கலைஞர்களுக்கு சரியான ஊதியம் இல்லை என்பதாகும். அதே நேரத்தில் இந்த கலைகளை கற்று தருவதற்கான பயிற்சி மையங்கள் என்பது தமிழ்நாட்டில் அந்தளவுக்கு இல்லை என்பது குறிப்பிடதக்கது. இரண்டு, மூன்று பேர் மட்டுமே இதற்கான பயிற்சி தருகிறார்கள். மற்றப்படி பார்த்தும், கேட்டும் கற்றுக்கொள்ளும் கலைகளாகவே இவை இருக்கின்றன.

பரதநாட்டியத்துக்கு கல்லூரிகள், இசை பயிற்சி கூடங்கள் இருப்பதுப்போல் நாட்டுப்புற கலைகளுக்கு இல்லை. தெருக்கூத்து, நாடகம் போன்றவற்றுக்கு ஒரு சிலர் மட்டும் பயிற்சி பள்ளி வைத்து நடத்துகிறார்கள். மற்றபடி தெருக்கூத்து கற்றுக்கொள்ள வேண்டும், கோல்கால் ஆட்டம் ஆடவேண்டும், புரவியாட்டம் ஆடவேண்டும், வள்ளிக்கும்மி ஆடவேண்டும், கோல்கால் ஆட்டம் ஆடவேண்டும் என ஆசைப்படுபவர்களுக்கு கற்றுத்தர பயிற்சி மையங்கள் இல்லை என்கிற ஏக்கம் இருந்துவந்தது.

இது குறித்த கோரிக்கை கலைபண்பாட்டுத்துறைக்கு அமைச்சராகவுள்ள செய்தித்துறை அமைச்சர் மு.பெ.சாமிநாதன் மூலமாக தமிழ்நாடு முதலமைச்சர் மு.க.ஸ்டாலின் கவனத்துக்கு சென்றது. அது குறித்து அதிகாரிகள் மற்றும் அறிஞர்களுடன் நடந்த கலந்தாலோசனையில் தமிழ்நாட்டில் உள்ள 17 மாவட்ட இசைப்பள்ளிகள், 5 இசைக்கல்லூரிகள், 3 மையங்களில் கிராமிய கலைகள் கற்றுத்தரலாம் என முடிவு எடுக்கப்பட்டது. இது குறித்து அதிரடியாக தகவல்கள் இசைக்கல்லூரி, இசைப்பள்ளிகளுக்கு அனுப்பிவைக்கப்பட்டது.

வட தமிழ்நாட்டில் விழுப்புரம், திருவண்ணாமலை, கள்ளக்குறிச்சி, காஞ்சிபுரம் மாவட்டங்களில் தெருக்கூத்து கலை பிரபலம் என்பதால், தெருக்கூத்து, பெரியமேளம், பம்பை, கிராமிய பாடல்கள் பாடுவது குறித்த பயிற்சிகள் அளிக்க ஏற்பாடு செய்யப்பட்டுள்ளன. தென்மாவட்டங்களில் வில்லுப்பாட்டு கரகாட்டம், கொங்கு மண்டலத்தில் உள்ள மாவட்டங்களில் வள்ளிக்கும்மி, துடும்பாட்டம், காவடியாட்டம், ஜிக்காட்டம், கோல்கால் ஆட்டம், புரவியாட்டம், டெல்டா மாவட்டங்களில் புலியாட்டம், கரகாட்டம், சாமியாட்டம், தப்பாட்டம் கற்றுத் தருவதற்கான பயிற்சி வகுப்புகள் கடந்த வாரத்தில் தொடங்கப்பட்டு உள்ளன.

இதற்காக திறமையான நாட்டுப்புற கலைஞர்களை கலை பண்பாட்டுத்துறையினர் தேர்வு செய்து அவர்கள் மூலமாக பயிற்சியைத் தொடங்கியுள்ளனர். பகுதிநேர நாட்டுப்புற கலைப்பயிற்சி என்கிற தலைப்பில் வாரத்தில் வெள்ளி – சனிக்கிழமை இரண்டு நாள் மட்டும் நடத்தப்படுகிறது. இந்தப் பயிற்சியில் 17 வயது நிரம்பிய யாரும் சேரலாம், அதிகப்பட்ச வயது வரம்பில்லை. பள்ளி படிப்பு 8 வது படித்து முடித்திருந்தால் தேர்வு எழுதவைக்கப்படுவர். படிக்கவில்லை என்றால் தேர்வு இல்லை. ஆனால் இருவருக்குமே சான்றிதழ் தருவோம் எனச்சொல்லப்பட்டுள்ளது. கிராமிய கலைகளை வளர்க்க தமிழ்நாடு அரசு திடீரென எடுத்துள்ள முயற்சி நாட்டுப்புற கலைஞர்களை மகிழ்ச்சியடைய செய்துள்ளது. 

Next Story

‘முற்றிலும் வதந்தியே..’ - ராமதாஸ் அறிக்கைக்குத் தமிழக அரசு விளக்கம்!

Published on 17/07/2024 | Edited on 17/07/2024
Tamil Nadu govt explanation for Ramdas report regarding online liquor sale

ஆன்லைன் வினியோக நிறுவனங்கள் மூலமாக வீடுகளுக்கே மதுவை கொண்டு சென்று விற்க திட்டமா? என்று பாமக நிறுவனர் ராமதாஸ் கண்டனம் தெரிவித்திருந்தார்.

இது தொடர்பாக அவர் வெளியிட்டுள்ள அறிக்கையில், “தமிழ்நாட்டில்  பீர், ஒயின், மணமூட்டப்பட்ட மதுவகைகள் போன்ற குறைந்த அளவில் ஆல்கஹால் கொண்ட மதுவகைகளை சொமாட்டோ, ஸ்விக்கி, பிக்பேஸ்கட் போன்ற ஆன்லைன் வினியோக நிறுவனங்கள் மூலமாக வீடுகளுக்கே கொண்டு சென்று விற்க தமிழக அரசு திட்டமிட்டிருப்பதாகவும், அதன் சாதக பாதகங்கள் குறித்து ஆன்லைன் வினியோக நிறுவனங்கள், மது உற்பத்தியாளர்கள் போன்றோருடன் கலந்தாய்வு செய்து வருவதாகவும் தி எகனாமிக் டைம்ஸ் நாளிதழ்  செய்தி வெளியிட்டுள்ளது.  இந்த செய்தியில் கூறப்பட்டுள்ள தகவல்கள் உண்மையா? வீடுகளுக்கே சென்று மது விற்க திட்டமிடப்பட்டுள்ளதா? என்பது குறித்து தமிழக அரசு விளக்கமளிக்க வேண்டும். ஒருவேளை இந்த செய்தி உண்மையாக இருந்தால் தமிழக அரசின் திட்டம் கடுமையாக கண்டிக்கத்தக்கது ஆகும்.

வீடுகளுக்கே கொண்டு சென்று மதுவை விற்பனை செய்வது என்பது மக்கள் நலனை விரும்பும் அரசுகளால் நினைத்துக் கூடப் பார்க்க முடியாத தீமை ஆகும். ஆனால், தமிழக அரசு அத்தகைய தீமையை செய்யாது என்று உறுதியாக கூற முடியவில்லை. அதற்கு காரணம், விளையாட்டு அரங்குகள், பன்னாட்டு நிகழ்வுகள், திருமண விழாக்கள் போன்றவற்றில் மதுவகைகளை வினியோகித்தல், மதுக்கடைகளில் காகிதக் குடுவைகளில் குறைந்த விலையில் மது விற்பனை செய்வது போன்ற புரட்சிகரமான திட்டங்களை அறிமுகம் செய்யத் துடித்த வரலாறு தமிழக அரசுக்கு உண்டு. அதனால்தான் இந்த செய்தியும் உண்மையாக இருக்குமோ? என்று நம்பத் தோன்றுகிறது.

மது, புகையிலை எதுவாக இருந்தாலும் நுகர்வோருக்கு எளிதில் கிடைக்காத வகையில் கட்டுப்பாடுகள் ஏற்படுத்தப்பட வேண்டும் என்பது தான் உலக சுகாதார நிறுவனத்தின் வழிகாட்டுதல் ஆகும். அதன் மூலம் தான் மது - புகையிலை ஆகியவற்றின் பயன்பாட்டை குறைக்க முடியும் என்பது உலக சுகாதார நிறுவனத்தின் நம்பிக்கை ஆகும். ஏற்கனவே தெருவுக்குத்தெரு மதுக்கடைகள் திறக்கப்பட்டிருப்பதால் தான் மாணவர்கள் மதுவை வாங்கிச் சென்று பள்ளிகளில் வைத்து அருந்தும் கொடுமை நிகழ்கிறது. வீடுகளுக்கே  மதுவை நேரடியாக கொண்டு வினியோகிக்க அனுமதித்தால் அதனால் ஏற்படும் விளைவுகளை நினைத்துக் கூடப் பார்க்க முடியாது.

போதை குறைந்த  மது வீடுகளுக்கே நேரடியாக வினியோகிக்கபட்டால், அது வீடுகளில் உள்ள குழந்தைகளையும், பெண்களையும் சுவைத்துப் பார்க்கத் தூண்டும். காலப்போக்கில்  வீட்டில் உள்ள பெண்களையும், பிள்ளைகளையும்  மதுவுக்கு அடிமையாக்கவே இந்த வழக்கம் வழிகோலும். ஒரு குடும்பத்தில் ஒருவர் மட்டுமே குடிக்கும் முறைக்கு முடிவுகட்டி குடும்பமே மது அருந்தும் கலாச்சாரத்தை உருவாக்கவே வீடு தேடு மதுவை கொண்டு சென்று கொடுக்கும் திட்டம் வழிவகுக்கும்.

தமிழ்நாட்டில் படிப்படியாக மதுவிலக்கை ஏற்படுத்துவோம் என்று வாக்குறுதி  அளித்த முதலமைச்சர் மு.க.ஸ்டாலின், மதுப்பழக்கத்தை ஊக்குவிக்கும் வகையிலான இத்தகைய திட்டங்களை அனுமதிக்கக் கூடாது.  மது வகைகளை ஆன்லைன் வினியோக நிறுவனங்கள் மூலமாக வீடுகளுக்கே கொண்டு சென்று விற்பனை செய்யும் திட்டம் இருந்தால் அதை தமிழக அரசு கைவிட வேண்டும்; இல்லாவிட்டால் மக்களைத் திரட்டி மாபெரும் போராட்டத்தை பாட்டாளி மக்கள் கட்சி நடத்தும்.” எனக் குறிப்பிட்டிருந்தார்.

இந்த நிலையில் ஆன்லைன் வினியோக நிறுவனங்கள் மூலமாக வீடுகளுக்கே மதுவை கொண்டு சென்று விற்பது தொடர்பான தகவலை தமிழக அரசு மறுத்துள்ளது. இது தொடர்பாக தமிழக அரசின் உண்மை சரிபார்ப்பு குழு வெளியிட்டுள்ள பதிவில், “இது முற்றிலும் வதந்தியே; அப்படி ஒரு திட்டமே இல்லை, அது தொடர்பாக பேச்சுவார்த்தைக் கூட நடைபெறவில்லை என டாஸ்மாக் நிர்வாக இயக்குநர் தெரிவித்துள்ளார். ஆன்லைன் விநியோக நிறுவனங்களால் மதுவை வீடுகளுக்கே கொண்டு சென்று விற்க சில மாநிலங்களில் அனுமதி வழங்கி வருவதால், தமிழ்நாட்டிலும் அனுமதி வழங்க இருப்பதாக தவறான தகவல் பரப்பப்படுகிறது” எனத் தெரிவித்துள்ளார்.