Skip to main content

தனியார் பள்ளி பேருந்து மோதிய விபத்து; ஓட்டுநர் பலி - போலீசார் விசாரணை

Published on 14/06/2024 | Edited on 14/06/2024
mini van driver passed away for private school bus accident

வேலூர் மாவட்டம் குடியாத்தம், பேரணாம்பட்டு பகுதியில் இருந்து குடியாத்தம் வழியாக காட்பாடி நோக்கி மினி வேன் சென்று கொண்டிருந்தது. அப்பொழுது சென்ராயனபல்லி பள்ளி பகுதியில் உள்ள தனியார் பள்ளியில் இருந்து மாலை தனியார் பள்ளி பேருந்து குடியாத்தம் அடுத்த காந்திநகர் அருகே சென்றபோது, அதிவேகத்தில் வந்த பள்ளி பேருந்து மினி வேன் மீது மோதியது.

இதில் மினி வேன் ஓட்டி வந்த பேரணாம்பட்டு பகுதியைச் சேர்ந்த ஓட்டுநர் சமத் உசேன் (31) பலத்த காயம் ஏற்பட்டு வேனுக்குள் சிக்கிக்கொண்டார். விபத்தை பார்த்துவிட்டு ஓடிவந்த அங்கிருந்த பொதுமக்கள் அவரை மீட்டு சிகிச்சைக்காக குடியாத்தம் அரசு மருத்துவமனைக்கு அனுப்பி வைத்தனர். அங்குத் தீவிர சிகிச்சை அளிக்கப்பட்ட நிலையில் சிகிச்சை பலனின்றி சமத் உசேன் உயிரிழந்தார் 

இந்தச் சம்பவம் குறித்து குடியாத்தம் நகர போலீசார் வழக்கு பதிவு செய்து விசாரணை மேற்கொண்டு வருகின்றனர். பள்ளிப் பேருந்துக்குள் 5 மாணவர்களே இருந்ததால் யாருக்கும் காயம் ஏற்படவில்லை. பள்ளி வாகனத்தை ஓட்டிய ஓட்டுநர் காயங்களுடன் குடியாத்தம் அரசு மருத்துவமனையில் சிகிச்சை பெற்று வருகிறார்.

பள்ளி, கல்லூரி பேருந்துகளை இயங்கும் ஓட்டுநர்கள், சீரான வேகத்தில் வாகனங்களை இயக்கவேண்டும் என அறிவுறுத்தல் வட்டார போக்குவரத்து துறை மற்றும் மாவட்ட நிர்வாகங்களால் வழங்கப்பட்டுள்ளது. இதனைப் பெரும்பாலான ஓட்டுநர்கள் கடைப்பிடித்தாலும் கல்லூரி பேருந்துகளை இயக்குபவர்கள் கடைப்பிடிப்பதில்லை. காலை நேரத்தில் அரக்கபரக்க வாகனங்களை இயக்குவது, மாலையில் சீக்கிரம் வீடு போய் சேரவேண்டும் என வாகனங்களை இயக்குவது எனச் செயல்படுகின்றனர். இதனால் சீரான வேகம் என்பதைக் கடைப்பிடிப்பதில்லை.

கல்லூரி பேருந்து ஓட்டுநர்களைப்போலவே பள்ளி பேருந்து ஓட்டுநர்கள் சிலரும் விதிமுறைகளைக் கடைப்பிடிக்காமல் பேருந்துகள், வேன்களை இயக்குவது அதிகரித்துவருகிறது. அப்படி இயக்கிய ஒரு ஓட்டுநரால் இப்படியொரு விபத்து நடந்துள்ளது. இனி இதுபோன்ற விபத்துக்கள் நடக்காமல் இருக்க கண்காணிப்பு தீவிரமாக இருக்கவேண்டும் என்கிற குரல்கள் பொதுமக்களிடம் இருந்தே எழுகின்றன.
 

சார்ந்த செய்திகள்

 

Next Story

ரயில் தடம் புரண்டு விபத்து; மீண்டும் பரபரப்பு

Published on 18/07/2024 | Edited on 18/07/2024
Train derailment accident; The excitement again

உத்தரபிரதேசத்தில் பயணிகள் ரயில் தடம் புரண்டு விபத்துக்குள்ளான சம்பவம் பரபரப்பை ஏற்படுத்தி இருக்கிறது.

உத்தரபிரதேசம் மாநிலம் கோண்டா பகுதியில் பயணிகள் ரயில் திடீரென தடம் புரண்டு விபத்து ஏற்பட்டுள்ளது. சண்டிகர் - திப்ரூகர் இடையே இயக்கப்படும் விரைவு ரயில் திடீரென தடம் புரண்டு விபத்துக்குள்ளானது. இதில் ரயிலின் நான்கு ஏசி பெட்டிகள் உட்பட 12 பெட்டிகள் தடம் புரண்டு உள்ளதாக முதற்கட்ட தகவல்கள் வெளியாகி உள்ளது.

இந்த விபத்தில் காயமடைந்தவர்கள் தொடர்பான எந்த விவரங்களும் வெளியாகாத நிலையில் மீட்புப் பணிகளை விரைந்து மேற்கொள்ள அதிகாரிகளுக்கு உத்தரப்பிரதேச முதல்வர் யோகி ஆதித்யநாத் உத்தரவிட்டுள்ளதாக தகவல்கள் வெளியாகி உள்ளது. ஏற்கனவே அண்மையில் ஒடிசாவில் ரயில் விபத்து ஏற்பட்டது பரபரப்பை ஏற்படுத்திய நிலையில்  மீண்டும் ரயில் விபத்தில் 12 பெட்டிகள் தடம் புரண்டுள்ளது மேலும் பரபரப்பை ஏற்படுத்தியுள்ளது.

Next Story

மோதி விட்டு நிற்காமல் பறந்த கார்; பஞ்சராகி பாதி வழியில் நின்றபோது பறிமுதல்

Published on 17/07/2024 | Edited on 17/07/2024
A car that caused an accident and did not stop

புதுக்கோட்டை மாவட்டம் அறந்தாங்கி அருகில் உள்ள சருக்கலக்கோட்டை மற்றும் குருந்திரகோட்டை கிராமங்களைச் சேர்ந்த 3 சிறுவர்கள் ஒரு பைக்கில் கீரமங்கலம் நோக்கி வந்து கொண்டிருந்தனர். அப்போது பனங்குளம் தெற்கு கிராமத்தில் அருகே திருவாரூர் மாவட்டம் முன்னாவல்கோட்டை கிராமத்தைச் சேர்ந்த வெங்கடேசன் மகன் தனபாண்டி (வயது 24) அறந்தாங்கி நோக்கி ஓட்டிச் சென்ற கார் எதிரே வந்த சிறுவர்களின் பைக் மீது மோதிய விபத்தில் 3 சிறுவர்களும் படுகாயமடைந்தனர்.

ஆனால் விபத்து ஏற்படுத்திய கார் சம்பவ இடத்தில் நிறுத்தாமல் வேகமாகச் சென்று விட்டது. அந்த வழியாகச் சென்றவர்கள் ரத்த காயங்களுடன் கிடந்த 3 சிறுவர்களையும் மீட்டு 108 ஆம்புலன்ஸ் மூலம் அறந்தாங்கி அரசு மருத்துவமனைக்கு அனுப்பி வைத்தனர்.

சிறுவர்களின் பைக் மீது மோதி நிற்காமல் தப்பிச் சென்ற கார் ஒரு கி.மீ தூரத்தில் குளமங்கலம் தெற்கு பகுதியில் பஞ்சராகி நின்றுவிட்டது. தகவலறிந்து சென்ற கீரமங்கலம் போலீசார் பஞ்சராகி நின்ற காருக்கு மாற்று டயர் மாற்றி காரை கைப்பற்றி கீரமங்கலம் காவல் நிலையம் கொண்டு வந்தனர். இந்த சம்பவம் அப்பகுதியில் பரபரப்பை ஏற்படுத்தியுள்ளது.