Skip to main content

மருத்துவத்துறை மாணவிகளுக்கு பாலியல் தொல்லை; தர்மபுரி அரசு மருத்துவர் பணியிடை நீக்கம்

Published on 14/09/2022 | Edited on 14/09/2022

 

 

mbbs students dharmapuri government medical college doctor suspended


தர்மபுரி அரசு மருத்துவக்கல்லூரி மருத்துவமனையில் எம்.பி.பி.எஸ். மாணவிகளிடம் பாலியல் தொல்லைகளில் ஈடுபட்டதாக வந்த புகாரின்பேரில், தடயவியல் துறை உதவி பேராசிரியர் சதீஸ்குமார் தற்காலிக பணிநீக்கம் செய்யப்பட்டார். 

 

தர்மபுரி அரசு மருத்துவக்கல்லூரி மருத்துவமனையில் 500- க்கும் மேற்பட்ட மாணவ, மாணவிகள் படித்து வருகின்றனர். இங்கு தடயவியல் மருத்துவத்துறை உதவி பேராசிரியராக சதீஸ்குமார் என்பவர் பணியாற்றி வருகிறார். இவர், மாணவிகளிடம் பாலியல் ரீதியாக தொல்லைகள் தந்ததாக  புகார் எழுந்தது. 

 

இது தொடர்பாக, இக்கல்லூரியில் இரண்டாம் ஆண்டு படித்து வரும் மருத்துவக்கல்லூரி இயக்குநர், கல்லூரி முதல்வர் ஆகியோருக்கு அனுப்பியுள்ள புகார் மனுவில் கூறியுள்ளதாவது, நாங்கள் கடந்த 2020- ஆம் ஆண்டு, தர்மபுரி அரசு மருத்துவக்கல்லூரியில் சேர்ந்து படித்து வருகிறோம். இங்கு உதவி பேராசிரியராக உள்ள சதீஸ்குமாரால் நாங்கள் வகுப்பில் பல்வேறு அசவுகரியங்களை அனுபவித்து வருகிறோம். 

 

வகுப்பில் சில மாணவிகளின் தலையில் வருடுவது, இரட்டை அர்த்த சொற்களை பேசுவது, மாணவிகளின் பின்னால் நின்றுகொண்டு மேலே சாய்வது, சிலர் மீது உரசுவது, மாணவிகளை பாட்டு பாடச் சொல்வது, மாணவிகளைச் சுற்றி சுற்றி வந்து பாடம் நடத்துவது என வரம்பு மீறி செயல்படுகிறார். இதனால் அவருடைய வகுப்பை நாங்கள் புறக்கணித்து வந்தோம். 

 

mbbs students dharmapuri government medical college doctor suspended

 

இதனால் எங்களின் கல்வி நலன் பாதிக்கப்படுகிறது. அவர் மீது உரிய நடவடிக்கை எடுக்க வேண்டும். இவ்வாறு புகார் மனுவில் கூறியுள்ளனர். இதையடுத்து, அவர் மீதான புகார் குறித்து விசாரிக்க மருத்துவர்கள் கண்மணி, காந்தி உள்ளிட்ட மூன்று பேர் கொண்ட குழு அமைக்கப்பட்டது. குழுவின் விசாரணையில் மருத்துவர் சதீஸ்குமார் மீதான புகார்கள் அனைத்தும் ஊர்ஜிதமானது. 

 

இது தொடர்பாக விளக்கம் அளிக்கும்படி அவருக்கு குற்றச்சாட்டு குறிப்பாணை அனுப்பப்பட்டது. அப்போது அவர், தன் மீது கூறப்பட்ட அனைத்துப் புகார்களும் பொய்யானவை என பதில் அளித்தார். எனினும், மூவர் குழு விசாரணையில் புகார்கள் உண்மை எனத் தெரிய வந்ததால் அவரை பணியிடை நீக்கம் செய்ய இயக்குநரகம் உத்தரவிட்டது. அதையடுத்து அவர் உடனடியாக பணியிடைநீக்கம் செய்யப்பட்டார். 

 

இதுகுறித்து தமிழக சுகாதாரத்துறை அமைச்சர் மா.சுப்பிரமணியம் கூறுகையில், ''மருத்துவர் பணி என்பது மக்களை காக்கும் மகத்தான பணி. அவர்கள் எந்த வித குற்றச்சாட்டுக்கும் ஆளாகாமல் பணியாற்ற வேண்டும். மருத்துவர் சதீஸ்குமார் மீது புகார் வந்த உடனே, மூவர் குழு அமைத்து விசாரணை நடத்தப்பட்டது. அதன்படி, தற்போது பணியிடைநீக்கம் செய்யப்பட்டுள்ளார். இதையடுத்து அவர் மீது துறை ரீதியான நடவடிக்கை எடுக்கவும் உத்தரவிடப்பட்டு உள்ளது,'' என்றார். 

 

கடந்த இரு மாதங்களுக்கு முன்பு இதே தடயவியல் துறையைச் சேர்ந்த மருத்துவர் மதன்ராஜ், வகுப்பில் இரட்டை அர்த்த சொற்களைப் பயன்படுத்தியதாக வந்த புகாரின் பேரில், புதுக்கோட்டை அரசு மருத்துவக்கல்லூரி மருத்துவமனைக்கு இடமாற்றம் செய்யப்பட்டார். 

 

இந்நிலையில், மீண்டும் மருத்துவர் ஒருவர் பாலியல் புகாரில் சிக்கியிருப்பது தர்மபுரி மருத்துவக்கல்லூரி மருத்துவமனை வட்டாரத்தில் பரபரப்பை ஏற்படுத்தி உள்ளது. 

 

 

சார்ந்த செய்திகள்

Next Story

“எனதருமை மாணவச் செல்வங்களே...” - முதல்வர் வாழ்த்து

Published on 25/03/2024 | Edited on 25/03/2024
Chief Minister Stalin congratulates students appearing for 10th public exam

தமிழ்நாட்டில் 10 ஆம் வகுப்பு பொதுத் தேர்வு நாளை தொடங்கி ஏப்ரல் 8 ஆம் தேதி வரை நடைபெறவுள்ளது. இதற்காக மாநிலம் முழுவதும் 4,107 தேர்வு மையங்கள் அமைக்கப்பட்டுள்ளன. மாணவர்கள், தனித் தேர்வர்கள், சிறைக் கைதிகள் என மொத்தம் 9.38 லட்சம் பேர் தேர்வு எழுதுகின்றனர்.

முதல்நாளில் தமிழ் உள்ளிட்ட மொழிப் பாடங்கள் தேர்வு நடைபெறவுள்ளது.  செல்போன், உள்ளிட்ட மின்னணு சாதனப் பொருட்களைத் தேர்வு அறைக்குள் கொண்டு செல்லக் கூடாது என்று ஆசிரியர்கள் மற்றும் மாணவர்களுக்கு அறிவுறுத்தப்பட்டுள்ளது. முறைகேடுகளைத் தவிர்க்க மாநிலம் முழுவதும் 4 ஆயிரத்திற்கும் மேற்பட்ட பறக்கும் படைகள் அமைக்கப்பட்டுள்ளன.

இந்த நிலையில், 10 ஆம் வகுப்பு பொதுத் தேர்வு எழுதும் மாணவர்களுக்கு முதல்வர் ஸ்டாலின் வாழ்த்து தெரிவித்துள்ளார். இது தொடர்பாக அவர் வெளியிட்டுள்ள எக்ஸ் பதிவில், “பத்தாம் வகுப்புப் பொதுத்தேர்வை எழுதவுள்ள எனதருமை மாணவச் செல்வங்களே... All the best!  நீங்கள் பதற்றமின்றித் தேர்வை எதிர்கொள்ளத்தான் வினாத்தாளைப் படித்துப் பார்க்க முதலில் 10 நிமிடங்கள் வழங்கப்படுகிறது. அதை முழுமையாகப் பயன்படுத்திக் கொள்ளுங்கள்.

இதனை மற்றுமொரு தேர்வாகக் கருதி நம்பிக்கையோடு எழுதி வெற்றி பெறுங்கள். பெற்றோர்களும் உங்கள் பிள்ளைகள் உரிய நேரத்தில் தேர்வு மையத்துக்குச் சென்றிடுவதை உறுதி செய்யுங்கள்” எனக் குறிப்பிட்டுள்ளார்.

Next Story

தர்மபுரி பா.ம.க. வேட்பாளர் மாற்றம்; தொண்டர்கள் கொண்டாட்டம்!

Published on 22/03/2024 | Edited on 22/03/2024
Dharmapuri pmk candidate change Celebration of volunteers

நாட்டின் 18ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டுள்ளது. மொத்தமாக ஏழு கட்டங்களாகத் தேர்தல் அறிவிக்கப்பட்டுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் கூட்டணி, தொகுதிப் பங்கீடு எனத் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது. அந்த வகையில், தி.மு.க, அ.தி.மு.க., காங்கிரஸ், தேமு.தி.க., பா.ம.க., பா.ஜ.க. உட்படப் பல்வேறு கட்சிகள் தேர்தல் கூட்டணி, தொகுதிப் பங்கீடு, வேட்பாளர்கள் அறிவிப்பு உள்ளிட்ட பணிகளில் தீவிரமாக ஈடுபட்டு வருகின்றன.

அதன்படி மக்களவை தேர்தலில் தமிழ்நாட்டில் பா.ஜ.க. மற்றும் கூட்டணிக் கட்சிகள் போட்டியிடும் தொகுதிகளின் பட்டியல் நேற்று (21.03.2024) வெளியானது. அதில் பட்டாளி மக்கள் கட்சிக்கு காஞ்சிபுரம், அரக்கோணம், தர்மபுரி, ஆரணி, விழுப்புரம், கள்ளக்குறிச்சி, சேலம், திண்டுக்கல் மற்றும் மயிலாடுதுறை ஆகிய 10 தொகுதிகள் ஒதுக்கப்பட்டன. இதனையடுத்து பா.ம.க. சார்பில் போட்டியிடும் வேட்பாளர்கள் அறிவிக்கப்பட்டனர். அதன்படி அரக்கோணம் - பாலு, கடலூர் - தங்கர்பச்சான், திண்டுக்கல் - திலகபாமா, தர்மபுரி - அரசாங்கம், விழுப்புரம் - முரளி சங்கர், ஆரணி - கணேஷ் குமார், மயிலாடுதுறை - ம.க. ஸ்டாலின், சேலம் - அண்ணாதுரை, கள்ளக்குறிச்சி - தேவதாஸ் அறிவிக்கப்பட்டனர். காஞ்சிபுரத்திற்கு மட்டும் இன்னும் வேட்பாளர் அறிவிக்கப்படவில்லை.

இந்நிலையில் தருமபுரி தொகுதியில் பா.ம.க. வேட்பாளர் அரசாங்கம் மாற்றப்பட்டுள்ளார். இவருக்கு பதிலாக அக்கட்சியின் தலைவர் அன்புமணியின் மனைவியும், பசுமை தாயகம் அறக்கட்டளையின் தலைவருமான சௌமியா அன்புமணி போட்டியிடுவார் என அறிவிக்கப்பட்டுள்ளது. இதனையடுத்து தருமபுரியில் பா.ம.க.வினர் பட்டாசுகள் வெடித்து கொண்டாடினர்.