Skip to main content

விட்டுச் சென்ற மனைவி; பரிதாபமாக உயிரிழந்த கணவர்

Published on 19/10/2023 | Edited on 19/10/2023

 

Husband lost their life due to family problems in Krishnagiri

 

கிருஷ்ணகிரி மாவட்டம் பேரிகை பகுதிக்கு அருகே அமைந்துள்ளது குடிசாகனபள்ளி கிராமம். இந்த பகுதியைச் சேர்ந்தவர் பாலாஜி. இவருக்கு 35 வயதாகிறது. தான் வசிக்கும் சுற்று வட்டாரப் பகுதிகளில் டிரைவராக வேலை செய்து வருகிறார். இந்நிலையில், பாலாஜிக்கு அதே ஊரைச் சேர்ந்த ராதா என்ற பெண்ணுடன் கடந்த 10 ஆண்டுகளுக்கு முன்பு திருமணம் நடந்துள்ளது. இந்த தம்பதிக்கு இரண்டு மகன்கள் உள்ளனர். மேலும், பாலாஜி தன்னுடைய டிரைவர் தொழிலில் கிடைக்கும் பணத்தை வைத்து தனது குடும்பத்தை பாதுகாத்து வந்தார்.

 

ஆரம்பத்தில் ஒற்றுமையாக இருந்த இவர்களது குடும்பத்தில், காலப்போக்கில் சிறு சிறு விரிசல்கள் ஏற்பட்டு வந்துள்ளது. அதில், பாலாஜிக்கும் அவரது மனைவிக்கும் இடையே அடிக்கடி தகராறு ஏற்பட்டு வந்துள்ளது. அப்போதெல்லாம் அக்கம் பக்கத்தில் உள்ளவர்கள், உறவினர்கள் என கணவன் மனைவியின் சண்டையை தீர்த்து வைப்பது வழக்கம். இந்நிலையில், பாலாஜிக்கும் அவரது மனைவிக்கும் ஏற்பட்ட தகராறு திடீரென உச்சக்கட்டத்தை எட்டியுள்ளது. 

 

ஒருகட்டத்தில், விரக்தியடைந்த பாலாஜியின் மனைவி தனது குடும்பத்தை விட்டுப் பிரிந்து இரண்டு மகன்களுடன் தனியாக வாழ்ந்து வருகிறார். இதனிடையே, தன்னுடைய மனைவி தனியாக வாழச் சென்றதால் விரக்தியில் இருந்த பாலாஜி தனிமையிலேயே இருந்துள்ளார். இதையடுத்து, பாலாஜியை விட்டு அவர் பிரிந்து சென்று எட்டு ஆண்டுகள் ஆகிறது. இதற்கிடையில், பாலாஜிக்கு மது குடிக்கும் பழக்கம் இருந்துள்ளது. அவர் அடிக்கடி மது குடிப்பது வழக்கம். இத்தகைய சூழலில், மது போதைக்கு அடிமையான பாலாஜி அடிக்கடி மது குடித்துவிட்டு வீட்டுக்கு வருவார் எனவும் கூறப்படுகிறது. 

 

இத்தகைய சூழலில், கடந்த 16 ஆம் தேதி காலை பாலாஜியின் வீட்டில் இருந்து துர்நாற்றம் வீசியுள்ளது. இதையடுத்து, அந்தப் பகுதியைச் சேர்ந்தவர்கள் வீட்டருகே சென்றபோது அந்த வீடும் வெளிப்புறமாக பூட்டிய நிலையில் காணப்பட்டுள்ளது. இந்நிலையில், இச்சம்பவம் குறித்து பேரிகை காவல் நிலையத்திற்குத் தகவல் தெரிவித்தனர். அதன்பேரில், சம்பவ இடத்திற்கு விரைந்த போலீசார் அங்கிருந்த பாலாஜி உறவினர்களின் உதவியுடன் பூட்டை உடைத்து உள்ளே சென்றனர்.

 

அப்போது, அவர்கள் உள்ளே சென்று பார்த்தபோது பாலாஜி பாதி அழுகிய நிலையில் ரத்த வெள்ளத்தில் சடலமாகக் கிடந்துள்ளார். ஒருகணம், இதைப் பார்த்து அதிர்ச்சியடைந்த உறவினர்கள், பாலாஜியை பார்த்து கண்ணீர் விட்டுக் கதறி அழுதனர். அதன்பிறகு, பாதி அழுகிய நிலையில் இருந்த பாலாஜியின் உடலை மீட்டுப் பிரேதப் பரிசோதனைக்காக கிருஷ்ணகிரி அரசு மருத்துவக் கல்லூரி மருத்துவமனைக்கு அனுப்பி வைத்தனர்.

 

அதே வேளையில், பாலாஜியின் உடலில் இருந்த காயங்களை வைத்துப் பார்க்கும்போது அவர் கொலை செய்யப்பட்டுள்ளார் என்பதை போலீசார் உறுதி செய்தனர். இந்நிலையில், இச்சம்பவம் குறித்து வழக்குப்பதிவு செய்த பேரிகை போலீசார், இந்த கொலைக்கான காரணம் குறித்து தீவிர விசாரணை மேற்கொண்டு வருகின்றனர். பாலாஜியை வேறு யாராவது அடித்துக் கொலை செய்துவிட்டுத் தப்பிச் சென்றார்களா? அல்லது முன்விரோதம் காரணமா? அவருக்கு எதிரிகள் யாரேனும் இருக்கிறார்களா? என்ற பல்வேறு கோணங்களில் விசாரித்து வருகின்றனர். தற்போது, மக்கள் நடமாட்டம் அதிகமாக உள்ள பகுதியில் பூட்டிய வீட்டில் டிரைவர் ஒருவர் அடித்துக் கொலை செய்யப்பட்ட சம்பவம் பேரிகை பகுதி மக்களிடையே பெரும் பதற்றத்தை ஏற்படுத்தியுள்ளது.

 

 

சார்ந்த செய்திகள்

 

Next Story

எஸ்.பியின் அதிரடி உத்தரவு; சுற்றி வளைத்த காவல்துறை - சிக்கிய 28 பேர்!

Published on 24/07/2024 | Edited on 24/07/2024
28 people arrested for gambling with money in Dindigul

திண்டுக்கல் மாநகரையொட்டி உள்ள மீனாட்சிநாயக்கன்பட்டியில் இருக்கும் ஒரு காம்ப்ளக்ஸ், வத்தலக்குண்டு பைபாஸ், அஞ்சலி பைபாஸ், சீலப்பாடி பைபாஸ்  இப்படி நகர்ப்பகுதியைச் சுற்றியுள்ள சில பகுதிகளிலும், நகரில் கோவிந்தாபுரம்,  நாகல் நகர், பேகம்பூர், பஸ் ஸ்டாண்டு பகுதிகள் உள்பட சில இடங்களிலும் அரசு அனுமதியில்லாமல் அங்கங்கே சூதாட்ட கிளப்புகள் இரவு பகல் பாராமல்  படுஜோராக நடந்து வந்தன. இதனால் வியாபாரிகள், விவசாயிகள், இளைஞர்கள், தொழிலாளர்கள் ஆகியோர்கள் இந்தச் சூதாட்ட விடுதிகளுக்கு சென்று பல ஆயிரங்களை இழந்தும் வந்தனர்.  

இந்த விசயம் மாவட்ட காவல்துறை கண்காணிப்பாளர் பிரதீப் காதிற்கு சமூக ஆர்வலர்கள் சிலர் கொண்டு சென்றனர். அத்துடன் எஸ்.பிக்கு  தனிப்படை போலீசாரும் தகவல் கொடுத்து இருந்தனர். அதைத் தொடர்ந்துதான்  எஸ்.பி உத்தரவின் பேரில் தாடிக்கொம்பு காவல்நிலைய இன்ஸ்பெக்டர்  சந்திரசேகரன், சப் இன்ஸ்பெக்டர்கள் அருண்நாராயணன், பூபதி மற்றும் சில காவலர்கள் நகரம் மற்றும் ஒன்றிய பகுதிகளில் அதிரடி நடவடிக்கையில் இறங்கி அனுமதியில்லாமல் சூதாட்ட கிளப்புகளில் ரைடு நடத்தினர்.  அப்போது சூதாட்டத்தில் ஈடுபட்டிருந்த ஆண்கள் சிலர் தப்பி ஓடியுள்ளனர். 

இருப்பினும், ஆண்கள் மற்றும் சூதாட்ட கிளப் நடத்தி வந்தவர்கள் உட்பட 28  பேரை போலீசார் கைது செய்து, அவர்களிடமிருந்த ஒரு லட்சம் ரூபாய் பணத்தையும் பறிமுதல் செய்தனர். ஆனால் இதேபோல் நத்தம், வத்தலக்குண்டு,  வேடசந்தூர், நிலக்கோட்டை, ஒட்டன்சத்திரம், பழனி, கொடைக்கானல், மேல்  மலைப்பகுதி உள்பட மாவட்டம் முழுவதும் உள்ள சில பகுதிகளில் அனுமதியில்லாமல் சூதாட்ட கிளப்புகள் படுஜோராகவும் நடந்து வருகிறது. அதேபோல் அனுமதியில்லாமல் சில்லிங் சென்டர்களும் அங்கங்கே நடந்து  வருகிறது. இதனால் பொதுமக்கள் பெரிதும் பாதிக்கப்பட்டு வருவதால் மாவட்ட  அளவில் எஸ்.பி.பிரதீப் அதிரடி நடவடிக்கை எடுக்க வேண்டும் எனச் சமூக  ஆர்வலர்கள் வேண்டுகோளும் விடுத்து வருகிறார்கள்.

Next Story

ஆம்ஸ்ட்ராங் கொலை வழக்கு; அருளிடம் போலீசார் தீவிர விசாரணை!

Published on 24/07/2024 | Edited on 24/07/2024
Armstrong murder case; Arul police intensive investigation

பகுஜன் சமாஜ் கட்சியின் மாநிலத் தலைவர் ஆம்ஸ்ட்ராங் (வயது 52) என்பவர் கடந்த 5 ஆம் தேதி (05.07.2024) அன்று மாலை கொலை செய்யப்பட்டார். இது குறித்து செம்பியம் காவல் நிலையத்தில் வழக்குப்பதிவு செய்து விசாரணை நடைபெற்று வருகிறது. இந்த கொலைக்கான காரணத்தைக் கண்டறிந்து சம்மந்தப்பட்ட குற்றவாளிகளை உடனடியாக கைது செய்ய சென்னை பெருநகர காவல் ஆணையாளர் உத்தரவிட்டிருந்தார்.

அந்த உத்தரவின்படி தனிப்படைகள் அமைக்கப்பட்டு ஆற்காடு சுரேஷின் தம்பி பொன்னை பாலு, ராமு, திருவேங்கடம், திருமலை, செல்வராஜ், மணிவண்ணன், சந்தோஷ், அருள், கோகுல், விஜேஷ், சிவசக்தி எனப் பலரும்  கைது செய்யப்பட்டனர். அதே சமயம் பூந்தமல்லி சிறையில் இருந்த பொன்னை பாலு, ராமு, அருள், ஹரிஹரன் ஆகிய நான்கு பேரையும் போலீஸ் பாதுகாப்புடன் எழும்பூர் நீதிமன்றத்தில் ஆஜர்படுத்தினர். 7 நாட்கள் காவலில் எடுத்து விசாரிக்க மனுத்தாக்கல் செய்யப்பட்டிருந்தது.

Armstrong case; Arul police intensive investigation

இதனையடுத்து ஆம்ஸ்ட்ராங் கொலை வழக்கில் கைது செய்யப்பட்ட ஹரிஹரனை நான்கு நாட்கள் காவலில் எடுத்து விசாரிக்கவும், பொன்னை பாலு, ராமு, அருள் ஆகிய மூன்று பேரை மூன்று நாட்கள் காவலில் எடுத்து  விசாரிக்கவும் நீதிமன்றம் அனுமதி வழங்கி உத்தரவிட்டது. இந்த நான்கு பேரையும் பரங்கிமலை பகுதியில் உள்ள ஆயுதப்படை அலுவலகத்தில் வைத்து செம்பியம் போலீசார் தனித் தனியாக விசாரணை செய்து வருகின்றனர்.

இந்நிலையில் கொலைக்கு சதி திட்டம் தீட்டிய பல்வேறு இடங்களுக்கும் அருளை அழைத்துச் சென்று போலீசார் தீவிர விசாரணை நடத்தி வருகின்றனர். அதன்படி வழக்கறிஞர் அருளை பெரம்பூர், புழல் உள்ளிட்ட இடங்களுக்கும் தனியாக அழைத்துச் சென்று விசாரணை நடத்தி வருகின்றனர். ஆம்ஸ்ட்ராங் கொலை வழக்கில் கைது செய்யப்பட்ட அருளை 2வது முறையாக போலீசார் காவலில் எடுத்து விசாரித்து வருவது குறிப்பிடத்தக்கது.