தர்மபுரி அருகே, பிளஸ்2 மாணவியை பாலியல் வன்கொடுமை செய்த இருவரை குண்டர் சட்டத்தில் காவல்துறையினர் கைது செய்தனர்.
தர்மபுரி மாவட்டம் இண்டூரைச் சேர்ந்த பிளஸ்2 மாணவி ஒருவர், கடந்த நவ. 17ம் தேதி, பள்ளிக்கு ஒற்றையடி பாதையில் சைக்கிளில் சென்று கொண்டிருந்தார். அந்த வழியாக வந்த இரண்டு வாலிபர்கள் மாணவியை வழிமறித்து அருகில் உள்ள புதர் பகுதிக்கு தூக்கிச்சென்று பாலியல் வன்கொடுமை செய்தனர். ஒரு கட்டத்தில் மாணவி மயக்கம் அடைந்ததால் அவர்கள் அங்கிருந்து தப்பியோடிவிட்டனர். மயக்கம் தெளிந்து கண் விழித்துப் பார்த்தபோது அரைநிர்வாணமாக கிடந்த மாணவியின் முனகல் சத்தம் கேட்டு, அந்த வழியாக வந்த சிலர் அவரை மீட்டு தர்மபுரி அரசு மருத்துவமனையில் சேர்த்தனர்.
இந்த சம்பவம் குறித்து வழக்குப்பதிவு செய்த பென்னாகரம் மகளிர் காவல்நிலைய காவல்துறையினர், மாணவியை வன்கொடுமை செய்த இண்டூரைச் சேர்ந்த சேகர் மகன் சவுகத் (20), அவருடைய கூட்டாளி மனோகரன் மகன் குமரேசன் ஆகிய இருவரையும் கைது செய்தனர். இதையடுத்து, நீதிமன்ற உத்தரவின் பேரில் அவர்கள் இருவரும் சேலம் மத்தியச் சிறையில் அடைக்கப்பட்டனர்.
இந்நிலையில், சவுகத், குமரேசன் ஆகியோரை குண்டர் சட்டத்தின் கீழ் கைது செய்ய மாவட்ட காவல்துறை எஸ்பி கலைச்செல்வன் மாவட்ட ஆட்சியருக்குப் பரிந்துரை செய்தார். அதன்பேரில் ஆட்சியர் சாந்தி இருவரையும் குண்டர் சட்டத்தில் கைது செய்ய உத்தரவிட்டார். இதனைத்தொடர்ந்து, சவுகத், குமரசேன் ஆகியோரை காவல்துறையினர் குண்டர் சட்டத்தின் கீழ் கைது செய்தனர். சிறையில் அடைக்கப்பட்டுள்ள அவர்களிடம் கைது ஆணையின் நகல் வழங்கப்பட்டது.
- "எல்லாருமே பார்ப்பீங்க" - விவரிக்கும் 'கூச முனுசாமி வீரப்பன்'
- "அதான் அடிச்சு தூக்குனேன்" - கூலாக சொன்ன கூச முனுசாமி வீரப்பன்
