Skip to main content

நக்கீரன் இணைய செய்தி எதிரொலி.. அரசுப் பள்ளி மாணவியின் வீட்டை தேடிச் சென்ற அரசு அதிகாரிகள்!.

Published on 13/07/2021 | Edited on 13/07/2021

 

Echo of Nakkeeran internet news .. Government officials who went in search of the house of a government school student

 

ஒரு கிராமத்தின் கட்டமைப்பு, நிர்வாகம் எப்படி இருக்க வேண்டும், ஏழை கிராம மக்கள் எளிமையாக பயனடைவது என்பது குறித்து கிராமத்தின் புள்ளிவிவரத்தை ஆய்வுசெய்து அதை மத்திய - மாநில அரசுகள் நடைமுறைப்படுத்தக் கோரி குடியரசுத் தலைவர், பிரதமர், முதலமைச்சர், தலைமைச் செயலாளர் என அதிகாரம் படைத்த அனைவருக்கும் அனுப்பிவிட்டு காத்திருந்த மாணவியின் குரல் அரசுகளை எட்டவில்லை. அதனால் நீதிமன்றத்தையும் நாடியுள்ளார் அந்த அரசுப் பள்ளி மாணவி கவுரி.

 

புதுக்கோட்டை மாவட்டம் கறம்பக்குடி தாலுகா உள்ளடங்கிய கலியரான்விடுதி கிராமத்தைச் சேர்ந்த லெட்சுமணன் என்பவரது மகள் கவுரி பட்டுக்கோட்டை அரசு மகளிர் மேல்நிலைப்பள்ளியில் படித்துவருகிறார். மாணவி கவுரி, தான் 8ஆம் வகுப்பு படிக்கும்போது தயாரித்த ஆய்வறிக்கையைப் பாடப்புத்தகத்தில் சேர்க்க வேண்டும் என்ற கோரிக்கையையும் முன்வைத்திருந்தார். இந்தச் செய்தியைக் கடந்த வெள்ளிக்கிழமை "அரசுகளுக்கே ஆலோசனை சொல்லும் அரசுப் பள்ளி மாணவி" என்ற தலைப்பில் மாணவியின் முதல் பேட்டியை நக்கீரன் இணையத்தில் விரிவான முழு வீடியோவாக வெளியிட்டிருந்தோம்.

 

இந்நிலையில்தான், திங்கள்கிழமை காலை மாணவியை தொலைபேசியில் தொடர்புகொண்ட மாவட்ட ஆட்சியரக அலுவலர், “தங்கள் ஆய்வறிக்கையை தலைமைச் செயலகத்தில் கேட்கிறார்கள். எங்கள் அதிகாரி வருவார் கொடுத்தனுப்புங்கள்” என்று கூறியுள்ளார். அதன்படி கறம்பக்குடி ஊராட்சி ஒன்றிய அலுவலர் கலியரான்விடுதிக்குச் சென்று மாணவியின் ஆய்வறிக்கை புத்தகத்தை வாங்கியுள்ளார். அப்போது, “சில நாட்களுக்கு முன்பு கூட ஆட்சியர் அலுவலகத்தில் இதுபற்றி பேச வந்த எங்க அப்பாவிடம் வேறு அலுவகம் போகச் சொன்னாங்களாமே. இப்ப தேடி வந்து வாங்குறீங்களே” என்று மாணவி கவுரி புத்தகம் வாங்க வந்த அதிகாரியிடம் கேட்டுள்ளார்.

 

அதற்கு அவர், “மேல் அதிகாரிகள் சொன்னாங்க, வாங்க வந்தேன்” என்று சொல்லி புறப்பட்டுள்ளார். 3 வருடங்களாக அரசு அலுவலகங்களின் கதவுகளைத் தட்டிய ஆய்வுப் புத்தகம், நக்கீரன் செய்தியால் அதிகாரிகளே தேடிவந்து பெற்றுக்கொள்ளும் நிலைக்கு உயர்ந்துள்ளது. மாணவியின் ‘கிராம ஆட்சியர் திட்டம்’ பற்றி அதிகாரிகள் ஆய்வுசெய்து நடைமுறைப்படுத்தட்டும்.

 

 

சார்ந்த செய்திகள்

Next Story

கடத்தி செல்லப்பட்ட அரசுப் பேருந்து விபத்து

Published on 23/03/2024 | Edited on 23/03/2024
Hijacked government bus accident

புதுக்கோட்டை மாவட்டம் அறந்தாங்கி அரசுப் பேருந்து பணிமனையில் உள்ள அரசுப் பேருந்துகள் அனைத்தும் இரவு நேரங்களில் பணிமனைக்குள் நிறுத்த முடியாததால் அருகே உள்ள பட்டுக்கோட்டை சாலையில் வரிசையாக நிறுத்தப்பட்டிருக்கும். அதிகாலை முதல் ஒவ்வொரு பேருந்தும் அந்தந்த பயண நேரத்திற்கு ஓட்டுநர்கள் ஓட்டிச் செல்வார்கள்.

வழக்கம்போல் நேற்று இரவு பேருந்துகள் சாலை ஓரத்தில் நிறுத்தி வைத்துவிட்டு ஓட்டுநர், நடத்துநர்கள் பணிமனையில் ஓய்வெடுக்கச் சென்று விட்டார். இந்நிலையில் இன்று அதிகாலை திருவாடானை செல்லும் வழியில் ஓரியூர் அருகே வண்டாத்தூர் கிராமத்தில் பிரதானச் சாலையில் ஒரு அரசுப் பேருந்து ஒரு லாரியில் மோதி விபத்துக்குள்ளாகி நின்றது. சத்தம் கேட்டு கிராம மக்கள் ஓடி வந்து பார்த்தபோது லாரி ஓட்டுநர் காலில் பலத்த காயத்துடன் ரத்த வெள்ளத்தில் துடித்துக் கொண்டிருந்தார். அவரை மீட்டு அரசு மருத்துவமனைக்கு அனுப்பி வைத்தனர்.

விபத்தில் சிக்கியிருந்த அந்த பேருந்து அறந்தாங்கி பணிமனையைச் சேர்ந்த அறந்தாங்கியில் இருந்து திருவாடானை செல்லும் TN 55 N 0690 என்பது தெரிய வந்தது. ஆனால் யார் இந்த பேருந்தை ஓட்டி வந்தது என்பது தெரியவில்லை. உடனே அறந்தாங்கி டெப்போவிற்கு தகவல் கொடுத்துள்ளனர். அதன் பிறகே சாலை ஓரம் வரிசையில் நிறுத்தி வைக்கப்பட்டிருந்த பேருந்துகளில் திருவாடானை செல்லும் பேருந்து காணாமல் போனது தெரிய வந்தது.

பணிமனையில் நிறுத்தி இருந்த பேருந்தை யார் கடத்திச் சென்றது என்று போக்குவரத்து கழக அதிகாரிகளும் ஊழியர்களும் விசாரணையில் உள்ளனர். பாதுகாப்பு மற்றும் கவனக்குறைவால் ஒரு பேருந்து கடத்தப்பட்டு விபத்து ஏற்படுத்திய சம்பவம் பரபரப்பை ஏற்படுத்தியுள்ளது. மேலும் போலீசார் விசாரணை செய்து வருகின்றனர்.

Next Story

முதல் கூட்டத்திலேயே முட்டிக் கொண்ட தி.மு.க. - காங்கிரஸ்!

Published on 21/03/2024 | Edited on 21/03/2024
DMK Congress which was knocked out in the first meeting

ராமநாதபுரம் பாராளுமன்றத் தொகுயில் உள்ள அறந்தாங்கி சட்டமன்றத் தொகுதியின் இந்தியா கூட்டணி கட்சிகளின் செயல் வீரர்கள் கூட்டம் அறந்தாங்கியில் உள்ள ஒரு தனியார் மண்டபத்தில் திமுக புதுக்கோட்டை மா.செ அமைச்சர் ரகுபதி தலைமையில் நடந்தது. இந்த கூட்டத்தில் அமைச்சர்கள் ராஜகண்ணப்பன், மெய்யநாதன், ராமநாதபுரம் மா.செ. காதர்பாட்சா (எ) முத்துராமலிங்கம் எம்.எல்.ஏ உட்பட கூட்டணிக் கட்சி நிர்வாகிகள் கலந்து கொண்டனர்.

கூட்டத்தில் இந்தியா கூட்டணி ராமநாதபுரம் வேட்பாளர் கே.நாவஸ்கனி (இந்திய யூனியன் முஸ்லிம் லீக்) அறிமுகம் செய்து வைக்கப்பட்டார். கூட்டத்தில் பேச வந்த அறந்தாங்கி முன்னாள் சட்டமன்ற உறுப்பினர் உதயம் சண்முகம் பேசும், “இப்போது நாங்கள் கூட்டணி கட்சிக்கு வாக்கு சேகரிப்போம் ஆனால், அறந்தாங்கி தொகுதியில் 2026 சட்டமன்றத் தேர்தலில் உதயசூரியனுக்கு வாக்களிக்க வேண்டும் என்பதை அமைச்சர்கள் செய்து தர வேண்டும் இல்லை என்றால் தற்கொலை முயற்சியோடு அறிவாலயம் நோக்கி போவோம்” என்று பேசி கூட்டத்தில் சலசலப்பை உருவாக்கினார்.

அதனைத் தொடர்ந்து பேச வந்த காங்கிரஸ் கட்சியின் புதுக்கோட்டை தெற்கு மாவட்டத் தலைவர் ராம.சுப்புராம் பேசும் போது, “அறந்தாங்கி சட்டமன்ற உறுப்பினர் ராமச்சந்திரன் அவசரப் பணியாக டெல்லி சென்றுள்ளதால் இங்கு வரமுடியவில்லை. ஆனால் இன்றைய போஸ்டரில் அவர் படம் இல்லை இனிமேல் அச்சடிக்கும் போஸ்டர்களில் ராமச்சந்திரன் எம்.எல்.ஏ. படத்தையும் போட வேண்டும்” என்றார். மேலும் அமைச்சர் ராஜ. கண்ணப்பன் பேசும்போது, “நேற்று வேட்பாளர் அறிவிப்பு இன்று விஜயபாஸ்கர் வீட்டில் ரைடு. திராவிடர் இயக்கத்தை ஒழிக்க நினைக்கிறார்கள் பா.ஜ.க.வினர். அது ஒருபோதும் நடக்காது. பாசிக பா.ஜ.க. தான் நம்ம எதிரி அவர்களை வீழ்த்துவோம். அமைச்சர் மெய்யநாதன், “கடந்த முறை பெற்றுத் தந்த வாக்குகளைவிட அதிக வாக்குகளை பெற்றுத் தருவோம்” என்றார்.

DMK Congress which was knocked out in the first meeting

தலைமையுரையாற்றிய அமைச்சர் ரகுபதி, “முதல் கூட்டத்திலேயே சொல்கிறோம் சந்தோசமாக செல்லுங்கள், அறந்தாங்கி தொகுதியில் அதிக வாக்குகள் பெற்றுத் தருவோம். ராமநாதபுரத்திற்கு குடிநீர் கொண்டு வருவதை நாங்கள் தடுக்கவில்லை. எங்களுக்கும் கொஞ்சம் வேண்டும் என்று தான் சொன்னோம்” என்றார். மேலும் உதயம் சண்முகத்திற்கு பதில் சொல்லும் விதமாக, “இந்த முறை ஏணிக்கு வாக்களியுங்கள் அடுத்த முறை (2026) தலைவர் விரும்பினால் உதயசூரியனுக்கு வாக்களிக்கலாம். அதே போல இனிமேல் அச்சடிக்கப்படும் ஒவ்வொரு போஸ்டரிலும் அறந்தாங்கி எம்.எல்.ஏ. படம் அச்சடிக்கப்படும்” என்று காங்கிரஸ் சுப்புராமுக்கும் பதில் கூறுவது போல பேசினார். இறுதியாக பேசிய வேட்பாளர் நவாஸ்கனி, “அனைவரும் ஒற்றுமையாக பணியாற்றி அதிக ஓட்டுகள் பெற்றுத்தர வேண்டும்” என்றார்.

அறந்தாங்கி தொகுதி முதல் செயல்வீரர்கள் கூட்டத்தில் தொகுதி சட்டமன்ற உறுப்பினர் படம் இல்லாமல் வடிவமைக்கப்பட்டதும், 2026 சட்மன்றத் தேர்தலில் உதயசூரியன் சின்னத்திற்கு வாக்களிக்க முடியவில்லை என்றால் அறிவாலயத்தில் தற்கொலை முயற்சி செய்வோம் என்று பேசியதும் சலசலப்பை ஏற்படுத்தியது குறிப்பிடத்தக்கது.