Skip to main content

சிறைபிடிக்கப்பட்ட தமிழக மீனவர்கள் விடுதலை 

Published on 21/11/2023 | Edited on 21/11/2023

 

Captured Tamil Nadu fishermen released

 

இலங்கை கடற்படையினரால் சிறைபிடிக்கப்பட்ட தமிழக மீனவர்களை விடுதலை செய்திருக்கிறது இலங்கையில் உள்ள மன்னார் நீதிமன்றம். விடுதலை செய்யப்பட்ட மீனவர்கள் இன்று சென்னை வந்தனர்.

 

ராமேஸ்வரம் மீன்பிடித் துறைமுகத்திலிருந்து கடந்த 14 ஆம் தேதி 15 மீனவர்கள் மீன் பிடிப்பதற்காகக் கடலுக்குள் சென்றார்கள். இலங்கை கடல் எல்லைக்குள் இவர்கள் புகுந்து விட்டதாகச் சொல்லி, 15 தமிழக மீனவர்களையும் சுற்றி வளைத்து கைது செய்தனர் இலங்கை கடற்படையினர். அவர்களுடைய இரண்டு விசைப் படகுகளையும் கைப்பற்றினர். கைது செய்யப்பட்ட மீனவர்களை இலங்கைக்கு அழைத்துச் சென்று தங்கள் அலுவலகத்தில் அடைத்து வைத்தனர்.

 

கைது செய்யப்பட்ட 15 மீனவர்களும் இந்திய கடல் எல்லையில்தான் மீன் பிடித்தனர் என்றும், இலங்கை கடல் எல்லைக்குள் அவர்கள் செல்லவில்லை என்றும், இந்திய எல்லைக்குள் அத்துமீறி இலங்கை கடற்படையினர்தான் நுழைந்தனர் என்றும் தமிழக மீனவர்கள் தகவல் அனுப்பினர். இந்தத் தகவலை தமிழக அரசின் கவனத்துக்கு ராமேஸ்வரம் மீனவர்கள் கொண்டு சென்றனர். தமிழக அரசும் இதனை மத்திய அரசுக்கு தெரிவித்தது.

 

இதனையடுத்து இந்திய அரசு மேற்கொண்ட முயற்சியில் 15 தமிழக மீனவர்களையும் விடுவித்தது இலங்கை அரசு. விடுவிக்கப்பட்ட தமிழக மீனவர்கள் 15 பேரும் இலங்கையிலிருந்து இன்று காலை சென்னை விமான நிலையம் வந்தனர். அவர்கள் சென்னையிலிருந்து ராமேஸ்வரம் செல்கின்றனர். 

 

சென்னை வந்த மீனவர்கள், “எங்களை விடுவிப்பதற்காக முயற்சி எடுத்த மீனவர் சங்கங்களுக்கும், மத்திய - மாநில அரசுகளுக்கும் நன்றி என்று சொல்வதை தவிர வேறு வார்த்தைகள் எங்களிடம் இல்லை” என்றனர் கண்ணீர் மல்க.

 

இதற்கிடையே, கடந்த அக்டோபர் மாதம் 28 ஆம் தேதி மீன் பிடிக்க கடலுக்குள் சென்ற ராமேஸ்வரம் மீனவர்கள் 38 பேரையும், அவர்கள் சென்ற 3 விசைப் படகுகளையும் கைது செய்தது இலங்கை கடற்படை. இவர்கள் மீது எல்லை தாண்டுதல், தடைசெய்யப்பட்ட வலைகளைப் பயன்படுத்துதல், அனுமதியின்றி மீன் பிடித்தல் உள்ளிட்ட சட்டப் பிரிவுகளின் கீழ்  வழக்குப் பதிவு செய்து, நீதிமன்றத்தில் ஆஜர்படுத்தி சிறையில் அடைத்தது இலங்கை கடற்படை.

 

இந்த வழக்கு மன்னார் நீதிமன்றத்தில் நடந்த நிலையில், தற்போது நிபந்தனைகளுடன் அவர்களை விடுதலை செய்துள்ளது நீதிமன்றம். விடுதலை செய்யப்பட்ட 38 மீனவர்களும் இலங்கையில் உள்ள இந்தியத் தூதரகத்தில் ஒப்படைக்கப்பட்டனர். அவர்களைத் தமிழகத்திற்கு அனுப்பி வைக்கும் ஏற்பாடுகளைச் செய்து வருகிறது இந்தியத் தூதரகம்.

 

 

சார்ந்த செய்திகள்

Next Story

சென்னையை உலுக்கிய வழக்கில் பல வருடங்கள் கழித்து கிடைத்த தீர்ப்பு

Published on 02/03/2024 | Edited on 02/03/2024
The verdict came after many years in the case that rocked Chennai

கடந்த 2018 ஆம் ஆண்டு சென்னையில் கே.கே.நகரில் கல்லூரியில் பயின்று வந்த கல்லூரி மாணவியை இளைஞர் கொலை செய்த சம்பவத்தில் அந்த இளைஞருக்கு அபாரதத்துடன் ஆயுள் தண்டனை வழங்கப்பட்டுள்ளது.

முதலாம் ஆண்டு படித்து வந்த மாணவி அஸ்வினி கல்லூரி முடிந்து வெளியே வந்தபோது அழகேசன் என்ற இளைஞரால் கொடூரமாக கழுத்தறுத்துக் கொல்லப்பட்டார்.

மதுரவாயல் பகுதியைச்சேர்ந்தவர் அஸ்வினி. கடந்த 2018 ஆம் ஆண்டு மார்ச் மாதம் சென்னையில் கே.கே.நகர் மேற்கில் உள்ள மீனாட்சி கல்லூரியில் பி.காம். பயின்று வந்தார். தந்தை இல்லாத நிலையில் தாய்தான் அவரை படிக்க வைத்து வந்தார். அதே பகுதியைச் சேர்ந்த அழகேசன் என்ற இளைஞர் அஸ்வினியை ஒருதலையாக காதலித்து வந்துள்ளார். கடைசிவரை அஸ்வினி அழகேசனின் காதலை ஏற்கவில்லை. இதனால் ஆத்திரம் அடைந்த அழகேசன்,  அஸ்வினியின் வீட்டு வாசலில் வைத்தே கட்டாய தாலி கட்டியுள்ளார். இது குறித்து போலீசில் புகார் தெரிவிக்கவே, போலீசார் அழகேசனை விசாரித்து கண்டித்து அனுப்பி வைத்தனர். ஆனால், அதன்பின்னரும் அஸ்வினியை தொடர்ந்து வந்து தொல்லை கொடுத்து வந்துள்ளார் அழகேசன். இதனால் மதுரவாயல் பகுதியை விட்டு, உறவினர் வீடான ஜாபர்கான் பேட்டையில் தங்கியிருந்து அங்கிருந்து கல்லூரிக்கு வந்து சென்றார் அஸ்வினி.

இந்நிலையில் 09/03/2018 அன்று மதியம் 2.30 மணியளவில் கல்லூரி முடிந்து வெளியே வந்து, லோகநாதன் தெருவில் நடந்து சென்ற அஸ்வினியை மறித்து காதலை ஏற்கச்சொல்லி வற்புத்தினான் அழகேசன்.  அஸ்வினி மறுக்கவே, சற்றும் எதிர்பாராத விதமாக கத்தியை எடுத்து அஸ்வினியின் கழுத்தை அறுத்தான் அழகேசன். இதில், அலறித்துடித்த அஸ்வினி ஓட முயற்சித்தார். ஆனால், ஓட முடியாமல் ரத்த வெள்ளத்தில் மயங்கி சரிந்தார். அஸ்வினியின் அலறல் சத்தம் கேட்டு ஓடி வந்த பொதுமக்கள் அழகேசனை பிடித்து கடுமையாக தாக்கினர்.   அடித்து உதைத்து கை, கால்களை கட்டி சம்பவ இடத்திற்கு போலீசார் வந்ததும் அழகேசனை பொதுமக்கள் அவர்களிடம் ஒப்படைத்தனர்.

இந்த சம்பவம் அந்த நேரத்தில் சென்னையில் பரபரப்பை ஏற்படுத்தியிருந்தது. தொடர்ச்சியாக இந்த வழக்கு நடைபெற்று வந்த நிலையில் வழக்கு விசாரணை சென்னை அள்ளிகுளத்தில் உள்ள மகளிர் சிறப்பு நீதிமன்றத்தில் நீதிபதி முகமது ஃபாரூக் முன்னிலையில் நடைபெற்றது. விசாரணையின் முடிவில் அழகேசன் மீதான குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டதால், அழகேசனுக்கு ஆயுள் தண்டனை விதித்ததோடு, பத்தாயிரத்து ஐநூறு ரூபாய் அபராதமும் விதித்து தீர்ப்பளிக்கப்பட்டுள்ளது.

Next Story

சோதனை முயற்சி; சென்னையில் போக்குவரத்து மாற்றம்

Published on 02/03/2024 | Edited on 02/03/2024
trial attempt; Traffic change in Chennai tomorrow

சென்னையில் மெட்ரோ பணி காரணமாக சோதனை ஓட்டமாக பல இடங்களில் நாளை  போக்குவரத்து மாற்றம் ஏற்படுத்தப்பட இருப்பதாக தகவல்கள் வெளியாகியுள்ளது.

மெட்ரோ ரயில் பணி காரணமாக அண்ணா மேம்பாலம், நுங்கம்பாக்கம், ஸ்டெர்லிங் சாலை ஆகிய பகுதிகளில் மூன்றாம் தேதி மட்டும் சோதனை ஓட்டமாக போக்குவரத்து மாற்றம் செய்யப்படுகிறது. சேத்துப்பட்டிலிருந்து அண்ணா மேம்பாலம் நோக்கி வரும் வாகனங்கள் கல்லூரி சாலை, உத்தமர் காந்தி சாலை வழியாக செல்ல வேண்டும் என அறிவுறுத்தல் கொடுக்கப்பட்டுள்ளது.

அதேபோல் அண்ணா மேம்பாலத்தில் இருந்து வரும் வாகனங்கள் எம்ஜிஆர் சாலை வழியே வள்ளுவர் கோட்டம் நோக்கி செல்லும் வகையில் மாற்றம் செய்யப்பட்டுள்ளது. அமைந்தகரை நோக்கிச் செல்லும் வாகனங்கள் நெல்சன் மாணிக்கம் சாலை வழியாக செல்லும் வகையில் போக்குவரத்து மாற்றம் செய்யப்பட்டுள்ளது. வள்ளுவர் கோட்டத்தில் இருந்து அண்ணா மேம்பாலம் செல்லும் வாகனங்கள் உத்தமர் காந்தி சாலை வழியாக செல்லும் என அறிவுறுத்தல்கள் கொடுக்கப்பட்டுள்ளது.