Skip to main content

நம்மாழ்வார் பெயரில் விருது; ரூ. 5 லட்சம் காசோலை - வேளாண் பட்ஜெட்டில் அரசு அறிவிப்பு

Published on 21/03/2023 | Edited on 21/03/2023

 

Award in the name of Nammalvar; 5 lakh cheque; Government announcement on Agriculture Budget

 

அடுத்த நிதியாண்டிற்கான தமிழ்நாடு அரசின் பொது பட்ஜெட் நேற்று தாக்கல் செய்யப்பட்டது. நிதியமைச்சர் பழனிவேல் தியாகராஜன் தாக்கல் செய்த இந்த பட்ஜெட்டில் பல முக்கிய அறிவிப்புகள் வெளியானது. இந்நிலையில் இன்று வேளாண் பட்ஜெட்டை அமைச்சர் எம்.ஆர்.கே.பன்னீர்செல்வம் தாக்கல் செய்து வருகிறார்.

 

முதலமைச்சர் மு.க.ஸ்டாலின் தலைமையில் அரசு பொறுப்பேற்ற 2021 ஆம் ஆண்டு முதல் வேளாண்துறைக்கு தனியாக நிதிநிலை அறிக்கை தாக்கல் செய்யப்பட்டு வருகிறது. அந்தவகையில் மூன்றாவது முறையாக அடுத்த நிதியாண்டிற்கான வேளாண் பட்ஜெட்டை வேளாண் மற்றும் உழவர் நலத்துறை அமைச்சர் எம்.ஆர்.கே.பன்னீர்செல்வம் இன்று தாக்கல் செய்து வருகிறார்.

 

பச்சைநிறத்துண்டு அணிந்து பட்ஜெட்டை தாக்கல் செய்த அமைச்சர் எம்.ஆர்.கே. பன்னீர்செல்வம், ஆர்கானிக் எனப்படும் அங்கக வேளாண் திட்டத்திற்கு வேளாண் பட்ஜெட்டில் ரூ.26 கோடி ஒதுக்கீடு செய்யப்பட்டுள்ளது. வேளாண்மையில் நம்மாழ்வார் ஆற்றிய பெரும் பங்கை எடுத்துரைக்கும் விதமாக இயற்கை வேளாண்மையில் ஈடுபடுபவர்களுக்கு, தமிழ்நாடு அரசால் நம்மாழ்வார் பெயரில் விருது வழங்கப்படும்; இவ்விருது ரூ.5 லட்சம் காசோலையுடன், பாராட்டு பத்திரம் குடியரசு தினத்தன்று வழங்கப்படும்

 

200 வேளாண் தோட்டக்கலை பட்டதாரிகளுக்கு புதிய தொழில் தொடங்க தலா ரூ.2 லட்சம் நிதி வழங்கப்படும்; தோட்டக்கலை துறை அதிகாரிகள் தலைமையில் விவசாயிகளுக்கு சாகுபடி தொழில்நுட்பங்கள், வானிலை முன்னறிவிப்புகள் போன்ற தகவல்களை உடனுக்குடன் தெரிவிக்க வட்டார அளவில் வாட்ஸாப் குழுக்கள் அமைக்கப்படும்.

 

பயிர் காப்பீடு திட்டத்திற்கு மாநில அரசின் பங்கீடாக ரூ.2,331 கோடி ஒதுக்கீடு; பருவத்திற்கு ஏற்ற பயிர் தொழில்நுட்பம் பற்றிய தகவல்களை உழவர்களுக்கு பகிர்வதற்காக விவசாயிகளை ஒருங்கிணைத்து கிராம வேளாண் முன்னேற்றக் குழு அமைக்கப்படும்; 3 - 4 கிராமங்களுக்கு ஒரு வேளாண் விரிவாக்க அலுவலர் நியமனம்; ஆதிதிராவிட சிறு குறு விவசாயிகளுக்கு 11 கோடி செலவில் விவசாய கருவிகளுக்கு 20% கூடுதல் மானியம் வழங்கப்படும்

 

60,000 சிறு குறு மற்றும் நிலமற்ற வேளாண் தொழிலாளர்களுக்கு வேளாண் கருவிகள் தொகுப்பு ரூ.15 கோடி செலவில் வழங்கப்படும்; சேலம், அமராவதி கூட்டுறவு சர்க்கரை ஆலைகளில் கழிவு மண்ணிலிருந்து மதிப்பு கூட்டப்பட்ட இயற்கை உரம் தயாரிக்க ரூ.3 கோடி நிதி ஒதுக்கீடு; கோவையில் கருவேப்பிலை சாகுபடியை அதிகரிக்க 5 ஆண்டுகளில் 1,500 ஹெக்டேரில் செயல்படுத்த ரூ.2.5 கோடி ஒதுக்கீடு போன்ற பல்வேறு அறிவிப்புகளை வெளியிட்டார்.

 


 

சார்ந்த செய்திகள்

Next Story

நம்மாழ்வார் பிறந்த தினம்; புற்று மண் குளியல் பற்றிய விழிப்புணர்வு நிகழ்ச்சி

Published on 15/04/2023 | Edited on 15/04/2023

 

nammazhwar birthday celebration ariyalur awareness programme

 

அரியலூர் மாவட்டம் குந்தபுரம் கிராமத்தில் இயற்கை வேளாண் விஞ்ஞானி நம்மாழ்வார் பிறந்த தினத்தை முன்னிட்டு புற்று மண் குளியல், கிராம வாழ்வியல் இயற்கை மருத்துவ சங்கம் சார்பில் செயலாளர் தங்க சண்முக சுந்தரம் தலைமையில் நடைபெற்றது.

 

புற்று மண் குளியல் செய்யும் முறையைப் பற்றி கிராம வாழ்வியல் இயற்கை மருத்துவ சங்க செயலாளர் கூறுகையில், "புற்று மண் பரவலாக எல்லா இடங்களிலும் கிடைக்கிறது. இன்றளவும் குழந்தைகளுக்கு தோலில் சிவப்பாக தடிப்பு போலவும் அடிக்கடி புண் வரும் போது குயவர்களிடத்தில் சென்று மண்ணால் எழுதுவது என்ற சிகிச்சை முறை தொன்று தொட்டு இருந்து வருகிறது. மண்ணால் உடலில் பூசி விடுவார்கள் பிறகு குழந்தைகளுக்கு அக்கி என்று சொல்லக்கூடிய இருந்த நாள்பட்ட சிரங்கு, படை போன்ற நோய்கள் உடலில் உண்டாகும். இதனை ஆங்கில மருத்துவத்தில் தீர்க்க முடியாது காரணம் ஆங்கில மருந்து மாத்திரைகள் கெமிக்கல் மூலம் தயாரிக்கப்பட்டவை. இவை சாப்பிடும் போது உடலில் அதிக சூடு ஏற்படும் அதன் காரணமாக குழந்தைகளுக்கு ஏற்பட்ட அக்கி என்று சொல்லக்கூடிய நோய்கள் மேலும் அதிகரிக்கும் தீராது.

 

எனவேதான் கிராமப்புறங்களில் இன்றளவும் குழந்தைகளுக்கு சிறுவர்களுக்கு ஏற்படும் இந்த அக்கி என்ற நோய்க்கு மண்பாண்ட குயவர்களிடம் சென்று இந்த புற்றுக் கரைசல் மண்ணை ஒரு குச்சியால் தொட்டு சிவந்து உள்ள இடங்களில் வளைவு வளைவாக எழுதுவார்கள் இப்படி எழுதுவதன் மூலம் உடலில் குளிர்ச்சி ஏற்பட்டு நோய் தீருவதை கண்கூடாக பார்க்கின்றோம். பார்க்க முடியும். அதே போல புற்று மண்ணை எடுத்து தூசு துப்பு இல்லாமல் சலித்து பாதுகாப்பாக வைத்து கொண்டு தேவை ஏற்படும் போது முதல் நாள் இரவே புற்றிலிருந்து எடுத்த மேல் மண்ணை தண்ணீரில் ஊற வைத்து விட வேண்டும். பின்னர் அடுத்த நாள் காலையில் 8 மணியிலிருந்து 10 மணிக்குள் இளம் வெயிலில் தலை முதல் பாதம் வரை உடலில் பூசி வெயிலில் நிற்க நன்றாக காய்ந்து உலர்ந்த பின்னர் ஆறுகளிலோ குளங்களிலோ ஏரிகளிலோ அல்லது கிணற்று நீரிலோ குளிக்க உடல் மிகவும் ஆரோக்கியமாக இருக்கும்.

 

மண் குளியல் செய்த அன்று எளிய உணவுகளை உண்ண வேண்டும். நல்ல உறக்கம் வரும். மேலும் ரத்த ஓட்டத்தில் தடை இருந்தால் அதனை போக்கி நல்ல ரத்தம் ஓடும். நல்ல பசி எடுக்கும் நாள்பட்ட கால் வலி தீரும். இயற்கையான நோய் தீர்க்கும் சிகிச்சை முறை இது பக்கவிளைவுகளற்றது. இந்த சிகிச்சையை குழந்தைகள் முதல் பெரியவர்கள் வரை அனைவரும் பயன்படுத்தலாம். செல்போன் பயன்பாட்டால் வரும் உடல் சூட்டைத் தணிக்கும் கோடை காலத்தில் அனைவரும் செய்து கொள்ள உடலில் தேங்கிய நாள்பட்ட கழிவுகள் நீங்கும்" என்கிறார் தங்க சண்முகசுந்தரம். 

 

 

Next Story

வேளாண் பட்ஜெட்; இபிஎஸ் செய்யாததை முதல்வர் செய்தார்!

Published on 23/03/2023 | Edited on 23/03/2023

 

tn agri budget thanjavur thiruvarur nagapattinam farmres happy 

 

தமிழக பட்ஜெட் கூட்டத்தொடரில் நேற்று முன்தினம் விவசாயிகளுக்கு தனி பட்ஜெட் 3வது முறையாக தாக்கல் செய்யப்பட்டது. 2023-24 ஆம் ஆண்டின் வேளாண்மை, அதன் தொடர்புடைய துறைகளான கால்நடை பராமரிப்புத்துறை, மீன்வளத்துறை, நீர்வள ஆதாரத்துறை, எரிசக்தி, ஊரக வளர்ச்சித் துறை, கூட்டுறவு, உணவுத்துறை, வருவாய் துறை, வனத்துறை, பட்டு வளர்ச்சித்துறை, குறு சிறு மற்றும் நடுத்தரத் தொழில் நிறுவனங்கள் ஆகியவற்றின் மானிய கோரிக்கைகளின் கீழ் 38 ஆயிரத்து 904 கோடியே 46 லட்சத்து ஆறு ஆயிரம் ரூபாய் ஒதுக்கீடு செய்யப்பட்டுள்ளது.

 

இந்த பட்ஜெட்டில் டெல்டா மாவட்டங்களில் உள்ள விவசாயிகளிடம் பெரும் வரவேற்பை பெற்றிருந்தாலும், திருச்சி மாவட்டத்திற்கென பல்வேறு சிறப்பு திட்டங்கள் அறிவிக்கப்பட்டுள்ளது பெரும் வரவேற்பை பெற்றுள்ளது. அதில் முக்கிய அறிவிப்பாக திருச்சி முதல் நாகப்பட்டினம் வரை வேளாண் சார்ந்த தொழிற்சாலைகள் அமைக்கும் திட்டத்தை அறிவித்துள்ளது. இந்த திட்டம் கடந்த அதிமுக எடப்பாடி அரசால் தொடங்கப்பட்டு அதற்காக 12 பேர் கொண்ட குழு அமைக்கப்பட்டதோடு, அந்த திட்டத்தை அதிமுக அரசு தொடர்ந்து செயல்படுத்தாமல் அப்படியே கிடப்பில் போட்டது. அதேசமயம் கடந்த இரண்டு வருடங்களாக திமுக அரசு அதை கையில் எடுக்காமல் தற்போது இந்த வேளாண் பட்ஜெட்டில் அந்த திட்டத்தை கையில் எடுத்துள்ளது. இந்த திட்டத்தை செயல்படுத்தினால் அதிக வேலைவாய்ப்பு உருவாக்கும் என்ற நோக்கில் இந்த திட்டம் செயல்பாட்டிற்கு வந்திருக்கலாம் என்று விவசாயிகள் மகிழ்ச்சி தெரிவித்துள்ளனர்.

 

அதேபோல் திருச்சி மாவட்டம் எண்ணெய் வித்து சிறப்பு மண்டலமாக அறிவிக்கப்பட்டுள்ளது. அதற்கு முக்கிய காரணம் திருச்சி மாவட்டத்தில் உள்ள லால்குடி பகுதியில் 1500 ஹெக்டேர் எள் பயிரிடப்பட்டு வருகிறது. அதற்கு முக்கிய காரணம் பிரபல தனியார் நல்லெண்ணெய் நிறுவனம், லால்குடி பகுதியில் உற்பத்தி செய்யப்படும் எள்ளுக்கு நல்ல மவுசு இருப்பதால், இந்த பகுதியில் உள்ள எள்ளை மட்டுமே கொள்முதல் செய்வதில் அந்நிறுவனம் ஆர்வம் காட்டுகிறது. இவர்கள் காட்டிய ஆர்வம் தான், தற்போது வேளாண் பட்ஜெட்டில் எதிரொலிக்கிறது என்று விவசாயிகள் தரப்பில் கூறப்படுகிறது. அந்த தனியார் நிறுவனம் தரும் எள் விதைகளை மட்டும் விவசாயிகள் உற்பத்தி செய்ய ஆர்வம் காட்டுவதாகவும் கூறப்படுகிறது.

 

திருச்சி மாவட்டத்தில் பல அதிகாரிகள் மாவட்ட ஆட்சியர்களாக பணியாற்றி இருந்தாலும் ஒரு சில அதிகாரிகள் மட்டும் தான் துறையூர் பச்சைமலை பகுதியில் வசித்து வரும் பழங்குடியின மக்களுக்கு வாழ்வாதாரம் தொடர்பான சில வசதிகளை ஏற்படுத்தி கொடுத்துள்ளனர். அந்த வகையில் திருச்சி மாவட்ட ஆட்சியர் பிரதீப்குமார், பச்சைமலை பகுதியில் வசித்து வரும் பழங்குடியினருக்கு தன்னுடைய முயற்சியால் அவர்களுக்கு 100க்கும் மேற்பட்டவர்களுக்கு பட்டா வழங்கி உள்ளார். தற்போது அவருடைய சீரிய முயற்சியால் இந்த பட்ஜெட்டில் பச்சைமலை உள்ளிட்ட பழங்குடியினர் அதிகம் வசிக்கும் மலைகளில் வாழ்வாதாரம் மேம்பட பல்வேறு துறைகள் இணைந்து பழங்குடியினரின் வாழ்வாதாரத்தை பெருக்க திட்டம் அறிவிக்கப்பட்டுள்ளது.

 

tn agri budget thanjavur thiruvarur nagapattinam farmres happy 

 

திருச்சி மாவட்டத்தில் உள்ள பச்சைமலை பகுதியில் கடந்த 50 ஆண்டுகளுக்கும் மேலாக தோட்டக்கலைத்துறை பயிர்கள் மட்டுமே உற்பத்தி செய்யப்பட்டு வந்த நிலையில், இந்த ஆண்டு முதல் வேளாண்மைத்துறை பயிர்களும் உற்பத்தி செய்திட நடவடிக்கை எடுக்கப்பட உள்ளது. அங்குள்ளவர்களுக்கு உரிய பட்டா மற்றும் அடிப்படை வசதிகளை செய்து தர ஊரக வளர்ச்சித் துறை உள்ளிட்ட பல்வேறு துறைகள் பயன்படுத்தப்பட உள்ளது. மேலும் இந்த பகுதியில் அதிக அளவில் முந்திரி உற்பத்தி நடைபெறுவதால், முந்திரி பருப்பு மற்றும் முந்திரி எண்ணெய் எடுப்பதற்கான ஒரு ஆலை வேண்டும் என்ற கோரிக்கை வைக்கப்பட்டுள்ளது.

 

தமிழகத்தில் ஒருசில இடங்களில் மட்டுமே செங்காந்தள் மலர் உற்பத்தி நடைபெற்று வரும் நிலையில், மற்ற மாவட்டங்களில் இதன் உற்பத்தியை அதிகரிக்க ஏற்கனவே வழங்கப்பட்டு வந்த மானியங்கள் மீண்டும் வழங்கப்பட்டால் இதன் உற்பத்தியை அதிகரிக்க வாய்ப்பு உள்ளதாக விவசாயிகள் கருதுகின்றனர். இந்நிலையில் திருச்சி மாவட்டத்தில் முதல்முறையாக செங்காந்தள் மலர் உற்பத்தியை பெருக்க விதைகளை ஒழுங்குமுறை விற்பனைக்கூடங்கள் மூலம் வர்த்தகம் செய்ய நடவடிக்கை மேற்கொள்ளப்படும் என்று பட்ஜெட்டில் அறிவிக்கப்பட்டுள்ளது. தற்போது குறைந்தபட்சமாக 36 ஹெக்டேர் வரை மட்டுமே பயிரிடப்பட்டு உற்பத்தி செய்யப்பட்ட இந்த செங்காந்தள் மலர்கள் அரசின் விற்பனை கூடங்கள் மூலம் கொள்முதல் செய்யப்பட்டால் விவசாயிகள் மகிழ்ச்சி அடைவார்கள் என்று கூறப்படுகிறது.

 

மேலும் தமிழகத்தில் தடுப்பணைகளை அதிகரிக்க எந்தவித திட்டமும் அறிவிக்கப்படவில்லை என்ற கோரிக்கை விவசாயிகளிடம் எழுந்துள்ளது. தடுப்பணைகளால் தான் நிலத்தடி நீர்மட்டம் குறையாமல் உள்ளது. எனவே தடுப்பணைகளை அதிகரித்தால் நிலத்தடி நீர்மட்டம் குறையாமல் எல்லா காலத்திலும் தண்ணீர் கிடைக்கும். எனவே அரசு இந்த வேளாண் பட்ஜெட்டில் அறிவித்துள்ள பெரும்பாலான திட்டங்கள் விவசாயிகளிடம் பெரும் வரவேற்பை பெற்றுள்ளது. ஆனால், இந்த திட்டங்களை அரசு முழுமையாக செயல்படுத்தினால் விவசாயிகள் பயனடைவார்கள்.