Skip to main content

''நீயும் எம்ஜிஆரும் ஒண்ணா; என்ன திமிர் உனக்கு'' - வெகுண்டெழுந்த ஓபிஎஸ்

Published on 25/04/2023 | Edited on 25/04/2023

 

 "You and MGR are one and the same; what arrogance do you have?"

 

அதிமுகவின் முப்பெரும் விழாவினைக் கொண்டாடவும், தனது பலத்தை நிரூபிக்கவும் திருச்சியில் மாநாட்டினை ஏற்பாடு செய்திருந்தார் ஓபிஎஸ். திருச்சி பொன்மலை ஜி கார்னர் மைதானத்தில் நடந்த இந்த மாநாட்டில் பல்லாயிரக்கணக்கில் அவரது ஆதரவாளர்கள் கலந்து கொண்டனர். மாநாட்டில் பண்ருட்டி ராமச்சந்திரன், வைத்திலிங்கம், கு.ப.கிருஷ்ணன், வெல்லமண்டி நடராஜன், மனோஜ் பாண்டியன், ஜே.சி.டி. பிரபாகரன் ஆகியோர் கலந்து கொண்டனர்.

 

மாநாட்டில் பல்வேறு விஷயங்கள் குறித்து ஓ.பன்னீர்செல்வம் மற்றும் அவரது தரப்பைச் சேர்ந்தவர்கள் பேசினர்.  அதில் எடப்பாடி பழனிசாமி எம்ஜிஆர்போல் தொப்பி, கண்ணாடி அணிந்து போட்டோவிற்கு போஸ் கொடுத்ததை பற்றி ஓபிஎஸ் பேசுகையில், ''தனக்குத்தானே அதிமுகவின் பொதுச்செயலாளராக தானே முடி சூட்டிக்கொண்டு. ஐயோ ஒரு கேலிக்கூத்து... எம்.ஜி.ஆர் என்றால் அவருக்கு ஒரு அடையாளம் இருக்கிறது. ஒரு அழகான தொப்பி, கருப்பு கண்ணாடி. அந்த தொப்பிக்கும் அந்த கருப்பு கண்ணாடிக்கும் அழகு சேர்த்தவரே எம்ஜிஆர். அதைப் போட்டுக் கொண்டு கேமராவில் நின்று போஸும் கொடுக்கிறாயே. எவ்வளவு பெரிய அநியாயம். எவ்வளவு பெரிய அக்கிரமம். நீயும் எம்ஜிஆர்  ஒண்ணா. அவருடைய கால் தூசிக்கு நீ ஆக மாட்டாய். அவர் ஒரு கருணைக்கடல், அன்பு தெய்வம், கொடை வள்ளல். இந்த இயக்கத்தை தனக்கு பின்னால் யார் வழி நடத்திச் செல்ல வேண்டும் என்று தீர்க்கதரிசனமாக ஜெயலலிதாவை தந்த தலைவர். உனக்கும் அவருக்கும் என்ன இருக்கிறது.

 

இந்த திருச்சி கூட்டம் 2011 சட்டமன்ற தேர்தலில் எதிர்நோக்கி ஜெயலலிதா எங்களை அழைத்து தமிழ்நாடு தழுவிய முக்கியமான இடங்களில் கூட்டங்கள் நடத்தப்படும் என்று சொன்னதன் அடிப்படையில் முதலில் கோயம்புத்தூர் அடுத்து திருச்சியில் நடத்தினோம். இந்த திருச்சிதான் மிகப்பெரிய அரசியல் மாற்றத்தைக் கொண்டு வந்தது. அந்த கூட்டத்தின் மூலமாக அடுத்த முதலமைச்சர் ஜெயலலிதா என்று தீர்மானித்த மாநகரம் இது. இந்த நகரத்தில் பொன்னி நதிக்கரையில் நின்றுகொண்டு நான் கேட்கிறேன் தொண்டனும் கழகத்தினுடைய உச்ச பதவிக்கு வர வேண்டும் என்று எம்ஜிஆர் சொன்ன சட்ட விதி மாற்றப்பட்டு அதிமுகவின் உச்ச பதவிக்கு வருகின்றவர்களை  10 மாவட்டச் செயலாளர்கள் முன்மொழி வேண்டுமாம். பத்து மாவட்ட கழகச் செயலாளர்கள் வழிமொழிய வேண்டுமாம், ஐந்து வருடம் தலைமை கழகத்தினுடைய பதவியை வகிக்க வேண்டுமாம்.

 

என்ன திமிர் உனக்கு. கோடிக்கணக்கான பணத்தை குவித்து வைத்துக் கொண்டு அதை வைத்து மாவட்டச் செயலாளர்களையும், தலைமைக் கழகத்தின் நிர்வாகிகளையும் விலைக்கு வாங்கிக் கொண்டு பொதுச்செயலாளராக வருவதற்காக சட்டவிதியை மாற்றியுள்ளீர்கள். என்னுடைய தலைவர் எம்ஜிஆர் சாதாரண தொண்டன் கூட அதிமுகவின் பொதுச்செயலாளராக வர முடியும் என்ற வரலாற்றை உருவாக்கியவர். இந்தியாவில் அல்ல உலகத்திலேயே முதலில் தலைமை பொறுப்புக்குத்தான் தேர்தல் நடக்கும். அந்த தேர்தலும் அடிப்படை தொண்டர்களால் வாக்கு போட்டு தேர்ந்தெடுக்கப்பட வேண்டும் என்ற சட்ட விதியை கொண்டு வந்து, அந்த சட்ட விதிக்கு உயிர் கொடுத்தவர், உரமேற்றியவர், நின்று காட்டியவர் ஜெயலலிதா. அதையும் மாற்றி விட்டீர்கள். இது ஜெயலலிதாவிற்கு செய்த மிகப்பெரிய துரோகம்''என்றார்.

 

 

சார்ந்த செய்திகள்

 

Next Story

'பாஜகவிற்கு ஜால்ரா அடிக்கும் அவசியம் அதிமுக தொண்டர்களுக்கு இல்லை'-புகழேந்தி பேட்டி

Published on 21/07/2024 | Edited on 21/07/2024
'AIADMK workers don't need to beat Jalra for BJP'-pugahendi interview

பாஜகவிற்கு ஜால்ரா அடித்து அவர்களின் கால்களில் விழக்கூடிய அவசியம் அதிமுக தொண்டர்களுக்கு இல்லை என அதிமுக ஒருங்கிணைப்பு குழு புகழேந்தி தெரிவித்துள்ளார்.

அதிமுக ஒருங்கிணைப்பு குழு பெங்களூர் புகழேந்தி  இன்று ஓசூர் சார் ஆட்சியர் அலுவலகம் அருகே உள்ள அம்மா உணவகத்திற்கு வருகை தந்தார். இன்று ஜூலை 21 ஆம் தேதி அவரது பிறந்தநாள் என்பதால் அவரது ஆதரவாளர்கள் மற்றும் அதிமுக ஒருங்கிணைப்பு குழுவை சேர்ந்தவர்கள் அவருக்கு சால்வை அணிவித்து பிறந்தநாள் வாழ்த்து தெரிவித்தனர். அதனைத் தொடர்ந்து அவர் அம்மா உணவகத்தில் வழங்கப்பட்ட உணவை பெற்று உணவகத்தில் சாப்பிட்டார். அதேபோல் அவருடன் வந்த அதிமுக ஒருங்கிணைப்பு குழுவை சேர்ந்தவர்களும் அங்கு உணவு உண்டனர்.

அதனைத்தொடர்ந்து செய்தியாளர்களுக்கு பேட்டியளித்த புகழேந்தி பேசுகையில், 'தமிழகத்தில் காலை சிற்றுண்டியை துவக்கி வைத்த தமிழக முதல்வருக்கு நன்றியை தெரிவித்தேன், பெருந்தலைவர் காமராஜர் உணவு திட்டம் ஆரம்பித்தார், எம்ஜிஆர் சத்துணவு வழங்கினார். அதனை மெருகூடியவர்  ஜெயலலிதா. அந்த வழியில் தமிழக முதல்வர் ஸ்டாலின் அதை செய்தார்கள் என பாராட்டினேன். ஆனால் யாரும் எதிர்பாராத விதமாக முதலமைச்சர் ஸ்டாலின் அம்மா உணவகத்திற்கு நேரில் சென்று 21 கோடி ரூபாயை மேம்பாட்டிற்காக ஒதுக்கியுள்ளார். இதனை பாராட்டுக்குரிய விஷயமாக நாங்கள் பார்க்கிறோம்.

எங்களை பொறுத்தவரையில் நல்லவைகளை செய்யும்போது பாராட்டுகிறோம். அது மக்களுக்கு எதிராக திரும்பும் போது அதனை எதிர்க்கிறோம், அந்த வகையில் 21 கோடி ரூபாயை அம்மா உணவகத்திற்கு ஒதுக்கிய முதலமைச்சரை மனப்பூர்வமாக பாராட்டுகிறோம் என தெரிவித்தார். 4 ஆண்டுகளாக எடப்பாடி பழனிசாமி  அம்மா உணவகத்திற்கு எந்த நிதியையும் ஒதுக்கவில்லை, ஆட்சியில் இருந்தார், போனார், உணவு பொருள்களில் ஊழல் செய்தார் என வழக்கு தொடர்ந்தேன். வழக்கு மன்றத்தில் உள்ளது. இதுதான் அவரது சாதனை. எந்த நிதியையும் அம்மா உணவகத்திற்கு ஒதுக்காமல் ஏமாற்றி வந்தவர் எடப்பாடி பழனிசாமி. ஒதுக்கியவர் ஸ்டாலின் எனவே இரண்டையும் சொல்லியாக வேண்டும். ஜெயலிதாவை நினைவில் நிறுத்தி அவர்கள் நிதியை ஒதுக்கி இருக்கிறார்கள். இந்தத் திட்டத்தை மேலும் மேலும் வளர்ச்சியடைய செய்யுங்கள். பெரும் அளவில் பெருமை செய்யுங்கள்.இந்தத் திட்டம் தொடர பல கோடி ரூபாயை நிதி ஒதுக்கி அம்மா உணவகங்களை மேம்படுத்த வேண்டும் என தெரிவித்தார்.

'AIADMK workers don't need to beat Jalra for BJP'-pugahendi interview

மின் கட்டண உயர்வு என்பது தொடர்ந்து காலம் காலமாக இருந்தாலும், விக்கிரவாண்டி இடைத்தேர்தல் முடியும் வரை மின்கட்டணம் உயர்த்தப்படவில்லை, ஆனால் தற்போது மின் கட்டணம் உயர்த்தப்பட்டுள்ளது என்பதை சுட்டிக் காட்ட வேண்டியது எதிர்க்கட்சிகளின் கடமையாகும்,. அதனை அவர்கள் சுட்டிக் காட்டி உள்ளார்கள். முதலமைச்சர் அதனை பரிசீலனை செய்து மின் கட்டணத்தை குறைப்பதற்கு முடிவெடுத்தால் மக்களுக்கு நன்மையாக இருக்கும் என்றார். மத்திய அரசுடன் இணக்கமாக இல்லை என்றால் மத்திய அரசு தமிழகத்திற்கு எதையும் செய்யாதா, பிரதமர் மோடி எதையும் செய்ய மாட்டாரா, பாரதப் பிரதமரின் நாற்காலி ஆட்டத்தில் உள்ளது. அது நிரந்தரமான நாற்காலியாக இல்லை, 60 சீட்டுகள் தான் வித்தியாசமாக உள்ளது. மத்திய அரசின் ஆட்சி நிதீஷ்குமார் சந்திரபாபு நாயுடு ஆகியோரின் கையில் உள்ளது. எப்பொழுது வேண்டுமானாலும் அந்த நாற்காலியை அவர்கள் தள்ளி விடுவார்கள் என்பதில் எனக்கு மாற்று கருத்து இல்லை. இந்திய அரசியலமைப்பு சட்டத்தை மாற்றுவேன் என துடித்த பிரதமருக்கு கிடைத்த நீதி தான் தற்போது முடிந்த தேர்தல், 40 நாடாளுமன்ற உறுப்பினர்கள் மட்டுமல்ல, எதிர்க்கட்சிகள் வலுப்பெற்றுள்ளது. ஜனநாயகம் தலைத்தோங்கி உள்ளது.

பிரதமரும் பாரதிய ஜனதா கட்சியும் நினைத்ததை செய்ய முடியாது. அது நடக்கவே நடக்காது என்ற நிலைப்பாடு இப்போது எழுந்துள்ளது. நாங்கள் அதிமுக கொடி பிடித்து அம்மாவின் புகழை சொல்லி வளர்ந்தவர்கள் நாங்கள் பாஜக மற்றும் மோடி அவர்களை ஒரு கட்சியாக பார்க்கிறோம், ஆனால் ஜால்ரா அடித்து அவர்களின் கால்களில் விழக்கூடிய அவசியம் அதிமுக தொண்டர்களுக்கு இல்லை என தெரிவித்தார்.

Next Story

ஆம்ஸ்ட்ராங் கொலை வழக்கில் சிக்கிய அதிமுக கவுன்சிலர்; எடப்பாடி பழனிசாமி அதிரடி நடவடிக்கை!

Published on 20/07/2024 | Edited on 20/07/2024
EPS action on AIADMK councilor involved in Armstrong incident case

தமிழக பகுஜன் சமாஜ் கட்சியின் மாநில தலைவர் ஆம்ஸ்ட்ராங் கடந்த 5 ஆம் தேதி (05.07.2024) இரவு பெரம்பூரில் உள்ள அவரது வீட்டின் அருகே 6 பேர் கொண்ட மர்ம கும்பலால் வெட்டி படுகொலை செய்யப்பட்டார். இது தொடர்பாக சரணடைந்த ஆற்காடு சுரேஷின் தம்பி பொன்னை பாலு, ராமு, திருவேங்கடம், திருமலை, செல்வராஜ், மணிவண்ணன், சந்தோஷ், அருள், கோகுல், விஜேஷ், சிவசக்தி ஆகிய 11 நபர்களும் போலீசார் கஸ்டடியில் எடுக்கப்பட்டு விசாரணை நடைபெற்றது. இத்தகைய சூழலில் இந்த வழக்கில் தொடர்புடைய முக்கிய குற்றவாளியான பிரபல ரவுடி திருவேங்கடம் 14.07.2024 அன்று அதிகாலை என்கவுண்டர் செய்யப்பட்டது பரபரப்பை ஏற்படுத்தியது.

இதனையடுத்து, வழக்கறிஞர் ஹரிஹரன் என்பவரும், தாதாவின் மனைவி மலர்க்கொடி என்பவரும் கைது செய்யப்பட்டதாக தகவல்கள் வெளியாகி இருந்தது. மேலும், ஆம்ஸ்ட்ராங் வழக்கு தொடர்பாக தேடப்பட்டு வந்த முன்னாள் பா.ஜ.க நிர்வாகி அஞ்சலையை கைது செய்தனர் . இதையடுத்து, ஆம்ஸ்ட்ராங் கொலை வழக்கில் ஏற்கெனவே கைதான அருள் என்பவரின் செல்போன், திருவள்ளூர் மாவட்டம் கடம்பத்தூர் 3வது வார்டு அ.தி.மு.க ஒன்றிய கவுன்சிலராக பொறுப்பு வகித்து வரும் ஹரிதரன் என்பவரிடம் இருந்ததால் அவரை போலீசார் கைது செய்து விசாரணை நடத்தி வருகின்றனர். 

இந்த நிலையில், அதிமுக கவுன்சிலர் ஹரிதரன் மீது அதிமுக பொதுச் செயலாளர் எடப்பாடி பழனிசாமி நடவடிக்கை எடுத்துள்ளார். இது குறித்து எடப்பாடி பழனிசாமி வெளியிட்ட அறிக்கையில், ‘கழகத்தின் கொள்கை-குறிக்கோள்களுக்கும் கோட்பாடுகளுக்கும் முரணான வகையில் செயல்பட்டதாலும், கழகத்தின் சட்ட திட்டங்களுக்கு மாறுபட்டு, கழகத்தின் ஒழுங்குமுறை குலையும் வகையில் நடந்து கொண்டதாலும், கழகத்தின் கண்ணியத்திற்கு மாசு ஏற்படும் வகையில், கழகக் கட்டுப்பாட்டை மீறி கழகத்திற்கு களங்கமும் அவப் பெயரும் உண்டாகும் விதத்தில் செயல்பட்ட காரணத்தினாலும், திருவள்ளூர் மேற்கு மாவட்டத்தைச் சேர்ந்த, ஹரிதரன் இன்று முதல் கழகத்தின் அடிப்படை உறுப்பினர் பொறுப்பு உட்பட அனைத்துப் பொறுப்புகளில் இருந்தும் நீக்கி வைக்கப்படுகிறார். கழக உடன்பிறப்புகள் யாரும் இவருடன் எவ்விதத் தொடர்பும் வைத்துக்கொள்ளக் கூடாது எனக் கேட்டுக்கொள்கிறேன்’ எனத் தெரிவித்திருந்தார்.