Skip to main content

சிலை அரசியலை தயவுசெய்து நிறுத்துங்கள்! - நடிகர் பிரகாஷ்ராஜ் வேண்டுகோள்

Published on 07/03/2018 | Edited on 07/03/2018

நாட்டில் நடந்துகொண்டிருக்கும் சிலை அரசியலை தயவுசெய்து நிறுத்துங்கள் என நடிகர் பிரகாஷ்ராஜ் கோரிக்கை விடுத்துள்ளார்.

 

திரிபுரா சட்டமன்றத் தேர்தல் முடிவுகள் வெளியான நிலையில், அம்மாநிலத்தில் 25 ஆண்டுகளாக ஆட்சிசெய்து வந்த சி.பி.எம். ஆட்சி அதிகாரத்தை இழந்து, பா.ஜ.க. ஆட்சியைப் பிடித்தது. இந்நிலையில், தேர்தல் முடிவுகள் வெளியான நாளில் இருந்து அம்மாநிலத்தில் தொடர்ந்து இயல்பு வாழ்க்கை பாதிக்கப்பட்டு வருகிறது. இரண்டு இடங்களில் சோவியத் புரட்சியாளர் லெனின் சிலை உடைக்கப்பட்டது. 

 

தமிழகத்தில் பா.ஜ.க. தேசிய தலைவர் எச்.ராஜா தனது முகநூல் பக்கத்தில், இன்று திரிபுராவில் லெனின் சிலையைப் போல, நாளை தமிழகத்தில் பெரியாரின் சிலையை அகற்றுவோம்’ என சர்ச்சையைக் கிளப்பும்விதமாக பதிவிட்டு, பின்னர் நீக்கியிருந்தார். மேலும், அந்தப் பதிவு தன்னுடையது அல்ல எனவும் அவர் விளக்கமளித்துள்ளார். இருந்தும், நேற்று இரவு வேலூர் மாவட்டத்தில் பெரியாரின் சிலை சேதப்படுத்தப்பட்டது.

 

 

 

 

இன்று காலை கொல்கத்தாவில் பா.ஜ.க. மூத்த தலைவர் ஷியாம பிரசாத் முகர்ஜீயின் சிலையை சேதப்படுத்திய ஏழு பேர் கைது செய்யப்பட்டுள்ளனர். தற்போது உத்தரப்பிரதேசம் மாநிலம் மீரூட்டில் அம்பேத்கர் சிலை சேதப்படுத்தப்பட்டதாக தகவல்கள் வெளியாகியுள்ளன.

 

இதுகுறித்து தனது ட்விட்டர் பக்கத்தில் நடிகர் பிரகாஷ்ராஜ், ‘லெனின், பெரியார், எஸ்.பி.முகர்ஜீயின் சிலைகள் சேதப்படுத்தப்பட்டுள்ளன. உங்கள் நிகழ்ச்சி நிரல் என்ன? நம் குழந்தைகளுக்கு எதைக் கற்றுக்கொடுக்கிறீர்கள்? இந்த சிலை அரசியலை தயவுசெய்து நிறுத்துங்கள்.. வன்முறை மூலம் வன்முறையையே அறுவடை செய்யமுடியும். உங்களின் அரசியல் வாக்குறுதி என்ன? மாற்றமா அல்லது மாநிலத்தில் குண்டாயிஸத்தைக் கொண்டுவருவதா? #JustAsking’ என பதிவிட்டுள்ளார்.

சார்ந்த செய்திகள்

 

Next Story

 “தயவு செய்து இப்போதாவது பிரச்சனை பன்ணுங்க” - சத்யராஜ் வேண்டுகோள்

Published on 22/07/2024 | Edited on 22/07/2024
sathyaraj speech in periyar vision ott event

சென்னை பெரியார் திடலில் திராவிடர் கழக சார்பில் ‘பெரியார் விசன்’ (PERIYAR VISION – Everything for everyone) என்ற ஓடிடி தளம் அறிமுகப் செய்யப்பட்டது. இந்த தளத்தில் சமூக நீதிக் கொள்கைகளை மையமாகக் கொண்ட திரைப்படங்கள் மற்றும் குறும்படங்கள் வெளியாகவுள்ளதாக அறிவிக்கப்பட்டுள்ளது. இதன் தொடக்க நிகழ்ச்சியில் தி.க. தலைவர் கி.வீரமணி, தி.மு.க. துணை பொதுச்செயலாளரும், நாடாளுமன்ற உறுப்பினருமான கனிமொழி, நடிகர் சத்யராஜ் உள்ளிட்டோர் கலந்துகொண்டனர்.

அப்போது சத்யராஜ் பேசுகையில், “இன்றைக்கு உலகம் முழுவதும் மன அழுத்தம், மனச் சோர்வு, கவலை ஆகியவை பெரிய பிரச்சனையாக பேசப்படுகிறது. இதைவைத்து கார்ப்பரேட் சாமிகள் காசு பாத்து வருகின்றனர். அவர்களிடம் ஒன்று கேட்டுக்கொள்கிறேன். நீங்க எந்த கார்ப்பரேட் சாமிகளிடமும் போக வேண்டாம். கி.வீரமணியின் வாழ்வியல் சிந்தனை படித்தால் சரியாக போய்விடும்.   

இந்த ஓடிடி இன்றைய காலகட்டத்தில் ரொம்ப முக்கியமானது. சென்சார் போர்டு முத்தமிழறிஞர் கலைஞர் காலத்திலிருந்து பிரச்சனையாக இருக்கிறது. பராசக்தியில் ஆரம்பித்து நான் நடித்துள்ள தோழர் சேகுவேரா வரை பெரிய பிரச்சனை. ஆனால் ஓடிடியில் அப்படி இல்லை. புதிய சிந்தனைகளை சொல்வதற்கு இந்த ஓடிடி தளம் வசதியாக இருக்கிறது. பெரியார் படத்தை தற்போதைய தொழில்நுட்பத்திற்கேற்ப மெருகூட்டி இருப்பதாக சொன்னார்கள். இப்போது வெளியிட்டால் இன்னும் பரபரப்பாக இருக்கும். அப்போது வெளியிடும் போது தியேட்டர் முன்பு கலவரம் வரும் என நினைத்தோம். ஆனால் கலைஞர் முதலமைச்சராக இருந்ததால் எதுவும் நடக்கவில்லை. இப்பவும் அந்தப் பயம் இருக்கிறது. மு.க.ஸ்டாலின் தற்போது முதலமைச்சராக இருக்கிறார். இப்போது வெளியிடும் போதாவது தயவு செய்து பிரச்சனை பன்ணுங்கள். அப்பதான் நல்லாருக்கும். நாங்கள் எதிர்ப்பில் தான் வளருவோம்” எனக் கேட்டுக் கொண்டார்.  

Next Story

“பெரியார் கருத்து இந்த மண்ணில் மேலும் செழுமை பெற வேண்டும்” - தொல்.திருமாவளவன் எம்.பி.,

Published on 27/06/2024 | Edited on 27/06/2024
 thol thirumavalavan speech about VIT Viswanathan

கல்விக்கோ முனைவர் கோ.விசுவநாதனுக்கு அமெரிக்கா, நியூயார்க் மாநில பல்கலைக்கழகத்தால் கௌரவ டாக்டர் பட்டம் வழங்கப்ட்டது. இதற்காக தமிழியக்கம் சார்பில் பாராட்டு விழா நடைபெற்றது. அதில் விடுதலை சிறுத்தைகள் கட்சி தலைவர் தொல்.திருமாவளவன், அமைச்சர்கள் பி.டி.ஆர்.பழனிவேல் தியாகராஜன், பி.கே சேகர்பாபு மற்றும் பலர் கலந்து கொண்டு வாழ்த்தினர்.

இந்நிகழ்வில் தொல்.திருமாவளவன் பேசுகையில் “அண்ணன் விஐடி நிறுவனர், வேந்தர், தமிழுக்கும் தமிழ்நாட்டு மக்களுக்கும் எவ்வளவு பொறுப்புணர்வோடு பணியாற்றி வருகிறார் என்பதை நாமும், நாடும் அறியும். இளம் வயதிலேயே நாடாளுமன்ற உறுப்பினராக தேர்ந்தெடுக்கப்பட்ட பெருமைக்குரியவர். பேரறிஞர் அண்ணாவால் அடையாளம் காணப்பட்ட அறிஞர். பெரியார், அண்ணா போன்றோரால் ஈர்க்கப்பட்ட, சமூக நீதி அரசியலையும், தமிழ் இயக்கத்தையும் உறுதியாக பாதுகாத்து வருபவர். இன்று அவர் ஒரு கல்வி தந்தையாக அறியப்பட்டாலும், அரசியலில் பெரும் பங்களிப்பை செலுத்தியிருக்கிறார் என்பதை எனது பார்வையில் மேலோங்கி நிற்பதாக நினைக்கிறேன். 

வெறும் வேடிக்கை பார்க்காமல், மொழி உணர்வு, இன உணர்வு பேச்சோடு நின்றுவிடாமல், களத்தில் இறங்கு பணியாற்றக் கூடியவர். சமூக நீதி பாதுகாக்கப்பட வேண்டும் என்று பணியாற்றி வருகிறார். அதனால்தான் தமிழ் இயக்கம் என்ற புதிய இயக்கத்தை உருவாக்கி, தமிழ் தேசிய களத்தில் பணியாற்றிக் கொண்டிருக்கிற அனைவரையும் ஒன்றினைப்பதற்கான பணியைச் செய்து வருகிறார். கட்சி அடிப்படையில் பலர் சிதறி கடந்தாலும், அனைவரையும் ஒரு மேடையில் இணைப்பதற்கான பணிகளைத் தொடர்ந்து செய்து வருகிறார். பெரியார் கருத்து இந்த மண்ணில் மேலும் செழுமை பெற வேண்டும், வலிமை பெற வேண்டும் என்று அவர் நினைக்கிறார்.

தமிழ்நாட்டில் பெரியார் அரசியலுக்கு எதிராக, தமிழ்நாட்டுக்கு எதிரானவர்கள், இங்கு காலூன்ற பார்க்கிறார்கள், அவர்களைத் தடுக்க வேண்டிய பொறுப்பு நமக்கு இருக்கிறது, என்று சொன்னார். அதிமுக, திமுக போன்ற கட்சிகளைப் பலவீனப்படுத்துவது, ஆபத்தில் முடிந்துவிடும், பெரியாரின் கருத்துக்கும் பேராபத்தாக முடிந்துவிடும், என்று சொன்னவர். அதற்கான பல விசயங்களை என்னிடம் பகிர்ந்துக்கொண்டார். அவரது அனுபவங்களைச் சொன்னார். மக்கள் நலக்கூட்டணி உங்களுடைய தனித்துவத்தை வெளிப்படுத்துவதற்கானதாக இருக்கலாம், ஆனால் மறுபரிசீலனை செய்யுங்கள், வாக்கு சிதறி விடக்கூடாது, என்றார். இதை அவர் சொல்லியிருக்க தேவையில்லை. அவர் திமுக மற்றும் அதிமுக-வுக்காக பணியாற்றவில்லை. அவரது கவலை என்னவென்றால், தமிழகத்தில் தமிழ் அரசியலுக்கு எதிரான சக்திகள் இங்கு காலூன்றி விடுவார்களோ என்ற கவலை. சனாதான சக்திகள் இங்கு வந்துவிடுவார்களோ, என்ற கவலை அவருக்கு. அவர் சொன்னது பற்றிப் பலமுறை பலரிடம் பகிர்ந்திருக்கிறேன். அதன் பிறகு காவிரி நீர் பிரச்சனைக்கு இன்றைய தமிழக முதல்வர், அன்றைய எதிர்க்கட்சி  தலைவர் அண்ணன் ஸ்டாலின் அழைத்த போது, எந்தவித ஆச்சரியமும் இன்றி அவருடன் கைகோர்த்தோம், இன்று தொடர்ந்து அவருடன் பயணித்துக் கொண்டிருக்கிறோம். மக்கள் எங்கள் கூட்டணிக்கு பல வெற்றிகளைக் கொடுத்து வருகிறார்கள். 

அவரது அரசியல் என்பது, மாநில உரிமைகள் பறிபோகக் கூடாது, மாநில சுயாட்சி பாதுகாக்கப்பட வேண்டும். தமிழ்நாடு பாதிக்கப்பட கூடாது, என்ற புரிதல், அந்தத் தெளிவு, அந்தப் பொறுப்புணர்வு அண்ணன் இடத்தில் மேலோங்கி இருப்பதை நான் பார்க்கிறேன். கல்வியை வணிகமாக பார்க்காமல், அதன் மூலம் மக்களை முன்னேற்ற முடியும், சாதி கொடுமைகளில் இருந்து மக்களை மீட்க முடியும், என்ற புரிதல். உயர் கல்வியில் சாதனைப் படைத்திருக்கிறார் என்பதால்தான் அவருக்கு கெளரவ டாக்டர் பட்டம் வழங்கியிருக்கிறது. இந்தியாவிலேயே தமிழ்நாடு உயர் கல்வியில் சிறந்து விளங்கிக் கொண்டிருக்கிறது. குஜராத், மத்திய பிரதேசம், உத்தர பிரதேசம் போன்ற மாநிலங்கள் தேசிய சராசரியில் 27 சதவீதத்திற்கு கீழ் உள்ளது. தமிழ்நாடு 47 சதவீதத்தில் இருக்கிரது. இதை ஒரு அரசு மட்டும் செய்ய முடியாது, விஐடி யும் சேர்ந்து செய்திருக்கிறது, என்பதை நாம் ஒப்புக்கொள்ள வேண்டும். இன்று விஐடி பல்கலைக்கழகத்தில் பல்வேறு மாநிலத்தில் இருந்து படிக்கிறார்கள், அதற்குக் காரணம், தரமான கல்வி வழங்குவதுதான். அதனால்தான் இப்படி ஒரு சிறப்பான பட்டம் அவருக்கு வழங்கப்பட்டிருக்கிறது. 

இதைத் தமிழ்நாட்டு பல்கலைக்கழகங்கள் செய்திருக்க வேண்டும், ஆனால் எங்கே இருக்கும் நியூயார்க் பல்கலைக்கழகத்திற்கு அண்ணனின் அருமை தெரிந்திருக்கிறது. அவருக்கு இந்தக் கெளரவ டாக்டர் பட்டம் வழங்கிய நியூயார்க் பல்கலைக்கழகத்திற்கு தமிழ்நாட்டு மக்கள் சார்பில் நன்றியைத் தெரிவித்துக் கொள்கிறேன். அண்ணன் அவர்கள், கல்வி தளத்தில் ஆற்றி வருகின்ற பணிகள் பாராட்டுக்குரியவை, போற்றக்கூடியவை என்றாலும், தமிழுக்காகவும், தமிழ் தேசியத்திற்கும் அவர் ஆற்றிக்கொண்டிருக்கின்ற பணிகள் மேலும் சிறப்பானவை. எங்களைப் போன்ற இளைய தலைமுறையினர் அண்ணன் வழியில் பணியாற்றி வருகிறோம். விடுதலை சிறுத்தைகள் கட்சி தமிழ் தேசியத்திற்காக பணியாற்றி வரும் கட்சி என்பதால்தான் தமிழ் இயக்கம் தொடங்கப்பட்ட போது என்னை அழைத்து பாராட்டினார். அதற்காக இந்த நேரத்தில் அண்ணன் விசுவநாதன் அவர்களுக்கு நன்றியைத் தெரிவித்துக் கொள்கிறேன். அவர் முன்னெடுக்கக் கூடிய அனைத்து முயற்சிகளுக்கும் விடுதலை சிறுத்தைகள் கட்சி துணையாக இருக்கும் என்று சொல்லி, விடுதலை  சிறுத்தைகள் கட்சியின் தொண்டர்கள் சார்பில் அவரை வாழ்த்தி விடைபெறுகிறேன் என்றார்.