Skip to main content

“திரையில் பேசியதை தரையில் செய்கிறோம்” - சினேகன்

Published on 21/02/2023 | Edited on 21/02/2023

 

Snegan spoke about the 5 years since the People's Justice Center started

 

50 ஆண்டுகளாக திரையில் பேசிய அரசியலை கமல் தரையில் பேச ஆரம்பித்து இருக்கிறார் என பாடலாசிரியரும் மக்கள் நீதி மய்யத்தின் நிர்வாகியுமான சினேகன் கூறியுள்ளார்.

 

மக்கள் நீதி மய்யம் கட்சி துவங்கி இன்றுடன் 5 ஆண்டுகள் நிறைவடைகிறது. இது குறித்து தனது ட்விட்டர் பக்கத்தில் தெரிவித்த அக்கட்சியின் தலைவர் கமல்ஹாசன், “ஆரம்பித்த துடிப்புக் குறையாமல், ஐந்து ஆண்டுகளைக் கடந்திருக்கிறது மக்கள் நீதி மய்யம். ஆறாம் ஆண்டில் அடி எடுத்து வைக்கிறோம். உள்ளத்தில் எரியும் அறத்தழல் ஒளி குன்றாமல் பார்த்துக்கொள்வோமாக. மநீம உறவுகள், நற்பணி இயக்க நண்பர்கள் உள்ளிட்ட அனைவருக்கும் வாழ்த்துகள்” எனக் கூறியுள்ளார்.

 

இந்நிலையில், இது குறித்து செய்தியாளர்களைச் சந்தித்த அக்கட்சியின் நிர்வாகி மற்றும் பாடலாசிரியருமான சினேகன், “மக்கள் நீதி மய்யம் துவங்கி ஐந்து ஆண்டுகள் நிறைவேறியுள்ளது. உலக தாய்மொழி நாள் இன்று. அதை உணர்ந்து தான் கமல்ஹாசன் 5 ஆண்டுகளுக்கு முன் இந்த நாளில் கட்சியைத் துவங்கினார். கலைத்துறை என்பது எங்களுக்கு தொழில். அரசியல் என்பது சேவை. இது கடமை, அது தொழில். நாங்கள் குழப்பிக் கொள்ளவில்லை. வெளியில் பார்ப்பவர்களுக்கு குழப்பமாக இருந்தால் அதற்கு நாங்கள் பொறுப்பாக முடியாது. 

 

50 ஆண்டுகளாக திரையில் பேசிய அரசியலை கமல் தரையில் பேச ஆரம்பித்து இருக்கிறார். கலை வெறும் பொழுதுபோக்கு மட்டுமல்ல. கலை மக்களின் வாழ்வியலை எப்போதும் வெளிக்காட்டுவது. மக்களின் நிலையை கலை வழியே ஆண்டாண்டு காலம் பேசுகிறார்கள். அதில் அதிகமானோர் திரையில் மட்டும் பேசிவிட்டுச் சென்றுவிடுகிறார்கள். கமல் மக்களோடு அதை களத்தில் பேச வேண்டும் என கட்சியை ஆரம்பித்தார். அதைத் தொடர்ந்து செய்து கொண்டு உள்ளோம்” எனக் கூறினார்.

 

 

சார்ந்த செய்திகள்

 

Next Story

பக்ரீத் பண்டிகை; தலைவர்கள் வாழ்த்து!

Published on 17/06/2024 | Edited on 17/06/2024
Bakrit festival Greetings leaders

பக்ரீத் பண்டிகை இன்று(17.06.2024) கொண்டாடப்பட்டு வருகிறது. இதனையொட்டி அரசியல் கட்சித் தலைவர்கள் பலரும் தங்களது வாழ்த்துகளைத் தெரிவித்து வருகின்றனர். அந்த வகையில் தமிழ்நாடு முதலமைச்சர் மு.க.ஸ்டாலின், புதுச்சேரி முதலமைச்சர் ரங்கசாமி, அதிமுக பொதுச் செயலாளர் எடப்பாடி பழனிசாமி, தமிழக காங்கிரஸ் கமிட்டியின் தலைவரும், சட்டமன்ற உறுப்பினருமான கு. செல்வப்பெருந்தகை, அமமுக பொதுச் செயலளார் டி.டி.வி. தினகரன் எனப் பலரும் பக்ரீத் பண்டிகை திருநாளுக்கான வாழ்த்துகளை தெரிவித்திருந்தனர்.

மேலும் பக்ரீத் பண்டிகையை ஒட்டி, தமிழகம் முழுவதும் பல்வேறு இடங்களில் அதிகாலை முதலே இஸ்லாமியர்கள் பள்ளிவாசல்களின் சிறப்புத் தொழுகை நடத்தி வழிபட்டனர். இந்நிலையில் நடிகரும், மக்கள் நீதி மய்யத்தின் கட்சியின் தலைவருமான கமல்ஹாசன் எக்ஸ் சமூக வலைத்தளத்தில் வெளியிட்டுள்ள பதிவில், “பக்ரீத் கொண்டாடும் சகோதரர்களுக்கு என் அன்பான வாழ்த்துகள். உங்கள் உள்ளம் மகிழ்வால் நிரம்புவதாக; உங்கள் இதயம் நேசத்தால் நிரம்புவதாக; உங்கள் சிந்தை ஞானத்தால் நிரம்புவதாக. தியாகத் திருநாள் சிறக்கட்டும்” எனக் குறிப்பிட்டுள்ளார். 

Bakrit festival Greetings leaders

அதே சமயம் நடிகரும், தமிழக வெற்றிக் கழகத்தின் தலைவருமான விஜய், “அன்பு, தியாகம், அர்ப்பணிப்பு, ஒற்றுமை ஆகிய நற்குணங்களை எடுத்துரைக்கும் வகையில் உலகெங்கும் உள்ள இசுலாமிய சகோதர சகோதரிகளால் பக்ரீத் பண்டிகை, தியாகத் திருநாளாகக் கொண்டாடப்படுகிறது. இந்த நன்னாளில் இசுலாமிய சொந்தங்கள் அனைவருக்கும் என் இனிய பக்ரீத் நல்வாழ்த்துகளைத் தெரிவித்துக்கொள்கிறேன்” எனக் குறிப்பிட்டுள்ளார். 

Next Story

'இந்தியாவிலேயே இவரைப் போன்ற எம்பி யாரும் இருப்பதாக எனக்கு தெரியவில்லை' -கமல்ஹாசன் பேச்சு

Published on 11/04/2024 | Edited on 11/04/2024
Kamal Haasan campaign in madurai

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாக தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது.

இந்நிலையில் இந்தியா கூட்டணி சார்பில் மதுரையில் போட்டியிடும் மார்க்சிஸ்ட் கம்யூனிஸ்ட் கட்சியின் வேட்பாளர் சு.வெங்கடேசனை ஆதரித்து  மக்கள் நீதி மய்யம் கட்சியின் தலைவர் கமல்ஹாசன் பிரச்சாரத்தில் ஈடுபட்டார். கூட்டத்தில் பேசிய அவர், ''இவரைப் பற்றி சொல்ல வேண்டுமென்றால் வழக்கமாக என்னை கேட்பார்கள் அரசியலுக்கு ஏன் வந்தீர்கள்? நீங்கள் எப்படி கையெழுத்து போட போகிறீர்கள் என்று. வித்தியாசமான அரசியல் செய்ய வந்திருக்கிறேன் என்று பெருமையாக மார் தட்டிக் கொண்டேன். இனி நாம் செய்ய போவதையும் செய்து இருப்பதைதான் சொல்ல வேண்டுமே தவிர, செய்யத் தவறியவர்களின் குற்றங்களை பட்டியலிடுவது என்பது நேர விரையம். அது உங்களுக்கே தெரியும். எங்கெங்கு தப்பு நடந்திருக்கிறது என்பதை சொல்லி உங்க நேரத்தையும் எங்க நேரத்தையும் வீணடிக்க கூடாது.

நவீன அரசியல் ஒருவரை ஒருவர் திட்டிக் கொள்ளும் அரசியலாக இருக்கக்கூடாது. ஒருவரை ஒருவர் திருத்திக் கொள்ளும் அரசியலாக இருக்க வேண்டும். அதனால் நான் சொல்கிறேன் இவர் செய்ததை சொல்கிறேன். கோவிட் என்ற காலகட்டத்தில் ஒரு சாதாரணமாக எம்பிக்கு  கொடுக்க வேண்டிய ஐந்து கோடி ரூபாய் ஒதுக்கீடு கூட இல்லாத நேரத்தில், பல நற்பணிகளை செய்து இருக்கிறார். அவருக்கு இன்னொரு வாய்ப்பு கொடுக்க வேண்டியது உங்களுடைய கடமை. இந்த வட்டாரத்திற்கு நீங்கள் செய்யும் நல்லது.

இவர் நல்ல எழுத்தாளர், பெரிய பெரிய நாவல்களை எழுதி இருக்கிறார் என்பதெல்லாம் சொல்வதை விட ஒரு இடத்திற்கு பம்ப் செட் போட்டு கொடுத்திருக்கிறார். ஒரு விவசாய ஊருக்கு ரயில் பாதை அமைத்துக் கொடுத்திருக்கிறார். இவர் செய்த நற்பணிகளை எல்லாம் திரட்டி ஒரு வீடியோ ஆவணம் செய்திருந்தார்கள். அதை வெளியிடும் பெருமை எனக்கு கிடைத்தது. நான் சொல்லுவது மிகை என்றால் திருத்திக் கொள்கிறேன். ஆனால் இந்தியாவிலேயே இப்படி, தான் செய்த விஷயங்களை பட்டியல் போடும் அளவிற்கு வேலை செய்த எம்பிக்கள் என்று யாரும் இருப்பதாக எனக்கு தெரியவில்லை'' என்றார்.