Skip to main content

பாமக, தேமுதிக டிமாண்ட்.. அதிமுக தலைமை குழப்பம்...

Published on 07/02/2020 | Edited on 07/02/2020

 

அதிமுகவுக்கு வரும் 2021 சட்டமன்றத் தேர்தல் முக்கியமானத் தேர்தலாக பார்க்கப்படுகிறது. ஜெயலலிதா மறைவுக்குப் பிறகு அதிமுக சந்தித்த நாடாளுமன்றத் தேர்தலில் தேனியை தவிர அனைத்துத் தொகுதிகளிலும் தோல்வியை சந்தித்தது. அதன் பிறகு நடந்த விக்கிரவாண்டி மற்றும் நாங்குநேரி சட்டமன்றத் தொகுதிகள் இடைத்தேர்தலில் அதிமுக வெற்றி பெற்றது அக்கட்சிக்கு ஒரு ஆறுதலை தந்தது. 

 

eps



கடந்த வருடம் நடந்த ஊரக உள்ளாட்சி அமைப்புகளுக்கு நடந்த உள்ளாட்சித் தேர்தலில் அதிமுக தனது அதிகாரத்தை பயன்படுத்தி ஒன்றியத் தலைவர், துணைத் தலைவர் பதவியிடங்களை பெரும்பான்மை இடங்களில் பிடித்தது. அடுத்து அதிமுக, பேரூராட்சி மற்றும் விடுபட்ட மாவட்டங்களிலும் தேர்தலை நடத்த அதிமுக அரசு தயாராகி வருகிறது. 
 

கடந்த வருடம் நடந்த ஊரக உள்ளாட்சித் தேர்தலில் போதிய இடங்கள் ஒதுக்கப்படவில்லை என்று பாமக, தேமதிமுக உள்ளிட்ட அதிமுக கூட்டணியில் உள்ள கட்சிகள் வருத்தத்தில் உள்ளன. மேலும் பேரூராட்சி மற்றும் விடுபட்ட மாவட்டங்களிலும் தேர்தல் நடந்தாலும் அதிமுக போதிய இடங்களை ஒதுக்குவது சந்தேகம்தான் என்று நினைத்துள்ள பாமக, தேமுதிக கட்சிகள் சட்டமன்றத் தேர்தலை மனதில் வைத்து கட்சி நிர்வாகிகளிடம் ஆலோசனையில் ஈடுபட்டுள்ளன.
 

கடந்த வாரம் கட்சியினரை சந்தித்துப் பேசிய பிரேமலதா, கூட்டணி தர்மத்தை கடைபிடிக்கும் ஒரே கட்சி தேமுதிக தான். கூட்டணி  என்பதால் குட்ட குட்ட குனிய மாட்டோம். குட்ட குட்ட குனியும் ஜாதி இல்லை தேமுதிக. நாங்கள் மீண்டு எழுவோம். 2021-ம் ஆண்டு தேர்தலில் தேமுதிக மிகப்பெரிய கட்சியாக வரும். விஜயகாந்த் தலைமையில் நல்லாட்சி வருவது தான் நோக்கம். விஜயகாந்த் ஆட்சி வரும் வரையில் ஓயமாட்டோம் என்று கூறினார்.


 

கடந்த இரண்டு தினங்களுக்கு முன்பு சென்னையில் நடந்த கட்சி நிர்வாகிகள் கூட்டத்தில் பேசிய பாமக நிறுவனர் டாக்டர் ராமதாஸ், 2021ல் பாமக ஆட்சிக்கு வந்தாக வேண்டும். தொகுதிக்கு ஒரு லட்சம் வாக்காளர்களை நாம் பெற வேண்டும். தனியாக நாம் போட்டியிட்டு ஓர் இடத்தில் கூட வெற்றி பெறாதது கேவலமாக உள்ளது. பாமக தொடங்கி 32 ஆண்டுகளில் ஒருமுறை கூட ஆட்சிக்கு வரவில்லை. 70 முதல் 80 எம்எல்ஏக்கள் பெற்றால் இந்த முறை நாம் ஆட்சிக்கு வரும் திட்டம் உள்ளது. பாமக ஆட்சி அமைக்கும் திட்டத்தை செயல்படுத்த முடியாத நிர்வாகிகள் கட்சியில் ஒதுங்கி கொள்ளுங்கள் என்று அறிவுறுத்தியுள்ளார்.
 

கடந்த சட்டமன்றத் தேர்தல் மற்றும் நாடாளுமன்றத் தேர்தலில் பாமக, தேமுதிக ஆகிய கட்சிகள் ஒரு இடம் கூட பிடிக்காததால் 2021 சட்டமன்றத் தேர்தலில் பலமான கூட்டணியில் இடம்பெற்று போதிய எம்எல்ஏக்களை பெற வேண்டும் என்று தீவிர ஆலோசனையில் ஈடுபட்டுள்ளன. அதனால்தான் இப்போதே சட்டமன்றத் தேர்தல் பற்றிய பேச்சுக்களை வெளியே பேச ஆரம்பித்துவிட்டன இந்த இரு கட்சிகளும். 


 

40 தொகுதிகளுக்கு குறையாமல் கூட்டணியில் இடம் வாங்கி போட்டியிட வேண்டும் என்று பாமக நினைக்கிறது. மேலும் திமுகவை வடதமிழகத்தில் வீழ்த்த அதிமுக தங்களுடன்தான் கூட்டணி அமைக்க வேண்டும் என்று பாமக கணக்கு போட்டுள்ளது. நாங்க, ஜெயலலிதா இருந்தபோதே 40 தொகுதிகளை பெற்று போட்டியிட்டோம். இப்போது தங்ளுக்கு அதனைவிட கூடுதலாக இடங்கள் கொடுக்கப்பட வேண்டும் என்று தேமுதிக கணக்கு போட்டு வருகிறது. பாஜக தமிழக தலைவர்களும் தங்களுக்கு சட்டமன்றத் தேர்தலில் முக்கியத்துவம் அளிக்க வேண்டும் என்று வலியுறுத்தி வருகின்றனர்.



கூட்டணிக் கட்சிகளுக்கு எத்தனை தொகுதிகளை அதிமுக ஒதுக்கப்போகிறது என்று அக்கட்சியினரே கணக்கு போட்டு பார்த்து வருகின்றனர். கூட்டணிக்கு கட்சிகள் கேட்கும் தொகுதிகளை பார்த்தால் கூட்டணி கட்சிகளுக்கு நூறு தொகுதிகளுக்கும் மேல் போய்விடுமோ? பிறகு ஓ.பி.எஸ். ஆதரவாளர்கள், ஈ.பி.ஸ். ஆதரவாளர்கள் கேட்கும் தொகுதிகளை எப்படி பிரித்து கொடுப்பது போன்றகுழப்பத்திலும் அதிமுக உள்ளது. அதிமுகவில் உள்ள பாமக, தேமுதிகவை விட்டால் தங்களுக்கு கூட்டணி பலம் இல்லை என்ற பயம் வந்தும் என்பதால் சிக்கலை எப்படி அதிமுக தலைமை தீர்க்கும் என்று அதிமுகவினர் முணுமுணுத்து வருகின்றனர்.

                                                                                                                      

சார்ந்த செய்திகள்

 

Next Story

காவிரி விவகாரம்; கர்நாடக காங்கிரஸ் அரசுக்கு எடப்பாடி பழனிசாமி கண்டனம்!

Published on 12/07/2024 | Edited on 12/07/2024
Edappadi Palaniswami condemns Karnataka Congress government!

தமிழகத்திற்கு நாள் ஒன்றுக்கு 1 டிஎம்சி தண்ணீர் திறக்க வேண்டும் என்று காவிரி ஒழுங்காற்று குழு பரிந்துரை செய்திருந்தது. இந்த நிலையில் கர்நாடக முதல்வர் சித்தராமையா மற்றும் துணை முதல்வர் டி.கே.சிவக்குமார் தலைமையில் தமிழகத்திற்குத் தண்ணீர் திறப்பது குறித்து அதிகாரிகளுடன் ஆலோசனை நடத்தப்பட்டது. இதையடுத்து, தமிழகத்திற்குத் தண்ணீர் தரவே முடியாது என்று கர்நாடக முதல்வர் சித்தராமையா திட்டவட்டமாகத் தெரிவித்துள்ளார்.

இது தொடர்பாகச் செய்தியாளர்களைச் சந்தித்த கர்நாடக முதல்வர் சித்தராமையா, “காவிரி பாசனப் பகுதியில் 28 சதவீதம் தண்ணீர் பற்றாக்குறை உள்ளது. கர்நாடகாவின் வலியுறுத்தலை மீறி தண்ணீர் திறக்க காவிரி ஒழுங்காற்று குழு உத்தரவிட்டுள்ளது. கர்நாடகாவில் பற்றாக்குறை இருப்பதால் தற்போதைக்கு தமிழகத்திற்கு தண்ணீர் திறந்துவிட  முடியாது” என்று தெரிவித்தார். மேலும் இது குறித்து ஆலோசனை நடத்தக் கர்நாடக மாநிலத்தில் உள்ள அனைத்து கட்சியினருக்கும் முதல்வர் சித்தராமையா அழைப்பு விடுத்துள்ளார். 

தமிழகத்திற்குத் தண்ணீர் தர மறுக்கும் கர்நாடக காங்கிரஸ் அரசுக்கு தமிழக எதிர்க்கட்சி தலைவர் எடப்பாடி பழனிசாமி கண்டனம் தெரிவித்துள்ளார். இது தொடர்பாக அவர் வெளியிட்ட பதிவில், “கர்நாடக அணைகளில் இருந்து தமிழகத்திற்கு காவிரியில் நாளொன்றுக்கு ஒரு டி.எம்.சி வீதம் ஜூலை 31 வரை தண்ணீர் திறந்துவிடவேண்டும் என்ற காவிரி ஒழுங்காற்றுக் குழுவின் உத்தரவை ஏற்க மறுக்கும் கர்நாடக காங்கிரஸ் அரசின் போக்கு கடும் கண்டனத்திற்குரியது. காவிரி ஆறு பாயும் மாநிலங்களின் எண்ணங்களை கருத்திற்கொண்டு பிறப்பிக்கப்பட்டுள்ள உத்தரவை கர்நாடக அரசு ஏற்காமல் முரண்டு பிடிப்பது ஏற்கத்தக்கதல்ல.

விளம்பர போட்டோ ஷூட்டில் மட்டுமே கவனம் செலுத்தும் திமுக முதல்வர், காங்கிரசின் தயவிற்காக தமிழ்நாட்டின் ஜீவாதார உரிமையை விட்டுக்கொடுப்பது அவரின் தொடர் செயலற்றத்தன்மை மூலம் தெளிவாகத் தெரிகிறது. மேடையில் மட்டும் மாநில உரிமை பற்றி வாய் கிழிய பேசும் திமுக அரசின் முதல்வர் தன்னுடைய செயலற்ற தன்மையால், தமிழக மக்களின் வாழ்வோடு விளையாடி வருவது கடும் கண்டனத்திற்குரியது.

டெல்டா விவசாயிகள் நலனைக் கருத்திற்கொண்டு உடனடியாக காவிரி விவகாரத்தில் தீர்க்கமான நடவடிக்கைகளை மேற்கொண்டு தமிழ்நாட்டிற்கு உரித்தான நீரைப் பெறுமாறு திமுக முதல்வரை வலியுறுத்துகிறேன்” எனத் தெரிவித்துள்ளார். 

Next Story

நீதிபதி மகாதேவனுக்கு அன்புமணி ராமதாஸ் வாழ்த்து!

Published on 11/07/2024 | Edited on 11/07/2024
Anbumani Ramadoss wishes to Justice Mahadevan!

உச்ச நீதிமன்றத்தில் நீதிபதி பணியிடங்களில் காலியாக உள்ள 2 இடங்களுக்கு நீதிபதிகளை நியமிக்க கொலீஜியம் அமைப்பு பரிந்துரை செய்துள்ளது. அதன்படி சென்னை உயர் நீதிமன்ற பொறுப்பு தலைமை நீதிபதியாக பதவி வகித்து வரும் மகாதேவனை உச்ச நீதிமன்ற நீதிபதியாக நியமிக்க கொலீஜியம் பரிந்துரை செய்துள்ளது. அதே போன்று ஜம்மு - காஷ்மீர் நீதிமன்றத்தின் தலைமை நீதிபதியாக பணியாற்றி வரும் கோட்டீஸ்வர் சிங்கை உச்சநீதிமன்ற நீதிபதியாக நியமிக்கவும் கொலிஜியம் பரிந்துரை செய்துள்ளது. இந்த நியமனத்தின் மூலம் நீதிபதி கோட்டீஸ்வர் சிங் மணிப்பூர் மாநிலத்தில் இருந்து உச்ச நீதிமன்ற நீதிபதியாக நியமிக்கப்படும் முதல் நீதிபதி ஆவார் என்பதும் குறிப்பிடத்தக்கது.

இந்நிலையில் உச்சநீதிமன்ற நீதிபதியாக பரிந்துரைக்கப்பட்டுள்ள நீதிபதி மகாதேவனுக்கு பாமக தலைவர் அன்புமணி ராமதாஸ் தனது வாழ்த்துகளை தெரிவித்துள்ளார். இது தொடர்பாக அவர் தனது எக்ஸ் தளத்தில் வெளியிட்டுள்ள பதிவில், “சென்னை உயர்நீதிமன்றத்தின் பொறுப்பு தலைமை நீதிபதியாக பதவி வகித்து வரும் அரங்க. மகாதேவன் உச்சநீதிமன்றத்தின் நீதிபதியாக நியமிக்க உச்சநீதிமன்ற கொலீஜியம் பரிந்துரைத்திருப்பது மகிழ்ச்சியளிக்கிறது. அவருக்கு எனது வாழ்த்துகளைத் தெரிவித்துக் கொள்கிறேன். 

Anbumani Ramadoss wishes to Justice Mahadevan!

சென்னை உயர்நீதிமன்றத்தின் நீதிபதியாக கடந்த 2013ஆம் ஆண்டு நியமிக்கப்பட்ட மகாதேவன் அவர்கள் கடந்த 11 ஆண்டுகளில் சிறப்பான பல தீர்ப்புகளை வழங்கியுள்ளார். தமிழ் மொழி மீது மிகுந்த பற்றும், தமிழ் மொழியில் புலமையும் கொண்ட மகாதேவன், தமிழ் மொழி வளர்ச்சிக்காகவும் பல தீர்ப்புகளை வழங்கியுள்ளார். உச்சநீதிமன்றத்தில் 4 ஆண்டுகள் பணியில் இருக்கப் போகும் நீதிபதி மகாதேவன், சமூகநீதி, மொழி சார்ந்த சிறப்பான தீர்ப்புகளை வழங்கி நீதித்துறை வரலாற்றில் நீங்காத இடம் பிடிக்க வேண்டும் என்று வாழ்த்துகிறேன்” எனக் குறிப்பிட்டுள்ளார்.