Skip to main content

“ஆளுநர் ரவியா? ஆன்லைன் ரம்மியா?” - முத்தரசன்

Published on 29/12/2022 | Edited on 29/12/2022

 

“Governor Ravi? Online Rummy?” - Mutharasan

 

இந்திய கம்யூனிஸ்ட் கட்சி சார்பில் ஆளுநருக்கு எதிராகப் போராட்டம் நடைபெற்றது. இப்போராட்டத்தை இந்திய கம்யூனிஸ்ட் கட்சியின் மூத்த தலைவர் ஆர்.நல்லகண்ணு கொடியசைத்துத் துவக்கி வைத்தார்.

 

அரசியலமைப்பு, மதச்சார்பின்மை, மாநில உரிமைகளுக்கு எதிராக ஆளுநர் ஆர்.என்.ரவி செயல்படுவதாகவும் மத்திய அரசு அவரை உடனடியாக திரும்பப் பெற வேண்டும் என வலியுறுத்தியும் இந்திய கம்யூனிஸ்ட் கட்சி சார்பில் பேரணி நடத்தப்பட்டது. இந்த பேரணி ஆளுநர் மாளிகையை முற்றுகையிட்டது. இந்தப் பேரணியில் இந்திய கம்யூனிஸ்ட் கட்சி சார்பில் 4000 மேற்பட்டோர் கலந்து கொண்டனர். இந்திய கம்யூனிஸ்ட் கட்சியின் மாநிலச் செயலாளர், தேசிய பொதுச் செயலாளர் ராஜா ஆகியோரும் கலந்து கொண்டனர்.

 

இந்திய கம்யூனிஸ்ட் கட்சியின் மாநிலச் செயலாளர் முத்தரசன் உரையாற்றினார். அப்போது பேசிய அவர், “ஆளுநர் ரவி என்பவர் யாரென்பதே எனக்குத் தெரியாது. தெரிந்துகொள்ள வேண்டிய அவசியமும் நமக்குக் கிடையாது. ஆனாலும் இந்த மாநிலத்தின் ஆளுநர் அவர். ஒன்றிய அரசால் நியமிக்கப்பட்டவர். சம்பளத்திற்காக நியமிக்கப்பட்டவர் அவர். அவருக்கு நமது வரிப்பணத்தைத்தான் மாநில அரசு சம்பளமாகக் கொடுக்கிறது. அவர் தங்கி இருக்கும் மாளிகைக்குத் தேவையான பணிகள் அனைத்தையும் மேற்கொள்வது மாநில அரசு. அவருக்கு உரியப் பாதுகாப்பை வழங்குவதும் தமிழக அரசுதான்.

 

இவை அனைத்தையும் பெற்றுக்கொண்டு தமிழக சட்டப்பேரவையில் நிறைவேற்றப்படும் மசோதாக்கள் எதற்கும் கையெழுத்துப் போடமாட்டேன் என அடம் பிடிக்கும் ஆளுநராக ரவி இங்கே இருக்கிறார்.

 

ஆன்லைன் சூதாட்டத்தில் தினசரி செத்துக் கொண்டு இருக்கிறார்கள். லட்சக்கணக்கான பணத்தை இழக்கிறார்கள். கடன் தொல்லையால் இதுவரை 60க்கும் மேற்பட்டோர் தற்கொலை செய்து கொண்டுள்ளார்கள். அவர்கள் எல்லாம் சாதாரணமானவர்கள் அல்ல. மிகப்பெரிய உத்தியோகங்களில் இருப்பவர்கள். படித்த பட்டதாரிகள். வெளியில் தெரியாமல் தற்கொலை செய்து கொண்டவர்கள் எத்தனை பேர் என்பது எனக்குத் தெரியாது. 

 

“Governor Ravi? Online Rummy?” - Mutharasan

 

சூதாட்டத்தை ரத்து செய்ய வேண்டும் என்ற தீர்மானத்தை நிறைவேற்றி அவசர சட்டத்தை ஆளுநருக்கு அனுப்பிய பிறகு அதற்கு ஒப்புதல் அளிக்கிறார். நிரந்தர தடை சட்ட மசோதா நிறைவேற்றப்பட்டு ஆளுநருக்கு அனுப்பப்பட்டுவிட்டது. பல மாதங்களுக்குப் பிறகு அரசிடம் விளக்கம் கேட்கிறார். அடுத்த 24 மணி நேரத்தில் அரசு அதற்குரிய விளக்கத்தை அளிக்கிறது. அதன் பின் ஆளுநர் இதுவரை அதற்கு ஒப்புதல் அளிக்கவில்லை. மாநிலத்தின் முதல்வரும் நேரில் சந்தித்து மசோதாவிற்கு ஒப்புதல் வழங்கக் கேட்கிறார். தமிழகத்தில் உள்ள அனைத்து கட்சிகளும் ஆளுநர் உடனடியாக கையெழுத்துப் போடவேண்டும் என்ற கோரிக்கையை வைத்துள்ளது. 

 

அவர் யாரையும் மதிக்காமல் சூதாட்டத்தை நடத்துபவர்கள் 9 பேரை ஆளுநர் மாளிகைக்கு அழைத்து விருந்து கொடுத்துப் பேசுகிறார். இதற்கு என்ன காரணம். தமிழகத்தில் உள்ளவர்கள் தொடர்ந்து சாக வேண்டும். ஆளுநர் அவர்களுடன் உறவாக இருப்பார் என்றால் இந்தக் கள்ள உறவிற்கு என்ன பெயர். இந்தக் கள்ள உறவை ஆளுநர் மேற்கொள்ளலாமா?” எனக் கேள்வி எழுப்பினார்.

 

முன்னதாக மாநிலச் செயலாளர் முத்தரசன் பேரணியின்போது “ஆளுநர் ரவியா? ஆன்லைன் ரம்மியா?” என முழக்கமிட்டதும் குறிப்பிடத்தக்கது.

 

ஆளுநர் மாளிகை முற்றுகை பேரணியில் ஈடுபட்ட 4000த்திற்கும் அதிகமானோர் தற்போது காவல்துறையால் கைது செய்யப்பட்டுள்ளனர். கைது செய்யப்பட்டவர்கள் அனைவரையும் பேருந்துகளில் ஏற்றிச் சென்று சமுதாய நலக்கூடங்களில் தங்க வைத்தனர்.

 

 

சார்ந்த செய்திகள்

 

Next Story

சிபிஎம் அலுவலகம் மீதான தாக்குதல் சம்பவம் - சட்டப்பேரவையில் முதல்வர் விளக்கம்!

Published on 25/06/2024 | Edited on 25/06/2024
Tirunelveli CPM Office incident CM explanation in the 

சென்னை தலைமைச் செயலகத்திலுள்ள சட்டமன்றப் பேரவை மண்டபத்தில் தமிழக சட்டசபை பேரவைக் கூட்டம் கடந்த 20 ஆம் தேதி (20.06.2024) தொடங்கியது. அப்போது மறைந்த முன்னாள் சட்டமன்ற உறுப்பினர்களுக்கு இரங்கல் தெரிவித்து மௌன அஞ்சலி செலுத்தப்பட்டது. மேலும் கள்ளக்குறிச்சியில் கள்ளச்சாராயம் குடித்து உயிரிழந்தவர்களுக்கு இரங்கல் தெரிவிக்கப்பட்டது. சட்டப்பேரவை கூட்டத் தொடரின் இரண்டாம் நாளில் (21.06.2024) இருந்து பல்வேறு துறைகளின் மீதான மானியக் கோரிக்கைகளின் மீது விவாதமும், வாக்கெடுப்பும் நடைபெற்று வருகிறது.

இந்நிலையில் திருநெல்வேலி மாவட்டம், மார்க்சிஸ்ட் கம்யூனிஸ்ட் கட்சி அலுவலகம் தாக்கப்பட்டது குறித்த கவன ஈர்ப்புக்கு தமிழ்நாடு முதலமைச்சர் மு.க.ஸ்டாலின் பதிலளித்து பேசுகையில், “திருநெல்வேலி மாவட்டம், ரெட்டியார்பட்டியில் உள்ள மார்க்சிஸ்ட் கம்யூனிஸ்ட் கட்சி அலுவலகத்தில் 13-6-2024 அன்று இருவேறு சமூகத்தைச் சார்ந்த மணமக்களுக்கு சாதி மறுப்புத் திருமணம் செய்து வைக்கப்பட்டு, அதுதொடர்பான புகைப்படம் முகநூல் பக்கத்திலே பதிவிடப்பட்டதாகத் தெரிகிறது. இதனையடுத்து, மணப்பெண்ணின் குடும்பத்தினர் கடந்த 14-6-2024 அன்று மார்க்சிஸ்ட் கம்யூனிஸ்ட் கட்சி அலுவலகத்திற்குச் சென்று, இதுகுறித்துக் கேட்டு, தகராறில் ஈடுபட்டு, அங்கிருந்த பொருட்களைச் சேதப்படுத்தியிருக்கிறார்கள். 

Tirunelveli CPM Office incident CM explanation in the 

இச்சம்பவம் தொடர்பாக, அக்கட்சியின் சார்பில் அளிக்கப்பட்ட புகாரின் அடிப்படையில், பெருமாள்புரம் காவல் நிலையத்தில் வழக்கு பதிவு செய்யப்பட்டு, 14 பேர் கைது செய்யப்பட்டு, அவர்களில் 7 பெண்கள் பிணையில் விடுவிக்கப்பட்டிருக்கிறார்கள்; 7 ஆண்கள் நீதிமன்றக் காவலுக்கு உட்படுத்தப்பட்டிருக்கிறார்கள். விசாரணையில் இச்சம்பவத்தில் சாதிய வன்கொடுமை நிகழ்ந்திருப்பதற்கான முகாந்திரம் உள்ளதாகச் தெரியவந்ததையடுத்து, இவ்வழக்கில் வன்கொடுமைத் தடுப்புச் சட்டத்தின் பிரிவுகளும் சேர்க்கப்பட்டு, தொடர்ந்து விசாரணை மேற்கொள்ளப்பட்டு வருகிறது.

சமூகநீதிக் கொள்கையைத் தனது உயிர் மூச்சாகக் கொண்டு தொடங்கப்பட்ட திராவிட முன்னேற்றக் கழகம், பெண் கல்வி, சமஉரிமை, சாதி மறுப்புத் திருமணம் ஆகியவற்றை தனது ஆரம்பக்காலம் தொட்டே ஆதரித்து வரக்கூடிய இயக்கமாகும். இதனை இந்த அவையில் உள்ள அனைவரும் அறிவார்கள். நமது அரசு பொறுப்பேற்றதிலிருந்து இதுபோன்ற பிற்போக்குத்தனமான சமூகக் குற்றங்களுக்கு எதிரான நடவடிக்கைகள் மிகவும் தீவிரமாகக் கண்காணிக்கப்பட்டு வருகின்றன. இதன் காரணமாக, இதுபோன்ற இனங்களில் பதிவுசெய்யப்படும் வழக்குகளில் குற்றவாளிகளுக்கு முறையான தண்டனை வாங்கித் தரப்படுகிறது. 

Tirunelveli CPM Office incident CM explanation in the 

இதற்கென ஒரு சிறப்புச் சட்டத்தைக் கொண்டுவருவதைவிட, தற்போது இதுபோன்ற குற்றங்களுக்கு நடைமுறையிலுள்ள சட்டப்பிரிவுகள், குறிப்பாக வன்கொடுமைத் தடுப்புச் சட்டம், இந்தியத் தண்டனைச் சட்டம், இந்தியக் குற்றவியல் நடைமுறைச் சட்டம் ஆகியவற்றின் அடிப்படையில், தீவிரமான, வேகமான நடவடிக்கை எடுத்து குற்றவாளிகள் சட்டத்தின் முன் நிறுத்தப்படுவது சரியானது என்று இந்த அரசு கருதுகிறது. அந்த வகையில் சமீபத்தில் பல வழக்குகளில், அதிலும் கடந்த ஆட்சிக்காலத்தில் நடைபெற்ற குற்றங்களில்கூட விசாரணை துரிதப்படுத்தப்பட்டு, குற்றவாளிகளுக்குத் தண்டனைகள் வாங்கித் தரப்பட்டு வருகின்றன” எனப் பேசினார்.

Next Story

'திமுக வெற்றிக்காக பாடுபடுவோம்' -முத்தரசன் பேட்டி

Published on 15/06/2024 | Edited on 15/06/2024
nn

விழுப்புரம் மாவட்டம் விக்கிரவாண்டி சட்டமன்றத் தொகுதிக்கு ஜூலை 10 ஆம் தேதி இடைத்தேர்தல் நடைபெறும் எனத் தேர்தல் ஆணையம் அறிவித்துள்ளது. அரசியல் கட்சிகள் வேட்பாளர்களை அறிவிப்பதில் தீவிரம் காட்டி வரும் நிலையில் அதிமுக இந்த இடைத் தேர்தலை புறக்கணிக்க முடிவெடுத்துள்ளது.

இந்நிலையில் ஈரோடு மாவட்டம் சத்தியமங்கலத்தில் இந்திய கம்யூனிஸ்ட் கட்சியின் மாநில செயலாளர் முத்தரசன் இன்று செய்தியாளர்களைச் சந்தித்தார். அப்போது பேசுகையில், ''குவைத்தில் நடந்த தீ விபத்தில் இறந்தவர்களுக்கு தமிழக அரசு ரூ.5 லட்சம் வழங்கிய நிலையில், மத்திய அரசு ரூ.2 லட்சம் மட்டுமே வழங்கியுள்ளது. அதை ரூ.25 லட்சமாக உயர்த்தி கொடுக்க வேண்டும். நீட் தேர்வில் நடைபெற்ற ஏராளமான குளறுபடிகளை சரி செய்ய வேண்டும். தமிழகத்தில் நீட் தேர்வை நிரந்தரமாக தடை விதிக்க வேண்டும். விக்கிரவாண்டி தொகுதியில் தி.மு.க. வேட்பாளரை இந்திய கம்யூனிஸ்ட் கட்சி முழுமையாக ஆதரிக்கும். திமுக வெற்றிக்காக பாடுபடுவோம். வனத்துறையில் பணியாற்றும் வேட்டை தடுப்பு காவலர்களை பணி நிரந்தரம் செய்ய வேண்டும். வனத்தில் 40 ஆண்டுகளுக்கு மேலாக வளர்ந்து, தற்பொழுது பட்டுப்போன மூங்கில் மரங்களை வனப்பகுதியில் வாழும் பழங்குடியினரே அதனை எடுத்துச் செல்ல வனத்துறை அனுமதிக்க வேண்டும்'' என்றார்.

The website encountered an unexpected error. Please try again later.