Skip to main content

அரசு, நிதி ஒதுக்காததால் ஊராட்சிப் பணிகள் பாதிப்பு... தலைவர்கள் புகார் மனு...

Published on 20/11/2020 | Edited on 20/11/2020

 

dddd

 

கடலூர் மாவட்டம் பண்ருட்டி ஊராட்சி ஒன்றியத்தில், 42 ஊராட்சிகள் உள்ளன. இந்த ஊராட்சிகளில், போதிய அளவில் திட்டப் பணிகளை நிறைவேற்றுவதற்கு, அரசு நிதி ஒதுக்காததால், பணிகளை செய்ய முடியாமல் ஊராட்சி மன்றத் தலைவர்கள் திணறி வருகின்றனர்.

 

இதனைக் கருத்தில் கொண்டு, பண்ருட்டி ஒன்றிய ஊராட்சி மன்றத் தலைவர்களின் கூட்டமைப்புத் தலைவர் வசந்தகுமாரி ஜெயராமன் தலைமையில் ஊராட்சி மன்றத் தலைவர்கள், பண்ருட்டி வட்டார வளர்ச்சி அலுவலர்கள் சீனிவாசன், ரவிச்சந்திரன் ஆகியோரை நேரில் சந்தித்துக் கோரிக்கை மனுவை அளித்தனர்.

 

அந்த மனுவில், ஊராட்சிகள் மூலம் பணியாற்றும் ஊழியர்கள், ஊராட்சியில் மேற்கொள்ளப்படும் சிறுசிறு பணிகள் ஆகியவற்றிற்கு, ஊதியம் வழங்குவதற்காக, கணக்கு எண் ஒன்றிலிருந்து நிதி வழங்கப்பட்டு வந்தது. தற்போது அதில் பொதுநிதி ஊராட்சி செலவினங்களுக்கு இல்லாததால், ஊராட்சிப் பணிகளை மேற்கொள்வதில் கடும் சிரமம் ஏற்பட்டுள்ளது. எனவே, அனைத்து ஊராட்சி மன்றத் தலைவர்களும், தங்களது சொந்தப் பணம் மற்றும் கடன் வாங்கிதான் ஊராட்சிப் பணிகளைச் செய்து வருகிறோம்.

 

இதே நிலை நீடித்தால், கிராம ஊராட்சிகளில் முக்கியப் பணிகள் கூட செய்ய முடியாமல் சுணக்கம் ஏற்படும். பொதுமக்களுக்குத் தேவையான பணிகளைச் செய்ய முடியாத நிலை உருவாகும். எனவே, ஊராட்சிகளில் வேறு கணக்கிலிருக்கும் நிதியை ஊராட்சி மன்ற கணக்கு எண் 1-க்கு மாற்றம் செய்ய வேண்டும். சுமார் 5 லட்சம் அளவிற்குக் குறையாமல் நிதியை மாற்றித் தருமாறு அதிகாரிகள் ஆவனசெய்ய வேண்டும் என்று அந்த மனுவில் கூறப்பட்டுள்ளது.

 

cnc

 

மனுவைப் பெற்றுக்கொண்ட அதிகாரிகள், அதற்கான நடவடிக்கைகள் எடுப்பதாகக் கூறி உள்ளனர். அப்போது ஊராட்சி மன்றத் தலைவர்கள் மணப்பாக்கம் சியாமளா சுரேந்தர், எல்.என்.புரம் தமிழ்ச்செல்வி செல்வமணி, கீழிருப்பு முருகன், குடுமியான்குப்பம் கலியமூர்த்தி, கருக்கை கலைமணி உட்பட 20க்கும் மேற்பட்ட ஊராட்சி மன்றத் தலைவர்கள் கையெழுத்திட்ட அந்த மனுவை அதிகாரிகள் பெற்றுக்கொண்டனர்.

 

ஊராட்சிப் பணிகளைச் செய்வதற்கு பொதுமக்களால் தேர்வு செய்யப்பட்ட ஊராட்சி மன்றத் தலைவர்கள் நிதி இல்லாமல் தடுமாறுகின்றனர். அரசும் அதிகாரிகளும் எப்போது நிதி நிலைமையைச் சரி செய்வார்கள் என்ற கேள்வி எழுந்துள்ளது.

 

 

 

சார்ந்த செய்திகள்

 

Next Story

கால் இன்றி அவதிப்படும் பள்ளிச் சிறுவன்; உதவிக்கரம் நீட்டிய ஊராட்சி மன்ற தலைவர்!

Published on 03/06/2024 | Edited on 03/06/2024
panchayat president bought four-wheeled sky for student suffering from leglessness

ராணிப்பேட்டை மாவட்டம் வாலாஜாபேட்டை அடுத்த வங்கூர் ஊராட்சிக்குட்பட்ட நாராயணக்குப்பம் பகுதியைச் சேர்ந்த கூலித் தொழிலாளி கங்காதரன். இவரது மனைவி நதியா. இந்த தம்பதிக்கு பத்தாம் வகுப்பு படிக்கும் ஒரு மகளும், எட்டாம் வகுப்பு படிக்கும் ஜீவா என்ற ஒரு மகனும் உள்ளனர்.

கடந்த ஐந்து வருடங்களுக்கு முன்பு ஜீவாவிற்கு வலது காலில் லேசாக புண் காயம் ஏற்பட்டதாக தெரிகிறது. அந்த காயம் நாளடைவில் பெரியதாக உருவாகி வலது கால் முழுவதுமாக சேதமடைந்துள்ளது. ஜீவாவை அவரது பெற்றோர்கள் பல்வேறு மருத்துவமனைகளில் அழைத்துச் சென்று காட்டியபோது, காயம் உள்ளுக்குள் அதிகமாகி கால் சேதம் அடைந்துள்ளதாகவும் உடனடியாக அறுவை சிகிச்சை செய்து முட்டி வரை காலை அகற்ற வேண்டும் இல்லையேல் உயிருக்கே ஆபத்து என மருத்துவர்கள் தெரிவித்துள்ளனர். இதைக்கேட்டு பெற்றோர்கள் அதிர்ச்சியடைந்து, கண்ணீர் விட்டுள்ளனர். மகனின் உயிர் முக்கியம் என மருத்துவர்களின் ஆலோசனையின் பேரில் சிறுவனின் கால் முட்டி வரை அறுவை சிகிச்சை மூலமாக துண்டிக்கப்பட்டுள்ளது.

மற்ற சிறுவர்களைப் போல் வெளியில் செல்ல முடியாமல் ஜீவா வீட்டிலேயே முடங்கி கிடந்ததார். சிறுவனின் சிகிச்சைக்காக மருத்துவமனைக்கு அழைத்துச் செல்லும்போதும், அவன் பள்ளிக்கு செல்லும்போது பெரும் சிரமத்தை சந்தித்துள்ளார்கள். 13 வயது சிறுவனை தூக்கிக்கொண்டு சுமந்து செல்லும் காட்சி பார்ப்போரை கண்கலங்க வைத்தது.

இதனைக் கண்ட அந்த கிராமத்தின் வங்கூர் ஊராட்சி மன்ற தலைவர் அம்சவேணி பெரியசாமி, சிறுவனுக்கு ரூபாய் ஒரு லட்சம் மதிப்பிலான பேட்டரியில் இயங்கும் நான்கு சக்கர வாகனத்தை சொந்த செலவில் வாங்கி கொடுத்துள்ளார்.  வரும் 10-ஆம் தேதி பள்ளிகள் திறக்க உள்ள நிலையில் தானும் மற்ற சிறுவர்களை போல் எவ்வித சிரமமும் இன்றி பள்ளிக்குச் செல்லப் போவதாக சிறுவன் ஜீவா மகிழ்ச்சி பொங்க கூறினார். தன் எதிர்காலம் முடங்கி விட்டதாக எண்ணி இதுநாள் வரை வீட்டில் முடங்கி கிடந்த சிறுவனுக்கு உதவிக்கரம் நீட்டிய ஊராட்சி மன்ற தலைவரை அப்பகுதி மக்கள் வெகுவாக பாராட்டுகளை தெரிவித்தனர்.

மிகவும் ஏழ்மை நிலையில் உள்ள சிறுவன் ஜீவாவின் குடும்பத்திற்கு தமிழக அரசு சார்பில் உதவிகளை செய்ய வேண்டுமென அவரது பெற்றோர்கள்  ஆதங்கத்தோடு கண்ணீர் மல்க கோரிக்கை விடுத்தனர்.

Next Story

கிச்சன் கட்ட ரூ.90 ஆயிரம் லஞ்சம்! சிக்கிய ஊராட்சி மன்ற தலைவர் - வைரலாகும் ஆடியோ

Published on 16/05/2024 | Edited on 16/05/2024
 panchayat  president asked for a bribe of 90 thousand rupees to build a kitchen

செங்கல்பட்டு மாவட்டம், தாம்பரம் அருகே அமைந்துள்ளது அகரம்தென் ஊராட்சி. இப்பகுதியில் உள்ளது  மும்மூர்த்தி அவென்யூ. இங்கு, கொத்தனார் பாபு அருள்ஜோதி என்பவருக்கு சொந்தமாக 1100 சதுர அடி கொண்ட நிலம் உள்ளது. இதனை, இந்து முன்னணியைச் சேர்ந்த ஓய்வு பெற்ற ராணுவ அதிகாரி சந்தானம் என்பவரிடம் பாபு அருள்ஜோதி வாங்கியதாக கூறப்படுகிறது.

இந்த நிலையில், பாபு அருள்ஜோதி தனது சொந்த நிலத்தில் வீடு கட்ட முடிவு எடுத்துள்ளார். இதையடுத்து,  3 அடுக்கு மாடிவீடு கட்ட சி.எம்.டி.ஏ.விடம் முறைப்படி அனுமதி பெற்றுள்ளார். தொடர்ந்து, நிலம் அமைந்துள்ள பகுதியானது, அகரம்தென் ஊராட்சிகுட்பட்டது என்பதால்.. அனுமதி வாங்க அகரம்தென் ஊராட்சி அலுவலகத்திற்கு நேரடியாக சென்றுள்ளார். அங்கு, அகரம்தென் ஊராட்சி செயலாளர் பிரபாகரன் என்பவரைச் சந்தித்து, கட்டட அனுமதி கோரி மனு அளித்துள்ளார். அப்போது, ஊராட்சி அலுவலகத்தில் தற்காலிக ஊழியராக பணிபுரியும் ஹரிகிருஷ்ணன் என்பவர், கட்டட அனுமதி வாங்கவந்த பாபு அருள்ஜோதியை வழிமறித்துள்ளார். அப்போது பேசியவர், ஊராட்சி தலைவர் ஜெகதீஸ்வரனை பார்த்து விட்டீர்களா, ஒரு கிச்சனுக்கு 30 ஆயிரம் ரூபாய் வீதம் 3 அடுக்கு மாடி கிச்சனுக்கு 90 ஆயிரம் ரூபாய் லஞ்சம் தரவேண்டும் என்று கூறியுள்ளார். இதைக் கேட்டு அதிர்ச்சியடைந்த பாபு அருள்ஜோதி முடியாது எனக் கூற, நீங்கள் எதுவென்றாலும் தலைவரிடம் பேசுங்கள் எனக் கூறி அவரை அனுப்பிவிட்டதாக கூறப்படுகிறது.

இதையடுத்து, வீடு திரும்பிய பாபு அருள்ஜோதி, அகரம்தென் ஊராட்சி தலைவர் ஜெகதீஸ்வரனை செல்போனில் தொடர்புகொண்டு பேசியுள்ளார். அப்போது, பேசிய திமுகவைச் சேர்ந்த ஜெகதீஸ்வரன், ''வீடுகட்ட உள்ள இடம் சந்தானம் வீட்டிற்கு எதிரில் உள்ள இடம் தானே.. அனுமதி கொடுக்க ரொம்ப யோசிக்கணுமே..'' எனக் கூறியுள்ளார். இறுதியாக பேசியவர், ''உன் சொந்த வீட்டின் ஆவணங்களை எடுத்துக் கொண்டு நேரில் வா..'' என்று அழைப்பு விடுத்ததாக கூறப்படுகிறது. ஆனால், ஆவணங்களை வாங்கிக் கொண்டு ஊராட்சி தலைவர் மிரட்டுவார் என எண்ணிய பாபு அருள்ஜோதி, ஊராட்சி தலைவரிடம் பேசிய ஆடியோவை சமூக வலைத்தளங்களில் பகிர்ந்து, கட்டட அனுமதி கோரினால் ஊராட்சி தலைவர் ஜெகதீஸ்வரன் 90 ஆயிரம் லஞ்சம் கேட்பதாக பதிவிட்டார். அதில், தாம்பரம் காவல் ஆணையர் அலுவலகத்தின் எக்ஸ் தள பக்கத்தை டேக் செய்து இருந்தார். இதையடுத்து, கட்டடம் கட்ட லஞ்சம் கேட்டதாக கூறப்படும் ஆடியோ சமூக வலைத்தளங்களில் வைரலானது.

அதனைத் தொடர்ந்து, காவல்துறையினர் லஞ்சம் கேட்டதாக கூறிய குற்றச்சாட்டு குறித்து சி.எஸ்.ஆர்.பதிவு செய்து விசாரித்து வருகின்றனர். ஆனால், ஒரு வாரம் ஆகியும் போலீசார் எப்.ஐ.ஆர் பதிவு செய்யப்பட வில்லை எனக் கூறப்படுகிறது. மேலும், கட்டடம் வழங்க அனுமதியும் வழங்காமல் அதிகாரிகள் இழுத்தடித்து வருவதாக நில உரிமையாளர் பாபு அருள்ஜோதி குற்றம்சாட்டி வருகிறார். இதனிடையே, மீண்டும் பாபு அருள்ஜோதி ஊராட்சி தலைவர் ஜெகதீஸ்வரனிடம் போனில் பேசியதாகவும், அப்போது அவர் ஆபாசமாக பேசி கொலை மிரட்டல் விடுத்தாக புகார் ஒன்றையும் போலீசாரிடம் அளித்ததுள்ளார். இதையடுத்து, தனது உயிருக்கு உத்தரவாதம் இல்லை என்று செய்தியாளர்களைச் சந்தித்து நடந்ததை கொத்தனார் பாபு அருள்ஜோதியும், அந்த இடத்தின் முந்தைய உரிமையாளர் சந்தானமும் விரிவாக பேசினர்.