திமுக தலைவரும் தமிழக முதல்வருமான ஸ்டாலின், ‘எளிய மனிதனுக்கும் அதிகாரம்’ என்ற அடிப்படையில் பல புதிய அமைச்சர்களுக்கு வாய்ப்பு கொடுத்துள்ளார். அவர்களில் பெரம்பலூர் மாவட்டம், குன்னம் தொகுதியில் போட்டியிட்டு வெற்றிபெற்றவர் சிவசங்கர். இவருக்குப் பிற்பட்டோர் மற்றும் சீர்மரபினர் நலத் துறை அமைச்சர் பொறுப்பு வழங்கப்பட்டுள்ளது.
சிவசங்கர், மிகவும் எளிய மனிதர். கட்சிகளைக் கடந்து மாற்றுக் கட்சியினர் பொதுமக்கள் என எல்லோரிடமும் சகஜமாக நெருங்கி பேசி பழக கூடியவர். இவரது தந்தை மறைந்த சிவசுப்பிரமணியம், அரியலூர், பெரம்பலூர் மாவட்டப் பகுதியில் திமுகவில் முன்னோடியாக திகழ்ந்தவர். இவர் ஆண்டிமடம் சட்டமன்றத் தொகுதியில் 1989ஆம் ஆண்டு சட்டமன்ற உறுப்பினராக தேர்ந்தெடுக்கப்பட்டவர். வழக்கறிஞரான இவர் தற்போது நீலகிரி எம்.பி.யும், முன்னாள் மத்திய அமைச்சருமான பெரம்பலூர் ஆ. ராசாவை அரசியலுக்கு கொண்டு வந்தவர்.
இந்த சிவசுப்பிரமணியன், கலைஞர், பேராசிரியர், முரசொலி மாறன் ஆகியோரின் அன்பைப் பெற்றவர். அதனடிப்படையில் இவருக்கு ஒருமுறை ராஜ்யசபா எம்.பி. பதவியையும் கட்சித் தலைமை அளித்தது. அப்பாவின் வழியில் சிவசங்கரும் தீவிரமாக கட்சிப் பணிகளில் செயல்பட்டவர். ஸ்டாலினின் அன்புக்குப் பாத்திரமானவர். இவரது தாயார் ராஜேஸ்வரி, இவரது மனைவி டாக்டர் காயத்ரி தேவி. சிவ சரண், சூர்யா என இரண்டு மகன்கள் உள்ளனர். இவர், குடும்பத்தினரோடு இருந்ததைவிட கட்சியினருடனும் பொதுமக்களுடனும் அதிக நேரத்தை செலவு செய்தவர் என்று அப்பகுதி மக்கள் தெரிவிக்கின்றனர்.
தற்போதைய அமைச்சர் சிவசங்கர், இலக்கியவாதியும் கூட; இவர், ‘மக்களோடு நான்’, ‘சோழன் ராஜா பிராப்தி’, ‘தோழர் சோழன்’ ஆகிய நூல்களை எழுதி வெளியிட்டுள்ளார். சிலம்பு விளையாட்டு சம்மேளனத்தின் தமிழக அளவில் தலைவர், தடகள சங்கத்தின் தலைவர் இப்படி பன்முகத்தன்மை கொண்ட அரசியல்வாதி.
இவர் 1996 - 2001 வரை பெரம்பலூர் மாவட்ட ஊராட்சி குழு துணைத்தலைவர், 2001 - 2006 மாவட்ட ஊராட்சி குழு உறுப்பினர், 2006 - 2011 ஆண்டிமடம் சட்டமன்ற உறுப்பினர், 2011 - 2016 குன்னம் சட்டமன்ற உறுப்பினர் என தொடர்ந்து அரசியலில் தீவிரமாக இருந்துவந்தவர். 2016 சட்டமன்றத் தேர்தலில் இவரை திமுக அரியலூர் தொகுதியில் நிறுத்தியது. குறைந்த வாக்கு வித்தியாசத்தில் தோல்வியை சந்தித்தார். மீண்டும் 2021 தேர்தலில் அரியலூர் தொகுதியில் கட்சித் தலைமை போட்டியிட வாய்ப்பளிக்கும் என்ற நம்பிக்கையோடு அரியலூர் தொகுதியில் பல்வேறு ஆக்க பணிகளை முனைப்புடன் செய்து வந்தார்.
ஆனால், குன்னம் தொகுதியில் போட்டியிட வாய்ப்பு அளிக்கப்பட்டது. அதனைத் தொடர்ந்து பல்வேறு உட்கட்சி அரசியலை முறியடித்து எம்.எல்.ஏ.வாக வெற்றிபெற்று இப்போது அமைச்சராகவும் பொறுப்பேற்றுள்ளார். 2011 - 2016 அதிமுக ஆட்சியில், திமுக சட்டமன்ற உறுப்பினராக இருந்த இவர், சட்டமன்றத்தில் பல்வேறு கருத்துக்களை எதிரொலிக்க செய்து பரபரப்பை ஏற்படுத்தியவர். அந்தக் காலகட்டத்தில் அவ்வப்போது சட்டமன்றத்தில் திமுகவினரை பேசவிடாமல் ஸ்டாலின் உட்பட திமுக எம்.எல்.ஏ.க்களை சபாநாயகர் வெளியேற்றும்போது கடும் போராட்டம் நடத்தியவர்களில் சிவசங்கரும் ஒருவர்.
அதேபோன்று தொகுதியிலும் மக்கள் பிரச்சனைகளை உடனுக்குடன் தீர்த்து வைப்பதில் கவனம் செலுத்துவார் தொகுதியில் மட்டுமல்ல கட்சியின் அரியலூர் மாவட்டச் செயலாளர் என்ற முறையில் கட்சி பிரமுகர்களின் அனைத்து குடும்ப நிகழ்ச்சிகளில் தவறாமல் கலந்துகொள்ள இரவு, பகல் என்று பாராமல் சுற்றிக்கொண்டே இருப்பார் என்று அத்தொகுதி திமுகவினர் தெரிவிக்கின்றனர். மேலும், அதேபோன்று அதிமுக ஆட்சியில் மக்களுக்கு விரோதமான திட்டங்களை, பிரச்சினைகளை எதிர்த்து மாட்டுவண்டியில் ஊர்வலமாகச் சென்று போராட்டம் உட்பட பல்வேறு வித்தியாசமான போராட்டங்களை நடத்தியவர்.
தற்போது இவருக்கு அமைச்சர் பதவி அளித்துள்ளது திமுக தலைமை. இதனைக் கண்டு அரியலூர் மாவட்ட மக்கள் கட்சி கடந்து சந்தோஷத்தில் உள்ளனர். மேலும் ஒருங்கிணைந்த திருச்சி மாவட்டமாக இருந்தபோது திருச்சி, தஞ்சை பகுதியில்தான் திமுக, அதிமுக கட்சிகளில் அமைச்சர் பதவிகள் கிடைக்கும். மிகவும் பின்தங்கிய அரியலூர் மாவட்டம், தேவனூர் கிராமத்தில் பிறந்த சிவசங்கர் அவர்களை அமைச்சர் ஆக்கியுள்ளது வரலாற்றுப் பதிவு என்கிறார்கள் திமுக தொண்டர்கள்.
அதேவேளையில், மாவட்டத்தில் உள்ள சிமெண்ட் ஆலைகள் மூலம் மாவட்ட மக்களுக்குப் போதிய அளவு வேலைவாய்ப்பு கிடைக்கவில்லை. நிலம் கொடுத்தவர்களுக்கு உரிய இழப்பீடு கிடைக்கவில்லை. இந்த சிமெண்ட் ஆலைகளால் அடிக்கடி விபத்துக்கள் நடக்கின்றன. கிராமச் சாலைகள் பல இடங்களில் மோசமாக சீர்கெட்டு கிடக்கின்றன இவையெல்லாம் சீர் செய்வார் என்ற பெரும் எதிர்பார்ப்போடு உள்ளனர் மாவட்ட மக்கள்.
- "எல்லாருமே பார்ப்பீங்க" - விவரிக்கும் 'கூச முனுசாமி வீரப்பன்'
- "அதான் அடிச்சு தூக்குனேன்" - கூலாக சொன்ன கூச முனுசாமி வீரப்பன்
