Skip to main content

அமைச்சர் தொகுதியில் போட்டியிட ஆளுங்கட்சி நிர்வாகிகள் வேட்புமனு! - பதற்றத்தில் அதிமுகவினர்!

Published on 18/03/2021 | Edited on 18/03/2021

 

AIADMK district administrator who filed nomination independently in the ministerial constituency

 

புதுக்கோட்டை மாவட்டத்தில் உள்ள 6 சட்டமன்றத் தொகுதிகளிலும், அறிவிக்கப்பட்ட அதிமுக வேட்பாளர்களில், விராலிமலை தவிர்த்து மற்ற 5 தொகுதிகளிலும் கடும் அதிருப்தி எழுந்துள்ளது. இதனால், அறந்தாங்கி, ஆலங்குடி உள்பட பல தொகுதிகளில் தொடர்ந்து போராட்டங்களை செய்தனர் அதிமுகவினர். அவர்கள் 16ந் தேதி பிரச்சாரத்திற்கு வந்த எடப்பாடியிடம் ‘வேட்பாளரை மாற்றுங்கள் எங்கள் முதல்வரே’ என்ற வாசகத்துடன் ஆலங்குடி தொகுதி, பனங்குளம் பாலத்தில் கொத்தமங்கலம் பாண்டியன் தலைமையில் திரண்டிருந்தனர். அதனை எடப்பாடி கண்டுகொள்ளாமல் சென்றதால், சாலை மறியல் செய்து கைதாகி விடுதலையான ர.ர.க்கள் மீது கீரமங்கலம் காவல் நிலையத்தில் வழக்குப் பதிவு செய்யப்பட்டுள்ளது.

 

அதன் பிறகும், வேட்பாளர்களை மாற்றவில்லை என்பதால், அதிமுக அதிருப்தியாளர் அனைத்துத் தொகுதியிலும் வேட்பு மனுத் தாக்கல் செய்யத் தொடங்கியுள்ளனர். திருமயம் தொகுதிக்கு, முன்னாள் ஒன்றிய சேர்மன் அழகு சுப்பையாவும், அமைச்சர் விஜயபாஸ்கரின் விராலிமலைத் தொகுதிக்கு, மாவட்ட வழக்கறிஞர் அணி துணைத் தலைவர் நெவளிநாதனும் வேட்பு மனுத் தாக்கல் செய்துள்ளனர். மேலும், ஆலங்குடி தொகுதிக்கு, கொத்தமங்கலம் கூட்டுறவுச் சங்கத் தலைவர் பாண்டியன், விராலிமலைத் தொகுதிக்கு, ஆலங்குடி தொகுதியின் முன்னாள் வேட்பாளரும் வழக்கறிஞருமான ஞான.கலைச்செல்வன், முன்னாள் அமைச்சர் வெங்கடாசலம் மகள் தனலெட்சுமி ஆகியோரும் வேட்பு மனுத் தாக்கல் செய்யத் தயாராகி வருகின்றனர்.

 

இந்நிலையில், தற்போது அறந்தாங்கி தொகுதியில் மீண்டும் வாய்ப்பு கிடைக்காத எம்.எல்.ஏ ரெத்தினசபாபதி கூறும்போது, “எனக்கு ஏன் வாய்ப்பு கொடுக்கவில்லை என்பதை தெரிந்து கொள்ள முதலமைச்சர் எடப்பாடியிடமும், அமைச்சர் விஜயபாஸ்கரிடமும் நேரடியாக கேட்டேன். மழுப்பலாகச் சிரித்தனர். நான் அமமுக போய் வந்ததால், வாய்ப்பு மறுக்கப்பட்டதா என்றும் கேட்டேன் பதில் இல்லை. என்னிடம் என் தொகுதி மக்கள் இதே கேள்வியைக் கேட்கிறார்கள். அவர்களுக்குப் பதில் சொல்ல வேண்டும் அதனால் வாய்ப்பு மறுக்கப்பட்டதற்கான காரணம் சொல்லுங்கள் என்று கேட்டேன், அதற்கும் பதில் இல்லை. அதனால் காரணம் கேட்டு 20ந் தேதி முதல் விராலிமலை முருகன் சன்னதியில் இருந்து மாவட்டத்தில் உள்ள 6 தொகுதி மக்களையும் சந்திக்க பயணம் ஏற்பாடு செய்துள்ளேன். கடைசியாக மணமேல்குடி கோடியக்கரையில் (கோடியக்கரை காரியம் செய்யும் இடம் என்பது குறிப்பிடத்தக்கது) பயணத்தை முடிக்கிறேன். மாவட்டத்தில் உள்ள 6 தொகுதியிலும் அதிமுக தோற்றால் அதற்கு அமைச்சர் விஜயபாஸ்கரும் கட்சித் தலைமையுமே காரணமாவார்கள்" என்றார்.

 

nevalinathan resignation

 

இன்று விராலிமலையில் அமைச்சர் விஜயபாஸ்கருக்கு எதிராக வேட்பு மனுத் தாக்கல் செய்துள்ள வழக்கறிஞர் நெவளிநாதன் கூறும்போது, “புதுக்கோட்டை மாவட்டத்தில் தகுதியான பழைய கட்சிக்காரர்களுக்கு வேட்பாளராகும் வாய்ப்புகள் வழங்கப்படவில்லை. இதற்கு அமைச்சர் விஜயபாஸ்கரும் காரணம். அதனால் தான் நான் இங்கு வந்து போட்டியிட வேட்பு மனுத் தாக்கல் செய்திருக்கிறேன். எனது வேட்பு மனுவை கூட அதிகாரிகளை வைத்து தள்ளுபடி செய்யவும் செய்வார்கள். அதனால் தான் அனைத்தையும் வீடியோ பதிவுகள் செய்து வைத்திருக்கிறேன். நான் கட்சிக்கு கட்டுப்படாமல் வேட்பு மனுத் தாக்கல் செய்ததாக என்னை கட்சியில் இருந்து நீக்கும் முடிவு செய்வார்கள். அவர்களாக என்னை நீக்கும் முன்பே எனது மாவட்ட வழக்கறிஞர் அணி துணைத் தலைவர் பதவி மற்றும் அதிமுக அடிப்படை உறுப்பினர் பதவிவரை ராஜினாமா செய்து கடிதம் அனுப்பிவிட்டேன்" என்றார்.

 

இப்படி புதுக்கோட்டை மாவட்டம் முழுவதும் அதிமுக அதிருப்தி வேட்பாளர்களால் பரபரப்பு ஏற்பட்டுள்ள நிலையில் அவர்களைச் சமாதானம் செய்யும் முயற்சியில் அமைச்சர் விஜயபாஸ்கர் ஈடுபட்டுள்ளார்.

 

 

 

சார்ந்த செய்திகள்

 

Next Story

'அப்போதே சீப் ஏஜென்ட் ஓபிஎஸ்தான்' - எடப்பாடி பகிர்ந்த சுவாரஸ்ய தகவல்

Published on 19/06/2024 | Edited on 19/06/2024
'That's when the cheap agent became an ops' - Interesting information shared by Edappadi

'ஓபிஎஸ் எந்தக் காலத்திலும் அதிமுகவிற்கு விசுவாசமாக இருந்ததில்லை' என எடப்பாடி பழனிசாமி விமர்சித்துள்ளார்.

அதிமுக பொதுச்செயலாளர் எடப்பாடி பழனிசாமி இன்று தஞ்சையில் செய்தியாளர்களைச் சந்தித்தார். அப்போது அவர் பேசுகையில், ''78.67 கோடி ரூபாய் வழங்கப்படும் என அறிவித்தார்கள். ஆனால் அதில் 24.50 கோடி தொகை மகாத்மா காந்தி தேசிய வேலைவாய்ப்புத் திட்டத்திற்கு ஒதுக்கி இருக்கிறார்கள். இது இரண்டையும் சேர்த்துதான் 78.67 கோடி ரூபாய். அதை வைத்து பார்த்தால் குறுவை தொகுப்புக்கு 54.17 கோடி ரூபாய் விவசாயிகளுக்கு கிடைக்கும். இது போதாது. ஏனென்றால் குறுவை சாகுபடிக்கும் முழுமையாக தண்ணீர் கிடைக்கவில்லை''என்றார்.

அதனைத் தொடர்ந்து 'சசிகலா மீண்டும் அரசியலில் ரீஎன்ட்ரி கொடுத்திருப்பதாகக் கூறியுள்ளார். அதிமுகவை காப்பாற்றப் போகிறேன் என்று சொல்கிறாரே' என்ற செய்தியாளர்கள் கேள்விக்கு, ''இத்தனை நாள் அதிமுகவை யார் காப்பாற்றிக் கொண்டிருந்தார். இப்பதான் காப்பாற்ற வந்திருக்கிறார்களா? இது என்ன வேலையா ரீஎன்ட்ரி கொடுக்க. ஒரு வேலைக்கு சென்று விட்டு மூன்று வருஷம் நின்று விட்டு மறுபடியும் வேலைக்கு சேர்வதா ரீஎன்ட்ரி. 2021-இல் என்ன சொன்னார்கள் நான் பொதுவாழ்க்கையில் இருந்து விலகி விட்டேன் என்று சொன்னார்கள். இப்பொழுது ரீ என்ட்ரி  என்கிறார்கள். இத்தனை நாட்கள் கட்சியைக் காப்பாற்றியது யாரு? தொண்டன்'' என்றார்.

இறுதியாக செய்தியாளர் சந்திப்பை முடித்துவிட்டு எழ முயன்றபோது எடப்பாடி பழனிசாமியிடம் செய்தியாளர்கள், 'ஓபிஎஸ்-ஐ மீண்டும் கட்சியில் சேர்த்துக் கொள்வீர்களா?' எனக் கேள்வி எழுப்பினர். அதற்குப் பதிலளித்த எடப்பாடி பழனிசாமி, ''அவரை எப்படி அதிமுகவில் சேர்த்துக்கொள்ள முடியும். அவர்தான் அதிமுகவுக்கு எதிராக, இரட்டை இலைக்கு எதிராக போட்டியிட்டுள்ளார். ஒரு தொண்டன் கூட அவரை மதிக்க மாட்டான். ஒவ்வொரு தொண்டனும் ரத்தத்தை வியர்வையாக சிந்தி உழைத்து அதிமுகவை வெற்றி பெற வைக்க வேண்டும் எனச் செயல்பட்டு கொண்டிருக்கும் நேரத்தில் அவர் போய் பலாப்பழத்தை வைத்து பூஜை செய்கிறார். ஏற்கெனவே ஒருமுறை இதே தவறை செய்தார். அதிமுக ஆட்சியில் நான் முதலமைச்சராக இருந்தபோது பெரும்பான்மையை நிரூபிக்க வேண்டும் என்று சட்டப்பேரவைத் தலைவர் அறிவித்து வாக்கெடுப்பு நடந்த பொழுது, எதிர்த்து ஓட்டு போட்டார்.

ஓபிஎஸ் கட்சிக்கு விசுவாசமாக எப்பொழுதுமே இருந்ததில்லை. சுயநலமாகத்தான் செயல்படுவார். 1989 ஆம் ஆண்டு ஜெயலலிதா தன்னந்தனியாக சேவல் சின்னத்தில் போட்டியிட்டபோது நானும் நின்றேன். அப்பொழுது வெண்ணிற ஆடை நிர்மலா, ஜானகி அணி சார்பாக போட்டியிட்டார். அப்பொழுது அவருக்கு சீப் ஏஜென்டாக இருந்தவர் இதே ஓபிஎஸ். அப்பொழுதே ஜெயலலிதாவிற்கு எதிராக இருந்தவர் ஓபிஎஸ். எப்பொழுதும் ஜெயலலிதாவுக்கும், அதிமுகவுக்கும் விசுவாசமாக இருந்ததில்லை. சுயநலம்தான் அவரிடம் உண்டு. இப்பொழுது கூட சுயநலத்தில்தானே அங்கே போய் போட்டியிட்டார். ஜெயிச்சா மத்திய மந்திரி ஆகலாம் என்று, ஆனால் நாட்டு மக்கள் சரியான தண்டனையைக் கொடுத்துள்ளார்கள். பலாப்பழத்தை வைத்து பூஜை போடுபவரை எப்படி தொண்டன் ஏற்றுக் கொள்வான். இந்தக் கட்சிக்கு எவர் ஒருவர் துரோகம் செய்தாலும் ஓபிஎஸ் நிலைதான் வரும்'' என்றார்.

Next Story

நில மோசடி புகார்; விஜயபாஸ்கரின் முன் ஜாமீன் மனு மீண்டும் ஒத்திவைப்பு

Published on 19/06/2024 | Edited on 19/06/2024
Vijayabaskar bail plea adjourned again

கரூரில் சிபிசிஐடிக்கு மாற்றப்பட்ட 100 கோடி மதிப்புள்ள நில மோசடி வழக்கில் முன்னாள் அமைச்சர் எம்.ஆர்.விஜயபாஸ்கர் முன் ஜாமின் கேட்டு, கரூர் மாவட்ட நீதிமன்றத்தில் மனுத்தாக்கல் செய்திருந்த நிலையில், 2-வது முறையாக இருதரப்பு வாதங்களைக் கேட்ட மாவட்ட நீதிபதி சண்முகசுந்தரம் ஜாமீன் மனு மீதான விசாரணையை வருகின்ற 21-ஆம் தேதிக்கு ஒத்தி வைத்துள்ளார்.

கரூர் மாவட்டம், மேலக்கரூர் சார்பதிவாளர் முகமது அப்துல் காதர் கரூர் நகர போலீசில் கொடுத்த புகாரில், போலி சான்றிதழ் கொடுத்து 22 ஏக்கர் நிலத்தை பத்திரப்பதிவு செய்த ரகு என்பவர் மீதும், இந்த விவகாரத்தில் தன்னை மிரட்டியவர்கள் மீதும் நடவடிக்கை எடுக்க வேண்டும் என்று கூறியிருந்தார். இந்த 22 ஏக்கர் நிலம் சுமார் ரூ.100 கோடி மதிப்புடையது. இந்தப் புகாரின் மீது கரூர் நகர போலீசார் வழக்குப்பதிந்து விசாரணையைத் தொடங்கினர். 

Vijayabaskar bail plea adjourned again

இதேபோல், கரூர் மாவட்டம், வாங்கல் குப்பிச்சிபாளையத்தைச் சேர்ந்த பிரகாஷ் என்பவர் கரூர் காவல் நிலையம் மற்றும் எஸ்.பி அலுவலகத்தில் புகார் அளித்தார். அதில், தோரணக்கல்பட்டி மற்றும் குன்னம்பட்டியில் தனக்கு சொந்தமான ரூ.100 கோடி மதிப்புள்ள 22 ஏக்கர் நிலத்தை அதிமுக முன்னாள் அமைச்சர் எம்.ஆர்.விஜயபாஸ்கர் மற்றும் அவரது ஆதரவாளர்கள் ஆகியோர் தனது மனைவி மற்றும் மகளை மிரட்டி மோசடியாக பத்திரப்பதிவு செய்து உள்ளனர் என்று கூறியிருந்தார்.

இந்த வழக்கு சிபிசிஐடிக்கு மாற்றப்பட்டது. இந்த வழக்கில் தனது பெயர் சேர்க்கப்படலாம் என்று கருதி முன்னாள் அமைச்சர் எம்.ஆர்.விஜயபாஸ்கர் முன்ஜாமீன் கேட்டு கரூர் நீதிமன்றத்தில் மனுத்தாக்கல் செய்தார். கடந்த 15ஆம் தேதி வழக்கு விசாரணைக்கு வந்தபோது ஜாமீன் மனு மீதான விசாரணை இன்று வந்த நிலையில், இரு தரப்பு வாதங்களைக் கேட்ட மாவட்ட நீதிபதி சண்முகசுந்தரம் வருகின்ற 21ஆம் தேதிக்கு மனு மீதான விசாரணையை மீண்டும் 2வது முறையாக ஒத்தி வைத்துள்ளார்.