Skip to main content

மத்திய அரசின் விதிமுறைக்கு எதிராக வழக்கு தொடர்ந்தது வாட்ஸ்அப்!

Published on 26/05/2021 | Edited on 26/05/2021

 

whatsapp

 

சமூகவலைதளங்களுக்கு கட்டுப்பாடுகள் விதிக்கக் கோரி ஒருசாரார் தொடர்ந்து கோரிக்கை விடுத்ததுவந்தனர். அதேபோல் ஓடிடி தளங்களுக்கும் கட்டுப்பாடுகள் விதிக்க வேண்டுமென்ற கோரிக்கை நீண்ட நாட்களாக எழுந்துவந்தது. மேலும், விவசாயிகள் போராட்டம் தொடர்பாக ட்விட்டர் நிறுவனத்துக்கும் மத்திய அரசுக்கும் மோதல் வெடித்தது. இதனைத் தொடர்ந்து மத்திய அரசு சமூகவலைதளங்களுக்கும் ஓடிடி தளங்களுக்கும் கடந்த பிப்ரவரி மாதம் கட்டுப்பாடுகளை அறிவித்தது.

 

மேலும், இந்தக் கட்டுப்பாடுகள் மூன்று மாதங்கள் கழித்து அமலுக்கு வருமென்றும் மத்திய அரசு அப்போது தெரிவித்திருந்தது. இந்தநிலையில், புதிய கட்டுப்பாடுகளை ஏற்றுக்கொள்வதற்கான கால அவகாசம் நேற்றுடன் (25.05.2021) முடிவடைந்தது. ஆனால் தற்போதுவரை வாட்சப், ஃபேஸ்புக், ட்விட்டர் ஆகிய நிறுவனங்கள் புதிய கட்டுப்பாடுகளுக்கு இணங்கவில்லை. மேலும், அந்த நிறுவனங்கள் மத்திய அரசின் புதிய விதிகள் குறித்து, அமெரிக்காவில் இருக்கும் தங்களது தலைமை அலுவலகத்தின் பதிலுக்காக காத்திருப்பதால், புதிய விதிகளை ஏற்றுக்கொள்வது தொடர்பாக முடிவெடுக்க 6 மாதங்கள்வரை  அவகாசம் கேட்டுவருகின்றனர்.

 

ஃபேஸ்புக் நிறுவனமும் தாங்கள் புதிய விதிகளுக்கு உடன்பட குறிக்கோள் கொண்டிருப்பாதகவும், அதேநேரத்தில் சில விவகாரங்கள் குறித்து மத்திய அரசுடன் பேச வேண்டியிருப்பதாகவும் தெரிவித்திருந்தது. இந்தநிலையில், ஃபேஸ்புக் நிறுவனத்தின் கீழ் இயங்கிவரும் வாட்ஸ்அப் நிறுவனம், மத்திய அரசின் புதிய விதிமுறைக்கு எதிராக டெல்லி உயர் நீதிமன்றத்தில் வழக்கு தொடர்ந்துள்தாக தகவல்கள் வெளியாகியுள்ளன.

 

மத்திய அரசின் புதிய விதிகளில் ஒன்று, ஒரு தகவலை முதன்முதலில் குறிப்பிட்ட சமூகவலைத்தளத்தில் பதிவிட்டவர் யார் என அரசு கேட்டால் சமூகவலைதளம், அந்த நபரைக் கண்டறிந்து தெரிவிக்க வேண்டும் என்பதாகும். இதனை எதிர்த்தே வாட்ஸ்அப் நிறுவனம், வழக்கு தொடர்ந்திருப்பதாக தகவல்கள் தெரிவிக்கின்றன. இந்த விதிமுறை இந்திய அரசியல் சட்டம், தனது குடிமக்களுக்கு வழங்கியுள்ள தனியுரிமையை மீறும் வகையில் இருப்பதாகவும், வாட்ஸ்அப் செயலியில் தகவல் அனுப்பும் முறை என்க்ரிப்ட் செய்யப்பட்டிருப்பதால், முதன்முதலில் ஒரு செய்தியைப் பதிவிட்டவரைக் கண்டுபிடிக்க, தகவலைப் பெற்றவர் முதல் அனுப்பியவர் வரை அனைவரது என்கிரிப்ஷனும் உடைக்கப்பட வேண்டியதிருக்கும் எனவும் வாட்ஸ்அப் தனது மனுவில் கூறியுள்ளதாக தகவல்கள் கூறுகின்றன. இந்த விவகாரம் குறித்து கருத்து தெரிவிக்க வாட்ஸ்அப் செய்தித்தொடர்பாளர் மறுத்துவிட்டார் என்பது குறிப்பிடத்தக்கது.

 

 

சார்ந்த செய்திகள்

 

Next Story

“‘மோடியின் குடும்பம்’ என்பதை நீக்குங்கள்” - பிரதமர் மோடி

Published on 12/06/2024 | Edited on 12/06/2024
PM Modi request to remove 'Modi family' from social media

ஏழு கட்டங்களாக நடைபெற்ற மக்களவைத் தேர்தல் முடிவுகள் கடந்த 4ஆம் தேதி வெளியானது. அதில் 543 மக்களவைத் தொகுதிகளில் தேசிய ஜனநாயகக் கூட்டணி 292 இடங்களிலும், இந்தியா கூட்டணி 234 இடங்களிலும் வென்றது. இதில் தேசிய ஜனநாயகக் கூட்டணியில் உள்ள பா.ஜ.க தனித்து 240 தொகுதிகளை மட்டுமே கைப்பற்றியிருந்தது.

ஆட்சி அமைக்க தனிப்பெரும்பான்மை கிடைக்காததால் தேசிய ஜனநாயகக் கூட்டணியில் உள்ள தெலுங்கு தேசம் கட்சி மற்றும் ஐக்கிய ஜனதா தளம் கட்சியுடன் சேர்ந்து கூட்டணி ஆட்சியை மத்தியில் பிரதமர் மோடி தலைமையிலான பாஜக அமைத்துள்ளது. இந்த நிலையில் பிரதமர் மோடி சமூக வலைதளங்களில் ‘மோடியின் குடும்பம்’ என்று வைத்திருப்பவர்கள் அதனை நீக்க வேண்டும் என்று கோரிக்கை வைத்துள்ளார். 

நாடாளுமன்றத் தேர்தல் பரப்புரையின் போது, பீகாரின் ராஷ்டிரிய ஜனதாதளம் கட்சியின் தலைவர் லாலு பிரசாத் யாதவ் பிரதமர் மோடிக்கு குடும்பம் இல்லை என்று விமர்சித்திருந்தார். அதற்கு, இந்தியாவே எனது குடும்பம் என்று பிரதமர் மோடி பதிலளித்தார். இதனைத் தொடர்ந்து பாஜக மற்றும் இந்துத்துவா அமைப்பினர் சமூக வலைதளங்களில் அவர்களது பெயருக்குப் பின்னால் ‘மோடியின் குடும்பம்’(மோடி கா பரிவார்) என்று மாற்றம் செய்துகொண்டனர். இந்த நிலையில்தான் பிரதமர் மோடி, ‘மோடியின் குடும்பம்’ என்பதை நீக்குமாறு கேட்டுக்கொண்டுள்ளார். 

மேலும், இந்தியா முழுவதும் இருக்கும் மக்கள் அனைவரும் என் மீதான பாசத்தின் காரணமாக சமூக வலைதள கணக்குக்குகளுக்கு பின் ‘மோடியின் குடும்பம்’ என்று  சேர்ந்தனர். அதிலிருந்து நான் நிறைய பலன் பெற்றேன். நமது தேசத்தின் முன்னேற்றத்திற்காகத் தொடர்ந்து பணியாற்றுவதற்கான ஆணையை மக்கள் நமக்கு வழங்கியுள்ளனர். நாம் அனைவரும் ஒரு குடும்பம் என்ற செய்தி திறம்படத் தெரிவிக்கப்பட்டுள்ளது. அதற்கு இந்திய மக்களுக்கு நன்றியை தெரிவித்துக்கொள்கிறேன். தற்போது, ‘மோடியின் குடும்பம்’ என்பதை நீக்குமாறு கேட்டுக்கொள்கிறேன். பெயர்கள் மாறலாம்; ஆனால் இந்தியாவின் முன்னேற்றத்திற்காக உழைக்கும் நாம் எப்போதும் ஒரே குடும்பம் என்ற வலிமையான உறவு அப்படியே இருக்கும் என்று தெரிவித்துள்ளார். 

Next Story

பாஜகவினருக்கு பிரதமர் மோடி முக்கிய அறிவுறுத்தல்!

Published on 11/06/2024 | Edited on 11/06/2024
Prime Minister Modi's important instructions to the BJP

நாட்டின் பிரதமராக மூன்றாவது முறையாக நரேந்திர மோடி பதவியேற்கும் விழா டெல்லியில் உள்ள குடியரசுத் தலைவர் மாளிகையில் நேற்று முன்தினம் (09.06.2024) நடைபெற்றது. இதன் ஒரு பகுதியாகக் குடியரசுத் தலைவர் திரௌபதி முர்மு, பிரதமராகப் பதவியேற்கும் மோடிக்கு பதவிப் பிரமாணமும், ரகசிய காப்பு பிரமாணமும் செய்து வைத்தார். அதனைத் தொடர்ந்து கேபினட் அமைச்சர்களும், தனிப்பொறுப்புடன் கூடிய இணையமைச்சர்கள், மற்றும் இணையமைச்சர்கள் பதவியேற்றனர். இதன் மூலம் பிரதமர் மோடி தலைமையில் 72 பேர் கொண்ட அமைச்சர்கள் பதவி ஏற்றனர். அதில் 30 கேபினட் அமைச்சர்கள், தனிப்பொறுப்புடன் கூடிய 5 இணையமைச்சர்கள் மற்றும் 36 இணையமைச்சர்கள் பதவி ஏற்றனர். இதனையடுத்து மத்திய அமைச்சர்களின் இலாகாக்கள் அதிகாரப்பூர்வமாக நேற்று (10.06.2024) அறிவிக்கப்பட்டன.

இந்நிலையில் பிரதமர் மோடி சமூக வலைத்தளத்தில் பாஜகவினரின் பெயருக்குப் பின்னால் ‘மோடியின் குடும்பம்’ எனக் குறிப்பிட்டிருப்பதை நீக்குமாறு அறிவுறுத்தியுள்ளார். இது தொடர்பாக அவர் எக்ஸ் சமூக வலைத்தளத்தில் வெளியிட்டுள்ள பதிவில், “தேர்தல் பிரச்சாரத்தின் மூலம், இந்தியா முழுவதும் உள்ள மக்கள் தங்கள் சமூக ஊடகங்களில் என் மீதான பாசத்தின் அடையாளமாக மோடியின் குடும்பம் (Modi Ka Parivar - மோடி கா பரிவார்) என சேர்த்தனர். அதிலிருந்து நான் நிறைய பலம் பெற்றேன். இந்திய மக்கள் தேசிய ஜனநாயகக் கூட்டணிக்குத் தொடர்ந்து மூன்றாவது முறையாகப் பெரும்பான்மையை வழங்கியுள்ளனர். இது ஒரு வகையான சாதனையாகும். மேலும் நமது தேசத்தின் முன்னேற்றத்திற்காகத் தொடர்ந்து பணியாற்றுவதற்கான ஆணையை எங்களுக்கு வழங்கியுள்ளனர். 

Prime Minister Modi's important instructions to the BJP

நாம் அனைவரும் ஒரே குடும்பம் என்ற செய்தி திறம்படத் தெரிவிக்கப்பட்டுள்ள நிலையில், இந்திய மக்களுக்கு மீண்டும் ஒருமுறை நன்றி தெரிவித்துக்கொள்கிறேன். மேலும் உங்கள் சமூக ஊடகப் பக்கத்தில் இருந்து மோடியின் குடும்பம் என்பதை நீக்குமாறு கேட்டுக்கொள்கிறேன். காட்சிப் பெயர் மாறலாம், ஆனால் இந்தியாவின் முன்னேற்றத்திற்காகப் பாடுபடும் ஒரு குடும்பம் என்ற நமது பிணைப்பு வலுவாகவும் உடைக்கப்படாமலும் உள்ளது” எனத் தெரிவித்துள்ளார்.

முன்னதாக பீகார் மாநில முன்னாள் முதல்வரான லாலு பிரசாத் யாதவ் பொதுக்கூட்டம் ஒன்றில் பேசும்போது ‘பிரதமர் மோடிக்கு குடும்பம் இல்லை’ எனத் தெரிவித்திருந்தார். இதனையடுத்து பாஜக தலைவர்கள் மற்றும் தொண்டர்கள் சமூக வலைத்தளத்தில் தளத்தில் தங்களது பெயருக்குப் பின்னால் ‘மோடியின் குடும்பம்’ எனக் குறிப்பிட்டு இருந்தது குறிப்பிடத்தக்கது.