Skip to main content

“ஏழு கோடி கன்னடர்களையும் மத்திய அரசு அவமதித்துவிட்டது” - சித்தராமையா காட்டம்

Published on 10/01/2024 | Edited on 10/01/2024
 Siddaramaiah says Central government has insulted all 7 crore Kannadas

2024 ஆம் ஆண்டின் 75வது குடியரசு தின விழா இந்தியா முழுவதும் கோலாகலமாகக் கொண்டாடப்படவுள்ளது. மேலும், தலைநகர் டெல்லியில் குடியரசு தின விழா வரும் ஜனவரி 26ஆம் தேதி நடைபெறவுள்ளது. டெல்லியில், ஒவ்வொரு ஆண்டிலும் குடியரசு தினவிழாவின் போது அணிவகுப்பு நடைபெறும். இந்த அணிவகுப்பில் ஒவ்வொரு மாநிலங்களுக்கு பெருமை சேர்க்கும் விதமாக, அந்த மாநில அலங்கார ஊர்திகள் இடம் பெறும். இதற்காக மத்திய அரசு முன்கூட்டியே, மாநிலங்கள் அனுப்பும் மாடல்களை பரிசீலனை செய்து விழாவில் இடம்பெறும் ஊர்திகளை தேர்வு செய்யும். 

அந்த வகையில், இந்த ஆண்டு தமிழ்நாடு, கர்நாடகா உள்ளிட்ட மாநில அரசுகள் தங்கள் மாநில ஊர்திகளின் மாடல்களை அனுப்பியிருந்தது. அதன்படி, கர்நாடகா மாநில ஊர்திகளை சேர்க்க வேண்டும் என்ற பரிந்துரையை அம்மாநில அரசு அனுப்பியிருந்தது. ஆனால், கர்நாடகா அரசு அனுப்பியிருந்த அனைத்து பரிந்துரைகளையும் மத்திய அரசு நிராகரித்துள்ளது. இந்த நிலையில், கர்நாடகாவின் ஊர்திக்கு அனுமதி அளிக்காததன் மூலம் ஏழு கோடி கன்னடர்களை மத்திய அரசு அவமதித்துள்ளதாக கர்நாடகா முதல்வர் சித்தராமையா குற்றம்சாட்டியுள்ளார். 

இது குறித்து முதல்வர் சித்தராமையா தனது எக்ஸ் (ட்விட்டர்) பக்கத்தில் தெரிவித்துள்ளதாவது, “ஜனவரி 26ஆம் தேதி டெல்லியில் குடியரசு தின அணிவகுப்பு நடைபெறவுள்ளது. இதில் கர்நாடகா ஊர்திக்கு மத்திய அரசு வாய்ப்பளிக்கவில்லை. இதன் மூலம், மத்திய அரசு ஏழு கோடி கன்னடர்களை அவமதித்துள்ளது. கடந்த ஆண்டும் கூட கர்நாடகா அலங்கார ஊர்திக்கு மத்திய அரசு வாய்ப்பு அளிக்க மறுத்தது. அதன் பின்னர், கர்நாடகா சட்டமன்ற தேர்தலை மனதில் கொண்டு அலங்கார ஊர்திக்கு அனுமதித்தனர். இப்போது இந்த முறையும் கன்னடர்களை இழிவுபடுத்தும் போக்கை மத்திய அரசு தொடர்ந்துள்ளது. 

 Siddaramaiah says Central government has insulted all 7 crore Kannadas

மாநிலத்தின் வளர்ச்சி, சமூக நியாய ஊர்தி, நீர்ப்பாசனம், பேக்கிங் அடிப்படை வசதிகள் வளர்ச்சி, மைசூரை முன் மாதிரி ராஜ்ஜியமாக உருவாக்கிய நால்வடி கிருஷ்ண ராஜ உடையார் ஊர்தி, பெங்களூரில் கிராம தேவதை, 10ஆம் நூற்றாண்டில் கட்டிய அன்னம்மா தேவி கோவில் ஊர்தி உட்பட நான்கு ஊர்திகளுக்கு அனுமதி கோரி மத்திய அரசுக்கு அனுப்பப்பட்டது.  ஆனால், மத்திய அரசு, எங்கள் வேண்டுகோள் அனைத்தையும் நிராகரித்துவிட்டது. மாநிலத்தின் சாதனை மற்றும் சாதனையாளர்களை நாட்டுக்கு அறிமுகம் செய்யும் வாய்ப்பை மத்திய அரசு பறிக்கிறது. 

கர்நாடகாவில் காங்கிரஸ் ஆட்சிக்கு வந்திருப்பதை, பா.ஜ.கவால் சகித்துக்கொள்ள முடியவில்லை. வரிப்பகிர்வு முதல் வறட்சி நிவாரணத்தில் அநீதி வரை, கன்னடர்களால் கட்டப்பட்ட வங்கிகள், துறைமுகங்கள், விமான நிலையங்களை விற்பது வரை மத்திய அரசு தொடர்ந்து அரசியல் காழ்ப்புணர்ச்சியுடன் கன்னடர்கள் மீது தாக்குதல் நடத்தி வருகிறது. இப்போது, ​​அலங்கார ஊர்திக்கு அனுமதி மறுத்ததன் மூலம், மீண்டும் எங்கள் அடையாளத்தைத் தாக்கியுள்ளது.

கர்நாடகா பா.ஜ.க இந்த அநீதியை எதிர்த்து கேள்வி கேட்கவில்லை. பா.ஜ.க எம்.பி.க்கள் நரேந்திர மோடியின் கைப்பாவையாகி விட்டனர். அவர்கள் யாருக்கு விஸ்வாசமாக இருக்கிறார்கள்? கன்னடர்களுக்கா? அல்லது நரேந்திர மோடிக்கா?. கன்னடம் மற்றும் கர்நாடகாவுக்கு மத்திய அரசு தொடர்ந்து அநீதி இழைத்து வருவதால் கன்னடர்கள் ஏற்கெனவே கொதிப்படைந்துள்ளனர். அவர்களின் பொறுமையை மத்திய அரசு சோதிக்கக் கூடாது. இனியும் தாமதிக்காமல், மத்திய அரசு தனது தவறை உடனடியாக சரிசெய்து, கவுரவமிக்க குடியரசு தின அணிவகுப்பில் கர்நாடகா அலங்கார ஊர்திக்கு அனுமதித்து கர்நாடகாவுக்கு இழைக்கப்பட்ட அநீதியை சரி செய்ய வேண்டும்” என்று பதிவிட்டுள்ளார்.

சார்ந்த செய்திகள்

 

Next Story

‘தமிழகத்திற்கு நீர் திறக்கப்படும்’ - முதல்வர் சித்தராமையா அறிவிப்பு!

Published on 14/07/2024 | Edited on 14/07/2024
Water will be opened to Tamil Nadu CM Siddaramaiah announcement

காவிரி ஒழுங்காற்றுக் குழுவின் 99வது கூட்டம் காணொளி காட்சி வாயிலாக கடந்த 11 ஆம் தேதி (11.07.2024) நடைபெற்றது. இந்தக் கூட்டத்தில், “தமிழகத்திற்கு ஜூலை 12 ஆம் தேதி (12.07.2024) முதல் வரும் 31ஆம் தேதி வரை நாள்தோறும் 1 டிஎம்சி தண்ணீர் திறந்துவிட வேண்டும்” எனக் கர்நாடகாவுக்கு பரிந்துரை செய்திருந்தது. இதனையடுத்து தமிழகத்திற்கு காவிரியில் இருந்து நீர் திறப்பது தொடர்பாக கர்நாடக முதல்வர் சித்தராமையா தலைமையில் இன்று (14.07.2024) அனைத்து கட்சி கூட்டம் பெங்களூருவில் நடைபெற்றது. இந்தக் கூட்டத்தில் மாநில துணை முதலமைச்சரும், நீர்ப்பாசனத்துறை அமைச்சருமான டி.கே.சிவகுமார், பாஜக மாநில தலைவர் சி.டி.ரவி, நீர்ப்பாசனத்துறை துறை அதிகாரிகள், அமைச்சர்கள், நாடாளுமன்ற மற்றும் சட்டமன்ற உறுப்பினர்கள் உள்ளிட்டோர் பங்கேற்று உள்ளனர்.

இந்நிலையில் அனைத்துக் கட்சிக் கூட்டத்துக்குப் பிறகு முதல்வர் சித்தராமையா செய்தியாளர்களைச் சந்தித்துப் பேசுகையில், “இன்று அனைத்துக் கட்சிக் கூட்டம் நடந்தது. இதில் துணை முதல்வர் டி.கே. சிவக்குமார், பாஜக தலைவர்கள், மைசூரு ஆற்றுப் பள்ளத்தாக்கு பகுதிகளைச் சேர்ந்த தலைவர்கள் கலந்து கொண்டனர். தமிழகத்திற்குத் தண்ணீர் திறந்து விடக்கூடாது என்றும், காவிரி ஒழுங்காற்றுக் குழுவின் முன் மேல்முறையீடு செய்ய வேண்டும் என்றும் இந்த கூட்டத்தில் கலந்து கொண்டவர்கள் கருத்துகளைத் தெரிவித்தனர். 

Water will be opened to Tamil Nadu CM Siddaramaiah announcement

இருப்பினும் காவிரியில் நீர் இருப்பின் தற்போதைய நிலவரத்தைக் கருத்தில் கொண்டு கே.ஆர்.எஸ், கபினி அணைகளில் இருந்து நாளை (15.07.2024) முதல் 8 ஆயிரம் கன அடி நீரைத் திறந்து விடலாம் என்றும், மழை பெய்தால் இந்த எண்ணிக்கையை அதிகரிப்போம் என்றும் முடிவு செய்யப்பட்டது. இதனைச் சட்ட ஆலோசனை குழுவின் உறுப்பினர் மோகன் கட்டார்கி முன்மொழிந்தார். எனவே நாள்தோறும் ஒரு டிஎம்சி தண்ணீரைத் தமிழகத்திற்குத் திறக்க முடியாது. இந்த மாதம் இறுதிவரை தினமும் ஒரு டிஎம்சி என மொத்தமாக 20 டிஎம்சி நீர் திறக்க வேண்டுமெனக் காவிரி ஒழுங்காற்றுக் குழு பிறப்பித்துள்ள உத்தரவை எதிர்த்து காவிரி மேலாண்மை ஆணையத்தில் மேல்முறையீடு செய்வோம்” எனத் தெரிவித்தார். இதன் மூலம் ஜூலை 12 முதல் 31 வரை தினமும் 1 டிஎம்சி (11 ஆயிரத்து 500 கன அடி) தண்ணீர் திறக்க வேண்டும் என்ற காவிரி ஒழுங்காற்று குழுவின் உத்தரவைக் கர்நாடக அரசு ஏற்க மறுத்துள்ளது குறிப்பிடத்தக்கது. 

Next Story

கர்நாடகாவில் அனைத்துக் கட்சிக் கூட்டம்!

Published on 14/07/2024 | Edited on 14/07/2024
All party meeting in Karnataka

காவிரி ஒழுங்காற்றுக் குழுவின் 99வது கூட்டம் காணொளி காட்சி வாயிலாக கடந்த 11 ஆம் தேதி (11.07.2024) நடைபெற்றது. இந்தக் கூட்டத்தில், “தமிழகத்திற்கு ஜூலை 12 ஆம் தேதி (12.07.2024) முதல் வரும் 31ஆம் தேதி வரை நாள்தோறும் 1 டிஎம்சி தண்ணீர் திறந்துவிட வேண்டும்” எனக் கர்நாடகாவுக்கு பரிந்துரை செய்திருந்தது. மேலும் தமிழக எல்லையான பிலிகுண்டுலுவுக்கு செல்லும் நீரின் அளவு 1 டிஎம்சியாக இருப்பதை கர்நாடக அரசு அதிகாரிகள் உறுதி செய்ய வேண்டும் எனவும் உத்தரவு பிறப்பிக்கப்பட்டிருந்தது.

இதனையடுத்து அன்றைய தினமே கர்நாடக முதல்வர் சித்தராமையா மற்றும் துணை முதல்வர் டி.கே.சிவக்குமார் தலைமையில் தமிழகத்திற்குத் தண்ணீர் திறப்பது குறித்து அதிகாரிகளுடன் ஆலோசனை நடத்தப்பட்டது. அதனைத் தொடர்ந்து செய்தியாளர்களைச் சந்தித்த கர்நாடக முதல்வர் சித்தராமையா, “காவிரி பாசனப் பகுதியில் 28 சதவீதம் தண்ணீர் பற்றாக்குறை உள்ளது. கர்நாடகாவின் வலியுறுத்தலை மீறி தண்ணீர் திறக்க காவிரி ஒழுங்காற்று குழு உத்தரவிட்டுள்ளது. கர்நாடகாவில் பற்றாக்குறை இருப்பதால் தற்போதைக்கு தமிழகத்திற்கு தண்ணீர் திறந்துவிட  முடியாது” என்று தெரிவித்தார். மேலும் இது குறித்து ஆலோசனை நடத்தக் கர்நாடக மாநிலத்தில் உள்ள அனைத்து கட்சியினருக்கும் முதல்வர் சித்தராமையா அழைப்பு விடுத்துள்ளார்.

இந்நிலையில் தமிழகத்திற்கு காவிரியில் இருந்து நீர் திறப்பது தொடர்பாக கர்நாடக முதல்வர் சித்தராமையா தலைமையில் இன்று (14.07.2024) அனைத்து கட்சி கூட்டம் பெங்களூருவில் தொடங்கியது. இந்தக் கூட்டத்தில் மாநில துணை முதலமைச்சரும், நீர் பாசனத்துறை அமைச்சருமான டி.கே.சிவகுமார், பாஜக மாநில தலைவர் சி.டி.ரவி, நீர்பாசனத்துறை துறை அதிகாரிகள், அமைச்சர்கள், நாடாளுமன்ற மற்றும் சட்டமன்ற உறுப்பினர்கள் உள்ளிட்டோர் பங்கேற்று உள்ளனர். இந்தக் கூட்டத்தில் தமிழகத்திற்கு நீர் திறப்பது தொடர்பாக விவாதிக்கப்பட உள்ளதாக தகவல் வெளியாகியுள்ளது.