Skip to main content

ஆம்புலன்ஸ் மீது மோதிய அமைச்சரின் வாகனம்; இணையவாசிகள் விமர்சனம்

Published on 13/07/2023 | Edited on 13/07/2023

 

Minister's vehicle collides with ambulance

 

கேரளா மாநிலத்தின் கல்வித்துறை அமைச்சராக இருப்பவர் சிவன்குட்டி. இவர், நேற்று திருவனந்தபுரம் நோக்கி தனது அரசு வாகனத்தில் பயணித்தார். திருவனந்தபுரத்திற்குச் செல்லும் வழியில் முக்கிய சந்திப்பாக புலம் சந்திப்பு இருக்கிறது. அங்கு போக்குவரத்து சிக்னல் வேலை செய்யாததால், காவல்துறையினர் போக்குவரத்தை முறைப்படுத்திக் கொண்டிருந்தனர். 

 

இந்தச் சமயத்தில், கொட்டக்கரா எனும் மருத்துவமனையில் இருந்து திருவனந்தபுரம் மருத்துவக் கல்லூரி மருத்துவமனைக்கு ஒரு ஆம்புலன்ஸ் நோயாளியுடன் அதே புலம் சந்திப்பைக் கடக்க முயன்றது. அப்போது அமைச்சரின் பாதுகாப்பு வாகனமான கான்வாய் அந்தச் சந்திப்பில் வேகமாகத் திரும்புவதற்கு வந்தபோது, ஆம்புலன்ஸ் மீது அமைச்சரின் கான்வாய் வாகனம் மோதி, ஆம்புலன்ஸ் நடு சாலையில் கவிழ்ந்து விபத்துக்குள்ளானது. மேலும், அமைச்சரின் கான்வாய் அங்கு நின்றுகொண்டிருந்த இருசக்கர வாகனத்திலும் மோதியது. 

 

Minister's vehicle collides with ambulance

 

உடனடியாக அந்தப் பகுதியில் இருந்த மக்களும், காவல்துறையினரும் இணைந்து கவிழ்ந்த ஆம்புலன்ஸை மீட்டனர். அந்த ஆம்புலன்ஸில் நோயாளி உட்பட மூவர் இருந்தனர். அவர்கள் மூவருக்கும் காயம் ஏற்பட்டிருந்தது. அதனைத் தொடர்ந்து அவர்கள் உடனடியாக அருகில் இருந்த தனியார் மருத்துவமனைக்கு அழைத்துச் செல்லப்பட்டனர். அங்கு அவர்களுக்கு முதலுதவி சிகிச்சை அளிக்கப்பட்டு பிறகு திருவனந்தபுரம் அரசு மருத்துவக் கல்லூரி மருத்துவமனைக்கு அழைத்துச் செல்லப்பட்டதாகச் சொல்லப்படுகிறது. 

 

இந்நிலையில், அமைச்சரின் கான்வாய் வாகனம் ஆம்புலன்ஸ் மீது மோதிய சி.சி.டி.வி காட்சிகள் தற்போது வெளியாகி வைரலாகப் பரவி வருகிறது. இந்த வீடியோவை பார்க்கும் இணையவாசிகள், அமைச்சரின் வாகனம் தவறான பாதை அதாவது எதிர்த்திசை பாதையில் வேகமாக வந்திருக்கிறது என விமர்சனத்தைப் பதிவு செய்து வருகின்றனர். 

 

 

சார்ந்த செய்திகள்

 

Next Story

அச்சுறுத்தும் 'நிபா' - கேரளா விரையும் மத்தியக்குழு

Published on 21/07/2024 | Edited on 21/07/2024
Threatening 'NIPA'-Kerala Rushing Central Committee

கேரளாவில் நிபா வைரஸ், பறவை காய்ச்சல் உள்ளிட்ட தொற்றுகள் அவ்வப்போது உயிரிழப்புகளை ஏற்படுத்தும் நிலையில் பல்வேறு கட்டுப்பாடுகளை மத்திய சுகாதாரத்துறை வெளியிடுவது வழக்கமாகி வருகிறது.

பறவை காய்ச்சல் உள்ளிட்ட தொற்றுகள் ஏற்பட்டால் மாநிலத்தின் எல்லைப் பகுதிகளில் தீவிர கண்காணிப்பு சோதனைகள் நிகழ்த்தப்படுவது வாடிக்கையாகி வருகிறது. இந்நிலையில் கேரள மாநிலம் மலப்புரத்தில் நிபா வைரஸ் தாக்குதலில் 14 வயது சிறுவன் உயிரிழந்தது பரபரப்பை ஏற்படுத்திய நிலையில், கட்டுப்பாடுகளை மத்திய சுகாதார அமைச்சகம் வெளியிட்டுள்ளது. மேலும் மத்திய சுகாதார அமைச்சகத்தின் தேசிய சுகாதார இயக்கத்தில் இருந்து ஒரு குழு கேரளாவிற்கு விரைந்துள்ளதாகத் தகவல்கள் வெளியாகியுள்ளது.

Next Story

 காசு கொடுக்காமல் ஓடிய காவலர்; தட்டிக்கேட்ட ஊழியருக்கு நேர்ந்த கொடூரம் 

Published on 17/07/2024 | Edited on 17/07/2024
employee was beaten for stopping a policeman who left petrol without paying

கேரள மாநிலம் கண்ணூர் அருகே தளாப் பகுதியில் உள்ள ஒரு பெட்ரோல் பங்கில் அணில்(26) என்ற இளைஞர் ஊழியராக வேலை செய்து வருகிறார். கண்ணூர் ஆயுதப்படையில் காவலராக சந்தோஷ்குமார் என்பவர் பணியாற்றி வருகிறார். இந்த நிலையில் சந்தோஷ்குமார், தளாப் பகுதியில் உள்ள பெட்ரோல் பங்கிற்குச் சென்று காருக்கு பெட்ரோல் போட்டுள்ளார். அதன்பின் அணில் பெட்ரோல் போட்டதற்குப் பணம் கேட்க, அதனைத் தராமல் காவலர் சந்தோஷ்குமார் காரை வேகமாக எடுத்துள்ளார். இதைத் தொடர்ந்து காரின் முன்னே சென்று அணில் தடுத்துள்ளார். 

இதனால் ஆத்திரமடைந்த காவலர் சந்தோஷ்குமார், காரின் முன் நின்றுக் கொண்டிருந்த அணிலை காரை கொண்டு வேகமாக மோதியுள்ளார். அதில் காரின் முன்பு ஆபத்தான நிலையில், ஊழியர் அணில் தொங்கியபடியே அமர்ந்திருந்தார். ஆனால் அதனைப் பொருட்படுத்தாமல், சந்தோஷ்குமார் 600 மீட்டர் வரை காரை ஓட்டிச் சென்றார். இதனை அங்கிருந்தவர்கள் வீடியோ எடுத்து சமூக வலைத்தளங்களில் வெளியிட்டனர். 

இந்த வீடியோ சமூக வலைதளங்களில் வைரலான நிலையில், காவல்துறை ஐ.ஜி.சுனில்குமார் நடந்த சம்பவம் குறித்து விசாரணை நடத்த உத்தரவிட்டார். அதன்பேரில் நடந்த விசாரணையில், காவலர் சந்தோஷ்குமார் பெட்ரோல் போட்டுவிட்டு பணம் கொடுக்காமல் மோசடி செய்ததும், ஊழியரை கார் ஏற்றிக் கொல்ல முயன்றதும் உறுதியானது. இதையடுத்து சந்தோஷ்குமார் மீது வழக்குப் பதிவு செய்து கைது செய்யப்பட்ட நிலையில் தற்போது அவரை பணியிடை நீக்கம் செய்து அதிகாரிகள் உத்தரவிட்டுள்ளனர்.