Skip to main content

 “ராகுல் காந்தியால் ஆக முடியுமா? ஏன் சிரிக்கிறீர்கள்..” - அமித்ஷா விமர்சனம்

Published on 20/05/2024 | Edited on 20/05/2024
Amitshah criticized rahul gandhi

நாடாளுமன்றத் தேர்தல் நாடு முழுவதும் ஏழு கட்டங்களாக நடைபெற்று வருகிறது. இதில் முதல் நான்கு கட்டமாக 381 மக்களவைத் தொகுதிகளில் வாக்குப்பதிவு நடைபெற்று முடிந்துள்ளது. அதனைத் தொடர்ந்து, 8 மாநிலங்கள் மற்றும் யூனியன் பிரதேசங்களில் உள்ள 49 தொகுதிகளில் ஐந்தாம் கட்டமாக வாக்குப்பதிவு இன்று (20-05-24) மாலை நடந்து முடிந்தது.

இதனையடுத்து, மொத்தம் 10 மக்களவைத் தொகுதிகள் கொண்ட ஹரியானா மாநிலத்தில் ஆறாம் கட்டமாக மே 25ஆம் தேதி தேர்தல் நடைபெறவிருக்கிறது. அந்த வகையில், இன்று (20-05-24) பா.ஜ.க சார்பில் நடைபெற்ற தேர்தல் பிரச்சாரப் பொதுக்கூட்டத்தில் மத்திய உள்துறை அமைச்சர் அமித்ஷா கலந்து கொண்டு பேசினார். அப்போது அவர், “சமாதான அரசியலுக்காக, காங்கிரஸ் 370வது பிரிவை ரத்து செய்யவில்லை. நீங்கள் அனைவரும் நரேந்திர மோடியை இரண்டாவது முறையாக பிரதமராக்கினீர்கள். ஆகஸ்ட் 5, 2019 அன்று அவர் சட்டப்பிரிவு 370 ஐ நீக்கினார். இப்போது காஷ்மீரில் நமது மூவர்ணக் கொடி பெருமையுடன் பறக்கிறது” எனப் பேசினார். 

அதனைத் தொடர்ந்து அமித்ஷா அங்குள்ள கூட்டத்தைப் பார்த்து, “சொல்லுங்கள், காஷ்மீர் நம்முடையதா இல்லையா? சத்தமாகச் சொல்லுங்கள், உங்கள் குரல் கார்கேவை எட்ட வேண்டும். கார்கே உங்களுக்கு 80 வயது ஆகிறது. ஆனால் உங்களுக்கு நாட்டைப் பற்றி புரியவில்லை. ஹரியானா இளைஞர்கள் காஷ்மீருக்காக உயிரைக் கொடுக்க முடியும்” எனக் கூறினார். மேலும் அவர், “இந்த கர்னல் தேசத்திலிருந்து ராகுல் காந்தியிடம் நான் சொல்ல விரும்புகிறேன், காதுகளைத் திறந்து கேளுங்கள். இது பா.ஜ.க அரசாங்கம், பாகிஸ்தான் ஆக்கிரமிப்பு காஷ்மீர் இந்தியாவுக்கே சொந்தமானது. எங்களுடையதாக இருக்கும், அதை நாங்கள் திரும்பப் பெறுவோம்.

காங்கிரஸ் தலைமை, குறிப்பாக கார்கே, ராகுல் காந்தி மற்றும் சோனியா காந்தி ஆகியோர் தங்கள் சிறுபான்மை வாக்கு வங்கியைப் பற்றி பயந்து 500 ஆண்டுகளுக்குப் பிறகு நடக்கும் ராமர் கோவில் கும்பாபிஷேகத்தில் பங்கேற்கவில்லை. அவர்கள் ஏழைகளைப் பற்றி மட்டுமே பேசினார்கள். ஆனால், ஏழைகளுக்கு எதுவும் செய்யவில்லை. ஏதேனும் பெயர் உள்ளதா? சரத் பவார் பிரதமராக முடியுமா, மம்தா பானர்ஜி ஆக முடியுமா, ஸ்டாலின் ஆக முடியுமா, அரவிந்த் கெஜ்ரிவால் ஆக முடியுமா, உத்தவ் தாக்கரே ஆக முடியுமா? ராகுல் காந்தி ஆக முடியுமா? ஏன் சிரிக்கிறீர்கள், அவர் காங்கிரஸின் பெரிய தலைவர். அவர்களால் பிரதமராக முடியுமா?. இவர்களுக்கு எந்தத் தலைவனும் இல்லை, கொள்கையும் இல்லை. சுழற்சி அடிப்படையில் ஐந்து வெவ்வேறு பிரதமர்கள் இருப்பார்கள் என்று இந்தியா கூட்டணி கூறியுள்ளது. 

ஆனால், இது மளிகைக் கடையல்ல, 130 கோடி மக்கள் வாழும் நாடு என்பது ராகுல் காந்திக்கு புரியவில்லை. பாகிஸ்தானுக்கு தகுந்த பதிலடி கொடுத்து பாகிஸ்தான் ஆக்கிரமிப்பு காஷ்மீரை திரும்பப் பெறக்கூடிய, கோவிட் போன்ற தொற்றுநோய்களின் போது நாட்டைப் பாதுகாப்பாக வைத்திருக்கக்கூடிய, பொது சிவில் சட்டத்தைக் கொண்டு வந்து நக்சலிசத்தை முடிவுக்குக் கொண்டுவரக்கூடிய, வலிமையான பிரதமர் இந்தியாவுக்குத் தேவை. மோடியால் மட்டுமே நாட்டைப் பாதுகாப்பாக வைத்திருக்கவும், தன்னிறைவு, வளம், தொழில்நுட்பம் போன்றவற்றை மேம்படுத்தவும் முடியும் என்பது அனைவரும் அறிந்ததே” என்று கூறினார்.  

சார்ந்த செய்திகள்

 

Next Story

ராகுல் காந்தி பிறந்த நாள்; நலத்திட்ட உதவிகளை வழங்கிய காங்கிரஸ் 

Published on 19/06/2024 | Edited on 19/06/2024
Congress has provided welfare assistance on the occasion of Rahul Gandhi's birthday

திருச்சி வடக்கு மாவட்ட காங்கிரஸ் கமிட்டி சார்பில் ராகுல்காந்தி எம்.பி பிறந்தநாள் விழா மாவட்ட தலைவர் திருச்சி கலை தலைமையில் வடக்கு மாவட்டம் முழுவதும் கொடியேற்றி, இனிப்பு வழங்கி கொண்டாடப்பட்டது. மண்ணச்சநல்லூர், துறையூர், லால்குடி, முசிறி, தா.பேட்டை, உப்பிலியபுரம், தொட்டியம். புள்ளம்பாடி உள்ளிட்ட 11 வட்டாரங்களில் கொடியேற்றி, இனிப்பு வழங்கப்பட்டது. சமயபுரம் நம்பர் ஒன் டோல்கேட்டில் பஸ் பயணிகள், பொதுமக்களுக்கு இனிப்பு வழங்கப்பட்டது. இதையடுத்து நம்பர் ஒன் டோல்கேட் அருகே உள்ள  பொதுமக்களுக்கு இலவச வேட்டி, சேலைகள் வழங்கப்பட்டன.


தொடர்ந்து பட்டத்தம்மாள் தெருவில் மதிய உணவு வழங்கப்பட்டது. இந்நிகழ்ச்சியில் மாவட்ட துணைத் தலைவர் ராஜா, மாநில பொதுக்குழு உறுப்பினர் வக்கீல் மோகனாம்பாள், மாநில மகளிர் அணி இணைச் செயலாளர் பிரமிளா, மகளிர் அணி சுதா, வட்டார தலைவர் சுப்பிரமணியன், மாவட்ட பொதுக்குழு அப்துல் காதர், சேவாதளம் தெற்கு மாவட்ட தலைவி லட்சுமி, சேவா தளம் வடக்கு மாவட்ட தலைவி மேரி ஆஷா, வட்டார பொறுப்பாளர் செல்வம், மண்ணச்சநல்லூர் நகர பொறுப்பாளர் பாட்ஷா, நிர்வாகிகள் செல்வராஜ், மாசிலாமணி, பழனியாண்டி, கணேசன், மூர்த்தி, சந்தியாகு அலெக்ஸாண்டர் உட்பட திருச்சி வடக்கு மாவட்ட நிர்வாகிகள், தொண்டர்கள் திரளாகக் கலந்து கொண்டனர். 

அனைத்து நிகழ்ச்சிகளிலும் மாவட்ட தலைவர் திருச்சி கலை கலந்து கொண்டு கட்சிகொடி ஏற்றி இனிப்பு வழங்கி நலத்திட்ட உதவிகளை வழங்கினார்.

Next Story

கெஜ்ரிவாலின் உதவியாளர் தாக்கிய விவகாரம்; ராகுல்காந்திக்கு ஸ்வாதி மாலிவால் பரபரப்பு கடிதம்!

Published on 19/06/2024 | Edited on 19/06/2024
 Swati Maliwal wrote letter to Rahul Gandhi for Kejriwal's aide case

டெல்லி மகளிர் ஆணையத்தின் முன்னாள் தலைவரும், ஆம் ஆத்மி கட்சி எம்.பியுமான ஸ்வாதி மாலிவால், போலீசாரிடம் பரபரப்பு புகார் ஒன்றை அளித்தார். இது தொடர்பாக கடந்த 13ஆம் தேதி காலை ஸ்வாதி மாலிவால் போலீசாரை தொடர்புகொண்டு, டெல்லி முதல்வர் இல்லத்தில் அரவிந்த் கெஜ்ரிவாலின் தனிப்பட்ட உதவியாளர் பிபவ் குமாரால் தாக்கப்பட்டதாகக் குற்றச்சாட்டை முன்வைத்திருந்தார். அந்தக் குற்றச்சாட்டின் அடிப்படையில், போலீசார் விசாரணை நடத்தி வந்தனர். மேலும், ஸ்வாதி மாலிவாலை தாக்கியதாக, அரவிந்த் கெஜ்ரிவாலின் தனிச் செயலாளர் பிபவ் குமார் மீது கடந்த 16ஆம் தேதி பல்வேறு பிரிவுகளின் கீழ் வழக்குப்பதிவு செய்த போலீசார், இந்தச் சம்பவம் குறித்து தொடர்ந்து விசாரித்து வந்தனர்.

இதனையடுத்து, டெல்லி போலீசார் அரவிந்த் கெஜ்ரிவாலின் தனி உதவியாளர் பிபவ் குமாரை கைது செய்து விசாரணை நடத்தி வருகின்றனர். இதற்கிடையில், தாக்கப்பட்டதாக கூறும் ஸ்வாதி மாலிவால், பா.ஜ.க முகமாக இருக்கிறார் என்றும், பா.ஜ.கவின் சதி திட்டத்தின் அடிப்படையில்தான் அவர் பொய் குற்றச்சாட்டை முன்வைக்கிறார் என்றும் ஆம் ஆத்மி குற்றம் சாட்டி வருகிறது. 

இந்த நிலையில், இந்தியா கூட்டணி கட்சித் தலைவர்களான ராகுல்காந்தி, உத்தவ் தாக்கரே, சரத் பவார், அகிலேஷ் யாதவ் உள்ளிட்டவர்களுக்கு ஸ்வாதி மாலிவால் கடிதம் எழுதியுள்ளார். அக்கடிதத்தில், ‘கடந்த 18 வருடங்களாக களத்தில் பணியாற்றி, 9 ஆண்டுகளில் 1.7 லட்சம் வழக்குகளை மகளிர் ஆணையத்தில் விசாரித்துள்ளேன். யாருக்கும் பயப்படாமல், யாருக்கும் தலைவணங்காமல், மகளிர் ஆணையத்தை மிக உயரிய நிலையில் நிறுத்தியிருக்கிறேன். ஆனால், முதல்வர் வீட்டில் என்னை மோசமாகத் தாக்கியதும், பிறகு என் குணத்தை இழிவுபடுத்தியதும் மிகவும் வருத்தமாக உள்ளது.

முதல்வரின் உதவியாளர் தாக்கிய விவகாரத்தில் என்னுடைய கட்சித் தலைவர்களும் தொண்டர்களும் எனக்கு ஆதரவு அளிக்கவில்லை. மேலும், அவர்கள் திட்டமிட்டு, என்னுடைய நடத்தை குறித்து விமர்சனம் செய்தனர். எனது குணாதிசயங்கள் மீதான இடைவிடாத தாக்குதல்களை நான் எதிர்கொண்டேன். கடந்த ஒரு மாதமாக, நீதிக்காகப் போராடும் போது எதிர்கொள்ளும் முதல் வலியை நான் சந்திக்கிறேன். இன்று இந்த விவகாரம் தொடர்பாக இந்தியக் கூட்டணியில் உள்ள அனைத்து பெரிய தலைவர்களுக்கும் கடிதம் எழுதியுள்ளேன். நான் எல்லோருடனும் சந்திக்க விரும்புகிறேன்’ என்று குறிப்பிட்டிருந்தார்.