Skip to main content

‘ராமாயணம் ஒரு கற்பனைக் கதை’ - பாடம் நடத்திய ஆசிரியர் மீது நடவடிக்கை

Published on 13/02/2024 | Edited on 13/02/2024
Action by Hindu organizations protest A teacher who conducted a lesson on Ramayana

ராமாயணம் பற்றியும், மகாபாரதம் பற்றியும் விமர்சனம் செய்ததாக ஆசிரியருக்கு எதிராக இந்து அமைப்பினர் போராட்டம் நடத்திய சம்பவம் பெரும் பரபரப்பை ஏற்படுத்தியுள்ளது.

கர்நாடகா மாநிலம், மங்களூர் அருகே ஜெப்புநகர் பகுதியில் தனியார் பள்ளி ஒன்று செயல்பட்டு வருகிறது. இந்த பள்ளியில் 7ஆம் வகுப்பு ஆசிரியராக பிரபா என்ற பெண் பணிபுரிந்து வந்தார். இவர் கடந்த 8ஆம் தேதி, மாணவர்களிடம் பாடம் நடத்தும்போது, ராமாயணம், மகாபாரதம் ஆகியவை கற்பனைக் கதை என்று கூறியதாக கூறப்படுகிறது. இதைப் பற்றி பள்ளி மாணவர்கள் தங்கள் பெற்றோர்களிடம் கூறியுள்ளனர்.

இதனையடுத்து, இது குறித்து அறிந்த இந்து அமைப்பினரும், பா.ஜ.க.வினர் மற்றும் மாணவர்களின் பெற்றோர்கள், பள்ளி ஆசிரியர் பிரபா மீது நடவடிக்கை எடுக்க வேண்டும் என்று கடந்த சில தினங்களுக்கு முன்பு பள்ளியை முற்றுகையிட்டு போராட்டம் நடத்தினர். இருப்பினும், பள்ளி நிர்வாகம், ஆசிரியர் மீது எந்தவித நடவடிக்கையும் எடுக்கவில்லை என்று கூறப்படுகிறது. அதனால், நேற்று (12-02-24) மீண்டும் பள்ளி மாணவர்கள், அவர்களது பெற்றோர், இந்து அமைப்பினர், பா.ஜ.க.வினர் என நூற்றுக்கணக்கானோர் பள்ளியின் வாசல் முன்பு திரண்டு ‘ஜெய் ஸ்ரீ ராம்’ என்று கோஷம் எழுப்பி போராட்டம் நடத்தினர். 

மேலும், அவர்கள் மாணவர்களின் மனதில் மதவெறியை விதைக்கும் ஆசிரியர் பிரபா மீது நடவடிக்கை எடுக்க வேண்டும் என்று வலியுறுத்தினர். இதையடுத்து, ஆசிரியர் பிரபாவை பள்ளி நிர்வாகம் பணியிடை நீக்கம் செய்து உத்தரவிட்டது. இதனால், அப்பகுதியில் பெரும் பரபரப்பு ஏற்பட்டது. 

சார்ந்த செய்திகள்

 

Next Story

'விரைவில் இந்தியா கூட்டணி பட்ஜெட் '-கமல்ஹாசன் கருத்து

Published on 23/07/2024 | Edited on 23/07/2024
'India alliance budget soon' - Kamal Haasan comments

நாடாளுமன்ற பட்ஜெட் கூட்டத்தொடர் நேற்று (22.07.2024) தொடங்கியது. இந்த பட்ஜெட் கூட்டத்தொடர் ஆகஸ்ட் 12 ஆம் தேதி வரை மொத்தம் 19 அமர்வுகளுடன் நடைபெறவுள்ளது. இந்நிலையில் 2024-25 ஆம் நிதி ஆண்டுக்கான முழு பட்ஜெட்டை நாடாளுமன்றத்தில் மத்திய நிதியமைச்சர் நிர்மலா சீதாராமன் இன்று (23.07.2024) காலை 11 மணிக்கு தாக்கல் செய்து உரை நிகழ்த்தினார். மத்திய அரசின் பட்ஜெட் குறித்து பல்வேறு அரசியல் தலைவர்களும் கருத்து தெரிவித்து வருகின்றனர்.

இந்நிலையில் பட்ஜெட் தாக்கல் செய்துள்ள தேசிய ஜனநாயக கூட்டணியான பாஜக கூட்டணிக்கு வாழ்த்துக்கள் என தெரிவித்துள்ள மக்கள் நீதி மய்யம் கட்சியின் தலைவரும் நடிகருமான கமல்ஹாசன் 'விரைவில் இந்தியா கூட்டணி பட்ஜெட்டை தாக்கல் செய்யும்' எனவும் பதிவிட்டுள்ளார். அதேபோல் 2024 மத்திய பட்ஜெட் குறித்து சமூக வலைத்தளமான எக்ஸ் தளத்தில் கருத்து பதிவிட்டுள்ள நடிகர் பிரகாஷ்ராஜ் 'ஆந்திரா பீகாருக்கு பட்ஜெட்; மற்ற மாநிலங்களுக்கு அல்வா' என விமர்சித்துள்ளார்.

 

Next Story

காவிரி ஆற்றில் நீர்வரத்து மேலும் அதிகரிப்பு!

Published on 22/07/2024 | Edited on 22/07/2024
Further increase in water flow in Cauvery river

கர்நாடக மாநிலத்தில் தென்மேற்கு பருவமழை கடந்த ஜூலை முதல் வாரத்தில் தொடங்கி தற்போது வரை விட்டு விட்டு கனமழை பொழிந்து வருகிறது. இதனால் காவிரி நீர்ப்பிடிப்பு பகுதிகளான மைசூர், குடகு, ஹாசன் உள்ளிட்ட பகுதிகளிலும் கடலோர மற்றும் மலை மாவட்டங்களிலும் தொடர்ந்து மழை பொழிவதால் கர்நாடக அணைகளுக்கு நீர்வரத்து அதிகரித்துள்ளது.

அதன்படி கர்நாடகாவின் முக்கிய அணைகளான கிருஷ்ணராஜ சாகர் அணை மற்றும் கபினி, ஹேமாவதி உள்ளிட்ட அணைகளில் நீர்மட்டம் அதிகரித்துள்ளது. இதனால் தொடர்ந்து உபரி நீர் காவிரி ஆற்றில் திறந்து விடப்பட்டு வருகிறது. இதனையொட்டி தமிழக கர்நாடக எல்லையான பிலிகுண்டுலுவிற்கு இன்று (22.07.2024) காலை நிலவரப்படி வினாடிக்கு 74 ஆயிரம் கன அடி தண்ணீர் வந்து கொண்டிருக்கிறது.

இந்நிலையில் ஒகேனக்கலுக்கு நேற்று (21.07.2024) மாலை வினாடிக்கு 65 ஆயிரம் கன அடியாக இருந்த நீர்வரத்து தற்போது 74 ஆயிரம் கன அடியாக அதிகரித்துள்ளது. அதிகப்படியான நீர்வரத்து காரணங்களால் ஐந்தருவி உள்ளிட்ட அருவிகளில் 7வது  நாளாக இன்றும் பரிசல்கள் இயக்கவும், குளிக்கவும் சுற்றுலா பயணிகளுக்குத் தடை விதிக்கப்பட்டுள்ளது. இதற்கான உத்தரவு மாவட்ட நிர்வாகம் சார்பில் பிறப்பிக்கப்பட்டுள்ளது. அதே சமயம் இன்று மதியம் நீர்வரத்து மேலும் அதிகரிக்கக் கூடும் எனவும் எதிர்பார்க்கப்படுகிறது.