Skip to main content

21 பேருக்கு டெல்டா ப்ளஸ் கரோனா பாதிப்பு - மஹாராஷ்ட்ரா அறிவிப்பு!

Published on 22/06/2021 | Edited on 22/06/2021

 

DELTA PLUS

 

இந்தியாவில் கரோனா இரண்டாவது அலை மெல்ல குறைந்துவருகிறது. இதனையடுத்து பல்வேறு மாநிலங்கள் ஊரடங்கு கட்டுப்பாடுகளில் பெரும் அளவில் தளர்வுகளை அளிக்கத் தொடங்கிவிட்டன. அதேநேரத்தில் நாட்டில் கரோனா இரண்டாவது அலைக்கு காரணமாக இருந்த டெல்டா வகை கரோனா, டெல்டா ப்ளஸ் ஆக மரபணு மாற்றமடைந்துள்ளது.

 

இந்த டெல்டா ப்ளஸ் வகை கரோனா மூன்றாவது அலையை ஏற்படுத்தலாம் என மஹாராஷ்ட்ரா மாநில சுகாதாரத்துறை அதிகாரிகள் எச்சரித்துள்ளனர். எனினும், டெல்டா ப்ளஸ் கரோனா கவலைக்குரிய தொற்றாக இன்னும் அறிவிக்கப்படவில்லை என மத்திய அரசு கூறியுள்ளது. அதேநேரத்தில் எய்ம்ஸ் இயக்குநர் ரந்தீப் குலேரியா, டெல்டா ப்ளஸ் வைரஸ் கவலைக்குரியது எனத் தெரிவித்துள்ளார்.

 

இந்தநிலையில், நாட்டில் 15 - 20 பேருக்கு இதுவரை டெல்டா வகை கரோனா பாதிப்பு கண்டறியப்பட்டுள்ளதாக தேசிய நோய்க் கட்டுப்பாட்டு மையத்தின் இயக்குநர் டாக்டர் சுஜீத் சிங் நேற்று (21.06.2021) தெரிவித்தார். இந்தநிலையில், மஹாராஷ்ட்ராவில் மட்டும் 21 பேர் டெல்டா ப்ளஸ் வைரஸால் பாதிக்கப்பட்டிருப்பதாக அம்மாநில சுகாதாரத்துறை அமைச்சர் தெரிவித்துள்ளார். 

 

மேலும், டெல்டா ப்ளஸ் வைரஸால் பாதிக்கப்பட்டவர்களின் பயண விவரங்களும், அவர்கள் தடுப்பூசி செலுத்திக்கொண்டவர்களா இல்லையா என்பதும் ஆராயப்பட்டுவருவதாகவும் தெரிவித்துள்ள சுகாதாரத்துறை அமைச்சர், டெல்டா ப்ளஸ் தொற்று ஏற்பட்டவர்களுடன் தொடர்பில் இருந்தவர்கள் கண்டறியப்பட்டு, அவர்களிடமும் பரிசோதனை நடத்தப்படும் என கூறியுள்ளார்.

 

இதற்கிடையே, டெல்டா ப்ளஸ் வகை கரோனா கண்டறியப்பட்ட பகுதிகளில் கட்டுப்பாட்டு மண்டலம் ஏற்படுத்தும் பணிகளும், அப்பகுதிகளில் டெல்டா ப்ளஸ் கரோனா அதிகம் பரவியுள்ளதா என்பதைக் கண்டறிய மேலும் மாதிரிகள் எடுக்கும் பணிகளும் நடைபெற்றுவருவதாக அம்மாநில சுகாதாரத்துறை அதிகாரிகள் தெரிவித்துள்ளனர். 

 

 

சார்ந்த செய்திகள்

 

Next Story

வீடு, கார்...எல்லை மீறிய பெண் ஐ.ஏ.எஸ் அதிகாரி; உயர் அதிகாரிகளுக்கு பறந்த புகார்!

Published on 11/07/2024 | Edited on 11/07/2024
woman IAS officer who crossed the line in maharashtra

மகாராஷ்டிரா மாநிலம், புனே மாவட்டத்தில் பயிற்சி ஐ.ஏ.எஸ் அதிகாரியாக பணியாற்றி வந்தவர் பூஜா கேட்கர். இவர் உதவி ஆட்சியராக சேருவதற்கு முன்பு தனக்கென தனி அலுவலகம், கார் மற்றும் வீடு வேண்டும் என்று கோரிக்கை வைத்ததாகக் கூறப்படுகிறது. தான் வைத்த கோரிக்கையை ஏற்பாடு செய்யும்படி உயர் அதிகாரிகளிடம் நச்சரித்து வந்ததாகக் கூறப்படுகிறது. 

இதனையடுத்து, பூஜாவுக்கு சொந்த அறை வழங்கப்பட்டது. ஆனால், அந்த அறையில் கழிவறை இல்லாததால், அதை நிராகரித்துள்ளார். இதையடுத்து புனே கூடுதல் ஆட்சியர் அஜய் மோரே வெளியே சென்றபோது, அவரது அறைக்கு வெளியே இருந்த கூடுதல் ஆட்சியரின் பெயர் பலகையை தூக்கிவிட்டு, பூஜா கேட்கர் தனது பெயர் பலகையை மாற்றி அந்த அறையை ஆக்கிரமித்துக் கொண்டதாகவும் கூறப்படுகிறது. மேலும், அவர் ஒப்பந்தக்காரர் ஒருவர் கொடுத்த விலை உயர்ந்த சொகுசு காரில் விதியை மீறி சைரன் வைத்துக் கொண்டதாகவும் புகார்கள் எழுந்தன. .

பூஜா கேட்கரின் எல்லை மீறிய செயல்கள் குறித்து உயர் அதிகாரிகளுக்கு புகார்கள் சென்றனர். தொடர் புகார்கள் எழுந்ததால், பூஜா கேட்கர் அதிரடியாக இடமாற்றம் செய்யப்பட்டார். இதற்கிடையில், பூஜா கேட்கர் பொருளாதாரத்தில் பின்தங்கிய இதர பிற்படுத்தப்பட்ட வகுப்பர் சேர்ந்தவர் எனக் கூறியும், பார்வை குறைபாடு உள்ள மாற்றுத்திறனாளி எனப் போலி சான்றிதழ் வழங்கி ஐ.ஏ.எஸ் அதிகாரி ஆனதாக சர்ச்சை எழுந்தது. இது குறித்தும் விசாரணை நடைபெற்று வருகிறது. 

Next Story

சொகுசு கார் விபத்து; சிக்கிய கட்சித் தலைவர் மீது அதிரடி நடவடிக்கை!

Published on 10/07/2024 | Edited on 10/07/2024
Action on the trapped shiv sena party leader Luxury car accident in maharashtra

மகாராஷ்டிரா மாநிலம் மும்பையின் வோர்லி பகுதியில் கடந்த 7ஆம் தேதி பிஎம்டபிள்யூ கார் ஒன்று அதிவேகமாக வந்துள்ளது. இந்த கார், அங்கு சென்று கொண்டிருந்த இருசக்கர வாகனத்தில் மோதியது. இதனால், இருசக்கர வாகனத்தில் பயணித்த பெண் ஒருவர் தூக்கி வீசப்பட்டார். இதில் படுகாயமடைந்த அந்த பெண், சம்பவ இடத்திலேயே பரிதாபமாக உயிரிழந்தார். 

இது குறித்து தகவல் அறிந்து போலீசார் விசாரணை நடத்தியதில், மகாராஷ்டிரா முதல்வர் ஏக்நாத் ஷிண்டேவின் சிவசேனா கட்சியின் முக்கிய தலைவரான ராஜேஷ் ஷா என்பவரின் மகன் மிஹிர் ஷா தான் காரை ஓட்டி வந்து விபத்தை ஏற்படுத்திவிட்டு அங்கிருந்து தப்பித்துச் சென்றுள்ளார் என்பது தெரியவந்தது. மதுபோதையில் காரை ஓட்டி விபத்தை ஏற்படுத்தியதை அடுத்து, மிஹிர் ஷா தலைமறைவானார்.

இதற்கிடையில், மிஹிர் ஷாவின் தந்தையும், பால்கர் மாவட்டத்தில் உள்ள ஏக்நாத் ஷிண்டே சிவசேனாவின் துணைத் தலைவருமான ராஜேஷ் ஷாவையும், ராஜேஷ் ஷாவின் ஓட்டுநர் ராஜ்ரிஷி பிடாவத் என்பவரையும் போலீசார் கைது செய்து விசாரணை நடத்தி வருகின்றனர். இந்த வழக்கில் 14 தனிப்படைகள் அமைத்து குற்றவாளியை தேடி வந்த நிலையில், மிஹிர் ஷாவை மும்பை போலீசார் நேற்று (09-07-24) கைது செய்து விசாரித்து வருகின்றனர். 

இந்த சம்பவம் பெரும் பரபரப்பு ஏற்படுத்தியிருந்த நிலையில், சிவசேனா கட்சியுடன் தொடர்புடையவரின் மகன் என்பதற்காக தண்டனையில் இருந்து மிஹிர் ஷாவை தப்ப வைக்கக் கூடாது என்று எதிர்க்கட்சிகள், மகாராஷ்டிரா அரசை வலியுறுத்தி வந்தன. இந்த நிலையில், சிவசேனா கட்சியின் துணைத் தலைவர் பதவியில் இருந்து மிஹிர் ஷாவின் தந்தையான ராஜேஷ் ஷா நீக்கும்படி மகாராஷ்டிரா முதல்வர் ஏக்நாத் ஷிண்டே உத்தரவிட்டுள்ளார். 

ஏற்கெனவே, மகாராஷ்டிரா மாநிலம், புனேவில் உள்ள கல்யாணி நகர் பகுதியைச் சேர்ந்த வேந்தாந்த் அகர்வால் என்ற 17 வயது சிறுவன், கடந்த மே 19ஆம் தேதி மது அருந்திவிட்டு தனது தந்தையின் சொகுசு வாகனத்தில் அதிவேகமாக வந்து முன்னே சென்ற பைக் மீது மோதியதில் பைக்கில் பயணித்த ஐ.டி ஊழியர்களான அனுஷ் மற்றும் கோஷ்டா ஆகிய 2 பேரும் ரத்த வெள்ளத்தில் சம்பவ இடத்திலேயே பரிதாபமாக உயிரிழந்தனர் என்பது குறிப்பிடத்தக்கது.