Skip to main content

1,000 அனுப்பினால் 10,000; அமலா சாஜி பேச்சைக் கேட்ட ஐடி ஊழியருக்கு அதிர்ச்சி

Published on 10/01/2024 | Edited on 10/01/2024
NN

இன்ஸ்டாகிராம் ரீல்ஸ் மூலமாக பிரபலமானவர்கள் அமலா சாஜி மற்றும் அவருடைய சகோதரி அமிர்தா சாஜி. அமலா சஜிக்கு 4.1 மில்லியன் ஃபாலோயர்கள் உள்ளனர். சினிமா காட்சிகளுக்கு பிரத்தியேக உடைகளை அணிந்து கொண்டு ரீல்ஸ் வெளியிடுவது இவர்களது வேலையாக இருந்து வருகிறது. இந்நிலையில், இணைய பிரபலமான அமலா சாஜியின் பேச்சை கேட்டு ஐ.டி ஊழியர் பணத்தை இழந்ததாக போலீசில் பரபரப்பு புகார் ஒன்றை கொடுத்துள்ளார்.

இன்ஸ்டா பிரபலமான அமலா சாஜி அவருடைய இணையதள பக்கத்தில் 'ஆன்யா ஃபாரெக்ஸ்' என்ற தன்னுடைய தோழியை அறிமுகப்படுத்தி அவர் ஆன்லைன் ட்ரெண்டிங் டிரேடிங் தொழில் செய்து வருவதாகவும், இதில் பணத்தை முதலீடு செய்தால் அதிக லாபம் பெறலாம். நானும் பெற்றுள்ளேன், என விளம்பரம் செய்துள்ளார். தன்னை பின்பற்றுபவர்கள் விருப்பப்பட்டால் அவரை தொடர்பு கொண்டு நீங்களும் ஆன்லைன் டிரேடிங் செய்து பணம் சம்பாதிக்கலாம் என தெரிவித்துள்ளார்.

இதனை நம்பிய ஐடி ஊழியர் ஒருவர் 'ஆன்யா ஃபாரெக்ஸ்' என்ற சமூக வலைத்தள பக்கத்தை குறுஞ்செய்தி மூலம் தொடர்பு கொண்டுள்ளார். அதில் பேசிய பெண், ஆயிரம் ரூபாய் செலுத்தினால் 50 நிமிடத்தில் 10,000 ரூபாயாக லாபம் சம்பாதிக்கலாம் என கூறியுள்ளார். இதனை நம்பிய ஐடி ஊழியர் அவர் அனுப்பிய கியூ ஆர் கோடை பயன்படுத்தி ஆயிரம் ரூபாய் முதலில் செலுத்தியுள்ளார். 'கிரிப்டோ வேர்ல்ட்' என்ற செயலியின் மூலம் உங்களுடைய பணத்தை வைத்து டிரேடிங் செய்து தற்பொழுது 12,999 ரூபாய் லாபம் வந்துள்ளது என பதிலுக்கு அந்த பெண் ஸ்கிரீன்ஷாட் அனுப்பி உள்ளார்.

தொடர்ந்து இதுபோன்று சம்பாதிக்க வேண்டும் என்றால் 9 ஆயிரம் ரூபாய் பணத்தை தன்னுடைய வங்கி கணக்கில் செலுத்தினால் மொத்தமாக 22 ஆயிரம் ரூபாய் பணம் கிடைக்கும் என ஆசை காட்டி உள்ளார். ஆனால் எனக்கு என்னுடைய பணத்தை மட்டும் திருப்பிக் கொடுத்து விடுங்கள் என கேட்டுள்ளார் ஐடி ஊழியர். ஆனால் இப்படியாக குறுஞ்செய்திகள் சென்று கொண்டிருந்த பொழுது ட்ரேட் செய்ததில் உங்களுக்கு ஒரு லட்சம் ரூபாய் வந்துள்ளது என மேலும் ஆசை காட்டி, அதிர்ச்சி கொடுத்துள்ளார்.

மொத்தமாக டெபாசிட் பணம் உள்ளிட்டவற்றை அனுப்பினால் மொத்தமாக ஒரு லட்சத்து 25 ஆயிரம் ரூபாய் தருவதாக ஐடி ஊழியரிடமிருந்து பணம் பெற்றுள்ளார். ஜிபே எண்ணையும் அந்த பெண் வாங்கியுள்ளார். ஆனால் பத்து முதல் 20 நாட்களாகியும் பணம் வந்து சேரவில்லை. தான் மோசடியில் சிக்கியதை அறிந்த அந்த ஐடி ஊழியர் அதிர்ச்சியடைந்து போலீசாரிடம் புகார் கொடுத்துள்ளார். இதுகுறித்து போலீசார் விசாரணை நடத்தி வருகின்றனர்.

சார்ந்த செய்திகள்

 

Next Story

ஆந்திராவில் இருந்து தென்மாநிலங்களுக்குக் கடத்தப்படும் கஞ்சா; சுற்றிவளைத்த தமிழக போலீஸ்

Published on 13/07/2024 | Edited on 13/07/2024
cannabis smuggled from Andhra, Telangana to Tamil Nadu, Karnataka, Kerala by car and train

ஆந்திராவில் இருந்து தமிழகத்திற்குக் கஞ்சா கடத்திய வரப்படுவதாக வந்த ரகசியத் தகவல் போலீசாருக்கு கிடைத்துள்ளது. அதனடிப்படையில் மாவட்ட காவல் கண்காணிப்பாளர் மணிவண்ணன் உத்தரவின் பேரில் தமிழக ஆந்திர எல்லையோரம் உள்ள வேலூர் மாவட்டம் சைணகுண்டா சோதனை சாவடி அருகே குடியாத்தம் தாலுகா போலீசார் தீவிர வாகன தணிக்கையில் ஈடுபட்டனர்.

அப்போது கர்நாடகா பதிவு எண் கொண்ட சொகுசு காரை தடுத்து நிறுத்தி சோதனை செய்த போது அதில் 12 கிலோ கஞ்சா கடத்திவரப்பட்டது தெரியவந்தது.  கஞ்சாவைக் கடத்தி வந்த குடியாத்தம் பகுதியைச் சேர்ந்த குடியரசன் (24) கோகுல்குமார் ( 26) மாதேஷ் (21) மற்றும் பெரம்பலூர் மாவட்டத்தைச் சேர்ந்த வெங்கடேசன்( 23) ஆகிய நான்கு பேரையும் கைது செய்து கடத்தலுக்குப் பயன்படுத்தப்பட்ட காரை பறிமுதல் செய்த குடியாத்தம் தாலுகா போலீசார் வழக்குப் பதிவு செய்து விசாரணை மேற்கொண்டு வருகின்றனர். இதில் கைது செய்யப்பட்ட குடியரசன் மற்றும் கோகுல்குமார் ஆகிய இருவரும் மீது கொலை வழக்கு உள்ளிட்ட பல்வேறு வழக்குகள் நிலுவையில் உள்ளது குறிப்பிடத்தக்கது.

இதேபோல் ராணிப்பேட்டை மாவட்டம் அரக்கோணம் வழியாக டாடா நகர் பகுதியில் இருந்து எர்ணாகுளம் செல்லும் எர்ணாகுளம் எக்ஸ்பிரஸில் கஞ்சா கடத்தப்படுவதாக வேலூர் மதுவிலக்கு மற்றும் அமலாக்கப் பிரிவு காவல்துறையினருக்கு ரகசியத் தகவல் கிடைத்தது. அதன் பேரில் அரக்கோணம் மதுவிலக்கு மற்றும் அமலாக்கப் பிரிவு காவல் துறையினருடன் இணைந்து ரயிலில் சோதனை மேற்கொண்டனர். 

முன்பக்க சாதாரண பெட்டியில் சந்தேகம் அளிக்கக் கூடிய வகையிலிருந்த நபர்களைப் பிடித்து விசாரணை மேற்கொண்ட போது கஞ்சா கடத்தி வருவது தெரியவந்தது. அவர்களிடம் இருந்து 10 பாண்டல்களில் இருந்த சுமார் 14 கிலோ எடையுள்ள கஞ்சாவை பறிமுதல் செய்த காவல்துறையினர் கஞ்சா கடத்திய குற்றத்திற்காக கர்நாடகா மாநிலம் பெங்களூரைச் சேர்ந்த சுப்ரமணியம் (21) மற்றும் அப்துல் (18) ஆகிய இருவரைக் கைது செய்து விசாரணை மேற்கொண்டு வருகின்றனர்.

ஆந்திரா மற்றும் தெலுங்கானாவில் வனப்பகுதிகளில் இருந்து கடத்தி வரப்படும் கஞ்சா தமிழ்நாடு, கர்நாடகா பகுதிகளுக்குள் நுழைந்து மாநில இளைஞர்களைப் போதைக்கு அடிமையாக்கி வருகிறது. இதனைத் தடுக்க காவல்துறை பெரும் முயற்சிகள் எடுத்தாலும் கஞ்சா கடத்தி வருவதற்காக அனுப்பப்படும் குருவிகளுக்குத் தரப்படும் ஆயிரக்கணக்கான ரூபாய் பணம் அவர்களை இந்த தொழிலைக் கச்சிதமாகச் செய்யவைக்கிறது. 

Next Story

சாராயம் காய்ச்சி குடித்த நபர்கள் மருத்துவமனையில் அனுமதி!

Published on 12/07/2024 | Edited on 13/07/2024
People admitted to hospital after drinking liquor

செங்கல்பட்டு மாவட்டம் மதுராந்தகம் அருகே மழுவங்கரணை கிராமத்தைச் சேர்ந்தவர் தேவன்(65).  அடுப்புக்கரி வியாபாரம் செய்து வரும் இவர் தன்னிடம் வேலை செய்யும் தொழிலாளர்களுக்காக சாராயம் காய்ச்சி வந்ததாகக் கூறப்படுகிறது. இது குறித்த தகவல் மேல்மருவத்தூர் காவல் ஆய்வாளர் ஏழுமலைக்குத் தெரியவர, உடனடியாக  மதுவிலக்கு அமல் பிரிவு போலீசாருடன் தேவன் வீட்டிற்குச் சென்று சோதனை நடத்தியுள்ளார்.

சோதனையில்  சாராயம் காய்ச்சுவதற்காக வைத்திருந்த ஊறல் மற்றும் காய்ச்சி வைத்திருந்த 20 லிட்டர் சாராயத்தைக் கைப்பற்றினர். மேலும் தேவனை போலீசார் கைது செய்து விசாரணை நடத்தியபோது, சாராயத்தைக் காய்ச்சி தன்னிடம் வேலை செய்யும் மணி, பெருமாள், அய்யனார், ராதா கிருஷ்ணன், மதுரை ஆகிய 5 பேருக்கு குடிக்கக் கொடுத்ததாகத் தெரிவித்தார்.

இதனைத் தொடர்ந்து மருத்துவ குழுவினர் அதில் 3 பேரை  பிடித்து முழு மருத்துவ பரிசோதனை செய்தனர். மூவருக்கும் எந்த பாதிப்பு ஏற்படவில்லை என்று  மருத்துவர்கள் தெரிவித்தனர். இருப்பினும் முன்னெச்சரிக்கைக்காக அவர்கள் செங்கல்பட்டு அரசு மருத்துவமனையில் அனுமதிக்கப்பட்டு கண்காணிக்கப்பட்டு வருகின்றனர். எஞ்சியுள்ள 2 பேருடன் சேர்த்து 5 பேரும் நலமுடன் இருப்பதாகத் தெரிவிக்கப்பட்டுள்ளது.