Skip to main content

‘மிக்ஜாம்’ புயல் எதிரொலி; டிஎன்பிஎஸ்சி முக்கிய அறிவிப்பு

Published on 03/12/2023 | Edited on 03/12/2023

 

Mikjam Storm Echo TNPSC Important Notification

 

வடகிழக்கு பருவமழை காரணமாகத் தமிழ்நாடு, கேரளா, புதுச்சேரி ஆகிய மாநிலங்களில் கனமழைக்கு வாய்ப்பு இருக்கும் என இந்திய வானிலை ஆய்வு மையம் ஏற்கனவே அறிவித்திருந்தது. அதன்படி வடகிழக்கு பருவமழை கடந்த அக்டோபர் மாதம் 21 ஆம் தேதி (21.10.2023) தொடங்கியதிலிருந்து தமிழகம், புதுச்சேரி உள்ளிட்ட பகுதிகளில் பரவலாக மழை பெய்து வருகிறது. அதே சமயம் வங்கக் கடலில் நிலவிய ஆழ்ந்த காற்றழுத்த தாழ்வு மண்டலம் புயலாக மாறியுள்ளது. இதற்கு மிக்ஜாம் எனப் பெயரிடப்பட்டுள்ளது. இந்த புயல் காரணமாக சென்னை, திருவள்ளூர், செங்கல்பட்டு மற்றும் காஞ்சிபுரம் உள்ளிட்ட பல்வேறு இடங்களில் தற்போது கனமழை பெய்து வருகிறது.

 

அதன் காரணமாகச் சென்னை, செங்கல்பட்டு, காஞ்சிபுரம், திருவள்ளூர் ஆகிய 4 மாவட்டங்களில் நாளை (04.12.2023) ஒரு நாள் மட்டும் பொது விடுமுறை அறிவிக்கப்பட்டுள்ளது. இந்நிலையில் டிசம்பர் 4 மற்றும் 6 ஆம் தேதிகளில் நடைபெற இருந்த கால்நடை உதவி மருத்துவர் பணிக்கான நேர்முகத் தேர்வு மிக்ஜாம் புயல் காரணமாக ஒத்திவைக்கப்பட்டுள்ளதாக டிஎன்பிஎஸ்சி அறிவித்துள்ளது.

 

இது குறித்து தமிழ்நாடு அரசுப் பணியாளர் தேர்வாணையம் சார்பில் தேர்வுக் கட்டுப்பாட்டு அலுவலரும், செயலாளருமான (பொறுப்பு) அஜய் யாதவ் வெளியிட்டுள்ள அறிவிப்பில், “தமிழ்நாடு அரசுப் பணியாளர் தேர்வாணையம் கால்நடை உதவி மருத்துவர் பணிக்கான நேர்முகத் தேர்வினை கடந்த 22.11.2023 முதல் நடத்தி வருகிறது. நேர்முகத் தேர்வுக்கான எஞ்சிய இரண்டு நாட்கள் (04.12.2023 மு.ப. & பி.ப. மற்றும் 06.12.2023 மு.ப.) உள்ளது. இந்நிலையில், தமிழக அரசு, மிக்ஜம் புயல் காரணமாக திங்கட்கிழமை (04.12.2023) சென்னை, திருவள்ளூர், காஞ்சிபுரம் மற்றும் செங்கல்பட்டு ஆகிய மாவட்டங்களுக்கு பொது விடுமுறை நாளாக அறிவித்துள்ளது.

 

இதனால் நேர்முகத்தேர்வு நாளில் மாற்றங்கள் செய்யப்பட்டுள்ளன. அந்த வகையில் திங்கட்கிழமை (04.12.2023) அன்று நடைபெறவுள்ள நேர்முகத்தேர்வு புதன் கிழமைக்கும் (06.12.2023), புதன் கிழமை (06122023) அன்று நடைபெறவுள்ள நேர்முகத்தேர்வு  வியாழக்கிழமை (07,12,2023) அன்றும் மாற்றியமைக்கப்பட்டுள்ளது. எனவே திங்கட்கிழமை (04122023) அன்று நேர்முகத்தேர்வில் கலந்துகொள்ள அழைக்கப்பட்டிருந்த தேர்வர்கள் அனைவரும் வரும் புதன் கிழமை (06.12.2023) அன்று மாற்றியமைக்கப்பட்டுள்ள நேர்முகத்தேர்விலும் புதன் கிழமை (06.12.2023) அன்று தடைபெறவுள்ள தேர்முகத்தேர்வில் கலந்துகொள்ள அழைக்கப்பட்டிருந்த தேர்வர்கள் அனைவரும் வியாழக்கிழமை (07.12.2023) அன்றும் மாற்றியமைக்கப்பட்டுள்ள நாளில் தவறாது கலந்துகொள்ளுமாறு கேட்டுக்கொள்ளப்படுகிறார்கள்” எனத் தெரிவிக்கப்பட்டுள்ளது. 

 

 

சார்ந்த செய்திகள்

Next Story

‘நீதிபதி பணியிடங்களுக்கு தேர்வானவர்கள் பட்டியல் ரத்து’ - உயர்நீதிமன்றம் அதிரடி!

Published on 29/02/2024 | Edited on 29/02/2024
Cancel of the list of candidates for judicial posts High Court

தமிழ்நாடு அரசுப் பணியாளர் தேர்வாணையத்தின் (TNPSC) மூலம் தமிழக அரசின் பல்வேறு துறைகளில் உள்ள காலிப்பணியிடங்களை நிரப்ப தேர்வுகளை நடத்தி வருகிறது. அந்த வகையில் தமிழகத்தில் உள்ள கீழமை உரிமையியல் நீதிமன்றங்களில் காலியாக உள்ள சிவில் நீதிபதி பணியிடங்களுக்கு கடந்த ஆண்டு ஜூன் 1 ஆம் தேதி அறிவிப்பு வெளியிடப்பட்டிருந்தது. இந்த தேர்வுக்கு விண்ணப்பித்திருந்த 12 ஆயிரம் பேருக்கு கடந்த ஆகஸ்ட் 19 ஆம் தேதி முதல் நிலை தேர்வை டி.என்.பி.எஸ்.சி. தேர்வு நடத்தி இருந்தது. இதனையடுத்து 2 ஆயிரத்து 544 பேர் முதன்மைத் தேர்வுக்கு தேர்ந்தெடுக்கப்பட்டனர்.

அதனைத் தொடர்ந்து சிவில் நீதிபதி 245 பணியிடங்களுக்குத் தேர்வானவர்கள் பட்டியலை டி.என்.பி.எஸ்.சி. வெளியிட்டிருந்தது. மேலும் இந்த பட்டியலை எதிர்த்து சென்னை உயர்நீதிமன்றத்தில் வழக்கு தொடரப்பட்டிருந்தது. அதில், “சிவில் நீதிபதி பணியிடங்களுக்குத் தேர்வானவர்கள் பட்டியலில் இட ஒதுக்கீடு முறையில் குளறுபடி உள்ளது. அதிக மதிப்பெண் பெற்ற பிற்படுத்தப்பட்ட மற்றும் மிகவும் பிற்படுத்தப்பட்ட பிரிவு மாணவர்களைப் பொதுப் பிரிவில் சேர்க்கவில்லை. இதனால் மற்ற பிற்படுத்தப்பட்ட மற்றும் மிகவும் பிற்படுத்தப்பட்ட பிரிவு மாணவர்கள் பாதிக்கப்பட்டுள்ளனர்” எனத் தெரிவிக்கப்பட்டிருந்தது.

இந்நிலையில் இந்த வழக்கு நீதிபதிகள் எஸ்.எம். சுப்ரமணியன், ராஜசேகர் அமர்வு முன்பு இன்று (29.02.2024) விசாரணைக்கு வந்தது. அப்போது, “தமிழ்நாடு சிவில் நீதிபதிகள் பணிக்கு தேர்வானவர்களின் தற்காலிகத் தேர்வுப் பட்டியல் ரத்து செய்யப்படுகிறது. திருத்தப்பட்ட பட்டியலை வெளியிடுமாறு தமிழ்நாடு அரசுப் பணியாளர்கள் தேர்வாணையத்துக்கு சென்னை உயர்நீதிமன்றம் உத்தரவிடப்படுகிறது” எனத் தெரிவித்தனர். 

Next Story

படுகொலை செய்யப்பட்ட தந்தை.. நீதிபதியான மகன்

Published on 19/02/2024 | Edited on 19/02/2024
Marshal Yesuvadian, son of  VAO Lourdes Francis, was elected as judge
ஸ்ரீபதி

டி.என்.பி.எஸ்.சி சிவில் நீதிபதி தேர்வு கடந்த ஆண்டு நடைபெற்ற நிலையில், சமீபத்தில் தேர்வு முடிவுகள் வெளியானது. இந்த தேர்வில் திருவண்ணாமலை மாவட்டத்தை சேர்ந்த ஸ்ரீபதி என்ற பழங்குடியின பெண் வெற்றி பெற்று சிவில் நீதிபதியாக தேர்வாகியுள்ளார். ஏழ்மையிலும் கல்வி கற்று பி.ஏ.பி.எல் சட்டப்படிப்பை முடித்தார். சட்டப்படிப்பு படிக்கும் போது ஸ்ரீபதிக்கு திருமணமான நிலையில் ஒரு குழந்தை உள்ளது. இந்த நிலையில் ஸ்ரீபதி தமிழ்நாட்டின் முதல் பழங்குடியினர் பெண் சிவில் நீதிபதியாக தேர்வாகியுள்ளார். 

Marshal Yesuvadian, son of  VAO Lourdes Francis, was elected as judge
லூர்து பிரான்சிஸ்

வலி மிகுந்த ஸ்ரீபதியின் வெற்றிப்பாதையை போன்றே, மார்ஷல் ஏசுவடியான் என்பவரின் வெற்றியும் பலராலும் கொண்டாடப்பட்டு வருகிறது. அதற்கு காரணம் அவரது அப்பா லூர்து பிரான்சிஸின் படுகொலை. தூத்துக்குடி மாவட்டம் முறப்பநாடு வி.ஏ.ஓவாக பணியாற்றி வந்த லூர்து பிரான்சிஸ், அங்கு நடைபெறும் மணல் கொள்ளையை தடுப்பதில் படுதீவிரமாக செயல்பட்டு வந்தார். அதனால் ஆத்திரமடைந்த மணல் கடத்தல் கும்பல் லூர்து பிரான்சிஸை அலுவலகத்தில் புகுந்து சரமாரியாக வெட்டிப் படுகொலை செய்தது. இந்த சம்பவம் தமிழ்நாடு முழுவதும் பெரும் பரப்பை ஏற்படுத்தியது. இந்த வழக்கில் சம்பந்தப்பட்ட இருவருக்கும் நீதிமன்றம் ஆயுள்தண்டனை கொடுத்து சிறையில் அடைத்துள்ளது குறிப்பிடத்தக்கது.

Marshal Yesuvadian, son of  VAO Lourdes Francis, was elected as judge
மார்ஷல் ஏசுவடியான்

இந்த நிலையில் கடந்த ஆண்டு நடைபெற்ற சிவில் நீதிபதி தேர்வை எழுதிய மார்ஷல் ஏசுவடியான் நீதிபதியாக தேர்வாகியுள்ளார். எனது தந்தை, உன்னை நீதிபதியாக பார்க்க வேண்டும் என சொல்லிக்கொண்டே இருப்பார். அவர் படுகொலை செய்யப்பட்ட 5 ஆவது நாள் சிவில் நீதிபதி தேர்வு அறிவிப்பு வந்தது. எனது தந்தையின் கனவை நிறைவேற்ற தேர்வுக்கு விண்ணப்பித்தேன். இப்போது வெற்றியும் பெற்றுவிட்டேன். அவரது ஆசையை நிறைவேற்றியதில் மகிழ்ச்சியாக உள்ளது” என மார்ஷல் ஏசுவடியான் நெகிழ்ச்சியாக பேசியுள்ளார். மார்ஷல் ஏசுவடியானுக்கு அரசியல் தலைவர்கள் எனப் பலரும் பாராட்டுகளைத் தெரிவித்து வருகின்றனர்.