Skip to main content

கர்நாடக எதிர்ப்புக்கு மத்திய அரசு பணியக் கூடாது! அன்புமணி ராமதாஸ்

Published on 18/02/2018 | Edited on 18/02/2018


மேலாண்மை வாரியத்தை அமைக்க எதிர்ப்பு தெரிவிக்கப் போவதாக கர்நாடக முதலமைச்சர் சித்தராமய்யா கூறியுள்ளார். கர்நாடக எதிர்ப்புக்கு மத்திய அரசு பணியக் கூடாது என்று பா.ம.க. இளைஞரணித் தலைவர் அன்புமணி இராமதாஸ் கூறியுள்ளார். 
 

இதுதொடர்பாக அவர் வெளியிட்டுள்ள அறிக்கை விவரம்:-
 

காவிரி நீரில் தமிழகத்திற்குரிய பங்கு 14.74 டி.எம்.சி அளவுக்கு குறைக்கப்பட்டு விட்ட நிலையில்,  காவிரி மேலாண்மை வாரியத்தை அடுத்த 6 வாரங்களில் அமைக்க வேண்டும் என்று உச்சநீதிமன்றம் தீர்ப்பளித்திருப்பது தான் தமிழக விவசாயிகளுக்கு சற்று ஆறுதலாக உள்ளது. ஆனால், மேலாண்மை வாரியத்தை அமைக்க எதிர்ப்பு தெரிவிக்கப் போவதாக கர்நாடக முதலமைச்சர் சித்தராமய்யா கூறியுள்ளார். வெந்த புண்ணில்  வேல் பாய்ச்சுவது போன்ற  சித்தராமய்யாவின் இந்த எதிர்ப்பு கண்டிக்கத்தக்கது.

 

anbumani ramadoss


 

காவிரிப் பிரச்சினை குறித்த வழக்கில் உச்சநீதிமன்றம் நேற்று முன்நாள் அளித்த தீர்ப்பு வெளியான சிறிது நேரத்தில் காவிரியில் தமிழகத்திற்குரிய பங்கு குறைக்கப்பட்டு, கர்நாடக மாநிலத்திற்குரிய பங்கு அதிகரிக்கப்பட்டிருப்பது வரவேற்கத்தக்கது என்றும், இதன்மூலம் நீதி வென்றுள்ளது என்றும் சித்தராமய்யா கூறியிருந்தார். கர்நாடகத்திற்கு அதிக தண்ணீர் தர வேண்டும் என்ற உச்சநீதிமன்றத்தின் தீர்ப்பை விழுந்து விழுந்து வரவேற்கும்  சித்தராமய்யா, நீர்ப்பகிர்வை செயல்படுத்துவதற்காக காவிரி மேலாண்மை  வாரியம் அமைக்க வேண்டும் என்ற உச்சநீதிமன்ற ஆணையை மட்டும் ஏற்க மறுப்பது  எந்த வகையில் நியாயம்? தமிழ்நாட்டிற்கு ஒரு நியாயம், கர்நாடகத்துக்கு ஒரு நியாயம் என்பதை ஏற்க முடியாது.
 

காவிரி விவகாரத்தில் மேற்பார்வைக் குழு ஏற்கனவே செயல்பட்டு வருவதால், மேலாண்மை வாரியம் அமைக்க தேவையில்லை என்று சித்தராமய்யா கூறியிருப்பது பிரச்சினையை திசை திருப்பும் செயலாகும். காவிரிப் பிரச்சினையில் மேற்பார்வைக்குழு என்பது தற்காலிகமான ஏற்பாடு ஆகும். காவிரிச் சிக்கலில் நடுவர் மன்றம் அதன் இறுதித் தீர்ப்பை 2007-ஆம் ஆண்டு பிப்ரவரி 5-ஆம் தேதி வழங்கியது. அடுத்த 2 மாதங்களில் காவிரி மேலாண்மை வாரியம் அமைக்கப்பட்டிருக்க வேண்டும். அதற்கு முன் நடுவர் மன்றம் அளித்த இடைக்காலத் தீர்ப்பை நடைமுறைப்படுத்த காவிரி நதிநீர் ஆணையமும், கண்காணிப்புக் குழுவும் இருந்தன. நடுவர் மன்றம் இறுதித் தீர்ப்பு வழங்கிய நிலையில், இடைக்காலத் தீர்ப்பு காலாவதி ஆனதைக் காரணம் காட்டி அந்த அமைப்புகள் கலைக்கப்பட்டன. அதன்பின் நடுவர் மன்ற இறுதித் தீர்ப்பை செயல்படுத்த எந்த அமைப்பும் இல்லாததை உச்சநீதிமன்றத்தில் தமிழக அரசு சுட்டிக்காட்டியதைத் தொடர்ந்தே இடைக்கால ஏற்பாடாக மேற்பார்வைக்குழுவை அமைக்க 2013-ஆம் ஆண்டு உச்சநீதிமன்றம் ஆணையிட்டது. அந்த மேற்பார்வைக்குழுவுக்கு எந்த அதிகாரமும் கிடையாது. அந்தக் குழு அமைக்கப் பட்ட நாளில் இருந்து இதுவரை ஒரு முறை மட்டுமே கூடியிருக்கிறது. அதனாலும் எந்த பயனுமில்லை.
 

காவிரி மேலாண்மை வாரியத்தை அமைக்கும்படி உச்சநீதிமன்றம் ஆணையிட்டதைத் தொடர்ந்து, மேற்பார்வைக்குழு செயலிழந்து விட்டது. அதைக் காரணம் காட்டி மேலாண்மை வாரியம் அமைப்பதற்கு முட்டுக்கட்டை போடுவதை அனுமதிக்க முடியாது. மேலாண்மை வாரியம் அமைக்க உச்சநீதிமன்றம் காலக்கெடு விதிக்கவில்லை என்று சித்தராமய்யா கூறுவதும் திரிபு வாதம் தான். உச்சநீதிமன்றத் தீர்ப்பு ஆணையின் 457&ஆவது பக்கத்தின் 403&ஆவது பத்தியில் காவிரி நடுவர் மன்ற இறுதித் தீர்ப்பைச் செயல்படுத்துவதற்கான அமைப்பு 6 வாரங்களில் அமைக்கப்பட வேண்டும்; இதற்காக இனியும் கால நீட்டிப்பு வழங்க முடியாது என்று திட்டவட்டமாக தெரிவிக்கப்பட்டுள்ளது. இவ்வளவுக்குப் பிறகும் மேலாண்மை வாரியம் அமைக்கக் காலக்கெடு விதிக்கப்படவில்லை என்றும், இந்த பிரச்சினைக்கு சம்பந்தப்பட்ட மாநிலங்களை ஒருங்கிணைத்து தீர்வு காண வேண்டும் என சித்தராமய்யா கூறிவருவதைப் பார்க்கும் போது அவர் இயல்பாக இல்லை; தேர்தல் காய்ச்சல் பாதித்துள்ளது என்பதை உணர குடிகிறது. இந்த எதிர்ப்புக்கு பணிந்து மேலாண்மை வாரியம் அமைப்பதை மத்திய அரசு தாமதப்படுத்தக் கூடாது.
 

ஏற்கனவே நான் குறிப்பிட்டதைப் போல உச்சநீதிமன்றம் தீர்ப்பளித்து விட்டதால் மட்டுமே மேலாண்மை வாரியத்தை அடுத்த 6 வாரங்களில் மத்திய அரசு அமைத்து விடாது என்பதற்கான உதாரணம் தான் சித்தராமய்யாவின் இந்தக் கருத்துகள் ஆகும். கர்நாடகத்தில் சட்டப்பேரவைத் தேர்தலுக்கான அறிவிக்கை அடுத்த மாதம் வெளியிடப்படவுள்ள நிலையில், அங்குள்ள மக்களின் ஆதரவைப் பெறுவதற்காக மேலாண்மை வாரியம் அமைப்பதற்கு முட்டுக்கட்டை போட காங்கிரசும், பாரதிய ஜனதாவும் முயலும். உச்சநீதிமன்றத் தீர்ப்பின்படி தமிழககத்திற்கு நீதி பெற்றுத் தருவதை விட கர்நாடக சட்டப்பேரவைத்  தேர்தலில் அரசியல் அதிகாரத்தை சுவைப்பது தான் அக்கட்சிகளுக்கு அவசரத் தேவையாக இருக்கும்.
 

எனவே, இந்த விஷயத்தில் தமிழகம் இனியும் அலட்சியமாக இருக்கக் கூடாது. மத்திய அரசுக்கு  தொடர்ந்து அழுத்தம் தருவதன் மூலமாக மட்டுமே காவிரி மேலாண்மை வாரியத்தை அமைக்க முடியும். உடனடியாக அனைத்துக் கட்சிக் கூட்டத்தைக் கூட்டி இது குறித்து தீர்மானம் நிறைவேற்றுவதுடன், அனைத்துக் கட்சித் தலைவர்கள், உழவர் அமைப்புகளின் தலைவர்களுடன் பிரதமர் நரேந்திர மோடியை சந்தித்து மேலாண்மை வாரியத்தை உடனடியாக அமைக்கும்படி வலியுறுத்த முதல்வர் முன்வர வேண்டும். இவ்வாறு கூறியுள்ளார். 
 

சார்ந்த செய்திகள்

 

Next Story

“இடைத்தேர்தல் முடிவுகளை ஏற்றுக்கொள்கிறோம்” - அன்புமணி!

Published on 13/07/2024 | Edited on 13/07/2024
We accept the by election results Anbumani 

விக்கிரவாண்டி சட்டமன்றத் தொகுதி திமுக எம்.எல்.ஏ புகழேந்தி உயிரிழந்ததைத் தொடர்ந்து அந்தத் தொகுதிக்குக் கடந்த 10 ஆம் தேதி இடைத்தேர்தல் நடைபெற்றது. இந்த இடைத்தேர்தலில் திமுக சார்பில் அன்னியூர் சிவா, நாம் தமிழர் கட்சி சார்பில் அபிநயா, பாஜக கூட்டணியில் உள்ள பாமக சார்பில் அக்கட்சியின் மாநிலத் துணைத் தலைவர் சி.அன்புமணி ஆகியோர் போட்டியிட்டனர். அதே சமயம் அதிமுக, தேமுதிக ஆகிய இருகட்சிகளும் இந்த இடைத்தேர்தலைப் புறக்கணித்திருந்தது. இந்தத் தேர்தலில் பதிவான வாக்குகள் இன்று (13.07.2024) எண்ணப்பட்டன. அதன்படி காலை 8 மணிக்கு வாக்கு எண்ணிக்கை தொடங்கிய நிலையில் முதலில் தபால் வாக்குகள் எண்ணப்பட்டது.

அதனைத் தொடர்ந்து மின்னணு வாக்குப்பதிவு இயந்திரத்தில் பதிவான வாக்குகள் எண்ணப்பட்டது. இந்நிலையில் 20 சுற்றுகள் முடிவில் திமுக வேட்பாளர் அன்னியூர் சிவா 1 லட்சத்து 24 ஆயிரத்து 53 வாக்குகள் பெற்று 67 ஆயிரத்து 757 வாக்குகள் வித்தியாசத்தில் வெற்றி பெற்றதாக தேர்தல் ஆணையம் அதிகாரப்பூர்வமாக அறிவித்தது. அதே வேளையில் பாமக வேட்பாளர் சி.அன்புமணி 56 ஆயிரத்து 26 வாக்குகளும், நாதக வேட்பாளர் அபிநயா 10 ஆயிரத்து 479 வாக்குகளும் பெற்றனர். இந்தத் தேர்தலில் நாம் தமிழர் கட்சி சார்பாக போட்டியிட்ட அபிநயா டெப்பாசிட்டை இழந்தார். இதனையடுத்து விக்கிரவாண்டி சட்டப்பேரவை தொகுதி இடைத்தேர்தலில் வெற்றி பெற்ற திமுக வேட்பாளர் அன்னியூர் சிவா வெற்றி பெற்றதற்கான சான்றிதழை தேர்தல் நடத்தும் அலுவலரிடம் இருந்து பெற்றுக்கொண்டார். 

We accept the by election results Anbumani 

இந்நிலையில் சென்னையில் பாமக தலைவர் அன்புமணி ராமதாஸ் செய்தியாளர்களை சந்தித்து பேட்டியளித்தார். அப்போது அவர் பேசுகையில், “அனைத்துக் கூட்டணிக் கட்சித்தலைவர்கள், குறிப்பாக பாமக நிர்வாகிகள் மற்றும் தொண்டர்களுக்கு நன்றியைத் தெரிவித்துக் கொள்கிறேன். பாமகவுக்கு வாக்களித்த அனைத்து வாக்காளர்களுக்கும் நன்றிகளை தெரிவித்துக்கொள்கிறோம். இந்த இடைத்தேர்தல் முடிவுகளை முழுமையாக ஏற்றுக்கொள்கிறோம். பணம் மற்றும் அதிகாரத்தை வைத்து திமுக பெற்ற வெற்றி உண்மையான வெற்றி அல்ல. இடைத்தேர்தலுக்காக சுமார் 200 கோடி ரூபாய்க்கும் அதிகமாக திமுக செலவிட்டுள்ளது.

பணம், பொருளை கொடுத்து பெறுவது வெற்றி அல்ல; ரூ.6 ஆயிரம் பணமும், ரூ.4 ஆயிரத்திற்கு பொருளும் திமுக கொடுத்திருக்கிறது. குறிப்பாக 3 தவணைகளாக வாக்காளர்களுக்கு திமுக பணத்தை கொடுத்துள்ளது. இத்தனை பொருட்கள் கொடுத்தது, பொதுமக்கள் அனைவருக்கும் தெரியும். ஆனால் தேர்தல் ஆணையத்திற்கு தெரியவில்லையா?. திமுகவுக்கும் சமூக நீதிக்கும் சம்பந்தம் கிடையாது. விக்கிரவாண்டி இடைத்தேர்தல் நேர்மையான முறையில் நடந்திருந்தால் திமுக டெபாசிட் இழந்திருக்கும். இந்த வெற்றி குறித்து தமிழக முதலமைச்சர் மு.க.ஸ்டாலின் பெருமைப்படுவதற்கு என்ன இருக்கிறது?” எனப் பேசினார். 

Next Story

“தமிழகத்திற்கு தண்ணீர் தர மறுப்பது அநீதி” - அன்புமணி ராமதாஸ்

Published on 12/07/2024 | Edited on 12/07/2024
Anbumani Ramadoss said that it is injustice to deny water to Tamil Nadu

காவிரி நீர் ஒழுங்குமுறைக் குழு ஆணைப்படி தமிழ்நாட்டிற்கு  தண்ணீர் திறக்க கர்நாடக துணை முதல்வர் சிவகுமார் மறுப்பது அநீதி என பாமக தலைவர் அன்புமணி ராமதாஸ் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், “காவிரி பாசன மாவட்டங்களில் குறுவை சாகுபடி செய்ய வசதியாக தமிழ்நாட்டிற்கு காவிரியில் தினமும் ஒரு  டி.எம்.சி வீதம் தண்ணீர் திறக்க வேண்டும் என்று காவிரி நீர் ஒழுங்குமுறைக் குழு ஆணையிட்டுள்ள நிலையில், தமிழ்நாட்டிற்கு திறந்து விட கர்நாடகத்தில் தண்ணீர் இல்லை என்றும், நல்ல மழை பெய்ய வேண்டும் என்று இறைவனை வேண்டிக் கொள்வதாகவும் கர்நாடக துணை முதலமைச்சர் டி.கே.சிவக்குமார் கூறியிருக்கிறார்.  கர்நாடக அணைகளில் போதிய அளவு தண்ணீர் இருக்கும் நிலையில், தமிழகத்திற்கு தண்ணீர் திறக்க கர்நாடக அரசு மறுப்பது கண்டிக்கத்தக்கது.

கர்நாடக அணைகளில் போதிய தண்ணீர் இல்லை என்றும்,  அதனால் தமிழ்நாட்டிற்கு தண்ணீர் தர இயலாது என்றும் கர்நாடக துணை முதலமைச்சர் கூறுவது முழுக்க முழுக்க பொய் ஆகும். கர்நாடகத்தில் காவிரி ஆற்றின் குறுக்கே கட்டப்பட்டுள்ள  கபினி, கிருஷ்ணராஜசாகர், ஹேமாவதி, ஹாரங்கி ஆகிய அணைகளில் இன்று காலை நிலவரப்படி, 72.50 டி.எம்.சி தண்ணீர் உள்ளது. அணைக்கு வினாடிக்கு சுமார் 20,000 கன அடி வீதம் தண்ணீர் வந்து  கொண்டிருக்கிறது. கர்நாடக அணைகளின் நீர்இருப்பு கடந்த 19 நாட்களில் 35 டி.எம்.சி அதிகரித்துள்ளது. மொத்தம் 114.57 டி.எம்.சி கொள்ளவுள்ள அணைகளில் மூன்றில் இரு பங்கு அளவுக்கு தண்ணீர் இருக்கும் நிலையில், அணைகளில் தண்ணீர் இல்லை என்று கூறுவதை எவரும் நம்ப மாட்டார்கள்.

உச்சநீதிமன்றம் அளித்தத் தீர்ப்பின்படி நடப்பாண்டின் ஜூன் மாதத்தில் 10 டி.எம்.சி, ஜூலை மாதத்தில் 34 டி.எம்.சி என இம்மாத இறுதிக்குள்ளாக 44 டி.எம்.சி  தண்ணீரை திறந்து விட வேண்டும்.  இன்று வரை  23 டி.எம்.சி தண்ணீரை கர்நாடகம் வழங்கியிருக்க வேண்டும். ஆனால், இதுவரை ஒரு டி.எம்.சி தண்ணீரைக் கூட  தமிழ்நாட்டுக்கு கர்நாடகம் வழங்கவில்லை.

காவிரி நீர் ஒழுங்குமுறைக் குழுவின் ஆணையை காவிரி மேலாண்மை ஆணையம் அடுத்த சில நாட்களில் உறுதி செய்த பிறகு தான்  கர்நாடகம் தண்ணீர் திறப்பதற்கான முறைப்படியான ஆணை பிறப்பிக்கப்படும். அதன்படி பார்த்தால் இம்மாத இறுதி வரை அதிகபட்சமாக 15 டி.எம்.சி தண்ணீர் மட்டும் தான் கிடைக்கும். அது  இம்மாத இறுதி வரை தமிழகத்திற்கு கிடைக்க வேண்டிய தண்ணீரில் மூன்றில் ஒரு பங்கு தான். அதைக் கூட தமிழகத்திற்கு வழங்க முடியாது என்று கர்நாடகம் மறுப்பது பெரும் அநீதி ஆகும்.  இதை அனுமதிக்க முடியாது.

கர்நாடக அணைகளில்  72 டி.எம்.சி தண்ணீர் இருந்தால் கூட தமிழகத்திற்கு தண்ணீர் திறக்க மாட்டோம், அணைகள் முழுமையாக நிரம்பினால் தான் தண்ணீர் திறப்போம் என்று கூறுவதன் மூலம் தமிழ்நாட்டை  உபரி நீரை வெளியேற்றுவதற்காக வடிகாலாக கர்நாடகம் பயன்படுத்தி வருகிறது  என்பது மீண்டும் ஒருமுறை உறுதிப்படுத்தப்பட்டிருக்கிறது.  காவிரி விவகாரத்தில் கர்நாடகத்தின் அனைத்து அத்துமீறல்களையும், அநீதிகளையும்  திமுக  அரசு வேடிக்கைப் பார்த்துக் கொண்டிருப்பதால் தான் அம்மாநிலத்திற்கு இந்த அளவு துணிச்சலைக் கொடுத்துள்ளது.

காவிரி சிக்கலில் கர்நாடகம் இழைக்கும் அநீதியை தொடர்ந்து தமிழகம் வேடிக்கைப் பார்த்துக் கொண்டிருக்கக் கூடாது. காவிரி மேலாண்மை ஆணையத்தின் கூட்டத்தை அடுத்த சில நாட்களில் கூட்டி, இநத சிக்கலில் அதிகாரப்பூர்வ ஆணை பிறப்பிக்கும்படி தமிழக அரசு வலியுறுத்த வேண்டும். அதன்பிறகும் தமிழகத்திற்கு தண்ணீர் திறக்க கர்நாடக அரசு மறுத்தால் காவிரி மேலாண்மை ஆணைய விதி எண் 16-இன்படி  கர்நாடக அரசு மீது மத்திய அரசின் வாயிலாக நடவடிக்கை எடுக்குமாறு காவிரி மேலாண்மை ஆணையத்தை வலியுறுத்த வேண்டும்.

இவை அனைத்துக்கும் மேலாக, காவிரி நடுவர் மன்றம் ஆணையிட்டவாறு, அதன் தீர்ப்பை செயல்படுத்த காவிரி ஆற்றின் குறுக்கே கட்டப்பட்டுள்ள அணைகள் அனைத்தையும்  காவிரி மேலாண்மை ஆணையத்தின் கட்டுப்பாட்டில் கொண்டு வர  ஆணையிடக் கோரி உச்சநீதிமன்றத்தில்  தமிழக அரசு வழக்கு தொடர வேண்டும் என்று வலியுறுத்துகிறேன்” எனக் குறிப்பிட்டுள்ளார்.