Skip to main content

இந்த உலகம் யாருக்காகவும் காத்திருக்காது; மனித வாழ்வை உணர வைக்கும் ஜென் கதைகள்

Published on 07/06/2023 | Edited on 07/06/2023

 

 zen story and Jay zen interview

 

ஜென் கதைகளின் பல்வேறு சிறப்புகள் குறித்து ஜெய் ஜென் நமக்கு விளக்குகிறார்.

 

நம்முடைய உடல் இயங்குவதற்கு தத்துவங்கள் தான் எரிபொருள். அவை தான் உங்களுடைய எண்ணங்களை உருவாக்குகின்றன. ஜென் கதைகள் காலத்துக்கு ஏற்றவாறு தத்துவங்களை எப்போதும் நமக்கு நினைவுபடுத்திக்கொண்டே இருக்கும். ஒரு மடாலயத்தில் சிறுவயதில் ஒருவர் வேலைக்குச் சேர்கிறார். தன்னுடைய வேலைகளைச் சரியாகச் செய்யும் அவர் ஒரு கட்டத்தில் குருவாக மாறுகிறார். காலையில் விழித்த பிறகும் இரவு தூங்குவதற்கு முன்பும் மடாலய மணியை அடிக்கும் பழக்கம் அங்கு இருந்தது. ஒருநாள் அவர் இறந்து போகிறார். ஆனால் அடுத்த நாள் காலையிலும் மணி அடிக்கிறது. இது தான் கதை. 

 

நீங்கள் உண்மையாக ஒரு விஷயத்தைச் செய்தால் உங்களுக்குப் பிறகும் அதை வேறு யாராவது நிச்சயம் தொடர்வார்கள். ஜென் தத்துவத்தை ஏற்றுக்கொண்ட ஒருவன் எளிமையாக வாழ்வான். பகட்டைப் புரிந்துகொண்ட அளவுக்கு எளிமையை நாம் இன்னும் புரிந்துகொள்ளவில்லை. ஒரு மடாலயத்தில் குருவிடம் சீடர் கேட்கிறார் "நான் வந்து பல நாட்கள் ஆகிறது. நான் எப்போது துறவி ஆவது?" என்று. "என்னுடைய நண்பர் ஒருவர் இருக்கிறார். அவர் என்ன சொல்கிறாரோ அதைச் செய்துவிட்டு வா" என்றார் குரு. அந்த நண்பரிடம் சென்றபோது ஒவ்வொரு வேளையும் உணவு உண்ட பிறகு பாத்திரங்களை சுத்தப்படுத்தி வைக்கச் சொன்னார். தொடர்ந்து ஐந்து நாட்கள் இதைச் செய்தார் சீடர். 

 

"நீ போகலாம்" என்றார் நண்பர். ஏன் இவை அனைத்தும் நடந்தது என்று குருவிடம் கேட்டார் சீடர். நடந்த அனைத்தையும் குரு கேட்டறிந்தார். "நீ துறவியாக முடியாது" என்றார் குரு. ஏன் என்று சீடர் வினவினார். "காலையில் எழுந்து ஏன் அனைத்தையும் கழுவி வைக்கவில்லை?" என்று கேட்டார் குரு. "இரவு தானே கழுவி வைத்தேன்?" என்றார் சீடர். "இரவிலிருந்து காலைக்குள் அந்தப் பாத்திரங்களில் தூசி படியாது என்று யார் உன்னிடம் சொன்னது? இந்தப் புரிதல் உனக்கு வரும்போது நீ துறவியாக முடியும்" என்றார் குரு. சீடருக்கு அப்போது புரிந்தது. ஜென் கதைகளை கேட்கக் கேட்க சலிப்பே வராது. 

 

ஒரு பட்டாம்பூச்சி பறக்கிறது. அதை ஒருவர் பார்த்துக் கொண்டிருக்கிறார். அதைப் பிடிக்க வேண்டும் என்று நினைத்து பிடித்தார். கையில் வைத்து அதைப் பார்த்துக் கொண்டிருந்தார். பட்டாம்பூச்சியின் உடலைத் திருப்பிப் போட்டார். ஒரு கம்பியை எடுத்து அதன் வயிற்றில் பெருக்கல் குறி போட்டார். அதன் உடலில் ரத்தம் வழிந்தது. அதைப் பார்த்து சிரித்தார். அதனால் பறக்க முடியவில்லை. இவை அனைத்தும் ஒரு துறவிக்கு கனவாக வந்தது. திடீரென்று எழுந்து பார்த்தபொழுது அவருடைய வயிற்றில் பெருக்கல் குறி போட்டிருந்தது. பட்டாம்பூச்சிக்கு காரணம் தெரியாதது போல் அவருக்கும் காரணம் தெரியவில்லை. அதோடு முடிகிறது கதை. 

 

ஜென் கதைகள் அனைவருக்கும் எளிதில் புரியும்படி இருக்கும். அவற்றுக்கு ஒரு ஆரம்பமும் முடிவும் கிடையாது. ஒரு துறவியும் நானும் ஒரே இடத்தில் இருந்தபோது இருவரும் நீண்ட நேரம் ஒருவரை ஒருவர் பேசாமல் பார்த்துக் கொண்டிருந்தோம். பிறகு அவர் சொன்னார் "நம் இருவருக்கும் இடையே மிகுந்த நம்பிக்கை இருப்பதால்தான் இவ்வளவு நேரம் பேசாமல் ஒருவரை ஒருவர் பார்க்க முடிந்தது" என்று. அதீத நம்பிக்கை இருப்பதால்தான் காதலர்கள் ஒருவரை ஒருவர் அதிக நேரம் பார்த்துக் கொண்டிருக்கிறார்கள். நம்பிக்கையின்மையால் தான் விவாகரத்து செய்பவர்கள் ஒருவர் முகத்தை ஒருவர் பார்க்கவே விரும்புவதில்லை. 

 

ஒருமுறை இமயமலையில் ஒரு துறவியிடம் ஒருவர் வந்து "உலகத்தில் ஏன் இவ்வளவு பிரச்சனைகள் இருக்கின்றன?" என்று கேட்டார். அவரிடம் அந்தத் துறவி "அருகிலிருக்கும் செடியில் ஒரு காம்பில் உள்ள இலைகளை மட்டும் பிடுங்கி வாருங்கள்" என்றார். அவரும் அதைச் செய்தார். "இதில் ஏதாவது இரண்டு இலைகள் ஒன்று போல் இருப்பதை எனக்குக் காட்டி விடுங்கள்" என்றார். ஒவ்வொன்றுமே ஏதோ ஒரு வகையில் வித்தியாசமாகத் தான் இருந்தன. "நீங்கள் கேட்ட கேள்விக்கு இதுதான் பதில். இந்த உலகில் வாழும் ஒவ்வொரு மனிதனும் ஒவ்வொரு விதம் என்பது உங்களுக்குப் புரிந்தால் இதுவும் புரியும்" என்றார் துறவி.

 


 

Next Story

ஈகோவால் விரக்தி; காசிக்கு போகத் திட்டமிட்ட முதியவர் - ‘ஜெய் ஜென்’ பகிரும் மனங்களும் மனிதர்களும்: 24

Published on 04/03/2024 | Edited on 04/03/2024
jay-zen-manangal-vs-manithargal- 24

தான் சந்தித்த பல்வேறு கவுன்சிலிங்கில் பல வகையான மனிதர்களை குறித்தும், அவர் கவுன்சிலிங்க் கொடுத்த விதம் குறித்தும் ‘மனங்களும் மனிதர்களும்’ தொடரின் வழியாக ஜெய் ஜென் நம்மோடு பகிர்ந்து கொள்கிறார்.

ஐம்பது வயது நபர் ஒருவர் என்னை பார்க்க வந்தார். பொதுவாக கவுன்சிலிங் என்று வருபவர்கள் நேரடியாக தனக்கிருக்கும் பிரச்சனையை சொல்லி ஆரம்பிப்பார்கள். ஆனால் இவரோ சும்மா பேசலாம் என்று வந்தேன் என்று சாதாரணமாகச் சொன்னார். பிறகு மெல்ல பேச்சு கொடுக்க கொடுக்க தன்னைப் பற்றி சொல்ல ஆரம்பிக்கிறார். அவர் வாழ்க்கையில் எதுவெல்லாம் முக்கியமானதோ அது அனைத்தும் தோல்வியாக இருந்திருக்கிறது. சிறு வயதில் பிடித்த படிப்பை படிக்க முடியவில்லை, திருமணமான பிறகு மனைவி விட்டுச் சென்று பல வருடம் கழித்து மீண்டும் வந்து வாழ்கிறார், அதில் சில சிக்கல்கள்.

24 வயதில் இருக்கும் மகனிடம் சீரான உறவுமுறை இல்லை. மகளோ எவ்வளவு சொல்லியும் கேக்காமல் காதல் திருமணம் செய்து கொண்டு அங்கு மீண்டும் சில பிரச்சனைகள், மேலும் நிதி ரீதியாகவும் நிறைய பிரச்சனைகள். இப்போது அவர் என் தேவையே குடும்பத்திற்கு தேவைப்படவில்லை. எனவே எல்லாரையும் அழைத்து சொல்லிவிட்டு கண் காணாத இடத்திற்கோ அல்லது காசிக்கு சென்றிடலாம் என்று இருக்கிறேன் என்று  இயல்பாக ஆனால் விரக்தி கலந்து கூறினார்.

நான் எடுத்த முடிவு சரியா தவறா என்று உங்களிடம் கேட்க வரவில்லை.  ஆனால் நான் எடுத்த முடிவிற்கு வேறு பக்கம் இருக்கும் என்று சும்மா பேச வந்திருக்கிறேன் என்று மிகவும் தெளிவாக இருந்தார். நானும் அவர் போக்கிலேயே, சரி காசிக்கு போகலாம் என்றால் டிக்கெட் எடுத்தாச்சா, அங்கு போய் என்னவெல்லாம் செய்யப் போகிறீர்கள் என்று பொதுவாக பேசிவிட்டு, கண் காணாத இடத்திற்கு என்று சொன்னீர்களே அப்படி என்றால் என்ன, யார் உங்களுக்கு காசி போய்வர ஐடியா கொடுத்தது என்று கேட்டேன். அவரை பொறுத்தவரை தன்னை சுற்றி இருக்கும் பிரச்சனைகளிடம் இருந்து வெளிவர வேண்டும் என்றும், தன்னை யாருமே மதிக்கவில்லை என்பதுதான் அவருக்கு இப்படி கண் காணாத இடத்திற்கு போக தோன்றி இருக்கிறது.

நான் அவரிடம் சற்று கடினமாக பேசப் போகிறேன் என்று தொடங்கி, நீங்கள் ஒரு ஈகோயிஸ்டிக் பெர்சன் தான் சார் என்றேன். இங்கு யாரும் உங்களை மதிப்பதில்லை, பொருட்படுத்துவதில்லை என்று காசிக்கு போகிறீர்கள். ஆனால் காசிக்கு சென்றால் அங்கு யாரையுமே உங்களுக்கு தெரியாது. சாப்பாடு என்று கேட்டால் யாரோ ஒருவர் உணவு கொடுப்பர். இது போலவே நகர வாழ்க்கையில் நீங்கள் வாழ நினைப்பது ஈகோயிஸ்டிக் தான் என்று அவரிடம் சொன்னேன். மேலும் நீங்கள் எல்லாரிடமும் தான் செய்வது சரி என்று ஒத்துக்கொள்ள வேண்டும் என்று எதிர்பார்க்கிறீர்கள்.

நான் என் மனைவிக்கு, மகனுக்கு, மகளுக்கு  நல்லது தானே செய்தேன் என்று அனைவரும் அதை ஏற்றுக்கொள்ள வேண்டும் என்று நினைக்கிறீர்கள். நீங்கள் நல்லவராகவே இருக்கலாம். ஆனால் உலகம் அப்படி ஏற்றுக் கொள்ளாது, உங்களை வேறு மாதிரியாகத்தான் பார்க்கும். இதுவரை நீங்கள் பார்க்காத இடத்தில் இயல்பாக வாழ்ந்து விட முடியும் என்று எப்படி நினைக்கிறீர்கள். உங்கள் மனைவி, உங்கள் மகன், மகள் என்பவர்களிடமே உங்களால் சரியாக வாழ முடியவில்லை என்று சிந்தனை இருக்கிறது. ஆனால் மற்றவர்கள் கூறியதை வைத்தும், சினிமாவில் பார்த்ததை வைத்தும் காசிக்கு சென்றால் சிறப்பாக வாழ்ந்திட முடியும் என்று நினைப்பது போலியான பாசிடிவிட்டி தானே. 

அவரும் சிரித்து, சரியாக பிடித்துவிட்டீர்கள் என்று ஒத்துக்கொண்டார். மேலும் இயற்கை இது தான். உங்கள் மனைவி, மகள், மகன் என்று உங்களுக்கு என்று தெரிந்தே அங்கீகரித்திருக்கிறது. அதை நீங்களும் ஏற்றுக்கொள்ள வேண்டும் என்றேன். என்னவோ புரிந்தும் புரியாதது போல இருந்தார். நான் இப்படி இருக்கிறேன். எல்லாரும் தன்னை போலவே இருக்க வேண்டும் என்று நினைக்கிறீர்கள். அதுதான் உங்களை காசிக்கு செல்ல நகர்த்துகிறது. கண்டிப்பாக நீங்கள் காசிக்கு போனாலும், இருப்பவர்களிலே நல்ல சாமியார் நான்தான் வேறு யாரும் இல்லை என்று தான் சொல்வீர்கள் என்று சிரித்துக் கொண்டே சொன்னேன். அவரும் சிரித்துவிட்டு சரி என்று கிளம்பினார். இரண்டு வாரம் கழித்து பேசுகையில், அவர் என்னிடம் நான் காசிக்கு போகவில்லை என்று அன்றே உங்களுக்கு தெரிந்திருக்கும். இருந்தாலும் சொல்கிறேன் நான் போகவில்லை என்று இயல்பாக சொன்னார். 

Next Story

குளிர்பானத்தில் மயக்க மருந்து; வட இந்திய பெண்ணுக்கு நடந்தது என்ன? - ‘ஜெய் ஜென்’ பகிரும் மனங்களும் மனிதர்களும்: 23

Published on 28/02/2024 | Edited on 28/02/2024
jay-zen-manangal-vs-manithargal- 23

வேலைக்காக இடம் பெயர்ந்த வடமாநில பெண்ணுக்கு கொடுத்த கவுன்சிலிங் பற்றி ‘மனங்களும் மனிதர்களும்’ தொடரின் வழியாக ஜெய் ஜென் நம்மோடு பகிர்ந்து கொள்கிறார்.

வடகிழக்கு மாநிலத்தைச் சேர்ந்த பதினெட்டு வயதுள்ள பெண் அவர். படித்து முடித்து பியூட்டீஷியன் கோர்ஸ் முடித்து, இங்கு நம் தமிழ்நாட்டில் ஒரு அழகு நிலையத்தில், குறிப்பாக பெண்களுக்கு முடி திருத்தும் பகுதியில் வேலை பார்த்து வந்திருக்கிறார். அவர் என்னிடம் கவுன்சிலிங்கிற்கு வந்து இரண்டு பிரச்சனைகளை முன்வைக்கிறார். ஒன்று, ஒருநாள் அவர் சலூனில் முடி திருத்தும் வேலையை செய்து முடிக்க இரவு நெடுநேரம் ஆகிவிடுகிறது. வீட்டிற்கு செல்ல தயாராகும் போது, யாரோ ஒருவர் இவரது பருகும் பானத்தில், எதையோ கலந்துவிட்டதாக எண்ணுகிறார். ஏனென்றால் காலை விழித்தபோது அதே பார்லரில் எழுகிறார். 

மேலும் தன்னையும் மீறி ஏதோ ஒரு அநீதி நடந்துவிட்டது என உணர்வுப்பூர்வமாக எண்ணுகிறார். தன்னுடைய மேலாளரோ அல்லது கூட பணிபுரியும் எட்டு வடமாநிலத்தவரில் ஒரு நபரோதான் தனக்கு இதை செய்திருக்க வேண்டும் என நினைக்கிறார். ஆனால் மருத்துவப்பூர்வமாக உடலை பரிசோதனை செய்து பார்த்ததில் எதுவும் ஆகவில்லை  என்றே தான் தெரிகிறது. ஆதாரமும் எதுவுமில்லை. இருந்தாலும் இவருக்கு வேலை சார்ந்த இடத்தில ஒரு இனம் புரியாத பயத்தை ஏற்படுத்தி இருக்கிறது. இரண்டாவதாக, இவருக்கு இந்த ஊர் மக்கள் இயல்பும் உடையணியும் பழக்கம், உணவு முறை, வாழ்க்கை முறை எதுவுமே ஒத்து வரவில்லை ஒட்டவும் முடியவில்லை.

பொதுவாகவே வடகிழக்கு மக்களின் உணவு வகைகளும், அளவும் மிக குறைவு. அவர்களின் உடலமைப்பும் மிகச் சிறியதாக தான் காணப்படுகிறது. அவர்களின் வாழ்க்கை முறையும் படிப்பு முதன்மையாக அல்லாது அளவான உணவு, இயற்கை, விவசாயம் என்று குறுகிய வட்டம் உடையது. எனவே அந்த பெண்மணிக்கு நம் தமிழர்களின் பல்வேறு உணவு வகைகள், உண்ணும் பழக்கம், உடைகளின் பல்வேறு வகைகள், என்பதை பார்க்க ரொம்ப மிரட்சியாக இருந்தது. அவர் ஏற்கனவே டெல்லி, கொல்கத்தா என்று சென்று, குறிப்பாக மும்பையின் மக்கள் தொகையைக் கண்டு மிகவும் ஆச்சரியப்பட்டு பேசினார்.

அவருக்கு  நம் ஊரில் அதிகாலை எழுந்து மாணவர்கள் டியூஷன் செல்வது பார்க்க மிக ஆச்சார்யமாக இருக்கிறது. மேலும் அவர் நம் ஊர்களில் படிப்பிற்கு தரும் முக்கியத்துவம் பார்த்து தன் வருங்கால குழந்தைகளை இங்கேயே படிக்க வைத்து வளர்க்கவே பிரியப்படுகிறார். ஆனால் நம் வாழ்க்கை முறையும், நம் இன மனிதர்களை பார்ப்பதே அவருக்கு மிக பயமாக இருந்திருக்கிறது. வடகிழக்கு ஊர்களையம், மலைகளையும் தாண்டி அதிகம் வெளியே செல்லாததால் இங்கு பரந்திருக்கும் வாழ்க்கை முறை அவரை மிகவும் பாதித்து இருக்கிறது. இது ஒரு இலகுவான கவுன்சிலிங்காக இருந்தது. நான் அவரிடம்  மெல்ல எடுத்து கூறினேன். படிப்பு சார்ந்த சமூகமாக இங்கு இந்தியாவில் குறிப்பாக தமிழகம் இருக்கிறது. இங்கு படிப்பு மூலமாக உலகம் முழுக்க தொடர்பான ஆட்களை பிடிக்கலாம். நீங்கள் எப்படி ஒரு வேலைக்காக இங்கு வந்தீர்களோ, அப்படியே நாளை உங்கள் குழந்தைகள் வெளிநாடுகளுக்கு படிப்பதன் மூலமாக எதிர்காலம் அமையும். அதேபோல் ஏதோ ஒன்று நடந்து விடும் என்று பயப்படும் உங்கள் மனம், இங்கு இல்லை நீங்கள் உங்கள் சொந்த கிராமத்திலிருந்து எங்கு சென்றிருந்தாலும் வரும் என்றெல்லாம் பேசி தெளிவுபடுத்தினேன். 

மேலும் அந்த ஒரு நாள் பார்லரில் ஏற்பட்ட அனுபவத்திற்கு ஆதாரமே இல்லை என்பதால், அதை நினைத்து தேவையில்லாமல் குழப்பிக்கொள்ள வேண்டியதில்லை. இது முழுக்க முழுக்க புது இடத்தினால் வந்திருக்கும் குழப்பம். அவரும் நன்கு தெளிவு அடைந்து இப்போது சொந்தமாக பார்லர் ஒன்றை நடத்தி வருகிறார். தனக்கு வரும் கஷ்டமர்சிடம் இருந்தே நன்றாக தமிழ் கற்றுக்கொண்டு, கோயம்புத்தூரில் திருமணம் ஆகி இப்போது அவருக்கு  இரட்டை குழந்தைகள் இருக்கின்றது.