Skip to main content

எனக்கேற்ற துணை எங்கே? -மாற்றுத்திறனாளிகளின் தேடல் விழா!

Published on 14/08/2018 | Edited on 14/08/2018

 

“இந்த அஜித் மாதிரி.. அப்புறம் விஜய் மாதிரி.. சூர்யா மாதிரி மாப்பிள்ளை வேணும்னு இங்கே யாரும் சொல்லப்போறதில்ல.”
-விருதுநகரில் மாற்றுத்திறனாளிகளுக்கு சுயம்வரம் நடத்திய அந்த  அற்புதமான மேடையில்,  சிம்மச்சந்திரன் என்பவர் இப்படிச் சொன்னபோது,  பார்வையாளர்கள் ஆர்ப்பரித்தனர். 

 

a

 

மாற்றுத்திறன் கொண்ட மகத்தான மனிதர்கள்!

உடல் குறைபாடு, புலன் குறைபாடு (பார்த்தல், கேட்டல், நுகர்தல், சுவைத்தல், உணர்தல்), அறிவுத்திறன் குறைபாடு, உளவியல் குறைபாடு மற்றும் சில நோய்கள் தொடர்பான குறைபாடு உள்ளவர்கள்தான் மாற்றுத்திறனாளிகள்.  உடலிலோ, மனதிலோ ஏற்பட்ட மாற்றத்தின் காரணமாக,  சில செயல்களை செய்யமுடியாமல் போய்விடுகிற காரணத்தால், அவர்கள் அவ்வாறு  அழைக்கப்படுகின்றனர். மரபணுவினால் பிறப்பிலேயே ஏற்படும் மாற்றங்கள், தாயின் கருவில் இருக்கும்போது அல்லது பிறந்தவுடன் ஏற்படும் நோய்கள் மூலம் ஏற்படும் மாற்றங்கள், கடுமையான நோயினாலோ, விபத்தினாலோ உருவாகும் மாற்றங்கள், வேறு தெரியாத சில காரணங்கள் என, மாற்றுத்திறன் என்பது வகைப்படுத்தப்படுகிறது. 

மாற்றுத்திறனாளியாகப் பிறந்தது அவர்கள் குற்றமல்ல. ஆனாலும், தங்கள் வாழ்க்கையை வாழ இயலாதவாறு, சமூகத்தில் அவர்களைத் தடுக்கின்ற சில தடைகள் உண்டு. இது மனித உரிமைகளோடு தொடர்புடையது. உலக சுகாதார நிறுவனம், மாற்றுத்திறனாளிகளை உலகின் மிகப்பெரிய சிறுபான்மையினர் என்று குறிப்பிடுகிறது. 

 

திருமணம் என்பதே சவால்தான்!


திருமணம் என்பது இரு மனங்களும், இரு உடல்களும் அலாதியான உணர்வோடு இணைந்து, நெடுந்தூரம் செல்லக்கூடிய ஒரு இனிய பயணம். அதனால், வாழ்க்கைத் துணையைத் தேர்ந்தெடுப்பதில் மிகுந்த கவனம் செலுத்துவார்கள்.  நல்ல உடலமைப்பு கொண்டவர்களும், பொருளாதார வசதி உள்ளவர்களும்,  ஜாதகம், பொருத்தம், தோஷம் என, தட்டிக்கழித்து விடுவதால்,  அவர்களுக்கும் திருமணம் தள்ளிப்போய் விடுகிறது. மாற்றுத்திறனாளிகள் அப்படி கிடையாது. மற்றவர்களைப் போல்,  முக அழகுக்கோ, உடல் நிறத்துக்கோ முக்கியத்துவம் தந்து, வாழ்க்கைத் துணையைத் தேட முடியாது. நேரில் பார்த்தும், விசாரித்தும்,   தங்களுக்கேற்ற துணை யாரென்பதை தீர்மானிக்கிறார்கள். ஆனாலும், மாற்றுத்திறனாளிகளுக்கு திருமணம் என்பது மிகப்பெரிய சவாலாகத்தான் உள்ளது. இதனை எதிர்கொள்ளும் விதமாகத்தான் விருதுநகரில் சுயம்வரம் விழா நடத்தினார்கள். 

 

சுகத்திலும் துயரிலும் பங்குகொள்ள ஆயத்தமான ஜோடிகள்!

 

a

 

மனவளர்ச்சி குன்றியவரான குட்டிப் பாண்டியம்மாளை தேர்வு செய்தார் தேசிங்குமுத்து. உடல் ஊனமற்ற ஈஸ்வரியின் தேர்வாக,  ஒரு கை ஊனமுற்ற ராமமூர்த்தி இருந்தார். கஸ்தூரி – பாலகிருஷ்ணன், கார்த்தீஸ்வரி – முனுசாமி, சந்திரன் – சுமதி  ஆகியோர் அவரவர் துணையைத் தேர்ந்தெடுத்தனர். ‘ஒருவரை ஒருவர் அன்பு கொண்டு, வரும் சுகத்திலும் துயரிலும் பங்கு கொண்டு, இருவரும் ஒருவரில் பாதி என்று, இன்புற வாழட்டும் பல்லாண்டு’ என பின்னணியில் திரைப்பாடலை ஒலிக்கவிட்டு, முதலில் தேர்வான ஐந்து ஜோடிகளின் தலையிலும் பூமழை பொழிந்தார்கள், சுயம்வரத்தை ஏற்பாடு செய்த அமைப்பினர். 

 

கடைசி வரையிலும் காப்பாற்றுபவர் யார்? 

பெண்கள் சிலர், பெற்றோருடன் மேடையேறி,  தங்களை அறிமுகப்படுத்திக்கொண்டு, தங்களின் வாழ்க்கைத்துணை எவ்வாறு இருக்க வேண்டும் என்ற எதிர்பார்ப்பை, பரிதவிப்போடு வெளிப்படுத்தினார்கள். 

 

mo

 

இஸ்லாம் மார்க்கத்தைச் சேர்ந்த மோனிஷா 10-வது வரை படித்திருக்கிறார். 25 சதவீதம் மனவளர்ச்சி குன்றிய இவர்  “எனக்கு நல்ல மாப்பிள்ளை வேண்டும். அவர் என்னை நல்லா பார்த்துக்கணும்.” என்று மழலை மொழியில் பேச, அவருடைய அம்மா “என் மகளைத் தேர்வு செய்பவர், இஸ்லாத்துக்கு மாற வேண்டும். வேறு எந்த மதத்துக்கும் நாங்கள் மாற மாட்டோம்.” என்று நிபந்தனை விதித்தார். 

 

m

 

குள்ளமாக, வயதான தோற்றத்தில் இருந்த மீனாட்சிக்கு வயது முப்பதுதான். அவர் மேடைக்கு வந்தபோது, “இன்னுமா உனக்கு திருமணம் ஆகவில்லை?” என்று கமெண்ட் அடித்தார் ஒரு நிர்வாகி. மீனாட்சி அலட்டிக்கொள்ளாமல் மைக் பிடித்தார்.  “என்னைத் திருமணம் செய்துகொள்பவரை நான் நன்றாகப் பார்த்துக்கொள்வேன்.” என்று கூற, பார்வையாளர்கள் கை தட்டினர். மீனாட்சியின் கார்டியன் “இவள் மிகவும் சுறுசுறுப்பான பெண். இவளை மணம் முடிப்பவருக்கு வீடு கட்டித் தருவோம். ஜாதி, மதம் பார்க்க மாட்டோம்.” என்றார். 

 

ma

 

“எம்மதமும் சம்மதம். என் மகள் மாரியைக் கண் கலங்காமல் பார்த்துக்கொள்ள வேண்டும். அவ்வளவுதான். மாரி யாரைக் கை காட்டுகிறாளோ. அவர்தான் மாப்பிள்ளை” என்றார் மாரியின் தாய் லட்சுமி. 

 

m

 

தன் மகள் பன்னீர்செல்விக்காகப் பேசினார் ராமராஜ் “வீட்டோடு மாப்பிள்ளையாக இருக்க வேண்டும். கட்டிய வேட்டி, சட்டையோடு வந்தால் போதும். எல்லாவற்றையும் நாங்கள் பார்த்துக்கொள்கிறோம். மாற்றுத்திறனாளியாக இருந்தாலும் சரிதான். ஆனால், ஜாதி செட்டியாராக இருக்க வேண்டும்.” என்றார். 

 

m

 

விவகாரத்தானவர் மாரீஸ்வரி. தேவர் ஜாதியில் மாப்பிள்ளை வேண்டும் என்றார். குறைவான ஊனம் என்றால் ஏற்றுக்கொள்வதாகக் கூறினார். 

 

p


பார்வையற்ற மாரியம்மாள், வயர் கூடை பின்னி வாழ்க்கை நடத்தி வருகிறார்.  “இந்த உலகத்தையே என்னால பார்க்க முடியல. ஜாதி, மதத்தையா பார்க்கப் போறேன்? கடைசிவரையிலும் என்னைக் காப்பாற்றக் கூடியவர் யாராவது இந்தக் கூட்டத்தில் இருக்கிறாரா?” என்று கேட்டார். 

 

சுயம்வரத்தில் கலந்துகொண்டவர்கள் 182 பேர் என்றும், தேர்வானது 11 ஜோடிகள் என்றும், இவர்களுக்கு முறையாக மருத்துவ பரிசோதனை மற்றும் சட்ட ஆலோசனைகளை வழங்கி, கீதாபவன் அறக்கட்டளை சார்பில் ரூ.1.5 லட்சம் மதிப்பிலான 51 வகையான சீர்வரிசையோடு, 2 கிராம் தங்க மாங்கல்யத்துடன், நவம்பர் 4-ஆம் தேதி சென்னையில் திருமணம் செய்து வைக்கபப்படும் என்றார்கள், நிகழ்ச்சி ஏற்பாட்டளர்களான பி.டபிள்யூ.டி. டிரஸ்ட் மற்றும் டீட் பவுன்டேஷன் இயக்குநர்கள். 

 

நல்ல மனங்கள் கூடும் இடங்களே சொர்க்கம்! அந்த வகையில், இந்த மாற்றுத்திறனாளிகளின் திருமணங்களும் சொர்க்கத்தில் நிச்சயிக்கப்பட்டிருக்கின்றன!
 

 

Next Story

எதிர்பாராத ட்விஸ்ட்; குற்றவாளியுடன் இருந்த பெண் இன்ஸ்பெக்டர் - அதிர்ந்துபோன போலீசார்

Published on 30/05/2024 | Edited on 30/05/2024
Police arrested 2 people including female inspector and put them in jail

விருதுநகர் மாவட்டம், ஸ்ரீவில்லிபுத்தூர் அன்னை சத்தியாநகரைச் சேர்ந்தவர் ராமர். 60 வயதான இவருக்கும், அதே பகுதியைச் சேர்ந்த 65 வயதான ராமசாமி  குடும்பத்துக்கும் பணம் கொடுக்கல் வாங்கல் தொடர்பாக முன்விரோதம் இருந்ததாக சொல்லப்படுகிறது.

இந்த நிலையில், கடந்த மே 21 ஆம் தேதி நடைபெற்ற முத்து மாரியம்மன் கோயில் திருவிழாவில் சிங்கம் சிலை வைக்க வேண்டும் என ராமசாமி மகன் ராம்குமார் கூறியுள்ளார். அதற்கு ராமர் எதிர்ப்புத் தெரிவித்ததால், இரு குடும்பத்துக்கும் இடையே மீண்டும் பிரச்சினை ஏற்பட்டது. அப்போது ராமசாமி, அவரது மகன்களான ராம்குமார், ராஜேந்திரன் மற்றும் இரு பெண்கள் சேர்ந்து கற்கள் மற்றும் இரும்புக் கரண்டியால் தாக்கினர். இதில் காயமடைந்த ராமர், மதுரை அரசு மருத்துவ மனையில் அனுமதிக்கப்பட்டார்.

இதுகுறித்த புகாரில் ஸ்ரீ வில்லிபுத்தூர் நகர் போலீஸார் கொலை முயற்சி வழக்கு பதிவுசெய்து, விசாரணை மேற்கொண்டனர். இதற்கிடையில், கடந்த மே 25 ஆம் தேதி சிகிச்சை பலனின்றி ராமர் உயிரிழந்தார். இதையடுத்து, இந்த வழக்கை கொலை வழக்காக மாற்றிய போலீசார், ராமசாமி, ராஜேந்திரன், ஜெயலட்சுமி ஆகியோரைக் கைதுசெய்தனர். தொடர்ந்து, தலைமறைவான ராம்குமார் மற்றும் பெண் ஒருவரை தேடி வந்தனர்.

இந்த நிலையில், கடந்த மே 28 ஆம் தேதி பெங்களூருவில் பதுங்கியிருந்த ராம் குமாரை தனிப்படை போலீசார் சுற்றி வளைத்து கைது செய்தனர். அவருடன் முதியவர் ராமர் கொலை வழக்கில் தொடர்புடைய பெண்ணையும் கைது செய்த போலீசார் ஸ்ரீவில்லிபுத்தூருக்கு அழைத்து வந்து விசாரணை மேற்கொண்டனர். அதில், தான் பல அதிர்ச்சி தகவல் தெரிய வந்தது. முதியவர் ராமர் கொலை வழக்கில் கைது செய்யப்பட்ட 45 வயதான பெண் சத்திய ஷீலா ராமநாதபுரம் மாவட்டம் மண்டபம் இலங்கைத் தமிழர் முகாமில் இன்ஸ்பெக்டராக பணி புரிந்து வருவதை போலீசார் உறுதி செய்தனர். தொடர்ந்து இருவரிடம் மேற்கொண்ட விசாரணையில், ராம்குமாரும், சத்திய ஷீலாவும் திருமணம் செய்யாமல் ஒன்றாக சேர்ந்து வசித்து வந்ததாக கூறப்படுகிறது. மேலும், இருவரும் சேர்ந்து வட்டிக்கு பணம் கொடுத்து வந்துள்ளனர். ஆரம்பத்தில் முன்னாள் அமைச்சர் ராஜேந்திரபாலாஜியின் ஆதரவாளராக ராம்குமார் இருந்ததாக சொல்லப்படுகிறது.

ஆனால், அதன் பிறகு தவறாக வீடியோ வெளியிட்ட விவகாரத்தில் ராம்குமார் அவரிடம் இருந்து விரட்டி அடிக்கப்பட்டுள்ளார். பின்னர், மதுரையைச் சேர்ந்த ஒரு டிஎஸ்பியுடன் டிக் டாக்கில் வீடியோ வெளியிட்டு, பேசி வந்ததாக சொல்லப்படுகிறது. மறுபுறம் டிஎஸ்பியுடன் பழக்கம் இருக்கும்போதே பெண் இன்ஸ்பெக்டருடன் ராம்குமார் வாழ்ந்ததாக சொல்லப்படுகிறது. ஆனால், சில மாதங்களுக்கு முன்னர் டிஎஸ்பிக்கும், ராம்குமாருக்கும் மோதல் ஏற்பட்டு பிரிந்துள்ளனர்.

இதற்கிடையில் பெண் இன்ஸ்பெக்டர் மீது தொடர்ந்து புகார்கள் வந்ததால், அவர் ராமநாதபுரம் மாவட்டம் மண்டபம் காவல்நிலையத்துக்கு மாற்றம் செய்யப்பட்டது விசாரணையில் தெரிய வந்தது. இந்த நிலையில, அதிரடியாக ராமநாதபுரம் டிஐஜி துரை, பெண் இன்ஸ்பெக்டர் சத்ய ஷீலாவை சஸ்பெண்ட் செய்து உத்தரவிட்டார். அதே நேரத்தில் கொலை வழக்கில் பெண் இன்ஸ்பெக்டர்  மற்றும் ராம்குமாரை  கைது செய்த ஸ்ரீவில்லிபுத்தூர் போலீசார், இருவரையும் ஸ்ரீவில்லிபுத்தூர் நீதிமன்றத்தில் ஆஜர்படுத்தி, மாஜிஸ்திரேட் உத்தரவின்படி சிறையில் அடைத்தனர்.

ஸ்ரீவில்லிபுத்தூர் கோயில் திருவிழாவில் முதியவர் ஒருவரை அடித்துக் கொன்றதாக பெண் இன்ஸ்பெக்டர், காதலனுடன் கைது செய்யப்பட்ட சம்பவம் பரபரப்பை ஏற்படுத்தியுள்ளது.

Next Story

பட்டாசு ஆலைகளில் தொடரும் விபத்துகள்- தொழிலாளர் நலத்துறை கொடுத்த அதிரடி உத்தரவு

Published on 10/05/2024 | Edited on 10/05/2024
Continuing accidents in firecracker factories- Action order given by Labor Welfare Department

விருதுநகர் மாவட்டம் சிவகாசியில் உள்ள ஸ்ரீசுதர்ஸன் பட்டாசு ஆலையில் நேற்று ஏற்பட்ட வெடி விபத்தில் உயிரிழந்தவர்களின் எண்ணிக்கை 10 ஆக உயர்ந்துள்ளது. இந்த நிலையில் தமிழ்நாட்டில் உள்ள பட்டாசு ஆலைகளின் நிலை குறித்து அறிக்கை தாக்கல் செய்ய தமிழக தொழிலாளர் நலத்துறை அறிவுறுத்தி உள்ளது.

இதற்கு முன்பாகவே தமிழகத்தில் குறிப்பாக விருதுநகர் சிவகாசி பகுதிகளில் பட்டாசு தொழிற்சாலைகளில் ஏற்படும் வெடி விபத்துகளும் அதனைத் தொடர்ந்து ஏற்படும் உயிரிழப்பு சம்பவங்களும் அதிகரித்து வருகிறது. இந்நிலையில் பட்டாசு ஆலைகளில் உரிய உரிமையைப் பெற்று செயல்படுகின்றனவா என ஆய்வு செய்து அறிக்கையாக தாக்கல் செய்ய தொழிலாளர் நலத்துறை அறிவுறுத்தியுள்ளது. தமிழகம் முழுவதும் உள்ள பட்டாசு தொழிற்சாலைகள் உரிய உரிமம் பெற்றுள்ளதா? தொழிலாளர்களுக்கு பாதுகாப்பு ஏற்பாடுகள் செய்யப்பட்டுள்ளதா என்பதை மாவட்ட ஆட்சியர் மூலம் மாவட்ட நிர்வாகம் ஆய்வு செய்து அடுத்த 10 நாட்களுக்குள் அறிக்கை அனுப்ப வேண்டும் என அறிவுறுத்தப்பட்டுள்ளது.