Skip to main content

“ரவுடியிஸம் பற்றி சொல்வதற்கு தகுதியே இல்லாத கட்சி திமுக...” வானதி சீனிவாசன் ஆவேசம்...

Published on 27/08/2020 | Edited on 28/08/2020
Vanathi Srinivasan

 

 

ஆகஸ்ட் 24ல் நடந்த தமிழக பா.ஜ.க மாநில செயற்குழு கூட்டத்தில், ''தேசிய மற்றும் தமிழக வளர்ச்சிக்கு தி.மு.க தடையாக இருக்கிறது. நாட்டின் நலனுக்காக உழைக்காதவர்களுக்கு, புகலிடமாக தி.மு.க உள்ளது. அவர்களுக்கு பதிலடி கொடுக்க நாம் விழிப்புடன் செயல்பட வேண்டும் என குறிப்பிட்டார் அக்கட்சியின் தேசிய தலைவர் ஜெ.பி.நட்டா. இதற்கு உடனடியாக, தமிழகத்தின் பண்பாட்டிற்கும், இந்தியாவின் ஒருமைப்பாட்டுக்கும் ஒரே எதிரி பா.ஜ.க. என திமுக தலைவர் மு.க.ஸ்டாலின் பரபரப்பான அறிக்கை வெளியிட்டிருந்தார். திமுகவில் மேலும் பல நிர்வாகிகள் நட்டாவின் பேச்சுக்கு கடும் எதிர்ப்புகளை தெரிவித்து கருத்துக்களைப் பதிவு செய்திருந்தனர்.

 

இதுதொடர்பாக நக்கீரன் இணையதளத்திடம் கருத்துக்களை பகிர்ந்து கொண்டார் பாஜகவின் தமிழக மாநிலத் துணைத் தலைவர் வானதி சீனிவாசன்.

 

பாஜக செயற்குழுவில் பேசிய ஜெ.பி.நட்டா, கட்சி வளர்ச்சிக்கு முக்கியத்துவம் தராமல் திமுகவை கடுமையாக விமர்சனம் செய்தது ஏன்...

 

“தேசிய பொதுச்செயலாளர் முரளிதர்ராவ், தேசிய தலைவர் நட்டாவும் ஒருமித்த குரலில் திமுகவை ஆட்சிக்கு வரவிடமாட்டோம் என்ற தெளிவான அரசியல் வழிகாட்டுதலை செயற்குழுக் கூட்டத்தில் கூறியிருக்கிறார்கள். அரசியல் கட்சியினுடைய செயற்குழுவிற்கு செயல் திட்டங்களை வகுப்பது மட்டுமல்ல, மக்களுக்கு யார் என்ன செய்து கொண்டிருக்கிறார்கள் என்பதை அடையாளம் காட்ட வேண்டிய பொறுப்பும் உள்ளது. அந்த வகையில் தேசிய தலைவர், திமுக தமிழகத்தில் பல்வேறு போராட்டங்களை முன்னெடுக்கிற வாயிலாக வளர்ச்சிக்கும், ஒற்றுமைக்கும் தடையாக இருக்கிறார்கள் என்பதை தெளிவாக குறிப்பிட்டிருக்கிறார். 

 

திமுக மத்திய கூட்டணி அரசில் இருந்தார்கள். சக்தி வாய்ந்த துறைகள் அவர்களிடம் இருந்தது. கல்வியை மாநில பட்டியலில் இருந்து மத்திய பட்டியலுக்கு மாற்றியது தவறு. மத்திய பட்டியலில் இருந்து முழுமையாக கொண்டுவர வேண்டும் என்கிறார்கள். இவர்களும் 10 வருடம் ஆட்சியில் இருந்தவர்கள்தான். அப்போது அதைப் பற்றி எதுவுமே பேசாமல் இன்று கல்வி பட்டியல் பற்றி கவலைப்படுவது ஏன்? 

 

bjp

 

தமிழகத்திற்கு பாஜக ஆளும் மாநிலங்களைவிட அதிகமான நிதி திட்டங்களை மத்தியில் உள்ள மோடி அரசு ஒதுக்கியுள்ளது. ஸ்மார்ட் சிட்டிகள், அம்ருத் திட்டம், 11 மருத்துவக் கல்லூரிகளுக்கான அனுமதி மற்றும் நிதி, எய்ம்ஸ் மருத்துவமனைக்கான அடிக்கல்,  ரூபாய் 5 லட்சம் கோடிக்கு மேலாக தமிழகத்திற்கு நிதி வழங்கப்பட்டிருக்கிறது. விவசாயிகளுக்கு வருடத்திற்கு ரூபாய் 6 ஆயிரம், பெண்களுக்கு ஜன்தன் வங்கிக் கணக்கு, விலையில்லா எரிவாயு, மாணவர்களுக்கு வித்தியலட்சுமி கடன் உதவி திட்டம், அவர்களுக்கு நேரடியாக வங்கிக் கணக்கில் உதவி, விவசாயத்தை சார்ந்து இருக்கும் மாடுகள் வளர்ப்பு, மீன் வளர்ப்பு, கோழி வளர்ப்பில் ஈடுபடுபவர்களுக்கு கிசான் கடன் அட்டை உள்ளிட்ட திட்டங்களைக் கொடுத்திருக்கிற பிரதமரை எப்போது பார்த்தாலும் தமிழகத்திற்கு எதிராக இருக்கிறார் என எதிர்க்கட்சித் தலைவர் கூறுகிறார். அதனால் நாங்கள் சொல்கிறோம், இந்த வளர்ச்சிகளை பொறுத்துக்கொள்ளமால் ஸ்டாலின் அரசியல் செய்து கொண்டிருக்கிறார். அதை மனதில் வைத்துதான் எங்கள் தேசிய தலைவர் அந்த வார்த்தையை கூறினார். 

 

குடும்பத்தின் உறுப்பினர்கள் பொறுப்புக்கு வருவது சமூக நீதியா? பாராளுமன்ற உறுப்பினர்களெல்லாம் கட்சியின் தலைவர்களுடைய வாரிசுகளுக்கு வழங்குவது சமூக நீதியா? பட்டியலினத்தைச் சேர்ந்த ஒருவரை மாநிலத் தலைவராக்கி ஒரு அங்கீகாரத்தை கொடுக்கிறது பாஜக.” 

 

தமிழகத்தின் பண்பாட்டிற்கும், இந்தியாவின் ஒருமைப்பாட்டுக்கும் ஒரே எதிரி பா.ஜ.க. என நட்டாவுக்கு பதில் அளித்திருக்கிறாரே ஸ்டாலின்... மேலும் மத்திய பாஜக அரசு கொண்டு வரும் புதிய கல்விக்கொள்கை உள்பட சில திட்டங்களை எதற்காக எதிர்க்கிறோம் என்ற காரணத்தையும் எதிர்க்கட்சிகள் சொல்கிறார்களே...

 

“அரசியல் பண்பாட்டை ஒட்டுமொத்தமாக சீர்குலைத்தது திமுக. அவர்களுடைய அரசியல் யாருக்கு பலனளித்திருக்கிறது என்றால் திமுக தலைவர்கள், நிர்வாகிகள் பலன் பெற்றிருக்கிறார்கள். இரண்டு மொழிகள் படித்தால் போதும் என்று ஏழைகளுக்கு சொல்லிவிட்டு அவர்கள் நடத்துகின்ற பள்ளிகளிலும், கல்லூரிகளிலும் பணம் பெற்றுக்கொண்டு மூன்றாவது மொழியை கற்றுக்கொடுக்கிறார்கள். அவர்கள் நடத்தும் நிறுவனங்களில் தமிழ் வளர்வதை காண முடியவில்லை. தமிழ் பெயர், தமிழ் மொழியை காணவில்லை. ஆனால் பாஜக மீது மொழி ரீதியான அரசியலை முன்னெடுக்கிறார்கள். 

 

புதிய கல்விக் கொள்கையில் எந்த மொழித்திணிப்பும் இல்லை. எந்த மொழியை வேண்டுமானாலும் 3வது மொழியாக கற்றுக்கொள்ளலாம் என்பதுதான் அதன் சாராம்சம். புதிய கல்விக் கொள்கையை எதிர்க்கிறார்கள். மற்ற மாநிலங்களில் 3வதாக ஒரு மொழியை தேர்வு செய்ததால் அவர்களது தாய்மொழி அழிந்ததா? உலகத்தின் மிக மூத்த மொழிக்கு நாம் சொந்தக்காரர்கள். தமிழ் மொழியை மற்ற மாநிலத்தவர்களும் படிப்பதற்கான ஒரு வாய்ப்பு உருவாகியிருக்கிறது. தமிழ் படித்தால் வேலைக் கிடைக்காது என்ற நிலையை உருவாக்கியது இங்குள்ள திராவிடக் கட்சிகளின் சாதனை.”

 

ஆளும் அதிமுக அரசும் இதனை எதிர்க்கிறதே?

 

“அதிமுகவுக்கு நாங்கள் வேண்டுகோள் வைத்திருக்கிறோம். உங்கள் கருத்தை மாற்றிக்கொள்ளுங்கள். காலத்தின் தேவையை புரிந்துகொள்ளுங்கள். எந்த மொழியை வேண்டுமானாலும் கற்றுக்கொள்ளலாம் என்ற வாய்ப்பை குழந்தைகளுக்கு கொடுங்கள். வசதிப்படைத்தவர்கள் சி.பி.எஸ்.சி.யில் கற்றுக்கொள்கிறார்கள். அரசு பள்ளியில் படிக்கும் குழந்தைகள் நிலையை பாருங்கள் என சொல்லிக்கொண்டுதான் இருக்கிறோம்.”

 

இந்தி-சமஸ்கிருத திணிப்பு என்பது தொல்காப்பியர் -நாயன்மார்கள்-ஆழ்வார்கள் இவர்கள் வகுத்த தமிழ்ப் பண்பாட்டிற்கு எதிராக இருக்கிறதே? 

 

“நாயன்மார்கள், ஆழ்வார்கள், தேவாரம், திருவாசகம், தொல்காப்பியம், கம்பராமாயணம் இவையெல்லாம் தமிழர்களின் அடையாளங்கள். இதுதான் பண்பாடு. இதைப்பற்றி திமுக தலைவர்கள் என்றாவது யோசித்திருக்கிறார்களா? இதையெல்லாம் ஒட்டுமொத்தமாக சிதைத்தது திமுக தலைவர்கள், அவர்களுடைய சித்தாந்தம்.”

 

அபின் கடத்தல்-குண்டாஸ் பேர்வழிகள் தமிழக பாஜகவுக்குள் முக்கியத்துவம் பெறுவதாக விமர்சனங்கள் எழுகிறதே?

 

“ஒரு கட்சியில் ஒருவர் இணைவதற்கு முன்பாக குற்றவாளியாக இருந்திருக்கலாம். அவர் தனது வாழ்க்கையில் திருந்தி வாழ்கிறேன் எனக் கூறிவிட்டு, அதற்கு பின்பாக கட்சியில் இணைக்கிறார். ரவுடியிஸம் பற்றி குறை சொல்வதற்கு திமுக தகுதியே இல்லாத கட்சி. அரசியலில் ரவுடியிஸத்தை கொண்டு வந்ததே திமுகதான். பாஜகவில் தற்போது நிறைய பேர் இணைந்து வருகிறார்கள். திரைநட்சத்திரங்கள், பிரபலங்கள், முன்னாள் உயர் அதிகாரிகள், முன்னாள் எம்எல்ஏக்கள், எம்பிக்கள், மந்திரிகள் எல்லோரும் சேர்ந்து கொண்டிருக்கிறார்கள்”.

 

 

 

 

Next Story

“ஸ்மிருதி இராணியை இழிவுபடுத்த வேண்டாம்” - ராகுல் காந்தி வேண்டுகோள்

Published on 12/07/2024 | Edited on 12/07/2024
Rahul Gandhi said that Don't insult Smriti Irani

கடந்த 2019 நாடாளுமன்றத்  தேர்தலில் காங்கிரஸ் தலைவர் ராகுல் காந்தியை அவரது குடும்பத் தொகுதியான அமேதியில் பாஜக வேட்பாளர் ஸ்மிருதி இராணி தோற்கடித்தார். அதேபோன்று இந்த முறையும் ராகுல் காந்தியை அமேதி தொகுதியில் தோற்கடிப்பேன் என்று ஸ்மிருதி இராணி சவால் விடுத்தார். ஆனால் கடைசி நேரத்தில் ராகுல் காந்தி அமேதி தொகுதியில் போட்டியிடாமல், காந்தி குடும்பத்தின் பாரம்பரிய தொகுதியான ரேபரேலி தொகுதியில் போட்டியிட்டு வெற்றியும் பெற்றார். 

அதே சமயம் அமேதியில் ஸ்மிருதி இராணியை எதிர்த்து ராகுல் காந்தி குடும்பத்தின் நம்பிக்கைக்குரிய நபரான கிஷோரி லால் சர்மாவைக் காங்கிரஸ் நிறுத்தியது. பின்னர் 2 லட்சம் வாக்குகள் வித்தியாசத்தில் ஸ்மிருதி இராணியைத் தோற்கடித்து கிஷோரி லால் சர்மா அமோக வெற்றிபெற்றார். இதனைத் தொடர்ந்து தோல்வியை ஒப்புக்கொண்ட ஸ்மிருதி இராணி, தொடர்ந்து அமேதி தொகுதி மக்களுக்காக பணியாற்றுவேன் என்று தெரிவித்தார். இதனைத் தொடர்ந்து, காங்கிரஸ் கட்சியினர் ஸ்மிருதி இராணிக்கு எதிராக சமூக வலைத்தளங்களில் கருத்து தெரிவித்து கடுமையான விமர்சனங்களை முன்வைத்து வருகின்றனர். 

இந்த நிலையில் ஸ்மிருதி இராணியை இழிவுபடுத்த வேண்டாம் என நாடாளுமன்ற எதிர்க்கட்சி தலைவர் காங்கிரஸ் எம்.பி ராகுல் காந்தி கேட்டுக்கொண்டுள்ளார். இது தொடர்பாக அவர் வெளியிட்டுள்ள சமூக வலைத்தள பக்கத்தில், “வாழ்க்கையில் வெற்றியும் தோல்வியும் சகஜம். அதனால் அந்த விஷயத்தில் ஸ்மிருதி இராணி அல்லது வேறு எந்தத் தலைவர்களையும், இழிவான வார்த்தைகளைப் பயன்படுத்துவதையும், கேவலமாக நடந்து கொள்வதையும் தவிர்க்குமாறு அனைவரையும் கேட்டுக்கொள்கிறேன். மக்களை அவமானப்படுத்துவதும் அவமதிப்பதும் பலவீனத்தின் அடையாளம், வலிமை அல்ல” எனக் குறிப்பிட்டுள்ளார். 

Next Story

‘ஜூன் 25 அரசியல் சாசன படுகொலை தினம்’ - மத்திய அரசு அறிவிப்பு

Published on 12/07/2024 | Edited on 12/07/2024
central govt said June 25 to be observed as Constitution black Day

1971 ஆம் ஆண்டு நடந்த இந்திய நாடாளுமன்றத் தேர்தலில் காங்கிரஸ் கட்சி 352 தொகுதிகளையும், கம்யூனிஸ்ட்கள் 48 தொகுதிகளையும், ஜனசங்கம் 22 தொகுதிகளையும், காமராஜர் தலைமையிலான ஸ்தாபன காங்கிரஸ் 16 தொகுதிகளையும் கைப்பற்றியது. உத்தரப்பிரதேச மாநிலம் ரேபரேலி தொகுதியில் அப்போதைய பிரதமர் இந்திரா காந்தி போட்டியிட்டார். அவரை எதிர்த்து சோசலிஸ்ட் கட்சியின் தலைவர் ராஜ் நாராயணன் போட்டியிட்டார். இதில் ராஜ் நாராயனணை தோற்கடித்து ரேபரேலி தொகுதியில் இந்திரா காந்தி வெற்றிபெற்றார்.

இந்த நிலையில், இந்திராகாந்தியின் வெற்றியை எதிர்த்து ராஜ் நாராயணன் அலகாபாத் உயர்நீதிமன்றத்தில் மனு தாக்கல் செய்தார். இந்த வழக்கில் இந்திராகாந்தியின் வெற்றி செல்லாது என்று கடந்த 1975 ஆம் ஆண்டு ஜூன்12 ஆம் தேதி அலகாபாத் நீதிமன்றம் தீர்ப்பளித்தது.  நீதிபதி ஜக்மோகன்லால் சின்ஹ தேர்தலில் வெற்றிபெற இந்திராகாந்தி பல்வேறு முறைகேடுகளில் ஈட்டுப்பட்டுள்ளார். அதனால் அவரது வெற்றி செல்லாது என்று தீர்ப்பளித்தார். மேலும், தேர்தல் முறைகேடுகளில் ஈடுபட்டதால் அடுத்த 6 ஆண்டுகளுக்குத் தேர்தலில் இந்திராகாந்தி போட்டியிட முடியாது என்றும் உத்தரவிட்டார். 

நாடு முழுவதும் பெரும் கொந்தளிப்பை இந்த தீர்ப்பு ஏற்படுத்திய நிலையில், அலகாபாத் நீதிமன்ற தீர்ப்பை எதிர்த்து உச்சநீதிமன்றத்தில் மனுத் தாக்கல் செய்தார் இந்திராகாந்தி. ஆனால் 1975 ஆம் ஆண்டு ஜூன் 24 ஆம் ஆண்டு அப்போதைய உச்சநீதிமன்ற நீதிபதி, கிருஷ்ண ஐயர் இந்திராகாந்தி மனுவைத் தள்ளுபடி செய்து அலகாபாத் உயர்நீதிமன்றம் வழங்கிய தீர்ப்பை உறுதி செய்தார். இதனால் இந்திராகாந்திக்கு நெருக்கடி அதிகரித்து, கட்டாயம் பதவி விலகி ஆக வேண்டிய சூழல் உருவானது.

இந்த சூழலில் 1975 ஆம் ஆண்டு ஜூன் 25 ஆம் தேதி நள்ளிரவில் இந்தியாவில் அவசரநிலை சட்டத்தை அப்போதைய பிரதமர் இந்திராகாந்தி அமல்படுத்தினார். இந்தியாவில் முதல்முறையாக எமர்ஜென்சி அமல்படுத்தப்பட்டது. நாடுமுழுவதும் எதிர்க்கட்சிகள் கடும் நடவடிக்கைகளுக்கு உள்ளாகினர். எதிர்க்கட்சி தலைவர்கள் மீசா சட்டத்தின் கீழ் கைது செய்யப்பட்டுச் சிறைப்படுத்தப்பட்டு சித்ரவதைகள் செய்யப்பட்டனர். பத்திரிக்கைகள் தனிக்கை செய்யப்பட்டது. இதனால் மக்கள், அரசியல் கட்சியினர் கடுமையாகப் பாதிக்கப்பட்டனர். பலரும் உயிரிழந்தனர். இதனைத் தொடர்ந்து, இரண்டு ஆண்டுகள் கழித்து 1977-ம் ஆண்டு மார்ச் 21-ந் தேதி இந்தியாவில் அவசர நிலை பிரகடனம் திரும்பப் பெறப்பட்டது. பிற்காலங்கள் நாட்டில் எமர்ஜென்சி அமல்படுத்தியதற்காக மக்களிடம் இந்திராகாந்தி மன்னிப்பு கேட்டதாக  கூறப்படுகிறது. இன்றளவும் எமர்ஜென்சி கலத்தை இந்தியா நாட்டின் கருப்பு தினமாகப் பலராலும் விமர்சிக்கப்படுகிறது.

மத்தியில் ஆளும் பாஜக காங்கிரசுக்கு எதிராக எமர்ஜென்சி காலத்தையே முன்வைத்து மக்களிடம் பிரச்சாரம் செய்துவருகிறது. இந்த நிலையில்தான், ஜூன் 25 ஆம் தேதி அரசியல் சாசன படுகொலை தினமாக கடைப்பிடிக்கப்படும் என மத்திய அரசு அறிவித்துள்ளது. அவசர நிலையால் பாதிக்கப்பட்டோருக்கு ஒவ்வொரு ஆண்டும் ஜூன் 25 ஆம் தேதி அஞ்சலி செலுத்தப்படும் என்று தெரிவிக்கப்பட்டுள்ளது.