Skip to main content

ரோட் ஷோ நடத்தி டேபிள் சேர் போட்டதைப் பெரிய சாதனையாகப் பேசுகிறார்கள்... முரளி அப்பாஸ் பதிலடி... 

Published on 16/09/2020 | Edited on 16/09/2020

 

ssss

 

நீட் தேர்வு விவகாரம், விவசாயிகளுக்கான மத்திய அரசின் நிதி உதவி திட்டத்தில் முறைகேடு, ஆன்லைன் கல்வி முறைப்படுத்துதல், கரோனா முறைகேடுகள், எட்டு வழிச்சாலை விவகாரம், மீனவர்கள் பாதுகாப்பு, வேலைவாய்ப்பின்மை, ஜி.எஸ்.டி பங்குகள் பெறுவதில் உள்ள தாமதம், டாஸ்மாக் விவகாரம், பருவமழை முன்னெச்சரிக்கை நடவடிக்கை என பத்து கேள்விகளை மக்கள் நீதி மய்யம் கட்சியின் தலைவர் கமல்ஹாசன் குறிப்பிட்டு, இதுபோன்ற மக்கள் பிரச்சனைகளைப் பற்றி விவாதிக்காமல், மூன்றே நாட்களில் கண்துடைப்பாக சட்டமன்றத் தொடரை நடத்தி முடிப்பது ஏன் எனக் கேள்வி எழுப்பியிருந்தார்.

 

இதுகுறித்து செய்தியாளர்களின் கேள்விக்குப் பதில் அளித்த அமைச்சர் ஜெயக்குமார், கரோனாவுக்கு பயந்து பிக்பாஸ் போல வீட்டுக்குள் இருந்தபடி, அரசை விமர்சனம் செய்வதாகக் குற்றம் சாட்டினார். மார்ச் மாதம் கோவிட் வந்ததில் இருந்து மக்களைத் தினந்தோறும் சந்தித்து வருகிறோம். களப்பணியில் இருக்கிறோம். பிக்பாஸ் -3 நிகழ்ச்சியின் முன்னோட்டமாக கமல் வீட்டிற்குள்ளேயே இருக்கிறார் என்றார். 

 

கமல் வீட்டிற்குள்ளேயே இருக்கிறார். கரோனா வந்ததில் இருந்து நாங்கள் களத்தில் இருக்கிறோம் என்று ஜெயக்குமார் பதில் அளித்திருக்கிறாரே என்று மக்கள் நீதி மய்யம் செய்தித் தொடர்பாளர் முரளி அப்பாஸிடம் கேட்டோம். 

 

அதற்கு அவர், தேவையில்லாமல் வெளியே வராதீர்கள் என்று சொல்லிவிட்டு வெளியேவருவது தியாகம் என்று சொல்கிறார்களே அதுவே முட்டாள்தனம் இல்லையா? ஒரு அரசு நிர்வாகத்தில் இருக்கும் நீங்கள் வெளியே வந்துதான் ஆகவேண்டும். மக்கள் நீதி மய்யத்தின் தலைவராக கமலின் பொறுப்பு, நிர்வாக ரீதியாகச் சரியாக நடக்கிறதா என்று கேள்வி கேட்கலாம், மக்களுக்கு தேவையானவற்றை செய்துகொடுக்க வேண்டும். 'நாமே தீர்வு' என்று நாங்கள் செய்துகொண்டுதான் இருக்கிறோம். அவர் அச்சப்படவில்லை என்பதற்கு உதாரணம்தான் நிதியுதவி கொடுத்துவிட்டுப் போனது. இவர்கள் இன்று பார்க்கும் பிக்பாஸ் ப்ரமோ வெளியே வராமலேயே எடுத்ததா? அவருக்குப் பயம் என்பதே கிடையாது. மற்றவர்களுக்கு முன் உதாரணமாக தேவையில்லாமல் வெளியே செல்ல வேண்டாம் என்று எங்களுக்குச் சொல்லியிருக்கிறார். 

 

தம்பி ஸ்னேகன், ‘ஒரு ஊரிலிருந்து 100 பேர் சேரவேண்டும் என்கிறார்கள்’ என்றார். அதற்கு “ஸ்னேகன், எனக்கு நிறைய ஸ்னேகன்கள் தேவைப்படுகிறார்கள் அதற்காக நீங்கள் இப்படிப் போகக்கூடாது. ஒருவேளை போவதென்றால் உங்களைப்போல ஒரு ஸ்னேகனை எனக்குத் தயார் பண்ணி கொடுத்துவிட்டுப் போங்கள்” என்று எங்களுக்கே அன்பாகக் கட்டளையிட்டிருக்கிறார். அவர் பாதுகாப்பாகவும் மற்றவர்களுக்கு முன்னுதாரணமாகவும் இருக்கச் சொன்னரே தவிர, வரவேண்டியவைகளுக்கு வராமல் இருந்ததில்லை. இவர்களைப் போல் தங்களுக்கு ஒரு பாதுகாப்பு வைத்துக்கொண்டு ரோட் ஷோ நடத்தி ஏமாற்றும் வேலையை எல்லாரும் செய்ய மாட்டார்கள். 

 

ம.நீ.ம. கேட்ட ஒரு பத்து கேள்விகளுக்கு அவர்களிடம் ஒழுங்கான பதில் இல்லை. இன்று எங்கள் அறிக்கைக்கு தி.மு.க, அ.தி.மு.க மற்றும் காங்கிரஸ் பதில் சொல்லியுள்ளது. ஆளும்கட்சியைப் பார்த்து கேட்ட கேள்விக்கு இவர்கள் எல்லாம் பதில் சொல்லவேண்டிய கட்டாயம் எப்படி வந்தது என்றால் நாம் கேட்ட கேள்வியில் நியாயம் இருந்தது. 

 

Ad

 

டெல்லியிலேயே 10 நாட்கள் கூட்டம் நடத்துகிறார்கள். இவர்கள் ஏன் மூன்று நாட்கள் மட்டுமே சட்டசபைக் கூட்டத்தை நடத்துகிறார்கள். முதல் நாள் இறந்தவர்களுக்கு இரங்கல் தெரிவிப்பது. அது எப்போதும் நடந்து வருவது. மற்றொருநாள், நீட் விவகாரத்தில் நீங்கள்தான் குற்றவாளி, நீங்கள்தான் குற்றவாளி என இரண்டுபேரும் மாறிமாறிச் சொல்லிக்கொண்டார்கள் அவ்வளவுதான். இதைத் தவிர்த்து எந்தப் பிரச்சனையும் அவர்கள் பெரிதாகப் பேசவில்லை. வெறும் சலுகைகள் அறிவிப்பு, கண்துடைப்பு மட்டும் செய்தனர். இன்றும் தினசரி 6,000 நபர்களுக்கு தொற்று உறுதியாகிக்கொண்டே வருகிறது. அதைக் கட்டுப்படுத்தக்கூடிய எந்த ஆலோசனையும் இல்லை.

 

ddd

 

இங்கு பத்து கேள்வி என்பது விஷயமே இல்லை. இத்தனை பிரச்சனைகளை வைத்துக்கொண்டு மூன்று நாட்கள் மட்டும் கூட்டுகிறீர்களே என்பதுதான் விஷயம். அடுத்தது பருவமழை காலம் வந்துவிட்டது. இப்போதெல்லாம் அதிக வெள்ளம் வருகிறது அதற்கு முன்னெச்சரிக்கை நடவடிக்கையாக என்ன செய்திருக்கிறீர்கள். 

 

கலைவாணர் அரங்கத்தில் 234 பேருக்கு கார்ப்பட் விரித்து டேபிள் சேர் போட்டது பெரிய சாதனையாகப் பேசுகிறார்களேயொழிய ஒருவாரம் பேச உங்களுக்கு நேரமில்லையா? அலுவல் ஆய்வுக் கூட்டத்தில் சபாநாயகர் முடிவு எடுக்கும்போது அதிக நாட்கள் கூட்டச்சொல்லி போராடியிருக்கலாமே இவர்கள். 

 

சட்டசபைக்கு வெளியே நீங்கள்தான் காரணம் எனக் கடுமையாகப் பேசும் தி.மு.க., சட்டசபைக்குள் நீங்கள்தான் காரணம் என முதலமைச்சர் பேசும்போது எந்த அளவிற்குச் சமாளித்தார்கள். காங்கிரஸ் இராமசாமி, ‘நாங்கள் இவ்வளவு கோரிக்கைகள் கொடுத்திருக்கிறோம் சட்டசபை இரண்டு நாட்கள்தான் நடக்கிறது’ என இப்போது கவலைப்படுகிறார். சபாநாயகர் அலுவல் ஆய்வுக் கூட்டம் கூட்டும்போது அனைத்துக் கட்சி எம்.எல்.ஏக்களையும் வைத்துத்தானே கூட்டுகிறார் அப்போதே எங்களுக்கு அதிகநாட்கள் வேண்டுமென்று கேட்க வேண்டியதுதானே. 

 

Nakkheeran

 

சந்தோஷப்படக்கூடிய ஒரு விஷயம், சட்டசபைக்குள் ஒழுங்காகக் கேள்வி- பதில் நேரம் நடக்கவில்லை என்றாலும் வெளியில் இருந்து கேட்ட கேள்விகளுக்கு மூன்று கட்சிகளும் பதில் சொல்லியிருக்கிறார்கள். சப்பை பதிலோ இல்லை சமாளிப்பு பதிலோ இனிமேல் இப்படித்தான் வரிசை கட்டி வந்து பதில் சொல்லி ஆகணும் என்றார். 

 

 

 

 

Next Story

அதிமுகவினர் சட்டப்பேரவையில் இருந்து வெளியேற்றம்! 

Published on 25/06/2024 | Edited on 25/06/2024
ADMK expelled from the Legislative Assembly

சென்னை தலைமைச் செயலகத்திலுள்ள சட்டமன்றப் பேரவை மண்டபத்தில் தமிழக சட்டசபை பேரவைக் கூட்டம் கடந்த 20 ஆம் தேதி (20.06.2024) தொடங்கியது. அப்போது மறைந்த முன்னாள் சட்டமன்ற உறுப்பினர்களுக்கு இரங்கல் தெரிவித்து மௌன அஞ்சலி செலுத்தப்பட்டது. மேலும் கள்ளக்குறிச்சியில் கள்ளச்சாராயம் குடித்து உயிரிழந்தவர்களுக்கு இரங்கல் தெரிவிக்கப்பட்டது. இதனையடுத்து சட்டப்பேரவை கூட்டத் தொடரின் இரண்டாம் நாளில் (21.06.2024) இருந்து பல்வேறு துறைகளின் மீதான மானியக் கோரிக்கைகளின் மீது விவாதமும், வாக்கெடுப்பும் நடைபெற்று வருகிறது.

இந்நிலையில் இன்று (25.06.2024) காலை தமிழக சட்டப்பேரவை நிகழ்வுகள் தொடங்கியது. அப்போது கேள்வி நேரத்தை ஒத்திவைத்து விட்டு கள்ளக்குறிச்சி விவகாரம் தொடர்பாக விவாதம் நடத்த கோரி அதிமுக உறுப்பினர்கள் மூன்றாவது நாளாக அமளியில் ஈடுபட்டனர். அதனைத் தொடர்ந்து அவைக்கு குந்தகம் விளைவித்ததால் அதிமுக உறுப்பினர்களை வெளியேற்ற சபாநாயகர் அப்பாவு உத்தரவிட்டார். மேலும் இன்று ஒரு நாள் பேரவை நடவடிக்கைகளில் கலந்து கொள்ள அதிமுக உறுப்பினர்களுக்குத் தடை விதிக்கப்பட்டது. 

ADMK expelled from the Legislative Assembly

இது தொடர்பாக தமிழக முதல்வர் மு.க.ஸ்டாலின் சட்டபேரவையில் பேசுகையில், “எடப்பாடி பழனிசாமி முதலமைச்சராக இருந்தபோது, அவர் மீது போடப்பட்ட வழக்கில் சிபிஐ மீது நம்பிக்கை இல்லை எனக் காரணம் காட்டி, அதற்குத் தடை உத்தரவு வாங்கிய வீராதி வீரரான எதிர்க்கட்சித் தலைவர்தான் தற்போது கள்ளக்குறிச்சி விவகாரத்தில் சிபிஐ விசாரணை வேண்டும் என்று வலியுறுத்தி வருகிறார். சட்டப்பேரவையில் திட்டமிட்டு கலவரத்தை ஏற்படுத்த அதிமுக உறுப்பினர்கள் முயற்சி செய்கின்றனர்.

நாடாளுமன்ற மக்களைவைத் தேர்தலில் திமுக கூட்டணி 40க்கு 40 தொகுதிகளில் பெற்ற வெற்றி அதிமுக கண்களை உறுத்துகிறது. அதைத் திட்டமிட்டு திசை திருப்ப இது போன்ற பிரச்சனைகளை அதிமுகவினர் கிளப்புகின்றனர்” எனத் தெரிவித்தார். முன்னதாக கள்ளக்குறிச்சி சம்பவத்தைக் கண்டித்து முன்னதாக இன்றும் கருப்பு சட்டை அணிந்து எதிர்க்கட்சி தலைவர் எடப்பாடி பழனிசாமி உள்ளிட்ட அதிமுக உறுப்பினர்கள் சட்டப்பேரவைக்கு வந்திருந்தனர். 

Next Story

“கள்ளச்சாராய விற்பனைக்கு ஏலம் நடந்துள்ளது” - கண்டன ஆர்ப்பாட்டத்தில் ராஜேந்திரபாலாஜி 

Published on 24/06/2024 | Edited on 24/06/2024
 Rajendra Balaji said An auction has been held for t sale of illicit liquor

கள்ளக்குறிச்சி கள்ளச்சாராய மரணங்களுக்குப் பொறுப்பேற்று, தமிழ்நாடு முதலமைச்சர் மு.க.ஸ்டாலின் பதவி விலக வலியுறுத்தி, விருதுநகரில் அதிமுக நடத்திய கண்ட ஆர்ப்பாட்டம் நடந்தது. 

அதில் பேசிய முன்னாள் அமைச்சர்  கே.டி.ராஜேந்திரபாலாஜி, “கள்ளக்குறிச்சியில் கள்ளச்சாராயம் குடித்து இதுவரை 54 பேர்  உயிரிழந்துள்ளனர். தமிழ்நாடு மற்றும் புதுச்சேரி மருத்துவமனையில் 150- க்கும் மேற்பட்டோர் சிகிச்சை பெற்று வருகின்றனர். அதில் பலர் கவலைக்கிடமாக உள்ளனர். திமுக ஆட்சியில் மு.க.ஸ்டாலின்  முதலமைச்சராகப் பதவியேற்ற பின்பு கள்ளச்சாராய விற்பனை தொடர்ந்து நடைபெற்று வருகிறது. அதிமுக பொதுச்செயலாளர் இ.பி.எஸ். தொடர்ந்து சட்டமன்றத்தில் குரல் எழுப்பி வருகிறார். போதைப் பொருள், கள்ளச்சாராயம்  தமிழ்நாட்டில் அதிகரித்து வருகிறது. தமிழக மக்களின் கண்ணீர் ஆட்சியாளர்களுக்குத் தெரியவில்லை. உலகமே உற்றுப்பார்க்கின்ற வகையில்  தமிழ்நாடு பேசுபொருளாகிவிட்டது.

அப்பாவி பொதுமக்கள் உடல் வலியைப் போக்குவதற்கு பழக்கப்பட்டுப்போன  மது அருந்தும் பழக்கத்தை விடமுடியாதவர்களாக உள்ளனர். விலை  குறைவான கள்ளச்சாராயத்தை கள்ளக்குறிச்சி கருணாபுரம் பகுதி மக்கள்  வாங்கிக் குடித்துள்ளனர். அதனால், ஊரே இன்று சுடுகாடாக மாறிவிட்டது.  தமிழ்நாட்டில் என்ன நடக்கிறது என்பதே முதலமைச்சருக்குத் தெரியவில்லை.

நாடாளுமன்றத் தேர்தலில் 40 தொகுதிகளில் தோற்றாலும், அதிமுக ஓட்டு சதவீதத்தில் அதிகம் பெற்றுள்ளது. அதிமுக வெற்றியை நோக்கிச் சென்றுகொண்டிருக்கிறது.  திமுக தோல்வியை நோக்கிச் சென்றுகொண்டிருக்கிறது. திமுகவுக்கு தனித்து நிற்கும் தைரியம் கிடையாது. கூட்டணிக் கட்சி வைத்து ஒரு தற்காலிக வெற்றியைப் பெற்றிருக்கிறார்கள். அப்படி இருந்தும் நாம் விருதுநகர் பாராளுமன்ற தொகுதியிலும் தென்காசி தொகுதியிலும் நல்ல வாக்குகளை பெற்றுள்ளோம். விருதுநகர் தொகுதியில் 4379  ஓட்டு வாக்கு வித்தியாசத்தில்தான் வெற்றியை இழந்திருக்கிறோம் அதிலும்  பிரச்சனை இருக்கிறது. வெற்றியை நாம் தொடவில்லை என்று யாரும் சொல்ல முடியாது. வெற்றி நம் பக்கம்தான் இருக்கிறது. அதிமுக ஆட்சி அமைத்து இ.பி.எஸ். மீண்டும் முதலமைச்சராவார்.  நாம் ஆட்சிக்கு வந்தவுடன்,  நமக்கு  எதிராகச் சதி செய்த அனைவரும் சட்டத்திற்கு முன்பாக நிறுத்தப்படுவார்கள்.  என்றைக்கும் அதிமுக காரன் கோழை அல்ல. அதிமுகவில் உள்ளவர்களின்  நாடி  நரம்புகளில்  எம்ஜிஆர், ஜெயலலிதா இருவருடைய வீரம் இருப்பதால் எந்தக்  கொம்பனாலும் அதிமுகவை அழிக்க முடியாது.  

முதல்வர் ஸ்டாலின் ஏன் பதவி விலக வேண்டும் என்பது குறித்து இ.பி.எஸ். விளக்கமாகப் பேசியிருக்கிறார். கள்ளக்குறிச்சி கல்வராயன் மலைப்பகுதியில் காவல்துறையினர் ஆய்வு செய்யச் சென்றபோது எங்கு பார்த்தாலும் கள்ளச்சாராய ஊறல்கள் தான். இந்தக் கள்ளச்சாராயத்தைக் குடிப்பதால் மக்கள் உயிர் போகுமென்பது இந்த அரசுக்கு தெரியாதா ? கல்வராயன் மலை இன்று சுற்றுலா தலமாக மாற்றப்படும் என்று முதலமைச்சர் அறிவிப்பு வெளியிடுகிறார்.கல்வராயன் மலை இன்று கள்ளச்சாரய மலை ஆகிவிட்டது. காவல்துறையினரின் கைகள் யாரால் கட்டப்பட்டுள்ளது? அந்தந்த பகுதிகளில் சாராயம் விற்பனை செய்ய ஏலம் விடப்பட்டிருக்கிறது. இதைக் கண்டுகொள்ளாமல் இருப்பதற்கு காவல்துறை அதிகாரிக்கு அழுத்தம் கொடுத்த  அரசியல்வாதி  யார்? மாவட்ட ஆட்சியர் மற்றும் காவல்துறை  கண்காணிப்பாளரை மாற்றிவிட்டால் இந்தப் பிரச்சனை முடிவுக்கு வந்துவிடுமா? இதற்கு நடவடிக்கை எடுக்காமல் விட்டது யார்? கண்டுகொள்ளாமல் விடச் சொன்னது யார்? எனவே,  காவல்துறையைக்  கையில் வைத்திருக்கும் முதல்வர் ஸ்டாலின் தான் இதற்கு முழு பொறுப்பேற்று பதவியை ராஜினாமா செய்ய  வேண்டும்.

முதல்வர் ஸ்டாலின் எதிர்க்கட்சியாக இருந்தபோது நாங்கள் ஆட்சிக்கு  வந்தவுடன் மதுவிலக்கை அமல்படுத்துவோம் என்று சொன்னாரா?  இல்லையா?  தற்பொழுது அதைச் செய்தாரா ? அவரது தங்கை கனிமொழி இளம் விதவைகள்  தமிழ்நாட்டில் அதிகமாக உள்ளனர்.  இதற்குக் காரணம் இ.பி.எஸ். என்றும்,  அதனால் திமுகவுக்கு ஓட்டு போடுங்கள் என்றும் பேசினார்.  திமுக ஆட்சிக்கு வந்து மூன்று வருடங்கள் முடிந்த நிலையில், முதல்வர்  ஸ்டாலின் இதுவரைக்கும்  மதுவிலக்கை அமல்படுத்தினாரா?  இதை விட்டுவிட்டு கள்ளச்சாராயம் குடித்து  இநந்தவருக்கு ரூபாய் 10 லட்சம் தருகிறார். இரண்டு மாதங்களுக்கு முன்பு  சிவகாசி அருகே பட்டாசு வெடிவிபத்தில் 10 பேர் இறந்ததற்கு ரூபாய் மூன்று  லட்சம் தான் கொடுத்தார்.  நாட்டை காக்கும் ராணுவ வீரர் மரணம் அடைந்தால்  ரூபாய் 5 லட்சம்தான் தருகிறார். இந்த நடவடிக்கைகளைப்  பார்க்கும்போது  கள்ளச்சாராயத்தை  நீங்களே ஊக்கப்படுத்துவது போல் தெரிகிறது.  

பட்டாசு  தொழிற்சாலை வெடி விபத்தில் இறந்தவர்களுக்கு அரசு  30 லட்சம் ரூபாய் தர வேண்டும். ஊர் மக்கள் சந்தோஷமாக இருக்க,  தனது அழகிய மேனியைக் கருக்கி உயிரை விடுபவன் தான் பட்டாசுத் தொழிலாளி. அவர்களுக்கு கவலை கிடையாதா? அவர்களது பிள்ளைகளின் படிப்புக்கு வழியில்லையே? ஆனால் கள்ளச்சாராயம் குடித்து இறந்தவர்களைத் தேடித்தேடிச் செல்கிறீர்கள். சட்ட விரோதமாக தொழில் செய்தால் ரூபாய் 10 லட்சம் தருகின்றீர்கள். சட்டத்திற்கு  உட்பட்டு தொழில் செய்து இறந்தால் ரூபாய் 3 லட்சம் தருகின்றீர்கள். இது எந்த விதத்தில் நியாயம்?  இங்கு சர்வாதிகார ஆட்சி நடக்கிறது.  கேட்பதற்கு ஆள் இல்லை. 40 தொகுதியிலும் ஜெயித்து விட்டோம்.  அடுத்த சட்டமன்றத்திலும் 234 தொகுதிகளில் வென்று விடுவோம் என்ற அகம்பாவத்தில் திமுக இருந்து  வருகிறது. மக்கள் என்ன ஏமாளியா? கோமாளியா? மக்கள் பார்த்துக்  கொண்டுதான் இருக்கிறார்கள்.

சரியான நேரத்தில் தக்க பதிலடி கொடுப்பார்கள். நாடாளுமன்றத் தேர்தல் முக்கியமில்லை என்பதால், சட்டமன்றத்தில்  அதிமுகவுக்கு வலுவாக ஆதரவளிப்பார்கள். வரும் சட்டமன்றத் தேர்தலில் அதிமுக கூட்டணி 234 தொகுதியிலும் எளிதாக வெற்றி பெறும் .  இந்தக் கள்ளச்சாராய விஷயத்தில் திமுக காரனுக்குத் தொடர்பு உள்ளது என்று  இ.பி.எஸ். கூறி வருகிறார்.  இதை விசாரிக்க திமுக அரசு முன்வரவில்லை.  ஒருமுறை பெருந்தலைவர் காமராஜர்  ‘கொலை செய்பவனால் ஒரு குடும்பம்  மட்டுமே பாதிக்கும். ஆனால் ஊரில் கள்ளச்சாராயம் விற்பவனால் பல்வேறு  குடும்பங்கள் நாசமாகப் போகும்.’ என்று கடுமையாகக் கண்டித்துள்ளார். 

எனவே, கள்ளச்சாராயத்தைத் தடுக்கத் தவறிய முதல்வர் மு.க.ஸ்டாலின் உடனடியாக பதவியை ராஜினாமா செய்ய வேண்டும். இதுதான் அடித்தட்டு மக்களின்  கோரிக்கை, பொதுமக்களின் கோரிக்கை, அதிமுகவின் கோரிக்கை,  இபிஎஸ்ஸின் கோரிக்கை, நல்ல மனிதர்களின் கோரிக்கை. கள்ளச்சாராயத்தால் பல உயிர்களை இழந்த கள்ளக்குறிச்சிக்கு இதுவரை மு.க.   ஸ்டாலின் செல்லவில்லை. ஏழைகளின் உயிர் என்ன அவருக்குக் கரும்பா? தப்போ, சரியோ, விவரம் தெரியாமல் இறந்தவர்களது குடும்பத்தினருக்கு ஆறுதல் சொல்லக்கூட முதல்வர் போகவேண்டாமா? இந்த விஷயத்தில் 20 பேர் தான் கைது செய்யப்பட்டு இருக்கிறார்கள் என்று சொல்கிறார்கள். இன்னும்  நிறையக் குற்றவாளிகள் கைது செய்யப்படாமல் உள்ளனர். எனவே அவர்களையும் உடனடியாக கைது செய்ய வேண்டும்.” என்றார்.