Skip to main content

சட்டம் ஒழுங்கு கெட்டுப்போக, அரசு சாராயக் கடைகளைத் திறந்துவிட்டுள்ளது -பியூஷ் மனுஷ் பேச்சு!

Published on 22/05/2020 | Edited on 22/05/2020


உலகம் முழுவதும் கரோனா பாதிப்பு உச்சத்தில் இருந்து வருகின்றது. இதுவரை 50 லட்சத்துக்கும் அதிகமானவர்களை இந்த நோயத் தாக்கியுள்ளது. 3 லட்சத்துக்கும் மேற்பட்டவர்கள் இந்த நோயினால் உலகம் முழுவதும் உயிரிழந்துள்ளனர். இந்தியாவில் 3,000- க்கும் மேற்பட்டவர்கள் இதனால் உயிரிழந்துள்ளனர். 1,00,000- க்கும் மேற்பட்டவர்கள் மருத்துவமனைகளில் சிகிச்சை பெற்று வருகிறார்கள். உலகின் பல நாடுகளுக்கு கரோனா வைரஸ் பரவியுள்ள நிலையில், இதனைத் தங்களது நாட்டில் பரவாமல் தடுக்க உலக நாடுகள் பலவும் முன்னெச்சரிக்கை நடவடிக்கைகளை மேற்கொண்டு வருகின்றது. பல நாடுகள் தங்கள் நாடுகளில் ஊரடங்கு உத்தரவை அமல்படுத்தியுள்ளன. இந்நிலையில் இந்தியாவில் பல்வேறு மாநிலங்களில் மதுக்கடைகள் மீண்டும் திறக்கப்பட்டுள்ளது. இதுதொடர்பாக சமூக செயற்பாட்டாளர் பியூஷ் மனுஷிடம் கேள்வியை முன்வைத்தோம். அவரின் அதிரடியான பதில்கள் வருமாறு, 
 


ஊரடங்கு காரணமாக கடந்த 50 நாட்களுக்கு மேலாக மதுக்கடைகள் திறக்க படாமல் இருந்தது. இந்நிலையில் கடந்த 7ஆம் தேதி மதுக்கடைகள் மீண்டும் திறக்கப்பட்டது. இரண்டு நாட்கள் திறக்கப்பட்டிருந்த மதுக்கடைகளில் சமூக இடைவெளி பின்பற்றப்படவில்லை எனக்கூறி உயர்நீதிமன்றம் மூடியது. இதனை எதிர்த்து தமிழக அரசு உச்சநீதிமன்றம் சென்றது. அங்கு மதுக்கடைகளைத் திறப்பதற்குத் தமிழக அரசு அனுமதி பெற்றது. மதுக்கடைகள் திறப்பிற்குக் கண்டனம் எழுந்த நிலையில் மாநில அரசு எதைப்பற்றியும் கவலைப்படாமல் தொடர்ந்து மதுக்கடைகடைகளைத் திறந்து வைத்துள்ளது. இதைப் பற்றி நீங்கள் என்ன நினைக்கிறீர்கள்?

7ஆம் தேதி கடை திறப்பதற்கு முன்பு உயர்நீதிமன்றம் 6ஆம் தேதி முக்கிய உத்தரவுகளைப் பிறப்பித்தது. அந்த உத்தரவில், மதுவாங்குபவர்களின் ஆதார் எண்ணைப் பதிவு செய்ய வேண்டும், பில் கொடுக்க வேண்டும், ஒரு ஆளுக்கு 750 மி.லி. மது கொடுக்கலாம், அதுவும் மூன்று நாட்களுக்கு ஒரு முறை வழங்கலாம் என்று வழிமுறைகளை வழங்கி இருந்தது. ஆனால் அடுத்த நாளே டாஸ்மாக் நிர்வாகம் ஒரு மனுவைத் தாக்கல் செய்தது. அதில் எங்களால் "பில் எல்லாம் கொடுக்க முடியாது, அதற்கான வசதிகள் எங்களிடம் இல்லை" என்று கூறியிருந்தது. ஆண்டுக்கு 50 ஆயிரம் கோடி வருமானம் பார்க்கும் டாஸ்மாக் நிர்வாகம் உயர்நீதிமன்றத்தில் இத்தகைய பதிலைச் சொல்லியது. இதனால் அதிருப்தி அடைந்த உயர்நீதிமன்றம் அப்படி என்றால் டாஸ்மாக் கடைகளை மூடுங்கள் என்று உத்தரவிட்டது. 
 

 


கடந்த 50 நாட்களுக்கு மேலாக பொதுமக்கள் யாரும் வேலைக்குச் செல்லவில்லை. அப்படி இருக்கையில் யாரிடமும் பணம் இருக்க வாய்ப்பில்லை. அப்படி இருந்தும் அவர்கள் டாஸ்மாக் கடைகளுக்கு வருகிறார்கள் என்றால்  அது யாருடைய பணம். மனைவி மக்களின் நகைகளை அடமானம் வைத்து அதன் மூலம் கிடைத்த பணமாக இருக்கும், இல்லை என்றால் வீட்டில் சேமித்து வைத்த பணத்தைத் திருடி எடுத்துக்கொண்டு வந்திருக்க வேண்டும். இதைத் தவிர வேலைக்குச் செல்லாதவர்களின் கையில் பணம் வர வாய்ப்பில்லை. இது எவ்வளவு கொடூரமான நிலைமை. இந்தச் சாராயக்கடைகள் எப்போது திறந்தார்களோ அடுத்த நாளில் இருந்து ஒவ்வொரு மாவட்டத்திலும் இரண்டு கொலைகள் விழுந்துள்ளது. ஒரு இடத்தில் தன்னுடைய மனைவியைக் கொன்றிருக்கிறான். மற்றொரு இடத்தில் சொந்த தங்கச்சியையே கொன்றிருக்கிறான். குழந்தைகளைக் கட்டி கொளுத்தியிருக்கிறார்கள். இது அனைத்தும் வெளியில் தெரிந்து நடைபெற்றுள்ள சம்பவங்கள். இன்னும் வெளியில் தெரியாமல் நடைபெற்ற சம்பவங்கள் ஏராளமான இருக்கும். சட்ட ஒழுங்கு கெட்டுப் போகச் சாராயக் கடைகளை அரசு திறந்துவிட்டுள்ளது, என்றார்.



 

 

 

Next Story

2023-24 டாஸ்மாக் வருமானம் அதிகரிப்பு

Published on 21/06/2024 | Edited on 21/06/2024
2023-24 TASMAC Income Increase

தமிழகத்தில் 2023 மற்றும் 2024 ஆம் ஆண்டில் டாஸ்மாக் வருமானம் 45,885.67 கோடி ரூபாய் அதிகரித்திருப்பதாக தமிழக அரசின் கொள்கை விளக்க குறிப்பில் தெரிவிக்கப்பட்டுள்ளது.

சட்டப்பேரவை கூட்டத் தொடரின் இரண்டாம் நாள் கூட்டம் இன்று (21.06.2024) காலை 10 மணிக்குத் தொடங்கி நடைபெற்று வருகிறது. மதுவிலக்கு மற்றும் ஆயத்தீர்வை துறையின் மானிய கோரிக்கை மீதான விவாதம் இன்று சட்டப்பேரவையில் மாலை நடைபெற்று வருகிறது. இதன் மூலமாக ஆயத்தீர்வை துறைக்கு கீழ் இருக்கக்கூடிய டாஸ்மாக் நிறுவனத்தின் மூலமாக தமிழக அரசுக்கு கிடைத்திருக்க கூடிய வருவாய் தொடர்பான பட்டியல் தற்போது கிடைத்திருக்கிறது. அதன் அடிப்படையில் கொள்கை விளக்க குறிப்பில் கிடைத்துள்ள தகவலின்படி 2023-24 ஆம் ஆண்டில் டாஸ்மாக் வருமானம் 45,855.67 கோடி ரூபாய் அதிகரித்துள்ளது. கடந்தாண்டை விட 1734.54 கோடி ரூபாய் கூடுதலாக டாஸ்மாக் வருமானம் கிடைத்துள்ளது இதன் மூலம் தெரிய வந்துள்ளது.

Next Story

அரசு மதுபான கடையில் காலாவதியான மதுபாட்டில்கள்? - கேள்வி கேட்ட மதுபிரியர்களுக்கு மிரட்டல்!

Published on 07/06/2024 | Edited on 07/06/2024
Sale of expired liquor bottles in government liquor store

திருப்பத்தூர் மாவட்டம், திருப்பத்தூர் - திருவண்ணாமலை சாலை, விஷமங்கலம் அருகே உள்ள நாகராஜன்பட்டி கிராமத்தில் அரசு மதுபான கடை இயங்கி வருகிறது. ஆனால் அது அரசு மதுபான கடைதான் என்பதற்கு அங்கு போர்டு எதுவும் இல்லை. இருந்தாலும் கூட அப்பகுதியில் உள்ள கூலி வேலை செய்யும் மக்கள், படிக்காத பாமர மக்கள் குடிப்பதற்காக மதுபான பாட்டில்களை அரசு நிர்ணயித்த கட்டணத்தை விட 10 முதல் 25 ரூபாய் வரை அதிகம் விற்பனை செய்து வருகின்றனர்.

அது ஒருபக்கம் இருக்கும் நிலையில் அந்த மதுபான கடையில் காலாவதியான மது பாட்டில்களை அதிகபட்ச விலையான 200 ரூபாய்க்கு மேல் 225 ரூபாய்க்கு விற்பனை செய்து உள்ளனர். இதனால் பாதிக்கப்பட்ட இளைஞர் ஒருவர் மது பாட்டில்களை வாங்கி காலாவதி ஆகி உள்ளது என்று கேட்டபோது, அதுக்கு என்ன? அதையே குடி போ... என்று பதில் அளித்துள்ளனர்.

இது குறித்து பாதிக்கப்பட்ட நபர் செய்தியாளர்களுக்குத் தகவல் அளித்தனர். அதன்படி, செய்தியாளர்கள் செய்தி சேகரித்துகொண்டிருந்த போது, உள்ளே இருந்து வெளியே வந்த விற்பனையாளர் கோவிந்தராஜ் என்பவர் செய்தி சேகரித்த செய்தியாளரிடம் நீங்க மட்டும்தான் வீடியோ எடுபீங்களா? நானும் எடுப்பேன் என்று செய்தியாளரை போட்டோ எடுத்து விட்டு அவர் என்ன பொறுப்பில் இருக்கிறார் என்றே சொல்லாமல் சென்று விட்டார்.

மேலும் அந்தக் கடையில் கூடுதல் விற்பனை, காலாவதியான மது பாட்டில்கள் விற்பனை படுஜோராக நடக்கிறது என்று கூறப்படுகிறது. இது குறித்து யாரேனும் கேள்வி எழுப்பினால் அதில் பணியாற்றும் நபர்கள் மிரட்டல் விடுவதால் அங்கு யாரும் கேள்வி கேட்பதில்லை என்று கூறப்படுகிறது. எனவே இது குறித்து சம்மந்தப்பட்ட துறை அதிகாரிகள் உரிய விசாரணை செய்து தக்க நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளது.