Skip to main content

கரோனா பரவல்; பயத்தை புறக்கணித்து கவனத்தை கையிலெடுப்போம்...

Published on 18/03/2020 | Edited on 18/03/2020

சீனாவிலிருந்து பரவத்தொடங்கிய கரோனா வைரஸ் உலகம் முழுவதும் பரவி வருகிறது. உலகம் முழுவதும் நூற்றுக்கும் மேற்பட்ட நாடுகளில் பரவியுள்ள இந்த கரோனா வைரஸ் சுமார் 1,80,000 பேரை பாதித்துள்ளது. மேலும், இந்த வைரஸால் 7,965 பேர் உயிரிழந்துள்ளனர். மனிதர்களின் மூலம் பரவக்கூடிய இந்த வைரஸ் மக்களிடையே கடும் அச்சத்தை ஏற்படுத்தியுள்ள நிலையில், இந்த வைரஸை கண்டு அச்சப்படுவதை தவிர்த்து, சற்று கவனமுடன் செயல்பட்டாலே இதிலிருந்து நம்மை பாதுகாத்துக்கொள்ளலாம் என்கின்றனர் மருத்துவர்கள். மேலும், கரோனா பாதிக்கப்பட்டவர்களில் சுமார் 40 சதவீதத்திற்கும் மேற்பட்டோர் மீண்டுள்ளதாக தெரிவிக்கிறது ஆய்வு அறிக்கைகள். அதாவது இதுவரை 82,000 பேர் வரை கரோனா பாதிப்பிலிருந்து முழுவதுமாக மீண்டு வந்துள்ளார் என தெரிவிக்கப்படுகிறது.  

 

how to protect ourself from corona virus

 

 

கரோனா எப்படி பரவுகிறது, இதன் அறிகுறிகள் என்ன என்பன குறித்த சில கேள்விகளுக்கு உலக சுகாதார அமைப்பு அளித்துள்ள பதில்கள்:

கரோனாவின் அறிகுறிகள் என்னென்ன..?

COVID-19 தொற்றின் பொதுவான அறிகுறிகள் காய்ச்சல், உடல் சோர்வு மற்றும் வறட்டு இருமல் ஆகியவை ஆகும். மேலும் சிலருக்கு உடல் வலி, சளி, மூக்கடைப்பு, தொண்டை புண் மற்றும் வயிற்றுப்போக்கு ஆகியவையும் ஏற்படலாம். இந்த அறிகுறிகள் லேசாக ஆரம்பித்து பின்னர் படிப்படியாக அதிகரிக்கும். ஆனால் பாதிக்கப்பட்டவர்களில் பெரும்பாலான மக்கள் (சுமார் 80%) சிறப்பு சிகிச்சைகள் ஏதுமின்றியே நோயிலிருந்து மீண்டு வருகிறார்கள்.

கரோனா வைரஸ் எப்படியெல்லாம் பரவுகிறது..?

வைரஸ் பாதிப்பு உள்ள ஒருவவரிடமிருந்து மற்றவர்களுக்கு இது பரவுகிறது. வைரஸ் பாதிப்பு உள்ள நபர் இருமும் போதோ அல்லது அவரின் தும்மலின்போது அவரது மூக்கு அல்லது வாயிலிருந்து வெளியேறும் திரவத்துளிகளால் இந்த நோய் பரவுகிறது. இப்படி தும்மல், இருமலின் போது வெளிப்படும் அந்த கிருமி அவரை சுற்றியுள்ள பொருட்களின் பரப்புகளில் விழுவதற்கான வாய்ப்புகள் இருக்கின்றன. அப்படி கிருமி பாதித்த அந்த பொருட்களை தொட்ட மற்றவர் தனது கைகளை அவர்களின் கண்கள், மூக்கு அல்லது வாய்ப்பகுதியில் வைக்கும்போது கிருமி எளிதாக பரவுகிறது. எனவே முகத்தில் கைவைப்பதை தவிர்ப்பதன் மூலம் கிருமி தொற்றிலிருந்து நம்மை பாதுகாக்க முடியும். அதேபோல அறிகுறிகள் உள்ள நபர்களிடம் இருந்து குறைந்தபட்சம் ஒரு மீட்டர் தூரம் வரை விலகியிருப்பது பாதுகாப்பானதாக கருதப்படுகிறது. 

இந்த வைரஸ் காற்றின் வழியாக பரவுமா..?

இந்த வைரஸ் பெரும்பாலும் காற்று வழியாக இல்லாமல், திரவத்துளிகள் மூலமாகவே பரவுகிறது என்று தற்போதும் வரை நடத்தப்பட்ட ஆய்வுகள் தெரிவிக்கின்றன. 

வைரஸில் இருந்து பாதுகாத்துக்கொள்வதற்கு செய்யவேண்டியவை என்ன..? 

கைகளை ஆல்கஹால் அடிப்படையிலான கிருமிநாசினியை கொண்டு முழுமையாக சுத்தம் செய்யுங்கள் அல்லது சோப்பு மற்றும் தண்ணீரில் கழுவவும்.

இருமல் அல்லது தும்மல் உடையவர்களுடன் குறைந்தது 1 மீட்டர் (3 அடி) தூரம் இடைவெளியை பராமரிக்கவும்.

கண்கள், மூக்கு மற்றும் வாயைத் தொடுவதைத் தவிர்க்கவும்.

நீங்களும், உங்களைச் சுற்றியுள்ள மக்களும் நல்ல சுவாச சுகாதாரத்தைப் பின்பற்றுவதை உறுதிப்படுத்திக் கொள்ளுங்கள். இருமல் அல்லது தும்மும்போது உங்கள் முழங்கை அல்லது திசு பேப்பர் மூலம் வாய் மற்றும் மூக்கை மூடிக்கொள்ளுங்கள். பின்னர் பயன்படுத்தப்பட்ட திசு பேப்பர்களை உடனடியாக அப்புறப்படுத்துங்கள்.

உடல்நிலை சரியில்லாமல் இருந்தால் வீட்டிலேயே இருங்கள். உங்களுக்கு காய்ச்சல், இருமல் மற்றும் சுவாசிப்பதில் சிரமம் இருந்தால் மருத்துவரை அணுகுங்கள். 

கரோனா பாதிப்பு கண்டறியப்பட்ட இடங்களுக்கு பயணிப்பதைத் தவிர்க்கவும் - குறிப்பாக வயதானவர்கள், நீரிழிவு, இதயம் அல்லது நுரையீரல் நோய் இருப்பவர்கள் கவனமுடன் இருத்தல் அவசியம். 

கரோனா வைரஸ் காரணமாக ஏற்படும் நோய் பொதுவாக லேசானது. குறிப்பாக குழந்தைகள் மற்றும் இளைஞர்களுக்கு இதன் தாக்கம் குறைவே. இருப்பினும் முன்னெச்சரிக்கையுடன் செயல்படுவது சிறந்தது. இந்த வைரஸ் பாதித்த ஒவ்வொரு 5 பேரில் ஒருவருக்கு மருத்துவமனை பராமரிப்பு தேவைப்படுகிறது. 

கையை நன்கு கழுவுதல், நல்ல சுவாச சுகாதாரத்தை பராமரித்தல் மற்றும் உள்ளூர் சுகாதார அதிகாரிகளின் ஆலோசனையைப் பின்பற்றி நடத்தல் ஆகியவையே கரோனாவிலிருந்து நம்மையும், நமது அன்புக்குரியவர்களையும் பாதுகாப்பதற்கான முக்கிய வழிகள் ஆகும். 

கரோனா வைரஸ் யாரையெல்லாம் அதிகம் பாதிக்கும்..?

இந்த வைரஸ் யாரையெல்லாம் அதிகம் பாதிக்கிறது என்பது குறித்து ஆய்வுகள் நடைபெற்று வருகின்றன. குறிப்பாக, வயதானவர்கள் மற்றும் உயர் இரத்த அழுத்தம், இதய நோய், நுரையீரல் நோய், புற்றுநோய் அல்லது நீரிழிவு போன்றவற்றை கொண்டவர்கள் மற்றவர்களை விட அதிகமாக பாதிக்கப்படுவதாக தெரிகிறது. 

தவிர்க்க வேண்டிய விஷயங்கள்:

புகைபிடித்தல்.

மருத்துவர் அறிவுரையின்ற மருந்துகள் உட்கொள்ளுதல். 

விலங்குகளுடன் பாதுகாப்பற்ற தொடர்பு.

கரோனா வைரஸை கண்டு மக்கள் அச்சப்படுவதை தவிர்த்து சற்று கவனமுடன் செயல்பட்டு சுகாதாரத்தை பராமரித்தாலே நம்மையும், நமக்கு அன்பானவர்களையும் பாதுகாக்கலாம் என்பதே மருத்துவத்துறையின் முக்கிய அறிவுறுத்தலாக இருந்து வருகிறது. 

கரோனா குறித்த சந்தேகங்கள் மற்றும் உதவிகளுக்கு தமிழக அரசின் ஹெல்ப்லைன் எண்:  044-29510500

 

 

 

Next Story

கோவி ஷீல்டை அடுத்து கோவாக்சின்; தயாரிப்பு நிறுவனம் கொடுத்த விளக்கம்

Published on 02/05/2024 | Edited on 02/05/2024
Covaccine after Covid Shield; Description given by the manufacturer


கடந்த 2019 ஆம் ஆண்டு சீனாவிலிருந்து பரவிய கொரோனா நோய்த் தொற்று உலகமெங்கும் பெருந்தொற்றாக மாறி பெரும் பாதிப்பை ஏற்படுத்தி இருந்தது. இந்த நோய்த் தொற்றால் உலகமெங்கும் லட்சக்கணக்கானோர் பலியானார்கள். இந்தத் தொற்றை கட்டுப்படுத்த உலகில் உள்ள மருத்துவர்கள், ஆராய்ச்சியாளர்கள் உட்பட அனைவரும் பல்வேறு ஆய்வுகளை செய்து தீவிர முயற்சியில் ஈடுபட்டு வந்தனர். அதன் பின்பு, கடுமையான கொரோனா கட்டுப்பாடுகள், மாஸ்க், தடுப்பூசி போன்ற தீவிர முயற்சிகளால் கொரோனா பாதிப்பு கட்டுக்குள் வந்தது.

இதில், இந்த நோயைக் கட்டுப்படுத்தும் விதமாக, கோவிஷீல்டு மற்றும் கோவாக்சின் போன்ற தடுப்பூசிகளை வழக்கத்தில் கொண்டு வந்து அதை மக்களும் தவறாமல் போட்டு வந்தனர். கோவாக்சின் தடுப்பூசியை இந்திய மருத்துவ ஆராய்ச்சி கவுன்சிலுடன் இணைந்து ஐதராபாத்தில் உள்ள பாரத் பயோடெக் நிறுவனம் தயாரித்தது. அதே போல், மற்றொரு தடுப்பூசியான கோவிஷீல்டு தடுப்பூசியை இங்கிலாந்து நாட்டைச் சேர்ந்த ஆல்டிராஜெனேகா நிறுவனமும், ஆக்ஸ்போர்டு பல்கலைக்கழகமும் இணைந்து கண்டுபிடித்தது.

இதில், கோவிட் தொற்றுக்கான தடுப்பூசியான கோவிஷீல்டை, மத்திய அரசு அனுமதியுடன் மகாராஷ்டிரா மாநிலத்தில் உள்ள புனேவில் அமைந்துள்ள சீரம் நிறுவனம் தயாரித்தது. இந்தத் தடுப்பூசியின் செயல்திறன் 70 சதவீதம் என்று அப்போது தெரிவிக்கப்பட்டது. இந்த இரண்டு வகையான தடுப்பூசிகளை, உலகில் உள்ள கோடிக்கணக்கான மக்கள் பயன்படுத்தினர். இதனால், இந்த நோய்த் தொற்று பரவலாக குறைந்து வந்து மக்களை பெருமூச்சடைய செய்தது.

தடுப்பூசிகளைப் பயன்படுத்தி நோய் தொற்றைக் கட்டுப்படுத்தி வந்த அதே வேளையில், கோவிஷீல்டு தடுப்பூசி போட்டுக் கொண்ட பின்னர் மரணங்களும், உடல்நல பாதிப்புகளும் ஏற்பட்டுள்ளதாக பல புகார்கள் எழுந்தது. இந்தப் புகார்களை அடுத்து, இங்கிலாந்து நீதிமன்றத்தில், கோவிஷீல்டு கண்டுபிடிப்பு நிறுவனமான ஆல்டிராஜெனேகாவுக்கு எதிராக 50க்கும் மேற்பட்ட வழக்குகள் தொடரப்பட்டன. இது தொடர்பான வழக்கு இங்கிலாந்து நீதிமன்றத்தில் விசாரணைக்கு வந்த போது, ஆல்டிராஜெனேகா நிறுவனத்தோடு, ஆக்ஸ்போர்டு பல்கலைக்கழகமும் சேர்ந்து அறிக்கை ஒன்று தாக்கல் செய்தது.

அந்த அறிக்கையில், ‘கோவிட் தடுப்பூசியான கோவிஷீல்டு சில நேரங்களில் ஏதேனும் ஒரு சிலருக்கு பக்கவிளைவுகளை தரலாம். ஏதேனும் ஒரு சிலருக்கு இது போன்ற பாதிப்பு வருவது அரிதான விஷயம்தான். ரத்தத்தில் உறைதல் ஏற்படலாம், டிடிஎஸ் எனப்படும் (Thrombosis with Thrombocytopenia Syndrome ) பாதிப்பு வரலாம். இது எல்லோருக்கும் வருவதில்லை, மிக அரிதாக நடக்கலாம்’ எனத் தெரிவித்தது. இது தற்போது உலகம் முழுவதும் பெரும் அதிர்ச்சியை ஏற்படுத்தியுள்ளது.

தொடர்ந்து கோவிஷீல்ட் தடுப்பூசியைப் பரிசோதிக்கவும், அதன் பக்க விளைவுகள் மற்றும் அபாய காரணிகளை ஆய்வு செய்யவும் மருத்துவ நிபுணர்கள் குழுவை அமைக்க கோரி வழக்கறிஞர் விஷால் திவாரி என்பவர் உச்சநீதிமன்றத்தில் பொதுநல மனு ஒன்றைத் தாக்கல் செய்துள்ளார். மேலும் அந்த மனுவில் தடுப்பூசியால் பக்க விளைவுகள் ஏற்பட்டவர்களுக்கு அரசு நிவாரணம் வழங்க அறிவுறுத்தல்களை வழங்குமாறு குறிப்பிடப்பட்டுள்ளது. இந்த வழக்கு இன்று உச்சநீதிமன்றத்தில் விசாரணைக்கு வரவுள்ளது.

Covaccine after Covid Shield; Description given by the manufacturer

இந்நிலையில் மற்றொரு கரோனா தடுப்பு மருந்தான கோவாக்சின் தடுப்பூசி பாதுகாப்பானதா என்ற கேள்வி மற்றும் சந்தேகங்கள் எழுந்திருந்தது. இந்த நிலையில் கோவாக்சின் தடுப்பூசி பாதுகாப்பானது. மக்களின் பாதுகாப்பு முக்கியத்துவம் என்பதை மனதில் வைத்து கோவாக்சின் தடுப்பூசி உருவாக்கப்பட்டது. மத்திய சுகாதாரத்துறை அமைச்சகத்தால் தடுப்பூசி பாதுகாப்பு குறித்து மதிப்பீடும் செய்யப்பட்டுள்ளது. கோவாக்சின் தடுப்பூசியின் தன்மை தொடர்ந்து கண்காணிக்கப்படும். கோவாக்சின் லைசன்ஸ் நடைமுறையின் போது சுமார் 27 ஆயிரம் வகைகளில் ஆய்வு செய்யப்பட்டது என அதனைத் தயாரித்த பாரத் பயோ டெக் நிறுவனம் விளக்கம் அளித்துள்ளது. ரத்தம் உறைதல் உள்ளிட்ட எந்த வித பக்க விளைவுகளும் கோவாக்சின் தடுப்பூசியால் ஏற்படாது என்பது உறுதி எனவும் பாரத் பயோ டெக் நிறுவனம் விளக்கம் அளித்துள்ளது.

Next Story

சற்றே குறைந்த கொரோனா பரவல்; மத்திய சுகாதார அமைச்சகம் தகவல்

Published on 02/01/2024 | Edited on 02/01/2024
Slightly less corona spread; Information from Union Ministry of Health

கடந்த 2019 ஆம் ஆண்டு சீனாவிலிருந்து பரவிய கொரோனா நோய்த் தொற்று உலகமெங்கும் பெருந்தொற்றாக மாறி பெரும் பாதிப்பை ஏற்படுத்தியிருந்தது. இந்த நோய்த் தொற்றால் உலகமெங்கும் ஏராளமானோர் பலியானார்கள். அதன் பின்பு, கடுமையான கொரோனா கட்டுப்பாடுகள், மாஸ்க், தடுப்பூசி போன்ற முயற்சிகளால் கொரோனா பாதிப்பு கட்டுக்குள் வந்தது.

இந்த நிலையில், இந்தியாவில் மீண்டும் கொரோனா பரவல் அதிகரித்துள்ளது. குறிப்பாக புதிய வகை கொரோனாவான ஜேஎன் 1 கொரோனா தொற்று பாதிப்பு நாளுக்கு நாள் அதிகரிக்கத் தொடங்கியுள்ளன. அதில் இந்தியாவில் மட்டும் கடந்த மாதம் 479 பேர் கொரோனா தொற்றால் பாதிக்கப்பட்டிருந்தனர். இந்நிலையில், கடந்த மாதத்தின் (டிசம்பர்) முதல் 8 நாட்களில் மட்டும் 825 பேருக்கு கொரோனா தொற்று உறுதி செய்யப்பட்டுள்ளது. மேலும், கொரோனா தொற்றால் பாதிக்கப்படுபவர்களில் 90% பேர் கேரளா மாநிலத்தைச் சேர்ந்தவர்கள் எனத் தகவல்கள் வெளியாகியுள்ளன. தொற்று பரவலைக் கட்டுப்படுத்த கேரளா மட்டுமல்லாது மற்ற மாநில அரசுகளும் பல்வேறு நடவடிக்கைகளை எடுத்து வருகிறது. 

இதனைத் தொடர்ந்து, இந்தியாவில் 423ஆக இருந்த கொரோனா பாதிப்பு கடந்த 23 ஆம் தேதி 752ஆக அதிகரித்திருந்தது. அதன்படி, இந்தியாவில் மட்டும் மொத்த பாதிப்பு எண்ணிக்கை 2,997இல் இருந்து 3,240ஆக அதிகரித்தது. இதில் கேரளாவில் மட்டும் கடந்த 24 மணி நேரத்தில் அதிகபட்சமாக 565 பேர் கொரோனா தொற்றால் பாதிப்படைந்துள்ளதாக மத்திய சுகாதாரத்துறை அமைச்சகம் தெரிவித்திருந்தது. மேலும், இந்தியாவில் மட்டும் ஒரே நாளில் 7 பேர் உயிரிழந்துள்ளதாக அதிர்ச்சி தகவல் வெளியாகியிருந்தது.

இதையடுத்து, கடந்த டிசம்பர் மாதம் 29 ஆம் தேதி, இந்தியாவில் ஒரே நாளில் புதிதாக 797 பேருக்கு கொரோனா தொற்று உறுதி செய்யப்பட்டுள்ளதாக மத்திய சுகாதாரத்துறை அமைச்சகம் தெரிவித்தது. அதே சமயம், ஒரே நாளில் கேரளாவில் 2 பேர், மகாராஷ்டிரா, தமிழகம் மற்றும் புதுச்சேரியில் தலா ஒருவர் என மொத்தம் 5 பேர் கொரோனா பாதிப்பால் உயிரிழந்துள்ளனர் என அதிர்ச்சி தகவல் வெளியாகியிருந்தது. அதேபோல், கடந்த டிசம்பர் மாதம் 31 ஆம் தேதி வரையிலான 24 மணி நேரத்தில் 841 பேருக்கு கொரோனா தொற்று உறுதி செய்யப்பட்டுள்ளதாக மத்திய சுகாதார அமைச்சகம் தெரிவித்தது. மேலும், ஒரே நாளில் கொரோனா பாதிப்பு காரணமாக கேரளா, கர்நாடகா, பீகார் ஆகிய மாநிலங்களில் தலா ஒருவர் என மொத்தம் 3 பேர் உயிரிழந்துள்ளதாகவும் தெரிவித்தது.

இந்த நிலையில், நாடு முழுவதும் கொரோனா பாதிப்பு சற்று குறைந்துள்ளதாக மத்திய சுகாதார அமைச்சகம் தெரிவித்துள்ளது. அதில் நேற்று முன்தினம் (31-12-23) 841 ஆக இருந்த கொரோனா தொற்று நேற்று (01-01-24) 636 ஆக குறைந்திருக்கிறது என்று தெரிவித்துள்ளது. இந்தியாவில் இதுவரை கொரோனாவால் பாதிக்கப்பட்டவர்களின் எண்ணிக்கை 4.5 கோடியை தாண்டியுள்ளதாகவும், நாடு முழுவதும் இதுவரை 5.33 லட்சம் பேர் கொரோனாவால் உயிரிழந்துள்ளனர் என்பது குறிப்பிடத்தக்கது.