Skip to main content

நித்தியானந்தாவின் திருவிளையாடலா? டென்ஷனான அமித்ஷா... நித்தி பற்றி வெளிவராத அதிர்ச்சி தகவல்! 

Published on 25/11/2019 | Edited on 25/11/2019

ஏன் நித்யானந்தாவை போலீசார் கைது செய்யவில்லை. அவர் ஒரு காமக் கொடூரன். குழந்தைகளை கொடுமை செய்பவர். அவர் என்ன செய்து கொண்டிருக்கிறார்? எங்கே இருக்கிறார்? என தேசிய செய்திச் சேனல்களில் விவாதப் பொருளாகியிருக்கிறார் நித்யானந்தா.

தமிழகத்தில் கும்பகோணத்தைச் சேர்ந்தவர் ஜனார்த்தன சர்மா. இவர் நித்தியின் பக்தர். 2013-ஆம் ஆண்டு தனது நான்கு குழந்தைகளை பெங்களூருவில் உள்ள பிடதி என்கிற இடத்தில் இயங்கும் குருகுல பள்ளியில் சேர்க்கிறார். அதில் மூன்று பெண் குழந்தைகள், ஒரு ஆண் குழந்தை. 2018ஆம் ஆண்டு நித்தியுடன் இவருக்கு கருத்து வேறுபாடு ஏற்பட அவரது குழந்தைகளை நித்தி பிடித்து வைத்துக் கொண்டார். அவர் போராடி சிறு வயதுடைய ஒரு பெண்ணையும் ஆண் குழந்தையையும் மீட்டுக் கொண்டு வந்தார். இளம் பெண்களான லோபமுத்ரா சர்மா (வயது 21), நந்திதா சர்மா (வயது 18) ஆகியோரை நித்தி திருப்பி அனுப்பவில்லை.

 

nithy



அவரிடம் ஒப்படைக்கப் பட்ட குழந்தைகளிடம் அவர் விசாரித்தபோது, "நித்தியின் பள்ளியில் பாடங்கள் எடுப்பதில்லை. சாலையோரத்தில் பொருட்களை விற்று பிச்சை எடுக்கும் குழந்தைகளைப் போல ஆசிரம பொருட்களை விற்று காசு கொண்டு வர சொல்வார்கள். விற்பனை குறைந்து காசு குறைந்தால் எங்களை அடிப்பார்கள். சோறும் போட மாட்டார்கள். அப்பா எங்களைப் பார்க்க வந்தால் விடமாட்டார்கள். அப்பா ஆசிரமவாசிகளிடம் சண்டை போட்டதால் பள்ளியை நிர்வகிக்கும் நித்தியின் பெண் சிஷ்யைகளான சாத்வி பிரான் பிரியானந்தா, பிரியாத்வா ரித்திகரன் ஆகியோர் அவர்கள் நிர்வகிக்கும் குருகுலத்துக்கு அழைத்துச் சென்றார்கள். குஜராத் மாநிலத்தின் தலைநகரான அகமதாபாத்தின் புறநகர் பகுதியில் டெல்லி பப்ளிக் ஸ்கூல் என்கிற பள்ளி வளாகத்தில் இயங்கும் குருகுல பள்ளிக்கு அனுப்பினார்கள். அப்பா அதி தீவிரமாக எங்களை குஜராத்திற்கு வந்து தேடினார். அவர் பார்வையில் நாங்கள் படாமலிருக்க எங்களை ஒரு குடியிருப்பில் உணவு இல்லாமல் அடைத்து வைத்தார்கள்'' என கதறி அழுதனர்.
 

nithy case



இந்தக் குழந்தைகளின் நிலை பற்றி அறிந்த ஜனார்த்தனன் அடுத்த கட்டமாக வயதுக்கு வந்த பெண்களின் நிலைமை குறித்து கேள்வி எழுப்பி அந்த பெண்களை எங்களுடன் அனுப்ப வேண்டுமென கதறினார். உடனே நித்யானந்தா, ஜெயராமனின் மூத்த மகளான லோபமுத்ரா பேசும் வீடியோ ஒன்றை அனுப்பினார். "நான் இப்பொழுது நித்யானந்தாவுடன் மேற்கத்திய தீவுகளில் ஒன்றான டிரினிடாட்டில் சுற்றுப் பயணம் செய்து வருகிறேன். நீங்கள் எனக்கு அப்பா இல்லை. நான் 21 வயது மேஜராகிவிட்டேன். நான் உங்கள் வீட்டில் இருந்தபோது உங்கள் நண்பர் ஒருவருடன் செக்ஸ் வைத்துக் கொள்ளும்படி கட்டாயப்படுத்தினீர்கள். அதனால் நித்தியுடன் இணைந்தேன். என்னை சுவாமி நித்தியிடம் இருந்து பிரிக்காதீர்கள்'' என அந்த பெண் பேசியிருந்தார்.
 

nithy



டென்ஷனான ஜனார்த்தனன் குஜராத் போலீசில் புகார் செய்தார். நித்யானந்தாவிற்கும் பா.ஜ.க.வுக்கு நெருக்கமான பிரபல சாமியார்களுக்கும் ஒத்து வராது. சுவாமி ஸ்ரீஸ்ரீரவிசங்கர், பாபா ராம்தேவ், ஜக்கி வாசுதேவ் ஆகியோரை பற்றி வாய்க்கு வந்தபடி நித்தி பேசுவதை வழக்கமாக வைத்திருந்தார். "இவர் மட்டும்தான் கடவுளா? எங்களை ஏன் கிண்டலடிக்க வேண்டும்' என டென்ஷனில் இருந்த சாமியார்கள் தென் மாநிலங்களில் மட்டும் திருவிளையாடல் காட்டி வந்த நித்திக்கு எதிராக மோடியின் சொந்த மண்ணான குஜராத் போலீ சில் புகார் வந்ததும் டென்ஷன் ஆனார்கள். கர்நாடகாவில் இந்த குழந்தைகளை வைத்திருந்தால் சிக்கல் என அகமதாபாத்தில் தனது பக்தையான டெல்லி பப்ளிக் ஸ்கூலின் பெண் உரிமையாளர் நடத்தும் பள்ளி வளாகத்தில் உள்ள குருகுலத்திற்கு நித்தி அனுப்பி வைத்தார். ஆனால் அதுவே நித்திக்கு வினையானது.

 

nithy



குஜராத்தில் நித்தியின் திருவிளையாடலா? என அமித்ஷாவும் டென்ஷனானார். ஜனார்த்தனனின் புகார் வழக்காக பதிவு செய்யப்பட்டது. நித்தியின் குருகுல பள்ளியில் குஜராத் போலீஸ் ரெய்டு நடத்தியது. ஜனார்த்தனனின் குழந்தைகளைப் போன்று அடைத்து வைக்கப்பட்ட மூன்று சிறுவர்களை மீட்டு அவர்களை அரசு விடுதியில் சேர்த்தது. அவர்களிடம் வாக்குமூலம் வாங்கியது. அவர்களும் ஜனார்த்தனனின் பிள்ளைகள் சொன்ன வாக்கு மூலத்தையே தந்தார்கள். ஜனார்த்தனனின் புகார் மற்றும் சிறுவர்கள் ஐந்து பேர் கொடுத்த வாக்குமூலத்தின் அடிப்படையில் நித்தியின் குஜராத் குருகுலத்தை நடத்தி வரும் சாத்வி பிரான் பிரியானந்தா, பிரியாத்வா ஆகி யோரை கைது செய்தனர். அவர் கள் மேல் குழந்தைகளை கடத்து தல், அடித்து உதைத்தல், சட்ட விரோதமாக அடைத்து வைத்தல், சமூக அமைதியை குலைத்தல், ஆபாசமான, அவதூறான பொருட்களை விற்பனை செய்தல் என ஏகப்பட்ட வழக்குகளை பாய்ச்சினர். அனைத்திலும் நித்யானந்தாவை முதல் குற்றவாளியாக்கினார்கள் என நடந்ததை விளக்கியது நித்திக்கு நெருக்கமான ஆன்மிக வட்டாரம்.


நித்திக்கு எதிராக அமித்ஷா கோபமடைந்துள்ளார். அதன் விளைவாக நித்தியின் ஆசிரமத்தில் என்ன நடந்தது என குஜராத் மாநில போலீசார், குழந்தைகள் நலப்பிரிவு, சமூக நல பிரிவு என மூன்று துறைகள் அடங்கிய விசாரணைக் கமிட்டியை அழைத்து விசாரிக்க அகமதாபாத் மாவட்ட கலெக்டர் உத்தரவிட்டுள்ளார். இதுபற்றி நம்மிடம் பேசிய நித்தியின் முன்னாள் பக்தர்கள், "நித்தி நடத்தும் இந்த குருகுல பள்ளி சட்டவிரோதம் என கர்நாடகா அரசு ஏற்கனவே உத்தரவிட்டிருந்தது.

2016ஆம் ஆண்டு பெங்களூரு பிடதியில் நடைபெற்ற குருகுல பள்ளியை பூட்டி சீல் வைக்க கர்நாடக அரசு உத்தரவிட்டது. எனவே நித்தி நடத்தியது சட்ட விரோத பள்ளி. அந்தப் பள்ளியில் இவ்வளவு அநியாயம் நடக்கிறது என புகார் வந்ததும் அதை மோடியின் சொந்த ஊரில் நித்தி அரங்கேற்றியதும் அமித்ஷாவை பெரிய அளவுக்கு கோபப்பட வைத்துள்ளது. ஒட்டுமொத்தமாக குஜராத் அரசு நித்திக்கு எதிராக திரும்பியுள்ளது. இது நித்திக்கு மிகப் பெரிய ஆபத்துதான் என்கிறார்கள்.

இதெல்லாம் நித்திக்கு புதிதல்ல. அவருக்கு தூசு மாதிரி.

"நித்யானந்தா தனது ஆண் பக்தர் ஒருவரிடமும் பெண் பக்தை ஒருவரிடமும் தவறாக நடந்து கொண்டார் என ஒரு கற்பழிப்பு வழக்கு பல வருடங்களாக நடந்து வருகிறது. அதில் கடந்த ஒரு வருடமாக நித்தி ஆஜராகவே இல்லை. வருகிற டிசம்பர் 9-ம் தேதி மறுபடியும் அந்த வழக்கு விசாரணைக்கு வருகிறது. குஜராத்தில் நடைபெற்ற சம்பவம் இந்த வழக்கில் எதிரொலித்தால் தேசிய சேனல்கள் சொல்வது மாதிரி நித்திக்கு கைது வாரண்டை, கற்பழிப்பு வழக்கு நடக்கும் கர்நாடக ராம்நகர் நீதிமன்றம் பிறப்பிக்கலாம்.


இதுதவிர சங்கீதா என்ற பெண் மர்மமான முறையில் நித்தியின் பிடதி ஆசிரமத்தில் இறந்தார். அதுகுறித்த வழக்கும் கர்நாடகா உயர்நீதிமன்றத்தில் நிலுவையில் இருக்கிறது. அத்துடன் இந்திய அரசின் அமலாக்கத்துறை ஒரு மோசடி வழக்கை நித்தி மீது கொடுத்துள்ளது. அந்த வழக்கு இன்னமும் விசாரணைக்கு வரவில்லை. தமிழகத்தில் திருவண்ணாமலையில் 1008 லிங்கங்களை வைத்து கிரிவல பாதையில் ஒரு ஆசிரமம் அமைத்தார் நித்தி. அப்பொழுது முதல்வராக இருந்த ஜெ. அதை சட்ட விரோத ஆக்கிரமிப்பு என இந்து சமய அறநிலையத்துறை மூலம் இழுத்து மூடினார். அதைத் தொடர்ந்து அது கோவிலல்ல என அங்கிருந்த 1008 லிங்கங்களையும் புல்டோசர் வைத்து உடைத்தெறிந்தார் நித்தி. அது தொடர்பான வழக்கு சென்னை உயர்நீதிமன்றத்தில் நிலுவையில் உள்ளது. இது போதாதென்று அமெரிக்காவில் உள்ள நீதி மன்றங்களில் நித்திக்கு எதிரான வழக்குகள் உள்ளன'' என்கிறார்கள் நித்திக்கு எதிராக போராடுபவர்கள்.

"நித்தி எங்கே' என கேட்டதற்கு "தெற்கு அமெரிக்காவில் உள்ள ஈக்வடார் நாட்டில் ஒரு குட்டித் தீவை விலைக்கு வாங்கி அங்கே செட்டில் ஆகிவிட்டார்'' என சவால் விடுகிறார்கள் நித்தியின் பக்தர்கள். இந்தியாவைப் பொறுத்தவரை நித்தியின் ஆட்டம் குளோஸ் என்கிறார்கள் வழக்கு களை தூசு தட்டுபவர்கள்.


 

 

 

Next Story

“ஸ்மிருதி இராணியை இழிவுபடுத்த வேண்டாம்” - ராகுல் காந்தி வேண்டுகோள்

Published on 12/07/2024 | Edited on 12/07/2024
Rahul Gandhi said that Don't insult Smriti Irani

கடந்த 2019 நாடாளுமன்றத்  தேர்தலில் காங்கிரஸ் தலைவர் ராகுல் காந்தியை அவரது குடும்பத் தொகுதியான அமேதியில் பாஜக வேட்பாளர் ஸ்மிருதி இராணி தோற்கடித்தார். அதேபோன்று இந்த முறையும் ராகுல் காந்தியை அமேதி தொகுதியில் தோற்கடிப்பேன் என்று ஸ்மிருதி இராணி சவால் விடுத்தார். ஆனால் கடைசி நேரத்தில் ராகுல் காந்தி அமேதி தொகுதியில் போட்டியிடாமல், காந்தி குடும்பத்தின் பாரம்பரிய தொகுதியான ரேபரேலி தொகுதியில் போட்டியிட்டு வெற்றியும் பெற்றார். 

அதே சமயம் அமேதியில் ஸ்மிருதி இராணியை எதிர்த்து ராகுல் காந்தி குடும்பத்தின் நம்பிக்கைக்குரிய நபரான கிஷோரி லால் சர்மாவைக் காங்கிரஸ் நிறுத்தியது. பின்னர் 2 லட்சம் வாக்குகள் வித்தியாசத்தில் ஸ்மிருதி இராணியைத் தோற்கடித்து கிஷோரி லால் சர்மா அமோக வெற்றிபெற்றார். இதனைத் தொடர்ந்து தோல்வியை ஒப்புக்கொண்ட ஸ்மிருதி இராணி, தொடர்ந்து அமேதி தொகுதி மக்களுக்காக பணியாற்றுவேன் என்று தெரிவித்தார். இதனைத் தொடர்ந்து, காங்கிரஸ் கட்சியினர் ஸ்மிருதி இராணிக்கு எதிராக சமூக வலைத்தளங்களில் கருத்து தெரிவித்து கடுமையான விமர்சனங்களை முன்வைத்து வருகின்றனர். 

இந்த நிலையில் ஸ்மிருதி இராணியை இழிவுபடுத்த வேண்டாம் என நாடாளுமன்ற எதிர்க்கட்சி தலைவர் காங்கிரஸ் எம்.பி ராகுல் காந்தி கேட்டுக்கொண்டுள்ளார். இது தொடர்பாக அவர் வெளியிட்டுள்ள சமூக வலைத்தள பக்கத்தில், “வாழ்க்கையில் வெற்றியும் தோல்வியும் சகஜம். அதனால் அந்த விஷயத்தில் ஸ்மிருதி இராணி அல்லது வேறு எந்தத் தலைவர்களையும், இழிவான வார்த்தைகளைப் பயன்படுத்துவதையும், கேவலமாக நடந்து கொள்வதையும் தவிர்க்குமாறு அனைவரையும் கேட்டுக்கொள்கிறேன். மக்களை அவமானப்படுத்துவதும் அவமதிப்பதும் பலவீனத்தின் அடையாளம், வலிமை அல்ல” எனக் குறிப்பிட்டுள்ளார். 

Next Story

‘ஜூன் 25 அரசியல் சாசன படுகொலை தினம்’ - மத்திய அரசு அறிவிப்பு

Published on 12/07/2024 | Edited on 12/07/2024
central govt said June 25 to be observed as Constitution black Day

1971 ஆம் ஆண்டு நடந்த இந்திய நாடாளுமன்றத் தேர்தலில் காங்கிரஸ் கட்சி 352 தொகுதிகளையும், கம்யூனிஸ்ட்கள் 48 தொகுதிகளையும், ஜனசங்கம் 22 தொகுதிகளையும், காமராஜர் தலைமையிலான ஸ்தாபன காங்கிரஸ் 16 தொகுதிகளையும் கைப்பற்றியது. உத்தரப்பிரதேச மாநிலம் ரேபரேலி தொகுதியில் அப்போதைய பிரதமர் இந்திரா காந்தி போட்டியிட்டார். அவரை எதிர்த்து சோசலிஸ்ட் கட்சியின் தலைவர் ராஜ் நாராயணன் போட்டியிட்டார். இதில் ராஜ் நாராயனணை தோற்கடித்து ரேபரேலி தொகுதியில் இந்திரா காந்தி வெற்றிபெற்றார்.

இந்த நிலையில், இந்திராகாந்தியின் வெற்றியை எதிர்த்து ராஜ் நாராயணன் அலகாபாத் உயர்நீதிமன்றத்தில் மனு தாக்கல் செய்தார். இந்த வழக்கில் இந்திராகாந்தியின் வெற்றி செல்லாது என்று கடந்த 1975 ஆம் ஆண்டு ஜூன்12 ஆம் தேதி அலகாபாத் நீதிமன்றம் தீர்ப்பளித்தது.  நீதிபதி ஜக்மோகன்லால் சின்ஹ தேர்தலில் வெற்றிபெற இந்திராகாந்தி பல்வேறு முறைகேடுகளில் ஈட்டுப்பட்டுள்ளார். அதனால் அவரது வெற்றி செல்லாது என்று தீர்ப்பளித்தார். மேலும், தேர்தல் முறைகேடுகளில் ஈடுபட்டதால் அடுத்த 6 ஆண்டுகளுக்குத் தேர்தலில் இந்திராகாந்தி போட்டியிட முடியாது என்றும் உத்தரவிட்டார். 

நாடு முழுவதும் பெரும் கொந்தளிப்பை இந்த தீர்ப்பு ஏற்படுத்திய நிலையில், அலகாபாத் நீதிமன்ற தீர்ப்பை எதிர்த்து உச்சநீதிமன்றத்தில் மனுத் தாக்கல் செய்தார் இந்திராகாந்தி. ஆனால் 1975 ஆம் ஆண்டு ஜூன் 24 ஆம் ஆண்டு அப்போதைய உச்சநீதிமன்ற நீதிபதி, கிருஷ்ண ஐயர் இந்திராகாந்தி மனுவைத் தள்ளுபடி செய்து அலகாபாத் உயர்நீதிமன்றம் வழங்கிய தீர்ப்பை உறுதி செய்தார். இதனால் இந்திராகாந்திக்கு நெருக்கடி அதிகரித்து, கட்டாயம் பதவி விலகி ஆக வேண்டிய சூழல் உருவானது.

இந்த சூழலில் 1975 ஆம் ஆண்டு ஜூன் 25 ஆம் தேதி நள்ளிரவில் இந்தியாவில் அவசரநிலை சட்டத்தை அப்போதைய பிரதமர் இந்திராகாந்தி அமல்படுத்தினார். இந்தியாவில் முதல்முறையாக எமர்ஜென்சி அமல்படுத்தப்பட்டது. நாடுமுழுவதும் எதிர்க்கட்சிகள் கடும் நடவடிக்கைகளுக்கு உள்ளாகினர். எதிர்க்கட்சி தலைவர்கள் மீசா சட்டத்தின் கீழ் கைது செய்யப்பட்டுச் சிறைப்படுத்தப்பட்டு சித்ரவதைகள் செய்யப்பட்டனர். பத்திரிக்கைகள் தனிக்கை செய்யப்பட்டது. இதனால் மக்கள், அரசியல் கட்சியினர் கடுமையாகப் பாதிக்கப்பட்டனர். பலரும் உயிரிழந்தனர். இதனைத் தொடர்ந்து, இரண்டு ஆண்டுகள் கழித்து 1977-ம் ஆண்டு மார்ச் 21-ந் தேதி இந்தியாவில் அவசர நிலை பிரகடனம் திரும்பப் பெறப்பட்டது. பிற்காலங்கள் நாட்டில் எமர்ஜென்சி அமல்படுத்தியதற்காக மக்களிடம் இந்திராகாந்தி மன்னிப்பு கேட்டதாக  கூறப்படுகிறது. இன்றளவும் எமர்ஜென்சி கலத்தை இந்தியா நாட்டின் கருப்பு தினமாகப் பலராலும் விமர்சிக்கப்படுகிறது.

மத்தியில் ஆளும் பாஜக காங்கிரசுக்கு எதிராக எமர்ஜென்சி காலத்தையே முன்வைத்து மக்களிடம் பிரச்சாரம் செய்துவருகிறது. இந்த நிலையில்தான், ஜூன் 25 ஆம் தேதி அரசியல் சாசன படுகொலை தினமாக கடைப்பிடிக்கப்படும் என மத்திய அரசு அறிவித்துள்ளது. அவசர நிலையால் பாதிக்கப்பட்டோருக்கு ஒவ்வொரு ஆண்டும் ஜூன் 25 ஆம் தேதி அஞ்சலி செலுத்தப்படும் என்று தெரிவிக்கப்பட்டுள்ளது.