பெரியாரைப் பாடிய டி.எம். கிருஷ்ணாவுக்கு விருதா? கொதிக்கும் சங்கீதக் கொடுக்குகள்! பதிலடி கொடுக்கும் தமிழ் உணர்வாளர்கள்!

சிந்திக்கச்சொன்னவர் பெரியார்

-தந்தை பெரியார்

சொந்த புத்தியைக் கொண்டு

சிந்திக்கச்சொன்னவர் பெரியார்!’

-என்றும் கம்பீரமாக தனது கர்நாடக இசை மேடைகளில் கம்பீரமாகப் பாடி பலரையும் தன்பால் ஈர்த்து வருகிறவர் பிரபல இசைக்கலைஞர் டி.எம்.கிருஷ்ணா.

சமூக சீர் திருத்தத்திற்கான ஒரு கருவியாக இசையைப் பயன்படுத்துவதற்காக அவருக்கு, சென்னையில் உள்ள பிரபல மியூசிக் அகடமி இந்த ஆண்டு ’சங்கீத கலாநிதி’ விருதை வழங்குவதாக அண்மையில் அறிவித்தது.

அந்த அறிவிப்பு வந்ததுமே பிராமண சமூகத்தைச் சேர்ந்த இசைச் சகோதரிகளான ரஞ்சனி, காயத்ரி உள்ளிட்டோர் பகிரங்கமாகவே கடும் எதிர்ப்பைத் தெரிவித்தனர். இதைத் தொடர்ந்து டி.எம்.கிருஷ்ணாவுக்கு ஆதரவாக பலரும் குரல் கொடுக்க ஆரம்பித்திருக்கிறார்கள்.

யார் இந்த டி.எம்.கிருஷ்ணா?

இவரும் பிராமண சமூகத்தைச் சேர்ந்தவர்தான். இசைக்கச்சேரிகளை நடத்திவருவதோடு, இசைப்பயிற்சியை பலருக்கும் கொடுத்துவருகிறவர். மேலும், சாதி மத வேறுபாடுகளை ஒழிக்கவேண்டும் என்று தொடர்ந்து குரல் கொடுத்துவருகிறவர்.

இசை என்பது இனம், மொழி சாதி கடந்தது என்று இவர் தொடர்ந்து அறிவித்துவருகிறார். அதோடு, எந்த மதத்தினரும் எந்த சாதியினரும் ஆர்வம் இருந்தால் கர்நாடக இசையைக் கற்றுக்கொள்ளலாம் என்றும் சொல்லிவருகிறார். அதோடு, இவர் கிறுத்தவ, இஸ்லாமிய இசைப் பாடல்களையும் பாடிவருகிறார். மேல் வர்ணத்தவரால் கீழ்ப்பார்வை பார்க்கப்படும் குப்பங்களிலும் சேரிகளிலும்கூட இசை நிகழ்ச்சிகளை நடத்தியிருக்கிறார்.

இசைக்கு மதமில்லை என்று இவர் சொன்னதற்கே பெரும் எதிர்ப்பு சில ஆண்டுகளுக்கு முன்பே கிளம்பியது.

2018 நவம்பரில் இந்திய விமான நிலைய ஆணையமும் ஒரு கலாச்சார அமைப்பும் டெல்லியில் ஏற்பாடு செய்திருந்த டி.எம்.கிருஷ்ணாவின் இசை நிகழ்ச்சியை, இந்துத்துவா கும்பலின் எதிர்ப்பால் ரத்து செய்துவிட்டனர். இது அப்போதே பரபரப்பானது.

இதுமட்டுமா?

2020-ல் இவர் மிருதங்கத்தை உருவாக் கும் கலைஞர்களைப் பற்றி, ’செபாஸ்டின் அண்ட் சன்ஸ்’ என்ற தலைப்பில் ஒரு நூலை எழுதினார். இந்த நூல், மிருதங்கத்தை உருவாக்கும் கலைஞர்களுக்கும் மிருதங்கம் வாசிக்கும் கலைஞர்களுக்கும் இடையிலுள்ள நெகிழ்ச்சியான உறவு குறித்து விவரித்தது. அதோடு, மிருதங்கக் கருவி மாட்டுத் தோலில் இருந்தே, அதுவும் பசு மாட்டுத் தோலிலிருந்தே செய்யப்படுகிறது என்கிற உண்மை குறித்தும் விவரித்திருக்கிறது.

இந்த நூலை கடந்த 2020 ஆம் ஆண்டு பிப்ரவரி 2ஆம் தேதி, சென்னை கலாசேத்ரா வில் உள்ள ருக்மணி அரங்கத்தில் வெளியிடு வதற்கான ஏற்பாடுகள் நடந்தன.இந்த விழா வில் விடுதலைச் சிறுத்தைகள் கட்சித் தலைவர் தொல். திருமாவளவன் உள்ளிட்டோர் பங்கேற்பதாகவும் இருந்தது.

இந்த நிலையில் இந்த நூலைப் பற்றி ஒரு ஆங்கில நாளிதழில் அறிமுகக் கட்டுரையை கிருஷ்ணா எழுதியிருந்தார்.

இதைப் படித்த கலாச்சேத்ரா நிர்வாகம்,மாட்டுத்தோல் மீதான அலர்ஜியால், இந்த விழாவைத் தங்கள் இடத்தில் நடத்தக்கூடாது என்று திடீரென அனுமதி மறுத்துவிட்டது.

இதைத்தொடர்ந்ந்து அந்த நூல் வெளியீட்டு விழாவை வேறொரு அரங்கில் நடத்தினார் கிருஷ்ணா. அப்போதும் பெரும் சர்ச்சை எழுந்தது.

ஆனாலும் டி.என்.கிருஷ்ணாவை, பெரும்பாலான பிராமணிய சபாக்கள் நிராகரிக்கத் தொடங்கின. அதேபோல் டி.என். கிருஷ்ணாவும் , அது பற்றியெல்லாம் கொஞ்சமும் கவலைப்படாமல் தமிழிசைப் பாடல்களைப் பாடிவந்தார்.

இந்த நிலையில்தான் மியூசிக் அகாடமியின் விருது அறிவிப்பு வெளியானதோடு, டி.எம்.கிருஷ்ணா தலைமையில் இசை மாநாடு நடக்கும் என்றும் அறிவிக்கப்பட்டது. இதுதான் பிராமண இசைக்கலைஞர்களை கொதியாய்க் கொதிக்க வைத்திருக்கிறது.

பெரியாரைப் பாடிய கிருஷ்ணாவுக்கு சங்கீத கலாநிதி பட்டமா என்று கொதித்திருக்கும், கர்நாடக இசைச் சகோதரிகளான ரஞ்சனி, காயத்ரி ஆகியோர் கடும் எதிர்ப்பு தெரிவித்திருக்கிறார்கள். அவர்கள் வெளியிட்டிருக்கும் இது குறித்த பதிவில் “ 2024 ஆம் ஆண்டு மியூசிக் அகாடமியின் மாநாட்டில் பங்கேற் பதிலிருந்தும், டிசம்பர் 25அன்று எங்கள் கச்சேரியை வழங்குவதிலிருந்தும் விலகுவதாக நாங்கள் முடிவை எடுத்துள்ளோம்.

டி.எம்.கிருஷ்ணா தலைமையில் மாநாடு நடைபெற உள்ளதால் இந்த முடிவை எடுத்துள்ளோம். டி எம் கிருஷ்ணா கர்நாடக இசை உலகில் பெரும் சேதத்தை ஏற்படுத்தியவர். வேண்டுமென்றே மகிழ்ச்சி யுடன் உள்ள சமூகத்தின் உணர்வுகளை மிதித்து, தியாகராஜா மற்றும் எம்.எஸ்.சுப்புலட்சுமி போன்ற மிகவும் மரியாதைக்குரிய நபர்களை அவமதித்துள்ளார்.

அவரது செயல்கள் ஒரு கர்நாடக இசைக்கலைஞராக இருப்பதில் அவமான உணர்வைப் பரப்பமுயன்றது மற்றும் இசையில் ஆன்மீகத்தை அவர் தொடர்ந்து இழிவு படுத்தி வந்தார். அவர் மில்லியன் கணக்கான கர்நாடக இசைக் கலைஞர் களை கொச்சைப்படுத்தி உள்ளார். கலைத் திறன், கடின உழைப்பு மற்றும் கர்நாடக இசையை அவமதித்து உள்ளார். இசையை மக்களிடம் கொண்டுசெல்வதில் தவறு இல்லை. ஆனால் அவரின் அரசியல் நிலைப்பாட்டை ஏற்றுக்கொள்ள முடியாது. முக்கியமாக பெரியார் போன்ற தலைவரை புகழ்ந்துபாடிய டி.எம் கிருஷ்ணாவிற்கு விருது வழங்குவதை ஏற்றுக்கொள்ள முடியாது என்று விமர்சனம் வைத்துள்ளனர் அதோடு, இது குறித்து மியூசிக் அகா டமிக்கும் கடிதம் எழுதியிருக்கிறார்கள்.

இந்த அற்பத்தனமான எதிர்ப்பைப் பார்த்த பலரும் டி.எம்.கிருஷ்ணாவுக்கு ஆதரவாகவும் அந்த ஏடாகூட இசைச் சகோதரிகளுக்கு கண்டனம் தெரிவிக்கும் வகையிலும் குரல் கொடுத்து வருகிறார் கள்.

திராவிடர் கழகத்தலைவரான கி.வீரமணி ஒரு கண்டனை அறிக்கையை வெளியிட்டிருக்கிறார். அதில் முத்தாய்ப் பாக “இசைத்துறையைச் சார்ந்த இரண்டு பெண்களை முன்னிறுத்தி, இந்தச் சூழலில் இதைப் பொதுத் தளத்தில் விவாதிக்கச் செய்து, இதன் பின்னணியிலிருந்து இயங்குவோரையும் தந்தை பெரியார் மீது அவர்கள் அவதூறு பரப்புவதையும், அவரை இழிவுசெய்வதையும் ஒரு போதும் பொறுத்துக்கொள்ள முடி யாது! இப்படி பெரியார் மீது அவதூறு பரப்புவோர் மக்கள் மன்றத்திலும், நீதி மன்றத்திலும் பதில் சொல்லவேண்டிய கட்டாயத்தை அவர்களே ஏற்படுத்திக் கொண்டிருக்கி றார்கள் என்பது உறுதி!” என்று தெரிவித்திருக்கிறார்.

நாடாளுமன்ற உறுப்பினரான கனிமொழி கருணாநிதி தன் பதிலில் “டி.எம். கிருஷ்ணா மியூசிக் அகாடமியால் சங்கீத கலாநிதி என்று அங்கீகரிக்கப் பட்டதற்கு சிலர் எதிர்ப்பு தெரிவித்துள்ளனர். டி எம் கிருஷ்ணாவின் தனிப்பட்ட நம்பிக்கைகள், அவர் பெரியார் மீது வைத்துள்ள அபிப்ராயங்கள் காரணமாக அவர் மீது கடுமையான வெறுப்பு உமிழப்படுகிறது.

பெரியாரின் கருத்துகளை அடிப்படையாகப் படித்தால், அவர் உலகம் கண்ட மிகப் பெரிய பெண்ணியவாதிகளில் ஒருவர் என்பது நமக்கு தெரியும். அவர் ஒருபோதும் இனப்படுகொலைக்கு அழைப்பு விடுத்ததில்லை. எந்த ஒரு பிரிவினரின் இனப்படுகொலைக்கும் அவர் அழைப்பு விடுத்தது இல்லை. சமீபத்தில் கர்நாடகாவை சேர்ந்த பா.ஜ.க. அமைச்சர் ஒருவர் தமிழர்களுக்கு எதிராக வெறுப்புடன் பேசினார். அதற்குச் சமமான வெறுப் புடன் இப்போது டி.எம். கிருஷ்ணாவை எதிர்க்கிறார் கள். நம் நாடு நம்பும் சுதந்திரம் மற்றும் கருத்துச் சுதந்திரத்தில் அவர்களுக்கு நம்பிக்கை இல்லாமல் இருக்கலாம்., ஆனால் அதற்காக டி. எம். கிருஷ்ணாவை இப்படி எதிர்ப்பது சரியல்ல’ என்று தெரிவித்திருக்கிறார்.

அந்த இசைச் சகோதரிகளுக்கு கண்ட னம் தெரிவித்திருக்கும் இசை யமைப்பாளர் ஜேம்ஸ் வசந்தனோ, ”கர்நாடக சங்கீத இசை உலகின் உயரிய விருதான 'சங்கீத கலாநிதி' இந்த ஆண்டு பாடகர் டி.எம். கிருஷ்ணா அவர்களுக்கு அறிவிக்கப்பட்டிருக்கிறது. இந்த அறிவிப்பு சங்கீத உலகத்தை இரண்டாகப் பிரித்திருக்கிறது.

கிருஷ்ணா "மிகப்பெரிய ஞானஸ்தன்; அபாரமான கலைஞர்" என ஒட்டுமொத்தமாக ஏற்றுக்கொள்கிற சங்கீத உலகம் இந்த விருது விஷயத்தில் இரண்டாகப் பிரிகிறதென்றால் அது இசையின் அடிப்படையில் அல்ல என்பது தெளிவாகிறதுதானே? வேறென்ன பிரச்சனை?

அவருடைய சமூகநீதிப் பார்வையும், அதைப் பளீரென்று உரத்த குரலில் அஞ்சாமல் சொல்லும் இயல்பும்தான். கடந்த சில ஆண்டுகளாக அவர் முன் னெடுத்து வரும் சில கோட்பாடுகள்தான் காரணம்.

"சபாக்களில் பிராமண ஆதிக்கம் இருக்கிறது; அதைக் களைய வேண்டும். சாஸ்திரீய சங்கீதத்தை வெகுஜனத்துக்கும் எடுத்துச்செல்ல வேண்டும்."

என்று அவர் வெளிப்படையாகக் சொன்னதுதான் இசை உலகத்தில் பெரிய பூதத்தைக் கிளப்பி விட்டு, பாரம்பரியத்தை உலுக்கி, பலரது சினத்தைத் தூண்டியது.

யாரை மேல்மட்டச் சமூகம் தீண்டாமல் ஒதுக்கி வைத்ததோ அவர்களோடு சேர்ந்து ஆல்காட் குப்பத்திலும், சேரிகளிலும் கர்நாடக இசையை எளிமைப்படுத்திப் பாடினார்.

மூன்றாம் பாலினத்தவரோடு சேர்ந்து ஒரு கச்சேரி நடத்தினார்.

இதைப்போல பல கலை-கலாச்சாரப் புரட்சி களைத் தொடர்ந்து செய்கிறார். 21-ம் நூற்றாண்டு பாரதியைப் பார்ப்பதுபோல் இருக்கிறதா? இவரும் பிராமணர்தான்!

ஆனால் பிராமணியத்தின் தவறான சில பகுதி களைக் களைய முயற்சிக்கிறவர்.” என்று அழுத்தமாகச் சொல்லியிருக்கிறார்.

அதேபோல் கிருஷ்ணாவுக்கு விருது கொடுப்பதை எதிர்க்கும் தொழிலதிபரான ’சோஹோ’ ஸ்ரீதர்வேம்பு, நான் கர்நாடக சங்கீதத்தைக் கற்றுக்கொண்டிருக்க வேண்டுமென விரும்புகிறேன்.டி எம் கிருஷ்ணா போன்ற ஒரு திறமையாளருடன் ஒப்பிடும்போது நான் இதில் பூஜ்ஜியம்தான். ஆனாலும் அவரது 'ஜ்ர்ந்ங்'அரசியல் எனப்படும் முற்போக்கு அரசியல் செய்வது எனக்கு குமட்டலாக இருக்கிறது. அவர் உண்மையிலேயே இந்து சமுதாயத்தை சீர்திருத்த விரும்பினால், அவர் சுவாமி விவேகானந்தரிடமிருந்து தொடங்கலாம். மாறாக தர்மத்தை அழித்து இந்த தேசத்தை உடைக்கநினைக்கும் சக்திகளுடன் ஒரே படுக்கையில் இருப்பதை ஏற்றுக்கொள்ள முடியாது.” என்று தாக்கியிருக்கிறார்.

இவரது கருத்தைப் பார்த்த அமைச்சர் பி.டி.ஆர். பழனிவேல் தியாகராசனோ “ அவரு டைய கருத்துக்களை வெளியிடும் உரிமையை நான் மதிக்கிறேன். ஆனால், பொறுப்புள்ள பதவியில் இருப்பவர்கள், "தர்மத்தை அழிக்கும், இந்த தேசத்தை உடைக்கும் சக்திகள்" போன்ற இழிவான சொற்றொடர் களைப் பயன்படுத்தாமல் தவிர்க்க வேண்டும். வாழ்க்கையில் அவர் வெற்றிபெற்றுவிட்டார் என்பதற்காகவே அவர் தன்னை தேசபக்தியின் நடுவராகவோ, தர்மத்தின் நடுவராகவோ நினைத் துக்கொள்ளக் கூடாது. மரியாதை கருதியே கடந்த ஆண்டு அவரது சொந்த பிரச்சனைகளை வைத்து அவரின் குணாதிசயத்தையோ நேர்மையையோ கேள்வி எழுப்பாமல் இருந்தோம். அவர் தனக்கு உடன்படாத வர்களை இழிவுபடுத்துவதற்குப் பதிலாக, அதே கட்டுப் பாட்டைக் கடைப்பிடிக்க வேண்டும்” என்று நெற்றியில் அடித்தாற்போல் பதிலடி கொடுத்திருக்கிறார்.

இது தொடர்பாக திரைக்கலைஞரான எஸ். இராஜகுமாரன் நம்மிடம் “ காலம் கடந்ததாக இருந் தாலும் டி. எம். கிருஷ்ணாவுக்கு ‘சங்கீத கலாநிதி’ விருது வழங்கியதற்காக முதலில் சங்கீத வித்வத் சபைக்கு பாராட்டுகள். ஒரு முக்கியமான கர்நாடக சங்கீத இயக்கமான மியூசிக் அகாடமியில் ‘இனி பாட மாட்டேன்!’ என்று மறுதலித்த ஒரு இசைக் கலைஞருக்கு அவர்களின் ஒரு முக்கியமான விருது அளிப்பது என்பது எல்லா சர்ச்சைகளையும் கடந்து வரவேற்கத்தக்க இசையின் சமூக மாற்றம் என்றே சொல்லலாம்!

ரஞ்சனி- காயத்ரி, துஷ்யந்த் ஸ்ரீதர், விசாகா ஹரி போன்ற கர்நாடக சங்கீத இசைக் கலைஞர்கள் அவருக்கு கடுமையான எதிர்ப்பும் நிராகரிப்பும் தெரிவித்திருக்கின்றனர். ஒரு இசைக் கலைஞரிடம் இருக்கக்கூடாத மனிதநேயமற்ற வன்மம் இது! ஆனால் நம்முடைய மரபு சார்ந்த கர்நாடக சங்கீதம் -தமிழிசை இரண்டுக்குமிடையே காலகாலமாக வரலாற்றின் யுத்த களத்தில் இந்த நிராகரிப்பு புதிதல்ல. பாரதியாரில் இருந்தே தொடங்குகிறது இந்த பழமைவாத எதிர்ப்புகள்! கனகலிங்கம் என்னும் ஆதிதிராவிடருக்கு பூணூல் போட்டது முதல் கடையநல்லூர் அக்ரஹாரத் தின் புனிதத்தை குலைக்கும் என்று அவர்கள் கருதிய, கழுதைக் குட்டியை தோளில் சுமந்து வீட்டுக்கு தூக்கி வந்தது வரை பலவகையான பழமைவாத எதிர்ப்புகளால் அக் காலகட்டத்தில் இதே போன்றர் களால் பாரதியார் நிராகரிக்கப்பட்டார்! பிறகு அவர் உலகப் புகழ் பெற்றதும் அவரைத் தங்கள் சாதி என்ற பெருமையைப் பேசத் தொடங்கினர்! இவர்களின் கொள்கைப்படி பார்த்தால் இப்போதும் மியூசிக் அகாடமி யில்கூட பாரதியார் பாடல்கள் பாடக்கூடாது!

அப்படி பாடும் அவையை இவர்களெல்லாம் மறுப்பார்களா? புறக்கணிப்பார்களா?

தமிழிசையின் தந்தை’ என்று போற்றப் படும் அண்ணாமலை பல்கலைக்கழக இசை அறிஞர், எம். எம். தண்டபாணி தேசிகர். திருவையாறு இசை நிகழ்ச்சியில் இவர் பாடிய பின், இவர் பிராம ணர் அல்லாதவர் என்பதற்காக மேடையில் தீட்டுக் கழித்த சம்பவங்கள் தீண்டாமையின் கொடூரமான வரலாறு! இப்போது டி.எம். கிருஷ்ணா மீது ஏவப்படும் அவதூறுகளும் நிராகரிப்புகளும் இத்தகையதுதான்!

கிருஷ்ணா அவர்களே! உங்கள் மனிதநேயமிக்க இசையின் மரபு உடைத்தல்களும் அதற்கு உங்களுக்கு கிடைத்திருக்கும் அங்கீகாரங்களும் சங்கீத கலாநிதி விருதை விட பன்மடங்கு உயர்வானது! மனிதநேய பாவங்கள் இழையும் உங்கள் உலக இசைக் குரலின் உன்னதப் பயணம் தொடரட்டும்! வாழ்த்துக்கள்!” என்கிறார் உற்சாகமாக.

திராவிடமுற்போக்குப் படைப்பாளர் பேரவை யின் நிர்வாகியான கவிஞர் செல்வ மீனாட்சி சுந்தரமோ அந்த இரண்டு பார்ப்பன பெண் இசைக் கலைஞர்கள் எழுதிய கடிதத்தில், தந்தை பெரியார் பார்ப்பன சமுதாயத்தை இனப்படுகொலை செய்யத் தூண்டியவர் என்றும் தொடர்ந்து பொது மேடை களிலே பார்ப்பன சமுதாயப் பெண்களைத் தகாத வார்த்தைகளால் இழிவுபடுத்திப் பேசி வந்துள்ளார் என்றும் குற்றம்சாட்டியுள்ளனர். இது அவர்களின் அறியாமையைக் காட்டுகிறது. தந்தை பெரியார் ஒரு கருத்தியல் போராளி. வன்முறையை அவர் என்றும் கையில் எடுத்தவர் இல்லை. அப்படி அறவழியிலே போரிட்ட "தமிழர் தலைவரை" "சமூக நீதிப் போராளி"யை வன்முறையைத் தூண்டினார் என்று குற்றம்சாட்டுவது உண்மைக்குப் புறம்பான கூற்றாகும்.

அண்ணல் காந்தியார் கோட்சே என்னும் பார்ப்பனரால் சுட்டுக் கொல்லப்பட்டபோது இந்தியாவெங்கும் பார்ப்பனர்கள் மீது தாக்குதல் நடந்து நேரத்தில், தமிழ்நாட்டில் வன்முறையேதும் பார்ப்பனர்கள் மீது நிகழாதவண்ணம் வானொலியில் உரையாற்றித் தமிழ்நாட்டிலே அமைதியை நிலை நாட்டியவர் தந்தை பெரியார். இதை இந்த இருவரும் எப்படி மறந்து போனார்கள் என்று தெரியவில்லை.

பெண்களுக்குக் கல்வியுரிமை, சொத்துரிமை, விவாகரத்து உரிமை, மறுமணம் செய்யும் உரிமை, வேலைக்குச் செல்லும் உரிமை ஆகியவை வேண்டு மென்று தொடர்ந்து பேசிப் போராடி வந்தவர்தான் தந்தை பெரியார். இந்தப் போராட்டத்தால் பயன்பட்டவர்கள் பார்ப்பனப் பெண்களும் தான் என்பதை இந்த இரண்டு இசைக் கலைஞர்களும் எப்படி மறந்துபோனார்கள் என்பது தெரியவில்லை. பெரியாருக்கு முன்னர் கணவனை இழந்த பார்ப்பனப் பெண்களின் தலையை மொட்டை அடித்து வெள்ளை உடையை அணிவித்து மூலையில் உட்கார வைத்ததையும் சேர்த்துக் கண்டித்தவர் தான் தந்தை பெரியார்.இன்று அவர்கள் சமுதாயத்தில் அப்படிப் பட்ட விதவைப் பெண்களை காண இயலுமா? அறிவு நாணயமிருந்தால் பதில் கூறுங்கள்.

தரம் தாழ்ந்த வன்ம வார்த்தைகளால் தந்தை பெரியாரை இழிவுபடுத்திப் பேசுவதை பெரியார் தொண்டர்களால் ஏற்றுக்கொள்ள முடியாது.பெண்களை இழிவுபடுத்தும் மனுஸ்மிருதியையும் சாஸ்திர சம்பிரதாயங்களையும் புராணங்களையும் கண்டிக்காத இந்த இரண்டு பெண்ணுரிமைப் போராளிகளும் தந்தை பெரியார்மேல் குற்றம் சாட்டுவது விந்தையாக உள்ளது இந்த ரஞ்சனி, காயத்ரி ஆகியோரின் வன்மம் நிறைந்த பொய்யான குற்றச்சாட்டுகளை மறுப்பதோடு ஒரு பெரியார் தொண்டனாக அவர்களுக்கு எனது கண்டனத்தையும் பதிவு செய்கின்றேன்” என்கிறார் அழுத்தமாக.

பெரியாரைப் பாடுவதாலும் புரட்சிகரமான எண்ணங்களை வெளியிடுவதாலும், டி.எம். கிருஷ்ணா வை இப்படிப்பட்ட தற்குறிகள் எதிர்த்தாலும், உலகத் தமிழர்கள் அனைவரும் உன்னதக்கலைஞரான அவரை இதயத்தில் ஏந்திக் கொண்டாடுவார்கள்.

-த.இலக்கியன்