Skip to main content

“மிகவும் பயம் வருகிறது” - டீப் ஃபேக் விவகாரம் குறித்து ராஷ்மிகா மந்தனா

Published on 01/02/2024 | Edited on 01/02/2024
rashmika about deep fake video

கடந்த நவம்பர் மாதம் ராஷ்மிகா மந்தனாவின் டீப் ஃபேக் வீடியோ சமூக வலைத் தளங்களில் வெளியாகி வைரலானது. இதற்குப் பல்வேறு பிரபலங்கள் எதிர்ப்பு தெரிவித்தனர். ராஷ்மிகாவும் மன வேதனை அடைந்ததாகத் தெரிவித்திருந்தார். பின்பு மத்திய அரசின் தகவல் தொழில்நுட்பத்துறை, போலியாக வீடியோ சித்தரித்து வெளியிட்டால் மூன்று ஆண்டுகள் சிறைத் தண்டனை விதிக்கப்படும். குற்றம் நிரூபிக்கப்பட்டால், மூன்று ஆண்டுகள் சிறைத் தண்டனை மட்டுமல்லாது ஒரு லட்சம் அபராதமும் விதிக்கப்படும் என எச்சரிக்கை விடுத்திருந்தது.

இந்த விவகாரம் தொடர்பாக டெல்லி போலீஸ், 5 பிரிவுகளின் கீழ் வழக்குப் பதிவு செய்து விசாரணை நடத்தினர். பின்பு வீடியோ வெளியிட்ட முக்கிய குற்றவாளியை கைது செய்ததாக சமீபத்தில் காவல்துறையினர் தெரிவித்திருந்தனர். இந்த நிலையில் இந்த டீப் ஃபேக் விவகாரம் குறித்து ஊடகம் ஒன்றில் ராஷ்மிகா மந்தனா பேசியுள்ளார். அவர் பேசுகையில், “பலமுறை இது நடந்திருக்கிறது. அதைப் பற்றி பேசினால், நீங்கள் இந்த துறையை தேர்ந்தெடுத்துள்ளீர்கள், இது இப்படித்தான் இருக்கும். இது உங்களுக்கும் தெரியும். அப்படி இருக்கையில் இப்போது ஏன் சொல்கிறீர்கள் என பேசுகிறார்கள்.

ஆனால் இதுவே நான் கல்லூரியில் படிக்கும் போது நடந்திருந்தால், எனக்கு ஆதரவாக யாரும் வரமாட்டார்கள். இதைத்தான் நான் யோசித்துக் கொண்டே இருக்கிறேன். ஏனெனில் சமூகம் நம்மைப் பற்றி என்ன நினைக்கிறதோ அதுவே நாமாக இருக்க வேண்டும் என்பது நமது கலாச்சாரத்தில் ஒன்று. சமூகம் நம்மை எப்படி விரும்புகிறதோ, அப்படி நாம் இருக்க வேண்டும். அது உங்களுக்குத் தெரியும். அதனால் சிந்தித்து எதிர்வினையாற்றுவது சரி.

நினைத்து பாருங்கள், ஒரு கல்லூரியில் ஒரு பெண்ணுக்கு இப்படி ஆகும்போது எப்படி இருக்கும். அந்த பெண்ணை பற்றி மிகவும் பயம் வருகிறது. அதனால் இதைப் பற்றி நான் பேசினால், குறைந்தபட்சம் 41 மில்லியன் மக்களுக்காவது டீப் ஃபேக் என்றால் என்ன? அது சரியானது அல்ல, அது பொதுவாக மக்களுக்கு அவர்களது உணர்வுகளை பாதித்து, மன அழுத்தத்தை ஏற்படுத்தக்கூடிய ஒன்று என தெரிய வரும். எனவே அந்த விழிப்புணர்வை வெளிக்கொண்டு வருவது முக்கியமாக பார்க்கிறேன்” என்றார்.

சார்ந்த செய்திகள்

Next Story

தனுஷின் ‘குபேரா’ - ராஷ்மிகா மந்தனாவின் ஃபர்ஸ்ட் லுக் வீடியோ வெளியீடு!

Published on 05/07/2024 | Edited on 05/07/2024
Rashmika Mandana Video Launch at Dhanush's 'Kubera' movie

ராயன் படத்தை தொடர்ந்து தனுஷ் தற்போது சேகர் கம்முலா இயக்கத்தில் குபேரா படத்தில் நடித்து வருகிறார். இதனைத் தொடர்ந்து, அருண் மாதேஷ்வரன் இயக்கத்தில் இளையராஜா பயோ-பிக், மாரி செல்வராஜ் இயக்கத்தில் ஒரு படம், இந்தியில் ஆனந்த் எல்.ராய் இயக்கத்தில் ஒரு படம் எனக் கைவசம் வைத்துள்ளார். 

இதில் சேகர் கம்முலா இயக்கத்தில் உருவாகும் ‘குபேரா’ படம் தனுஷின் 51ஆவது படமாக உருவாகிறது. ஸ்ரீவெங்கடேஸ்வரா சினிமாஸ் தயாரிக்கும் இப்படம் தமிழ், தெலுங்கு, இந்தி என மூன்று மொழிகளில் ஒரே நேரத்தில் உருவாகிறது. இந்தப் படத்தின் கதாநாயகியாக ராஷ்மிகா மந்தனா நடிக்க தெலுங்கு முன்னணி நடிகர் நாகர்ஜுனா முக்கிய கதாபாத்திரத்தில் நடிக்கிறார். தேவி ஸ்ரீபிரசாத் இசையமைக்கிறார்.  

இந்தப் படத்தின் படப்பிடிப்பு பல இடங்களில் நடைபெற்று வருகிறது. தனுஷுக்கு ஜோடியாக நடிக்கும் ராஷ்மிகா மந்தனா ஃபர்ஸ்ட் லுக் போஸ்டர் வெளியாகும் எனக் கூறப்பட்டது. இந்த நிலையில், ராஷ்மிகா மந்தனாவின் ஃபர்ஸ்ட் லுக் தொடர்பான வீடியோ தற்போது வெளியிடப்பட்டுள்ளது. அந்த வீடியோவில், இரவு நேரத்தில் காட்டுப் பகுதியில் ராஷ்மிகா மந்தனா ஆர்வத்துடன் வந்து கடப்பாறையைக் கொண்டு கீழே தோண்டுகிறார். சீறிக் கொண்டு தோண்டியதில், சூட்கேஸ் ஒன்றை எடுக்கிறார். அந்த சூட்கேஸ் முழுக்க பணம் இருப்பதைக் கண்டு மகிழ்ச்சியடைந்த ராஷ்மிகா, அதைத் தொட்டு கும்பிடுகிறார். மீண்டும் அந்த சூட்கேஸை மூடிவிட்டு, அதை எடுத்துக் கொண்டு நகர்கிறார் என்பதோடு முடிகிறது.  

Next Story

பிரபல பாடகியின் பயோ- பிக்; பரிசீலனையில் டாப் நடிகைகள்

Published on 22/05/2024 | Edited on 22/05/2024
trisha, nayanthara, rashmika are talks in ms subbulakshmi biopic

கர்நாடக சங்கீதத்தில் கோலோச்சியவர் பிரபல பின்னணிப் பாடகி மதுரை சண்முகவடிவு சுப்புலட்சுமி. இசை ரசிகர்களால் எம்.எஸ் சுப்புலட்சுமி என அறியப்படும் இவர், சிறுவயதிலேயே கர்நாடக இசை, இந்துஸ்தானி இசை ஆகியவைகளை கற்றுக் கொண்டார். பின்பு தனது தாயின் கச்சேரியில் பாடி மக்களின் கவனத்தை ஈர்த்தார். இதையடுத்து அவரது அம்மாவுடன் கருத்து வேறுபாடு ஏற்பட்டு சென்னையில் கச்சேரி நடத்திய எம்.எஸ் சுப்புலட்சுமி திரைப்படங்களில் நடிகையாகவும் அறிமுகமானார். சில படங்களில் மட்டும் நடித்துவிட்டு, விலகிய அவர், இந்திய கலாச்சார தூதராக, லண்டன், நியூயார்க், கனடா என உலகம் முழுவதும் இசை கச்சேரிகள் நடத்தினார்.   

இந்தியாவின் உயரிய விருதாக கருதப்படும் பாரத் ரத்னா விருது வாங்கிய முதல் பாடகர் என்ற பெருமையை எம்.எஸ் சுப்புலட்சுமி பெற்றார். மேலும் பத்ப பூஷன், பத்ம விபூஷன், இந்திரா காந்தி விருது என பல்வேறு விருதுகளை வாங்கியுள்ளார். 2004 டிசம்பர் 11 அன்று மறைந்தார். இந்த நிலையில் இவரது வாழ்க்கை வரலாறு திரைப்படமாக உருவாகவுள்ளதாக தகவல் வெளியாகியுள்ளது. மேலும் பெங்களூருவை சேர்ந்த தயாரிப்பு நிறுவனம் இந்த படத்தை தயாரிப்பதாகவும், ஆரம்பக்கட்ட பணிகள் தொடங்கிவிட்டதாகவும் கூறப்படுகிறது. 

trisha, nayanthara, rashmika are talks in ms subbulakshmi biopic

2025 இந்த படத்தை வெளியிட திட்டமிடப்பட்டுள்ளதாக சொல்லப்படும் நிலையில் எம்.எஸ் சுப்புலட்சுமி கதாபாத்திரத்தில் த்ரிஷா, நயன்தாரா மற்றும் ராஷ்மிகா மந்தனா ஆகிய நடிகைகளில் யாராவது ஒருவர் நடிக்கவுள்ளதாக திரை வட்டாரங்கள் தெரிவிக்கின்றன. இது குறித்தான அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.