Skip to main content

அவரை தமிழரென்றும் சொல்ல முடியாது, மனிதரென்றும் சொல்ல முடியாது!- விஜய்சேதுபதிக்குக் கோரிக்கை வைக்கும் இலங்கைத் தமிழர்கள்...

Published on 19/10/2020 | Edited on 19/10/2020

 

muttiah


முத்தையா முரளிதரனாக விஜய் சேதுபதி நடிப்பதற்கு உலகம் முழுவதும் இருக்கும் தமிழர்கள் தங்களின் கண்டனங்களைப் பதிவு செய்து வருகின்றனர்.

 

இந்நிலையில், ஈழத் தமிழர்களான 'வலிந்து காணாமல் ஆக்கப்பட்ட உறவுகளின் சங்க'த்தைச் சேர்ந்தவர்கள் முத்தையா முரளிதரனின் வாழ்க்கை வரலாற்றுப் படத்தில் விஜய் சேதுபதி நடிக்கக் கூடாது என்று வேண்டுகோள் வைத்திருக்கின்றனர்.

 

இதுகுறித்து அவர்கள் செய்தியாளர்கள் சந்திப்பில் பேசுகையில், “விஜய் சேதுபதிக்கு உண்மையாகவே முரளிதரன் பற்றிய விஷயங்கள் தெரியாமல் இருந்திருக்கலாம். ஆனால், அவரை பற்றி சமூக வலைதளங்களில் பல விமர்சனங்கள் வைக்கப்பட்டு வருகின்றன. ஏனென்றால், அந்தளவிற்கு ஒட்டுமொத்த தமிழ் மக்களையும் கொச்சைப்படுத்தியிருக்கிறார். உதாரணமாக, இலங்கை ஒரு சிங்கள பௌத்த நாடு என்று சிங்களவர்கள் சொல்வதற்கு முன்பாக முந்திக்கொண்டு சொல்லி, அவருடைய விசுவாஸத்தை சிங்களவர்களுக்கு காட்டியிருக்கிறார்.

 

அதேபோல, மே18 2009 இனப் படுகொலை செய்யப்பட்டு பலரும் கொல்லப்பட்ட அந்த நாளை, இனிய நாளாக, மிகவும் சந்தோஷமான நாள் என்று கூறினார். அவர் பெயரில் மட்டும்தான் தமிழை வைத்திருக்கிறார். மற்றபடி தமிழர்களுக்கு உண்டான எந்தவிதக் குணமும் அவருக்கு இல்லை. எதிரிகூட ஒன்றரை லட்சம் மக்களை அழித்த நாளை, இனிய நாளாகக் கொண்டாட மாட்டார்கள். அதை சிங்கள மக்கள் கூட எண்ணி சந்தோஷப்பட்டிருக்க மாட்டார்கள். எங்களுக்கு எத்தனையோ சிங்கள நண்பர்கள் உண்டு, அவர்கள் எல்லாம் இந்த விஷயத்தைச் சொல்லும்போது கண்ணீர் சிந்தி அழுதிருக்கிறார்கள். ஆனால், அந்த நாளை இனிய நாளாகக் கொண்டாடும் அளவிற்கு மனசாட்சி இல்லாத ஒரு ஆள் இந்த முத்தையா. இதனால்தான் அவர் மீது கடுமையான விமர்சனங்களை வைத்து, அவர் தொடர்பான படம் வெளியாகக் கூடாது என்பதில் உறுதியாக இருக்கின்றோம். 

 

Ad

 

கடந்த 2011ஆம் ஆண்டு பிரிட்டானிய பிரதமர் டேவிட் கேமரூன் யாழ்ப்பானம் வந்திருந்தார். அவரிடம் மனு ஒன்றைக் கொடுப்பதற்காக ஒரு சிறு அளவிளான மக்கள் அங்கு கூடியிருந்தோம். அப்போது, ஒரு ஊடகவியாளர் முத்தையா முரளிதரனிடம் இதுகுறித்து கேள்வி கேட்டபோது, 20 அல்லது 30 பெண்கள் அழுது கொண்டிருப்பதால் அது நிஜமாகிவிடாது என்று கூறினார். அப்போது, நாங்கள் என்ன நாடகத்திற்காக அழுதுகொண்டிருந்தோமா? இவர்களை யாரோ இயக்கியிருப்பார்கள் என்று அலட்டிக்கொள்ளாமல் கூறினார். எங்களுடைய போராட்டத்தைக் கொச்சைப்படுத்த இவருக்கு எந்தவிதத் தகுதியும் இல்லை. இந்த '800' படத்தில் தமிழ்ப் பட நடிகர் விஜய் சேதுபதி நடிக்கக்கூடாது என்பதில் உறுதியாக இருக்கின்றோம்.

 

முரளிதரன், மனிதத் தன்மையே இல்லாதவர். எங்கள் வலியை, எங்கள் போராட்டத்தை அந்தளவிற்கு கொச்சைப் படுத்தியிருக்கிறார். 138 நாட்கள் போராடி, 78 உறவுகளை இழந்திருக்கின்றோம். இந்த வலியைப் பற்றி அவருக்குத் தெரியுமா? அப்படித் தெரியாவிட்டாலும் யோசித்துப் பார்க்க வேண்டாமா? அவர் நிறைய தொழில்கள் செய்வதற்காக அரசாங்கத்திற்கு ஆதரவாக இருப்பதில் எங்களுக்கு எந்தப் பிரச்சனையும் இல்லை. ஆனால், நாட்டின் பிரதிநிதி போல ஊடகவியளர்களிடம் அப்படி ஒரு அறிக்கையை, அவர் கொடுத்தது கண்டிக்க வேண்டியது. அதை வன்மையாகக் கண்டித்தோம். எனவே, இந்தப் படத்திலிருந்து விலகிவிடுங்கள். தயவுசெய்து உடனடியாக இந்தப் படத்திலிருந்து விலகிவிடுங்கள். முன்பு இருப்பது குழி எனத் தெரிந்தும் காலை விடாதீர்கள்” என்று தெரிவித்திருக்கிறார்கள். 


 

 

 

சார்ந்த செய்திகள்

Next Story

விஜய் சேதுபதி விலகிய படத்தில் நடிக்கும் பிரிட்டன் நடிகர்

Published on 11/01/2022 | Edited on 11/01/2022

 

actor dev patel joining muttiah muralitharan biopic 800 movie

 

பாலிவுட் திரையுலகில் ஆண்டுதோறும் பல்வேறு பயோபிக் திரைப்படங்கள் எடுக்கப்பட்டு வருகின்றன. குறிப்பாக கிரிக்கெட் வீரர்களின் வாழ்க்கையை படமாக்க இயக்குநர்கள் அதிக ஆர்வம் காட்டி வருகின்றனர். சச்சின், அசாருதீன், தோனி என இதுவரை வெளியான கிரிக்கெட் வீரர்களின் பயோபிக் படங்கள்  ரசிகர்களிடையே பெரும் வரவேற்பை பெற்றது.

 

அந்த வரிசையில் அடுத்ததாக இலங்கை கிரிக்கெட் வீரர் முத்தையா முரளிதரனின் பயோபிக்  திரைப்படம் '800' என்ற தலைப்பில் வெளியாகவுள்ளது. இயக்குநர் ஸ்ரீபதி ரங்கசாமி இயக்கும் இப்படத்தில் முத்தையா முரளிதரனாக நடிகர் விஜய் சேதுபதி நடிக்க ஒப்பந்தமானார். ஆனால் இதற்கு தமிழ்நாட்டில் இருந்து எதிர்ப்பு கிளம்பியதை அடுத்து '800' படத்திலிருந்து நடிகர் விஜய் சேதுபதி விலகினார்.

 

இந்நிலையில் விஜய் சேதுபதி விலகிய கதாபாத்திரத்தில் இந்திய வம்சாவளியை சேர்ந்த பிரிட்டன் நடிகர் தேவ் பட்டேல் நடிக்க உள்ளதாக தகவல் வெளியாகியுள்ளது. இவர் 'ஸ்லம்டாக் மில்லினியர்', 'ஹோட்டல் மும்பை', 'சாப்பி' படங்களில் நடித்துள்ளார். தேவ் பட்டேல் தற்போது 'மங்கி மேன்' என்ற ஆங்கில படத்தை எழுதி இயக்கி மற்றும் நடித்தும் வருகிறார். 

 

 

Next Story

முத்தையா முரளிதரன் டிஸ்சார்ஜ் குறித்து மருத்துவமனை அறிவிப்பு!

Published on 19/04/2021 | Edited on 19/04/2021

 

muttiah muralithran

 

இலங்கை கிரிக்கெட் அணியின் முன்னாள் வீரரும், சுழல்பந்து வீச்சு ஜாம்பவானுமான முத்தையா முரளிதரன், தற்போது சன் ரைசர்ஸ் ஹைதராபாத் அணியின் பயிற்சியாளராக இருந்து வருகிறார். இவர் தனது பிறந்தநாளை கடந்த 17ஆம் தேதி கொண்டாடிய நிலையில், சென்னை கிரீம்ஸ் சாலையில் உள்ள அப்போலோ மருத்துவமனையில் நேற்று (18.04.2021) அனுமதிக்கப்பட்டார். இதயம் சம்பந்தமான சிகிச்சைக்காக அவர் அனுமதிக்கப்பட்டதாக தகவல் வெளியானது. 

 

இந்தநிலையில், அங்கு அவருக்கு அஞ்சியோ சிகிச்சை வெற்றிகரமாக செய்யப்பட்டது. இதனை அப்போலோ மருத்துவமனை அறிவித்துள்ளது. அஞ்சியோ சிகிச்சை வெற்றிகரமாக நடந்து முடிந்ததை தொடர்ந்து, முத்தையா முரளிதரன் இன்று டிஸ்சார்ஜ் செய்யப்படவுள்ளார். டிஸ்சார்ஜ்க்குப் பிறகு முரளிதரன் தனது வழக்கமான பணிகளில் ஈடுபடுவார் எனவும் அப்போலோ மருத்துவமனை தெரிவித்துள்ளது.