“இலக்கை அடைந்த தருணம்...” - துஷாரா விஜயன் பெருமிதம்

கேப்டன் மில்லர் படத்தைத் தொடர்ந்து தற்போது தனது 50 ஆவது படப் பணிகளை கவனித்து வருகிறார் தனுஷ். அவரே இயக்கி நடிக்கும் இப்படத்தின் முழு படப்பிடிப்பும் முடிந்துள்ளது. படத்தின் தலைப்பு மற்றும் ஃபர்ஸ்ட் லுக் போஸ்டர் சமீபத்தில் வெளியானது. அதில் தனுஷ், காளிதாஸ் ஜெயராம், சந்தீப் கிஷன் உள்ளிட்டோர் இடம்பெற்றிருந்தனர். ராயன் எனத் தலைப்பு வைக்கப்பட்டுள்ள இப்படத்திற்கு ஏ.ஆர். ரஹ்மான் இசையமைக்கிறார். இந்தாண்டிற்குள் இப்படம் வெளியாகவுள்ளதாக அறிவிக்கப்பட்டுள்ளது.

முன்னதாக இப்படத்தில் துஷாரா விஜயன், எஸ்.ஜே. சூர்யா, அபர்ணா பாலமுரளி, செல்வராகவன், வரலட்சுமி சரத்குமார் உள்ளிட்ட பலர் நடிக்கவுள்ளதாகத் தகவல் வெளியானது. மேலும் வட சென்னையை மையமாக வைத்து ஒரு கேங்ஸ்டர் ஜானரில் இப்படம் உருவாகி வருவதாகக் கூறப்பட்டது. இதையடுத்து சில தினங்களுக்கு முன்பு செல்வராகவன் இப்படத்தில் நடித்திருப்பதை எக்ஸ் தளம் வாயிலாக அவர் உறுதிப்படுத்தியிருந்தார். மேலும் இப்படம் தனுஷின் கனவுப் படம் எனக்குறிப்பிட்டிருந்தார்.

இதையடுத்து எஸ்.ஜே. சூர்யா, செல்வராகவன் ஆகியோர் நடித்துள்ளதாகப் படக்குழு அவர்களது கதாபாத்திர லுக் போஸ்டர்களை அடுத்தடுத்து வெளியிட்டு உறுதி செய்தது. இதையடுத்து பிரகாஷ் ராஜ் போஸ்டரை படக்குழு வெளியிட்டது. இந்த நிலையில், துஷாரா விஜயன் போஸ்டரை தற்போது படக்குழு வெளியிட்டுள்ளது. இது தொடர்பாக துஷாரா விஜயன், “இந்த படம் எனக்கு ஒரு கிஃப்ட். கனவு நனவான தருணம் என்று சொல்வதை விட இலக்கை அடைந்ததருணமாகத்தான் நான் பார்க்கிறேன்.தனுஷ் சார் எனக்கு மிகப்பெரிய இன்ஸ்பிரேஷன். அவர் இயக்கத்தில் நடித்ததை தாண்டி அவருடன் நடிப்பதை கூடுதல் மகிழ்ச்சியாகக்கருதுகிறேன்” எனக் குறிப்பிட்டுள்ளார்.