Skip to main content

கறுப்புத்தோல் என்பதால் மறுக்கப்பட்ட அங்கீகாரம்! 14 வயதில் தமிழர் ஒருவர் செய்த சாதனை! சிவா அய்யாதுரை | வென்றோர் சொல் #20

Published on 23/09/2020 | Edited on 23/09/2020

 

Shiva Ayyadurai

 

"அம்மா... எனக்குப் பள்ளிக்கூடம் போக பிடிக்கவில்லை.. இனி நான் போக மாட்டேன்" என ஒன்பதாம் வகுப்பு படிக்கக்கூடிய சிவா அய்யாதுரை எனும் பெயர் கொண்ட சிறுவன் தன் அம்மாவிடம் கூறுகிறான். நாம் அனைவரும் நம் பள்ளிக்காலத்தில் இதை ஒரு முறையாவது நம் அம்மாவிடமும் கூறியிருப்போம்.

 

நமக்கு அதிகபட்ச காரணம் பக்கத்தில் உள்ள பையன் என்னிடம் சண்டை போடுகிறான், என்னை விட அவன் நல்ல பேனா வைத்திருக்கிறான், அவன் ஊக்குக் குத்தாத டவுசர் போட்டிருக்கிறான் என்பதாகவே இருக்கும். அப்படி அம்மாவிடம் முறையிடும் போது நம் கண்கள் கலங்கியிருக்கும். ஆனால் சிவா அய்யாதுரை, தன் அம்மாவின் முன் நின்றபோது, அவர் கண்களில் வெறுமை இருந்தது. அந்த வெறுமை அவர் அம்மாவிற்கு எதையோ உணர்த்தியது. என்ன காரணம் எனக் கேட்கிறார். கல்லூரி இரண்டாம் ஆண்டுக்கு உரிய கணக்குப் பாடங்கள் வரை படித்து முடித்துவிட்டேன். பள்ளியில் நான் புதிதாகப் படிக்க கணக்குப் பாடம் இல்லை. கணக்குப் பாடம் இல்லாத பள்ளி வகுப்பறை எனக்கு வெறுமையாக இருக்கிறது என்கிறார் சிவா அய்யாதுரை. விஞ்ஞான யுகத்தைப் புரட்டிப்போட்ட இ-மெயில் கண்டுபிடிப்பிற்கான தொடக்க வித்து போடப்பட்ட நாள் அன்றுதான்.

 

ராஜபாளையம் அருகே உள்ள முகவூர் என்ற எளிய கிராமத்தில் பிறந்தவர் சிவா அய்யாதுரை. இளம் வயதாக இருக்கும்போதே அவர் குடும்பம் அமெரிக்காவில் குடியேறிவிட்டது. பள்ளிப்படிப்பின் மீது அவருக்கு ஏற்பட்ட வெறுமையை அடுத்து அவர் தாயார் 'லெஸ் மைக்கேல்சன்' என்பவரிடம் அறிமுகப்படுத்துகிறார். சிவா அய்யாதுரையின் திறமையைக் கண்டறிந்து இ-மெயிலைக் கண்டுபிடிப்பதில் அவருக்கு உறுதுணையாக இருந்தவர்களில் லெஸ் மைக்கேல்சன் முக்கியமானவர். பின்னாட்களில் வெள்ளை மேலாதிக்க மனநிலை கொண்ட சிலர் அவரது கண்டுபிடிப்பிற்கு சொந்தம் கொண்டாடி, அதை அபகரிக்க முயன்றபோது அவருடன் இறுதிவரை துணை நின்றவரும் இவரே. இ-மெயில் கண்டுபிடிப்பில் அவரது புத்திக்கூர்மையான செயல்பாடுகளைவிட நமக்கு அதிகம் ஆச்சரியம் அளிப்பது அவரது வயதுதான். ஆம்... டிஜிட்டல் உலகத்திற்கு புதிய தடம் போட்ட இ-மெயிலைக் கண்டுபிடித்த போது அவரது வயது வெறும் 14. இ-மெயில் என்ற தொழில்நுட்பத்தை நான் கண்டுபிடித்தது எப்படி என்று சிவா அய்யாதுரை கூறும் விஷயங்கள், "சாதிக்க வேண்டும் என்ற ஆசை இருக்கிறது.. ஆனால் என்ன செய்வதென்று தெரியவில்லை" எனும் மனநிலையில் இருப்பவர்களுக்குத் தெளிவான பாதையினைக் காட்டும்.

 

"லெஸ் மைக்கேல்சன் எனக்குக் கொடுத்த ஒரு சவாலே இ-மெயில் கண்டுபிடிப்பு ஆனது. அவர் வேலை பார்த்த மெடிக்கல் ஸ்கூலில் மூன்று வளாகங்கள் இருந்தன. அவை ஒவ்வொன்றும் வேறுவேறு இடங்களில் இருந்தன. அங்கே நடக்கும் தகவல் பரிமாற்றம் அனைத்தும் காகிதம் வழியே நடந்தன. ஒவ்வொரு வளாகத்திலும் அதற்கென ஆட்கள் இருப்பார்கள். இன்று இ-மெயிலில் உள்ள இன்பாக்ஸ், அவுட்பாக்ஸ், கார்பன் காப்பி, டிராப்ட், ட்ராஷ் என அனைத்திற்கும் தனித்தனி பெட்டிகள் இருக்கும். லெஸ் மைக்கேல்சன், இவற்றை அனைத்தையும் மின்னணு வடிவில் மாற்றிக்காட்டு என்றார். கணினியில் ப்ரோக்ராம் செய்வதற்கான மொழிகளில் எனக்குப் புலமை அதிகம் இருந்தது. அதைப் பயன்படுத்தி, கடுமையானத் தொடர் முயற்சிகளுக்கு பின் இதைக் கண்டு பிடித்தேன். இது கண்டுபிடிப்பதில் எனக்கு இருந்த சவால், எளிய முறையில் பயன்படுத்தக்கூடிய வகையில் இதை வடிவமைக்க வேண்டும் என்பதே...."  

 

இ-மெயில் என்ற அபரிமிதமான ஒன்று சிவா அய்யாதுரையால் கண்டுபிடிக்கப்பட்டாலும், கண்டுபிடிப்பு என்றாலே அது மேலைநாட்டினரின் மூளையில் இருந்தே வருமென்ற மனப்போக்கு கொண்ட பெரும்பான்மை உலகம் அதை ஏற்றுக்கொள்ள மறுத்தது.

 

Ad

 

“அமெரிக்காவில் நான் வளர்ந்தாலும் தமிழ் குடும்பத்தைச் சேர்ந்தப் பிள்ளையாகவே வளர்க்கப்பட்டேன். பெயர், புகழ் இவையெல்லாம் நான் என்றும் எதிர்பார்த்தது இல்லை. இ-மெயில் கண்டுபிடித்தவுடன் நான் அடுத்த ஒன்று குறித்து ஆராய்ச்சி செய்யத்தொடங்கினேன். நான் செய்தது எல்லோராலும் செய்யக் கூடிய சாதாரண ஒன்றுதான் என்று நினைத்தேன். அதனால் அதைப் பெரிய அளவில் விளம்பரப்படுத்தவில்லை. 35 ஆண்டுகளுக்குப் பின் என் அம்மா இறந்துவிட்டார். அன்று வீட்டைச் சுத்தம் செய்யும் போது என் வீட்டில் இருந்த ஒரு பெட்டியில் இ-மெயிலுக்கான காப்புரிமை, நான் எழுதிய ப்ரோக்ராம் மொழி என அனைத்தும் இருந்தது. அதைப் பார்த்த என் நண்பர் இதுகுறித்து என்னிடம் கேட்டார். நான் விஷயத்தைக் கூறினேன். 'இ-மெயிலைக் கண்டுபிடித்தது நீதான் சிவா' என்றார். அதன் பின்புதான் இது குறித்து எனக்கு நியாபகம் வந்தது. அந்த நண்பர்தான் பின் நாட்களில் அதைப் பத்திரிகைகளுக்கு கொண்டு சென்றார். 

 

பொதுவாக தமிழ், தமிழர் என்று பேசக்கூடிய தீவிரத்தமிழ் ஆர்வலர்கள், உலகத்திற்குப் பல விஷயங்கள் தமிழன் கொடையாகக் கொடுத்ததே என்பார்கள். சில நேரங்களில் அது மிகைப்படுத்தப்பட்டு இருக்கும். ஆனால், விஞ்ஞான யுகத்தில் இதற்கான நேரடி சாட்சியாக சிவா அய்யாதுரை இருக்கிறாரோ என்ற கேள்வி நமக்குள் எழாமல் இல்லை. அவர் பேசும் ஒவ்வொரு வார்த்தையிலும் இந்தியன், தமிழன், கறுப்புத்தோல் கொண்டவன் என்பதால் உலகம் என்னை அங்கீகரிக்கத் தயங்குகிறது என்கிற வருத்தம் தெரியும். இன்றும் நீங்கள் 'வெள்ளை'மாளிகைக்கு மெயில் அனுப்பினால் உங்களுக்கு ஒரு பதில் மெயில் தானியங்கி முறையில் கணினி அனுப்பும். இதற்கு 'எக்கோ மெயில் சிஸ்டம்' என்று பெயர். இதைக் கண்டுபிடித்தவரும் நம் சிவா அய்யாதுரையே!

 

Nakkheeran

 

ஒவ்வொரு சாதனையாளரின் வாழ்க்கையும் ஒவ்வொரு பாடத்தினைக் கற்றுத்தரும். 'தீர்க்கமான கனவு, கடின உழைப்பு இருந்தால் மட்டும் போதாது. உன்னை நீ விளம்பரப்படுத்திக்கொள்ளாத வரை, நீயும் சிறகுகள் வெட்டப்பட்ட பறவையே' என்பதுதான், சிவா அய்யாத்துரையின் வாழ்க்கை நமக்குச் சொல்லும் சேதி. கனவினை நோக்கித் தொடர்ந்து ஓடுவோம்!

 

 

 

Next Story

குடிப்பழக்கத்தை நிறுத்த கவுன்சிலிங்கில் புதிய முறை - ஜெய் ஜென்

Published on 05/06/2023 | Edited on 05/06/2023

 

 Manangal Manithargal Kathaikal JayZen Interview

 

கவுன்சிலிங் கொடுக்கும்போது தான் எதிர்கொண்ட விஷயங்கள் குறித்து நம்மோடு ஜெய் ஜென் பகிர்ந்து கொள்கிறார்.

 

கவுன்சிலிங் கொடுப்பதற்காக நிறுவனங்களுக்கு நாம் செல்லும்போது, அங்கு தனி நபர்களும் நம்மிடம் கவுன்சிலிங் பெற வருவார்கள். அப்படி ஒரு மனிதர் என்னிடம் வந்தார். அவருக்கு இரண்டு பிரச்சனைகள். ஒன்று குடி. இன்னொன்று சிகரெட். இரண்டும் தவறு என்று தெரிந்தும் தான் செய்து வருவதாகவும், எப்படி நிறுத்துவது என்று தெரியவில்லை என்றும் கூறினார். இதற்காக ஏன் அவர் கவலைப்படுகிறார் என்று கேட்டபோது, இதனால் தனக்கு குற்ற உணர்ச்சி ஏற்படுகிறது என்றும் பொருளாதார இழப்பு ஏற்படுகிறது என்றும் கூறினார்.

 

குடியால் வீட்டுக்கு நிதானம் இல்லாமலும் அவர் வந்துள்ளார். ஆனாலும் குடிப்பது தொடர்ந்தே வந்திருக்கிறது. எதார்த்தமாக ஆரம்பிக்கும் இந்தப் பழக்கம் பின்பு மனிதர்களை அடிமைப்படுத்துகிறது. இதை ஒரு வாழ்வியலாகவே பலர் மாற்றி வைத்துள்ளனர். ஒரு விஷயத்தை விட வேண்டும் என்று நினைத்தாலும் விட முடியவில்லையே என்பதுதான் தன்னுடைய குற்ற உணர்ச்சி என்று அவர் கூறினார். இதில் நீங்கள் நிச்சயம் தோற்பீர்கள், உங்களால் குடியை நிறுத்த முடியாது என்று அவரை வேண்டுமென்றே உசுப்பேற்றினேன். அவருக்கு கோபம் வந்தது. தன்னால் குடியை நிறுத்த முடியும் என்று அவர் கூறினார். 

 

இரண்டு வாரம் கழித்து அவரிடமிருந்து ஃபோன் வந்தது. கடந்த 14 நாட்களில் 4 நாட்கள் தான் குடிக்கவில்லை என்று கூறினார். மீதி 10 நாட்கள் குடித்தீர்களே என்று மீண்டும் அவரை உசுப்பேற்றினேன். குடும்பத்தில், தொழிலில் நல்ல பெயர் எடுக்க வேண்டும் என்று இயல்பாகவே அவர் விரும்பினார். மூன்று மாதம் கழித்து அவர் மீண்டும் பேசினார். அப்போதும் அவர் குடியை முழுமையாக நிறுத்தவில்லை. 7 வருடங்கள் கழித்து சமீபத்தில் அவரை சந்தித்தேன். இப்போது அவர் குடியை சுத்தமாக நிறுத்திவிட்டார். என்னுடைய டெக்னிக் பலித்தது. குடியை நிறுத்திய பிறகு குடும்பம் எவ்வளவு அழகானது என்பது புரிந்தது என்று கூறினார். குடும்பத்தின் மகிழ்ச்சியும் ஒரு போதை தான் என்பதை அவர் உணர்ந்தார்.

 

இது அவருக்கு மிகுந்த தன்னம்பிக்கையை அளித்தது. இதுபோன்று பலர் மாறியிருக்கின்றனர். குடியால் பலருடைய பொருளாதாரம் பாதிக்கப்பட்டிருக்கிறது. பெயர் கெட்டிருக்கிறது. அவர்கள் அனைவரும் மீள வேண்டும்.

 

 

Next Story

உலகம் முழுக்க சைக்கிளில் சுற்றி வந்த சாதனை இளைஞன் அருண் ராகேஷ் 

Published on 25/02/2023 | Edited on 25/02/2023

 

Arun Rakesh is the young man who cycled around the world

 

நடந்தே லடாக் வரை சென்றார், பைக்கில் இந்தியா முழுக்க சுற்றினார் போன்ற செய்திகளை சமீபகாலங்களில் நாம் அதிகம் பார்த்திருப்போம். ஆனால் சைக்கிளை எடுத்துக்கொண்டே தன்னால் உலகம் முழுக்க சுற்ற முடியும் என்று நம்பி, 11 நாடுகள் சுற்றி முடித்துவிட்டு இந்தியா திரும்பியிருக்கும் இளம் சாதனையாளர் அருண் ராகேஷ். பல கிலோமீட்டர்கள் பயணம் செய்த அவரிடமும் அவருடைய சைக்கிளிடமும் சிலிர்க்க வைக்கும் அனுபவங்கள் பல இருக்கின்றன. 

 

சைக்கிளிலேயே உலகம் முழுக்க பயணம் செய்யலாம் என்கிற எண்ணம் உங்களுக்கு முதலில் எப்போது வந்தது?

சைக்கிளில் செல்ல வேண்டும் என்பதை விட பயணம் செய்வதில் எனக்கு ஆர்வம் அதிகம். ஐடி துறையில் பணிபுரியும் நான், மன அழுத்தத்திலிருந்து விடுபட வேண்டும் என்பதற்காகவே பயணங்கள் செய்யத் தொடங்கினேன். பொதுவாகவே எங்கு சென்றாலும் டூரிஸ்ட் ஸ்பாட்டுகளைத் தேடித்தான் நாம் முதலில் செல்வோம். ஆனால், அந்த இடங்களில் எளிய மக்களோடு நாம் பழக முடியாது. பள்ளியில் நான் படித்துக் கொண்டிருக்கும்போது வெளிநாட்டைச் சேர்ந்த ஒருவர் சைக்கிளிலேயே இந்தியாவுக்கு வந்தார். "இப்படி எல்லாம் செய்ய முடியுமா?" என்கிற எண்ணம் அவரைப் பார்த்து எனக்கு ஏற்பட்டது. அதுதான் இந்த சைக்கிள் பயணத்திற்கான முதல் உந்துசக்தி என்று சொல்லலாம். 

 

சைக்கிளை எடுத்துக்கொண்டு நம்முடைய ஏரியாவுக்குள் உலவுவது வேறு. கடினமான பாதைகளில் செல்லும்போது எப்படி இருந்தது?

சைக்கிள் டியூப் உள்ளிட்ட தேவையான பொருட்கள் அனைத்தையும் நானே கையில் வைத்துக் கொள்வேன். கிட்டத்தட்ட மூன்று, நான்கு நாடுகள் வரை சைக்கிள் பஞ்சராகவே இல்லை. அதன் பிறகுதான் ஆனது. தேவையான பொருட்கள் என்னிடம் இருப்பதால் நானே சமாளித்துக் கொள்ளும் நிலையில் தான் இருந்தேன்.

 

இதுபோன்ற நீண்ட பயணத்தை விரும்புபவர்கள் செய்ய வேண்டியவை என்ன?

தேவைக்கு அதிகமான பொருட்களை எடுத்துச் செல்லத் தேவையில்லை. டூரிஸ்ட் ஸ்பாட்டுகளை மட்டும் குறிவைக்காமல் பல்வேறு இடங்களுக்கும் செல்ல வேண்டும். உதாரணத்திற்கு, தாய்லாந்தில் பீச் போன்ற அனைவரும் செல்லும் பகுதிகளைத் தாண்டி கிராமங்களுக்குள் செல்லும்போது அந்த மக்கள் நம் மீது செலுத்தும் அன்பு பிரமிப்பை ஏற்படுத்தியது. அவர்களுடைய கலாச்சாரத்தைப் புரிந்துகொள்ளும் வாய்ப்பும் எனக்குக் கிடைத்தது. 

 

உங்களை மிகவும் ஈர்த்த நாடு, கலாச்சாரம் எது?

இந்தியாவில் ஒவ்வொரு மாநிலத்திற்கென்றும் தனி கலாச்சாரங்கள் உள்ளன. ஆனால் வெளிநாடுகளில் அந்த நாடுகளுக்கென்று பொது கலாச்சாரங்கள் உள்ளன. மியான்மர் மக்களின் கலாச்சாரமும், அவர்கள் அளித்த வரவேற்பும், அவர்களுடைய வழிபாட்டு முறையும் எனக்கு அதிகம் பழக்கப்பட்ட ஒன்று போல் தோன்றியது. தாய்லாந்து மக்களின் அன்பும் என்னை மிகவும் ஈர்த்தது. கரும்பு ஜூஸ் குடிக்கச் சென்ற எனக்கு இலவசமாக வாட்டர் பாட்டில் கொடுத்து ஊக்கப்படுத்தினார் தாய்லாந்தில் ஒரு மொழி தெரியாத கடைக்காரர். மறக்க முடியாத நினைவு அது.

 

சைக்கிளில் செல்லும்போது கிடைக்கும் பிரத்தியேக அட்வான்டேஜ் என்ன?

பைக்கில் நாம் செல்லும்போது ஒவ்வொரு பகுதியையும் வேகமாகக் கடந்து விடுவோம். ஆனால் சைக்கிளில் மெதுவாகச் செல்லும்போது நின்று நிதானமாக ஒவ்வொரு பகுதியையும் ரசிக்கலாம். 

 

இது போன்ற பயணங்களில் எந்த வழி செல்வது என்பதைக் குறித்த வழிகாட்டுதல்  நிச்சயம் தேவை. அந்த விஷயத்தில் மக்களுடைய ஒத்துழைப்பு எப்படி இருந்தது?

மியான்மரில் ஒருமுறை இரவு நேரத்தில் கூகுள் மேப்பை நம்பி ஏமாந்தபோது, அங்கிருந்த மக்கள் நான் செல்ல வேண்டிய கிட்டத்தட்ட ஒன்றரை மணி நேர தூரத்தில் இருந்த ஒரு பகுதிக்கு அவர்களே என்னை அழைத்துச் சென்றனர். அவசரமான இந்த உலகத்தில் இவ்வளவு மனிதநேயம் கொண்ட மக்களைப் பார்த்து வியந்தேன். கடவுளே என்னைப் பார்த்துக்கொள்வது போன்ற ஒரு சிலிர்ப்பு ஏற்பட்டது.

 

இந்தப் பயணத்தில் நீங்கள் எதிர்கொண்ட சவால்கள் என்னென்ன?

கூகுள் டிரான்ஸ்லேட்டர் மூலம் அந்தந்த மக்களின் மொழிக்கு என்னால் அட்ஜஸ்ட் செய்துகொள்ள முடிந்தது. ஆனாலும் சில சமயங்களில் அது தவறான வார்த்தைகளைக் காட்டிவிடும். என்னை அனைவரும் ஏற இறங்கப் பார்ப்பார்கள். இந்த அனுபவம் எனக்கு மியான்மரில் நிகழ்ந்தது. கிட்டத்தட்ட 'முத்து' படத்தில் ரஜினி சாருக்கு ஏற்பட்டது போன்ற அனுபவம் அது.

 

ஏதாவது முக்கியமான ஒரு இடத்தில் 'இதற்கு மேல் முடியாது' என்கிற சோர்வு ஏற்பட்டதுண்டா?

நேபாள நாட்டில் காடுகள் நிறைந்த ஒரு இடத்தில் அந்த எண்ணம் ஏற்பட்டது. இருட்டுவதற்குள் தங்குவதற்கான இடத்தைத் தேர்வு செய்து முடிப்பது சிறந்தது என்பார்கள். அதுபோல நானும் இருட்டுவதற்குள் டென்ட் போடும் பணியை முடித்துவிடுவேன். அதுபோன்ற தருணங்களில் யானைகள் சூழும் ஆபத்தான இடங்களில் கூட தங்க நேர்ந்திருக்கிறது.

 

சிங்கப்பூர், மலேசியா போன்ற இடங்களில் தமிழர்களின் வரவேற்பு எப்படி இருந்தது?

என்னுடைய பயணத்தை நான் தொடங்கியதிலிருந்து வீட்டிற்கு வந்து சேரும் வரை அவர்கள் தான் எனக்கு உதவினர். என்னை அவர்களுடைய உறவினர் போல் பார்த்துக்கொண்டனர். மலேசியாவில் நான் ஒரு ரூபாய் கூட செலவு செய்யவில்லை என்றால் பார்த்துக்கொள்ளுங்கள். செலவுக்கு எனக்கு அவர்கள் தான் பணம் கொடுத்தனர். அந்த அளவுக்கு அன்பு நிறைந்தவர்கள்.

 

பயணத்தின் போது நீங்கள் உணர்ந்த சிறந்த விஷயம் எது?

ஏன் அனைவரும் பணத்தின் பின் இவ்வளவு வேகமாக ஓடுகிறோம் என்று தோன்றியது. தாய்லாந்தில் மக்கள் அவரவர் வீடுகளுக்கு அருகிலேயே தான் வேலை பார்ப்பார்கள். விவசாயம் மூலம் அறுவடை செய்த பொருட்களை அவர்களுடைய கடையில் விற்பனை செய்வார்கள். அதுதான் அவர்களுக்கு மகிழ்ச்சியை அளிக்கிறது. குடும்பத்தோடு அதிக நேரம் செலவிடுகின்றனர். செல்போனை அவர்கள் பயன்படுத்தி நான் பார்க்கவே இல்லை. இதையெல்லாம் பார்க்கும்போது அங்கேயே செட்டிலாகி விடலாமா என்று கூடத் தோன்றியது.

 

உங்களுடைய எதிர்காலத் திட்டம் என்ன?

ஆர்க்டிக் முதல் அண்டார்டிக் வரை பயணம் செய்யவிருக்கிறேன். இது ஒரு உலக சாதனை முயற்சி. இதுவரை யாரும் செய்ததில்லை. இது 60க்கும் மேற்பட்ட நாடுகளில் 50000க்கும் அதிகமான கிலோமீட்டர்கள் கடந்து செய்யப்போகும் பயணம். ஐரோப்பா, ஆப்பிரிக்கா, தென் அமெரிக்கா பகுதிகளில் இந்தப் பயணம் இருக்கும். இது என்னுடைய வாழ்நாள் கனவு. ஒரு பகுதியில் நாம் செய்யும் தவறு இன்னொரு பகுதியில் மிகப்பெரிய பாதிப்பை ஏற்படுத்துகிறது. இந்த விழிப்புணர்வை ஏற்படுத்தும் வகையில் என்னுடைய பயணம் இருக்கும். இரண்டு வருடங்கள் நான் செய்யப்போகும் இந்தப் பயணத்திற்கு தமிழ்நாடு அரசு மற்றும் கார்ப்பரேட்டுகளின் உதவியை நாடுகிறேன். நிச்சயம் தமிழர்கள் பெருமைப்படும் வகையில் என்னுடைய பயணம் அமையும். எங்களுடைய ராமாபுரம் பகுதியைச் சேர்ந்த எம்.எல்.ஏ திரு. பிரபாகர் ராஜா அவர்கள் என்னுடைய பயணத்திற்குப் பிறகு என்னை அழைத்து சால்வை அணிவித்து ஊக்குவித்தார். அவருக்கும் என்னுடைய நன்றியைத் தெரிவித்துக் கொள்கிறேன்.