Skip to main content

"அந்த விஷயத்தில் நேரத்தை வீணாக்காதீங்க..." -சச்சின் சொல்லும் ரகசியம்! சச்சின் | வென்றோர் சொல் #2

Published on 28/07/2020 | Edited on 28/07/2020

 

sachin

 

"சில விஷயங்கள் நமது கைகளுக்கு அப்பாற்பட்டவை. அதில் வீணாக நேரத்தை செலவிடுவதற்கு பதில் உங்களுடைய முழு ஆற்றலையும் உங்கள் வரம்பிற்கு உட்பட்ட விஷயத்தில் செலுத்துங்கள்..." - சொன்னது யார்? 'கிரிக்கெட் உலகின் கடவுள்' என்று இன்றும் ரசிகர்களால் வழிபடப்படும் சச்சின். பதினாறு வயதில் இந்திய அணிக்காக தேர்ந்தெடுக்கப்பட்டு தன்னுடைய ஓய்வு அறிவிப்புக்கு முன்பு வரை தொடர்ந்து அசத்தலான ஆட்டத்தினால் உலக கிரிக்கெட் வரலாற்றில் தன்னுடைய முத்திரையை அழுத்தமாக பதித்துக்கொண்டவர். சர்வதேச ஒரு நாள் போட்டியில் முதல் இரட்டை சதம் எனும் பெருஞ்சாதனையை பதிவு செய்தவர். சதத்தில் சதம் அடித்தவர் என்ற சாதனைக்கு சொந்தக்காரர். இதுபோல, பிற கிரிக்கெட் வீரர்கள் கற்பனையில் கூட எண்ணிப்பார்க்க முடியாத பலவற்றை சாத்தியமாக்கிவர் சச்சின் டெண்டுல்கர். அர்ஜுனா விருது, ராஜீவ்காந்தி கேல் ரத்னா விருது, மிக இளம் வயதில் பாரத ரத்னா விருது என வாங்காத விருதுகள் இல்லை. 2012ம் ஆண்டு மாநிலங்களவை உறுப்பினராக தேர்ந்தெடுக்கப்பட்டு பாராளுமன்றத்திற்குள் நுழைந்தார் சச்சின் டெண்டுல்கர்.

 

வெற்றியின் ரகசியம் குறித்து சச்சின் பேசும் பொழுது, "எல்லோருக்கும் வாழ்க்கையில் இலட்சியங்கள், கனவுகள் இருக்கும். நாம் எல்லோருமே திறமையானவர்கள்தான். நமக்குள் ஒரு திறமையை ஒளித்துவைத்துதான் கடவுள் நம்மை இவ்வுலகத்திற்கு அனுப்பியுள்ளார். அந்த திறமையை கண்டுபிடிக்க வேண்டியது மட்டும்தான் நம்முடைய ஒரே வேலை. பட்டை தீட்டப்படாத வைரத்தை பட்டை தீட்டி அதை மினுமினுப்பாக்கும் செயல் என்பது எளிதானது அல்ல. நாம் ஒரு முயற்சியில் இறங்கும்போது திடீரென தடைகள் வரலாம். முயற்சியைக் கைவிடவோ அல்லது குறுக்கு வழியைத் தேடவோ முயற்சிக்காதீர்கள். அது உங்களை நீங்களே ஏமாற்றி கொள்வதற்கு சமம். சரியான வழியில் பயணிப்பது என்பது மிகவும் அவசியம். நீங்கள் விழிக்கும் ஒவ்வொரு காலைப் பொழுதையும் அர்த்தமுள்ளதாக மாற்றுங்கள்."

 

 

Next Story

அயோத்தி கோயில் திறப்புக்கு 7 ஆயிரம் பிரபலங்களுக்கு அழைப்பு! 

Published on 07/12/2023 | Edited on 07/12/2023

 

7 thousand celebrities are invited for the opening of the Ayodhya temple!

உத்தரபிரதேசம் மாநிலம் அயோத்தியில் ராமர் கோயில் கட்டுமானம் நடைபெற்று வருகிறது. இது தற்போது நிறைவடையும் தருவாயில் உள்ளது. இந்தக் கோயில் வரும் ஜனவரி மாதம் 22ம் தேதி திறக்கப்படவிருக்கிறது. இதற்கான பணிகள் மும்முரமாக நடைபெற்றுவரும் நிலையில், கோயில் அறக்கட்டளை சார்பில் மொத்தம் 7 ஆயிரம் சிறப்பு விருந்தினர்களுக்கு அழைப்பு விடுக்கப்பட்டுள்ளது. 

அதன்படி அயோத்தி கோயில் திறப்புக்கு நாட்டின் மிக பிரபலமான தொழிலதிபர்களான கௌதம் அதானி, முகேஷ் அம்பானி மற்றும் ரத்தன் டாடா உள்ளிட்டோருக்கு அழைப்பு விடுக்கப்பட்டுள்ளது. திரைப்பிரபலங்களில், அமிதாப் பச்சன், அக்‌ஷய குமார், டி.டி. சேனலில் ஒளிபரப்பான ராமாயணம் தொடரில் ராமர் வேடத்தில் நடித்த அருண் கோவில், அதே தொடரில் சீதையாக நடித்த தீபிகா சிக்கில்யா மற்றும் நடிகை கங்கனா ரனாவத் ஆகியோருக்கும், முன்னாள் மற்றும் இன்னாள் கிரிக்கெட் வீரர்களான சச்சின், விராட் கோலி உள்ளிட்டோர்களுக்கும் அழைப்பு விடுக்கப்பட்டுள்ளது. 

அதேபோல், ராமர் கோயில் அமைவதற்கு ஆதரவாக இருந்த பத்திரிகையாளர்களுக்கும், ராமர் கோயிலுக்காக பாடுபட்ட 50 கரசேவகர்களின் குடும்பத்தினருக்கும், குறைந்தபட்சம் 50 நாடுகளில் இருந்து தலா ஒரு பிரதிநிதிகளுக்கும் அழைப்பு விடுக்கப்பட்டுள்ளது. 

மேலும், மத தலைவர்கள், சன்யாசிகள், மத போதகர்கள், சங்கராச்சார்யர்கள், முன்னாள் அரசு ஊழியர்கள், ஓய்வு பெற்ற ராணுவ அதிகாரிகள், வழக்கறிஞர்கள், அறிவியல் அறிஞர்கள், கவிஞர்கள், இசை கலைஞர்கள், பத்ம ஸ்ரீ மற்றும் பத்ம பூஷன் பெற்றவர்கள் உள்ளிட்டோருக்கும் அழைப்பு கொடுக்கப்பட்டுள்ளது. மொத்த 7,000 சிறப்பு விருந்தினர்களில், 4,000 அழைப்புகள் நாடு முழுக்க இருக்கும் மத தலைவர்களும், 3,000 அழைப்புகள் வி.வி.ஐ.பி.க்களும் அடங்குவர். 

Next Story

விராட் கோலி சாதனை குறித்து சச்சின் நெகிழ்ச்சி!

Published on 15/11/2023 | Edited on 15/11/2023

 

Sachin excited about Virat Kohli's feat

 

மும்பை வான்கடே மைதானத்தில் நடைபெற்று வரும் முதல் அரையிறுதி போட்டியில் இந்தியா -  நியூசிலாந்து அணிகள் மோதி வருகின்றன. டாஸ் வென்ற இந்திய அணி கேப்டன் ரோஹித் சர்மா முதலில் பேட்டிங்கை தேர்வு செய்தார். அதிரடியாக ஆடிய ரோஹித் 28 பந்துகளில் 47 ரன்களை எடுத்து ஆட்டமிழந்தார்.

 

இதனையடுத்து வந்த விராட் கோலி நிதானமாக ஆடினார். அரை சதம் கடந்த கோலி 80 ரன்கள் எடுத்த நிலையில் இந்த உலக கோப்பை தொடரில் மொத்தமாக 674 ரன்களை குவித்தார். இதன் மூலம் கடந்த 2003 ஆம் ஆண்டு நடைபெற்ற உலககோப்பை தொடரில் சச்சின் டெண்டுல்கர் 11 போட்டிகளில் குவித்த 673 ரன்கள் எனும் சாதனையை முறியடித்தார். ஒரு நாள் உலகப்கோப்பை தொடரில் ஏறத்தாழ 20 ஆண்டுகால சாதனையை விராட் கோலி முறியடித்துள்ளார். தொடர்ந்து சிறப்பாக ஆடிய கோலி சதத்தை கடந்தார். இதன் மூலம் சச்சினின் மற்றொரு சாதனையான ஒரு நாள் போட்டிகளில் அதிக சதம் (49) விளாசிய வீரர் எனும் சாதனையையும் முறியடித்து 50 ஆவது சதத்தை கடந்தார். இந்திய அணி 50 ஓவர்களில் 4 விக்கெட்டுகள் இழப்பிற்கு 397 ரன்களை குவித்தது. இதன் மூலம் நியூசிலாந்து அணிக்கு 398 ரன்களை வெற்றி இலக்காக இந்திய அணி நிர்ணயித்துள்ளது.

 

இந்நிலையில் விராட் கோலி சாதனைக்கு பல்வேறு தரப்பினரும், அரசியல் தலைவர்களும் தங்களது வாழ்த்துகளை தெரிவித்து வருகின்றனர். அந்த வகையில் விராட் கோலியின் ரோல் மாடலும், அதிக சதங்கள் அடித்த வீரர் என்ற சாதனைக்கும் சொந்தக்காரரான, இந்திய அணியின் முன்னாள் நட்சத்திர வீரருமான சச்சின், விராட் கோலியைப் பாராட்டியுள்ளார்.  தனது சமூக வலைத்தளப் பக்கமான எக்ஸ் தளத்தில் "இந்திய டிரஸ்ஸிங் ரூமில் நான் உங்களை முதன்முதலில் சந்தித்தபோது, மற்ற அணியினர் என் கால்களைத் தொடும்படி கேலி செய்தார்கள். அன்று என்னால் சிரிப்பை அடக்க முடியவில்லை. ஆனால் விரைவில், உங்கள் ஆர்வத்தாலும், திறமையாலும் என் இதயத்தைத் தொட்டீர்கள். அந்த சிறுவன் ‘விராட்’ சிறந்த வீரராக வளர்ந்ததில் எனக்கு மிகவும் மகிழ்ச்சி.

 

Sachin excited about Virat Kohli's feat

 

ஒரு இந்தியர் எனது சாதனையை முறியடித்ததை விட என்க்கு பெரிய மகிழ்ச்சி எதுவும் கிடையாது. உலகக் கோப்பை அரையிறுதிப் போட்டியிலும், மிகப் பெரிய அரங்கில் அதைச் செய்ததும், மேலும் எனது சொந்த மைதானத்தில் இது நடந்தது எனக்கு பெருமகிழ்ச்சியைத் தந்துள்ளது”என பதிவிட்டுள்ளார்.