Skip to main content

சென்னையில் பிக்பாக்கெட் தொல்லை குறைஞ்சது எப்படி தெரியுமா? - ராஜ்குமார் பகிரும் சொல்ல மறந்த கதை: 17

Published on 17/11/2023 | Edited on 17/11/2023

 

rajkumar-solla-marantha-kathai-17

 

சென்னை என்றாலே சினிமாக்களில் பிக்பாக்கெட் அடிப்பதாக காட்டப்படுவதுண்டு; அது இப்போதெல்லாம் சுத்தமாக கிடையாது. அது எப்படி முழுவதுமாக ஒழித்துக் கட்டப்பட்டது என்பதை இன்சூரன்ஸ் நிறுவனத்தில் நீண்ட காலம் பணிபுரிந்த ராஜ்குமார் ‘சொல்ல மறந்த கதை’ தொடரின் வழியாக நம்மோடு பகிர்ந்து கொள்கிறார்.

 

சென்னை எல்லீஸ் ரோட்டில் ஆட்டோக்களுக்கு பைனான்ஸ் பண்ணும் நிறுவனத்திற்கான கிளை ஒன்றிற்கு பணம் நிலுவைத் தொகை கட்ட வரும் ஆட்டோக்காரர்கள் அடிக்கடி பணம் தொலைந்து விட்டதாகவே கூறி வந்தார்கள். ஆரம்பத்தில் எங்கேயோ தொலைத்து விட்டார்களோ என்று சாதாரணமாக எடுத்துக் கொண்டோம். ஆனால் தொடர்ச்சியாக இப்படி சொல்லப்படுவதால் என்னவென்று விசாரித்தபோது பணத்தை தொலைத்த எல்லோருடைய பை, பேண்ட், சட்டை ஆகியவற்றில் பிளேடு கொண்டு கிழிக்கப்பட்டிருக்கிறது. அப்போது ஒரு முடிவெடுத்தோம் தொடர்ச்சியாக பிக்பாக்கெட் அடிக்கப்பட்டு இருக்கிறது.

 

இது குறித்து விசாரித்து இதை தடுக்க வேண்டும் என்று சென்னை கமிஷ்னராக அப்போது இருந்த விஜயகுமார் அவர்களிடம் பேசினேன். அவரும் செல்வமணி என்ற காவல்துறை அதிகாரியின் தலைமையில் ஒரு தனிப்படை அமைத்து எங்களுடைய இன்சூரன்ஸ் குழுவும் இணைந்து ஏதேதோ முயற்சிகள் செய்து தேடினோம். ஒரு துப்பும் கிடைக்கவில்லை. அப்போது ஏட்டையா ஒருவர் சொன்னார். இதெல்லாம் வேலைக்கு ஆகாது. அப்போதைய சென்ட்ரல் ஜெயிலில் பிக்பாக்கெட் வழக்கில் சிக்கியிருக்கிறவங்க கிட்ட கேட்டால் ஏதாச்சும் ஐடியா கிடைக்கும் என்றார்.

 

காவலர் ஒருவரையே கைதி போல சிறைக்குள் அனுப்பி பிக்பாக்கெட் கேசில் சிக்கியவர்களோடு பழக வைத்தோம். மகேஷ் என்றவர் அறிமுகமானார். அடிக்கடி பிக்பாக்கெட் வழக்கில் சிக்கி சிறை செல்பவர். அவரை நீதிபதி அனுமதியோடு மருத்துவ காரணங்களை சொல்லி சிறையிலிருந்து வெளியே எடுத்து அவரைக் கொண்டு அவருடைய பிக்பாக்கெட் அடிக்கும் கூட்டாளிகளைத் தேடினோம். சென்னையில் பிரபலமாக இருக்கும் அனைத்து பஸ் ஸ்டாண்டுகளிலிலிருந்தும் பிக்பாக்கெட் அடிக்கும் அவனின் கூட்டாளிகள் சிக்கினர்.

 

அதில் ஒருவன்தான் சொன்னான். எங்களை ஏன் சார் பிடிச்சு வச்சிருக்கீங்க... எங்க டிரைனர் இருக்காரு சார், அவரை போயி பாருங்க என்றான். வியாசர்பாடி நாகராஜன் என்பவரை தேடிப் போனபோது அவரோ வீட்டின் பின்புறம் பெரிய பயிற்சி பட்டறை வைத்திருந்திருக்கிறார். 

 

பஸ் ஸ்டாண்டில் எப்படி திருடனும், கோவிலில் எப்படி திருடனும், பையிலிருந்து எப்படி எடுக்க வேண்டும் போன்ற எல்லாவற்றிற்கும் செய்முறை பயிற்சி எடுப்பதற்காகவே மாதிரிகளை உருவாக்கி ஒரு பட்டறையே வைத்திருந்திருக்கிறார். தினமும் சென்னை மண்ட்ரோ சிலை அருகே கூடி நின்று எந்த பஸ்சில் யார் போக வேண்டும். பிக்பாக்கெட் அடிக்கும் பணத்தை எங்கே கொண்டு வந்து பிரித்துக் கொள்ள வேண்டும் என்று திட்டம் தீட்டி வேலை செய்திருக்கிறார்கள். அந்த குழுவையே ஒட்டுமொத்தமாக பிடித்து குண்டர் சட்டத்தில் சிறைக்கு அனுப்பினோம். அதன் பிறகு சென்னையில் பிக்பாக்கெட் ஒட்டுமொத்தமாக அடியோடு அழித்து ஒழிக்கப்பட்டது. 

 

 

Next Story

நகைகளை வைத்து நூதன கொள்ளை; ஏமாந்த வங்கிகள் - ராஜ்குமார் பகிரும் சொல்ல மறந்த கதை: 20

Published on 29/01/2024 | Edited on 29/01/2024
 rajkumar-solla-marantha-kathai-20

இன்சூரன்ஸ் பெறுவதற்காக நடத்தப்படும் பல்வேறு மோசடி, திருட்டு குறித்து நம்மிடையே தொடர்ச்சியாக இன்சூரன்ஸ் நிறுவனத்தில் நீண்டகாலம் பணிபுரிந்த ராஜ்குமார் பகிர்ந்து வருகிறார். அந்த வகையில் ஆந்திராவைச் சேர்ந்த பல குடும்பங்கள் வங்கிகளை ஏமாற்றியது குறித்து விவரிக்கிறார்.

இந்திய ரிசர்வ் வங்கியின் வழிகாட்டுதலின்படி தனிநபருக்கு நகைக்கடன் வழங்குவது இங்கே வழக்கமாக இருந்து வருவது. வங்கிக்குச் சென்றால் உங்களது நகைகளை பரிசோதிக்க ஆள் இருப்பார்கள். நகைகளைப் பொறுத்தும், வங்கி கணக்கை நிர்வகிக்கும் முறையை வைத்தும் தொகை நிர்ணயிக்கப்படும்.

சென்னையில் ஈஞ்சம்பாக்கம் பகுதியில் உள்ள ஒரு வங்கிக்கு ஒரு குடும்பம் நகை அடகு வைக்க வருகிறது. நகை பரிசோதிப்பவரும் வாங்கி பரிசோதித்து முகவரியை உறுதி செய்து கடன் வழங்குகிறார். அதே போல 30-க்கும் மேற்பட்ட குடும்பங்கள் நகை அடகு வைத்து வருகிறார்கள். வட்டியும் மாதம் தவறாது கட்டுகிறார்கள்.

ஆறு மாதம் முடிந்து வட்டி கட்டுவது நின்று போகிறது. ஈஞ்சம்பாக்கம் பகுதிகளில் அதிகப்படியான சிறிய அளவிலான தொழில்கள் நடைபெறும். தொழில் முடக்கத்தால் கட்டமுடியாம போய் விட்டதோ என்று நேரே சென்று விசாரிக்கிறார்கள். எங்களால் அந்த நகைக்கு வட்டியும் கட்ட முடியவில்லை, முதலும் செலுத்த முடியவில்லை. நீங்கள் அந்த நகையை ஏலத்திற்கு விட்டு பணத்தை எடுத்துக்கொள்ளுங்கள் என்றிருக்கிறார்கள்.

வங்கி நிர்வாகத்திற்கோ இவ்வளவு நகைகளையும் வங்கிக்காக விற்றுக்கொடுத்தால் நன்றாகத்தான் இருக்கும் என்று அதற்கான வேலைகளில் ஈடுபடுகிறார்கள். ஏலம் அறிவிப்பினை பார்த்து நகைகளை வைத்து தொழில் செய்பவர்கள் வந்து நகைகளை பரிசோதித்து வாங்கும் போது அனைத்து நகைகளுமே போலியான நகைகள் என்பது தெரியவருகிறது.

நகையை அடகு வைத்த குடும்பத்தை விசாரித்தால் நாங்கள் ஆறு மாதத்திற்கு முன்பு நல்ல நகையைத்தானே கொடுத்தோம். இப்போது வந்து தங்க நகை இல்லை என்றால் நாங்கள் எப்படி பொறுப்பு ஏற்பது என்கிறார்கள். அதே சமயத்தில் அந்த குடும்பத்தில் ஒருவனை விசாரிக்கும் விதத்தில் விசாரித்த போது நாங்கள் இதை ஆந்திரா மாநிலத்து பக்கத்திலிருந்து குடிசை தொழிலாகவே செய்கிறோம் என்பதை சொல்கிறார்கள். அதாவது வெவ்வேறு வகை உலோகங்களால் தயாரிக்கப்பட்ட ஆபரணத்தில்  தங்கமுலாம் பூசி அதைத் தஙகம் போல மாற்றி பல மாநிலங்களில் இதை போல நகைக்கடன் வாங்கி நூதன மோசடியில் ஈடுபட்டுள்ளது தெரிய வந்தது.

இதையே தான் இந்த வங்கியிலும் செய்திருக்கிறார்கள். இதில் சம்பந்தப்பட்டவர்களை பண மோசடி வழக்கில் கைது செய்து சிறையில் அடைத்தார்கள். பல்வேறு வகையான மோசடிகளுக்கு மத்தியில் இப்படியுமான மோசடிகளும் கொள்ளைகளும் நடந்து கொண்டு தான் இருக்கிறது.

Next Story

காணாமல் போன 40 ஆயிரம் டன் பொருட்கள்; கடத்தலின் சுவாரசிய பின்னணி - ராஜ்குமார் பகிரும் சொல்ல மறந்த கதை: 19

Published on 22/12/2023 | Edited on 22/12/2023
 rajkumar-solla-marantha-kathai-19

இன்சூரன்ஸ் பெறுவதற்காக நடத்தப்படும் பல்வேறு மோசடி, திருட்டு குறித்து நம்மிடையே தொடர்ச்சியாக இன்சூரன்ஸ் நிறுவனத்தில் நீண்டகாலம் பணிபுரிந்த ராஜ்குமார் பகிர்ந்து வருகிறார். அந்த வகையில் காணாமல் போன 40 ஆயிரம் டன் பொருட்களுக்கான இன்சூரன்ஸ் கேட்டது குறித்து விவரிக்கிறார்.

மலேசியா, சிங்கப்பூர், சீனா, இந்தோனேசியா போன்ற நாடுகளில் இரும்பு கடைகளெல்லாம் கிடையாது. பொருளின் தேவை முடிந்ததும் நசுக்கி போட்டு துண்டாக்கி போட்டு விடுவார்கள். நமது நாட்டிலிருந்து அங்கே சென்று காப்பர், அயர்ன், அலுமினியம் போன்றவற்றை வாங்கி வருவார்கள். சென்னை மாதவரம், மணலி போன்ற பகுதிகளில் இரும்பை உருக்கி பொருட்கள் செய்கிற நிறைய தொழிற்சாலைகள் உள்ளது. அங்கே சென்று கொண்டு வரப்படும் அயர்ன், காப்பர், அலுமினியம் வேறு பொருட்களாக மாற்றமாவதற்கு உதவும்.

சட்டப்படி கொண்டுவரப்படும் எந்த பொருட்களுக்கும் துறைமுகத்தில் சுங்கவரி கட்ட வேண்டும். வரி கட்ட முடியாவிட்டாலோ, அல்லது தவறினாலோ அந்த பொருட்களை அதிகாரிகள் கைப்பற்றி தங்களது அலுவலக குடோன்களில் பாதுகாத்து வைப்பார்கள், அல்லது தனியார் குடோன்களில் வாடகை செலுத்தி பாதுகாத்து வைத்திருப்பார்கள். கைப்பற்றிய பொருட்கள் வரி கட்டியதும் விடுவிக்கப்படும். 

அப்படி பாதுகாத்து வைக்கப்பட்டிருக்கும் பொருட்கள் மழை வெள்ளம் புயல் பாதிப்புகளால் சேதமடையாமல் இருக்க இன்சூரன்ஸ் செய்யலாம் என ஒரு இன்சூரன்ஸ் முகவர் சொல்ல, வெளிநாட்டிலிருந்து இந்தியா கொண்டு வரப்பட்டு வரி கட்டாமல் வைத்திருந்த இரும்பு சம்பந்தப்பட்ட பொருட்களுக்கு அதனை இறக்குமதி செய்தவர் இன்சூரன்ஸ் செய்து வைக்கிறார். 

ஒருநாள் இன்சூரன்ஸ் அலுவலகத்திற்கு குடோனில் பாதுகாத்து வைத்திருந்த 40 ஆயிரம் டன் அயர்ன், காப்பர், அலுமினியப் பொருட்களை காணவில்லை என்றும் அதற்கு இன்சூரன்ஸ் செய்திருக்கிறேன், அதற்கான தொகையை தரவும் என்று வந்து நிற்கிறார். நாங்கள் செய்தியின் உண்மைத் தன்மையை அறிய இடத்திற்கு விரைந்தோம். பெரிய குடோனின் முன் பக்கம் பூட்டி இருக்கிறது, ஆனால் பின்பக்கம் உடைக்கப்பட்டு பொருட்கள் எடுக்கப்பட்டு இருப்பது தெரிய வந்தது.

கஸ்டம்ஸ் ஆபீசர்களை தொடர்புகொண்டு பொருட்களை கையகப்படுத்தி வைத்திருந்தீர்களே நீங்கள் இன்சூரன்ஸ் செய்தீர்களா என்றால் இல்லை என்கிறார்கள். ஆனால் பொருட்கள் கைப்பற்றப்பட்டு அதிகாரிகள் வசம் இருந்தும், அதற்கு சொந்தக்காரர் இன்சூரன்ஸ் எடுத்திருக்கிறார் என்பதும் எங்களுக்கு சின்ன சந்தேகம் வந்தது. அதன் அடிப்படையில் விசாரித்தோம்.

அந்த பகுதியில் இருந்த ஒரு மதுப்பிரியரோடு மூன்று நாட்களாக பழகியதில் அவர் ஒரு விசயத்தைச் சொன்னார், இந்த குடோனில் இருந்த பொருளை எல்லாம் யாரும் திருடல, பொருளுக்கு சொந்தக்காரனே 40 லாரிகளைக் கொண்டு வந்து இங்கிருந்து எடுத்துட்டு போயிட்டான் என்றார். சென்னையிலேயே விற்றால் சிக்கலாகும் என்பதற்காக ஆந்திரா, ஒரிஸ்ஸா போன்ற இடங்களுக்குச் சென்று விற்றிருக்கிறார் நம்மிடம் இன்சூரன்ஸ் போட்டவர்.

கஸ்டம்சில் மாட்டிய பொருட்களை வாங்குவதற்கு என்றே புரோக்கர்கள் இருப்பார்கள், அவர்களின் வாகனங்கள் நகரின் எல்லைப் பகுதியில் அவர்களுடைய டிரைவர்களோடு வந்து நிற்கும். லோக்கலில் இருக்கும் டிரைவர்கள் அந்த வண்டியை மட்டும் எடுத்துக் கொண்டு வந்து பொருட்களை ஏற்றிக்கொண்டு போய், அவர்களிடம் கொடுத்து பணத்தை பெற்றுக்கொள்வார்கள்.

அதற்கு பிறகு அந்த பொருட்கள் எந்த தொழிற்சாலைக்கு போகும். எந்த முதலாளி வாங்கியிருப்பார் என்ற எந்த தகவலும் தெரிய வராது. அதனால் இன்சூரன்ஸ் நிறுவனம் சார்பாக சிபிஐ வசம் ஒரு புகார் கொடுத்து, இதனை கண்டறிந்து சம்பந்தப்பட்டவருக்கு இன்சூரன்ஸ் மறுக்கப்பட்டது. இன்சூரன்சிற்காக இது போன்ற திருட்டு வேலையெல்லாம் சர்வசாதாரணமாக நடக்கும்.