Skip to main content

அழகும் வசதியும் நிறைந்த மாப்பிள்ளை; மறுப்பு தெரிவித்த பெண் - டிடெக்டிவ் யாஸ்மின் புலனாய்வு: 15

Published on 16/10/2023 | Edited on 16/10/2023

 

 lady-detective-yasmin-case-explanation-15

 

விசித்திரமான ஒரு வழக்கு குறித்து நம்மோடு துப்பறிவாளர் யாஸ்மின் பகிர்ந்துகொள்கிறார்

 

ஒரு பெண் எங்களிடம் வந்து கேஸ் கொடுத்தார். அவருடைய குடும்பம் நல்ல வசதி படைத்தது. அவருடைய கணவரின் தொழிலை மகன் கவனித்து வந்தான். அவருடைய மகன் மிகவும் அழகாக இருப்பான். அவன் தனக்கு சுமாரான தோற்றம் கொண்ட பெண்ணே வேண்டும் என்று அடம்பிடித்ததால் அப்படிப்பட்ட ஒரு பெண்ணையே அவனுக்கு பார்த்தனர். அந்தப் பெண்ணுக்கு வசதி, படிப்பு என்று அனைத்தும் குறைவுதான். ஆனால் நிச்சயம் செய்யும் சமயத்தில் பெண் வீட்டார் இந்தத் திருமணம் வேண்டாம் என்று கூறினர். அவர்களுக்கு அது அதிர்ச்சியாக இருந்தது. 

 

அதற்கு முன் தங்களுடைய மகனுக்கு உயர்ந்த செல்வாக்கு பெற்ற குடும்பத்தில் திருமணம் செய்து வைத்து, அது சரியாக வராததால் மீண்டும் அதுபோன்று திருமணம் செய்துவைக்க அவருடைய குடும்பத்தினர் அஞ்சினர். எதனால் பெண்ணின் குடும்பத்தினர் திருமணம் வேண்டாம் என்று கூறினர் என்று பையனின் குடும்பத்தினர் தெரிந்துகொள்ள விரும்பினர். பெண்ணின் குடும்பம் மிகவும் சாதாரணமான ஒரு குடும்பம். அவருடைய பெற்றோர் கூலி வேலை செய்து வந்தனர். பெண்ணுக்கு எக்ஸ்போர்ட் கம்பெனியில் மாதம் 7 ஆயிரம் ரூபாய் சம்பளம். ஆனால் அவர் நல்ல பெண்ணாக இருந்தார். இவர்கள் ஏன் இந்த சம்பந்தத்தை நிராகரிக்கிறார்கள் என்று தெரிந்துகொள்ள விரும்பினோம்.

 

அவருடைய கம்பெனிக்கு இயல்பாகச் செல்வது போல் சென்று அந்தப் பெண்ணிடம் பேசினேன். தனக்கு வந்த வரனில் தனக்கு விருப்பமில்லை என்று அவர் கூறினார். "அந்தப் பையனுக்கு இது இரண்டாவது திருமணம். அதில் எனக்கு எந்தப் பிரச்சனையும் இல்லை. ஆனால் பணக்காரப் பெண் தங்களுக்கு ஒத்துவராததால், என்னைப் போன்ற சாதாரண பெண்ணைத் திருமணம் செய்து வைத்தால் அனைத்திலும் அடங்கி இருப்பேன் என்று நினைக்கிறார்கள். அப்படிப்பட்ட திருமணம் எனக்கு வேண்டாம். என்னை விரும்பி, புரிந்துகொண்டு செய்யப்படும் திருமணமே எனக்கு வேண்டும்" என்று அந்தப் பெண் கூறினார். அவர் மீது எனக்கு மிகுந்த மரியாதை ஏற்பட்டது.

 

இந்த விஷயங்களை பையனின் குடும்பத்தினரிடம் சொன்னேன். "பணம் மட்டுமே வாழ்க்கையில்லை என்பது எனக்குத் தெரியும். வசதியில்லாதவர்கள் எனக்கு அடங்கிப் போவார்கள் என்று நினைத்தது என்னுடைய தவறுதான். ஆனால் அவரை அடக்க வேண்டும் என்று நான் நினைக்கவில்லை. நல்ல வாழ்க்கைத் துணை வேண்டும் என்பதுதான் என்னுடைய தேவை" என்று அந்தப் பையன் கூறினார். அவர் மீதும் எனக்கு மரியாதையே ஏற்பட்டது. இரண்டு பக்கமுமே நியாயம் இருப்பதுபோல் தோன்றியது. மீண்டும் அந்தப் பெண்ணிடம் நான் பேசினேன். அவர்கள் இருவருக்கும் திருமணம் நடைபெற்று இப்போது மகிழ்ச்சியாக வாழ்ந்து வருகின்றனர்.

 

 

 

 

Next Story

ஆம்ஸ்ட்ராங் கொலை வழக்கு; அடுத்தடுத்து வெளியாகும் திடுக்கிடும் தகவல்கள்!

Published on 21/07/2024 | Edited on 21/07/2024
Armstrong case The startling information that will be released in succession

பகுஜன் சமாஜ் கட்சியின் மாநிலத் தலைவர் ஆம்ஸ்ட்ராங் (வயது 52) என்பவர் கடந்த 5 ஆம் தேதி  (05.07.2024) அன்று மாலை கொலை செய்யப்பட்டார். இது குறித்து செம்பியம் காவல் நிலையத்தில் வழக்குப்பதிவு செய்து விசாரணை நடைபெற்று வருகிறது. இந்த கொலைக்கான காரணத்தைக் கண்டறிந்து சம்மந்தப்பட்ட குற்றவாளிகளை உடனடியாக கைது செய்ய சென்னை பெருநகர காவல் ஆணையாளர் உத்தரவிட்டிருந்தார். அந்த உத்தரவின்படி தனிப்படைகள் அமைக்கப்பட்டு ஏற்கனவே 14 குற்றவாளிகள் கைது செய்யப்பட்டு சிறையில் அடைக்கப்பட்டுள்ளனர்.

இத்தகைய சூழலில் தனிப்படை போலீசார் தீவிர விசாரணை செய்து இந்த கொலை வழக்கில் சம்பந்தப்பட்ட திருவள்ளூர் மாவட்டம் கடம்பத்தூர் பகுதியைச் சேர்ந்த கோதண்டராமன் என்பவரது மகன் ஹரிதரன் (வயது 37) என்பவரை நேற்று (20.07.2024) கைது செய்தனர். மேலும் விசாரணையில் கைது செய்யப்பட்ட ஹரிதரன் வழக்கறிஞராக பணியாற்றி வருவதும், இவர் அதிமுகவின் கடம்பத்தூர் ஒன்றிய குழு உறுப்பினராக உள்ளதும் தெரியவந்தது. 

Armstrong case The startling information that will be released in succession

இவர் ஆம்ஸ்ட்ராங் கொலை வழக்கில் கைது செய்யப்பட்ட ஹரிஹரன் மற்றும் அருளின் நண்பர் ஆவார். அருள் இவ்வழக்கில் குற்றவாளிகள் பயன்படுத்திய 6 செல்போன்களை ஹரிதரனிடம் ஒப்படைத்துள்ளார். இந்த செல்போன்களை மற்றொரு குற்றவாளியான ஹரிஹரன் யாருக்கும் தெரியாமல் தூக்கி எறியுமாறு ஹரிதரனிடம் தெரிவித்ததன் பேரில், ஹரிதரன் 6 செல்போன்களையும் சேதப்படுத்தி திருவள்ளுவர் மாவட்டம், வெங்கத்தூரில் உள்ள கொசஸ்தலை ஆற்றில் வீசி எறிந்துள்ளார்.

இதனையடுத்து தனிப்படை போலீசார் தமிழ்நாடு தீயணைப்பு மற்றும் மீட்புப் பணிகள் துறையைச் சேர்ந்த நீச்சல் பயிற்சி பெற்ற வீரர்களின் உதவியுடன் கொசஸ்தலை ஆற்றிலிருந்து 3 செல்போன்கள் மீட்கப்பட்டன. மற்ற செல்போன்களையும் கண்டுபிடிக்க மீட்புக் குழுவினர் தீவிரமாகத் தேடி வருகின்றனர். அதே சமயம் அதிமுக கவுன்சிலர் ஹரிதரனை அதிமுகவின் அடிப்படை உறுப்பினர் பொறுப்பு உட்பட அனைத்துப் பொறுப்புகளில் இருந்தும் நீக்கி அக்கட்சியின் பொதுச்செயலாளர் எடப்பாடி பழனிசாமி உத்தரவிட்டிருந்தார். 

Armstrong case The startling information that will be released in succession

இந்நிலையில் ஆம்ஸ்ட்ராங் கொலை வழக்கில் அடுத்தடுத்து வெளியாகும் தகவல்களால் பரபரப்பு ஏற்பட்டுள்ளது. அதிமுகவில் இருந்து நீக்கப்பட்ட ஒன்றிய கவுன்சிலர் ஹரிதரன் ஆம்ஸ்ட்ராங் கொலைக்கு முன்பு ஆற்காடு சுரேஷ் கூட்டாளிகளுடன் தொடர்பில் இருந்து அம்பலமாகி உள்ளது.மேலும் ஆற்காடு சுரேஷின் கூட்டாளிகளுக்கு ஹரிதரன் அடைக்கலம் கொடுத்ததும் போலீசார் நடத்திய விசாரணையில் தெரியவந்துள்ளது. அதோடு ஹரிதரன் ஆற்காடு சுரேஷ் கூட்டாளிகளுடன் மகாராஷ்டிராவுக்கு சுற்றுலா சென்றதாகவும் தகவல் வெளியாகியுள்ளது. ஆம்ஸ்ட்ராங்கை படுகொலை செய்த ரவுடி ராமனுடன் ஹரிஹரன் தொடர்பில் இருந்ததும் அம்பலமாகியுள்ளது.

தனது அரசியல் களத்தில் பகுஜன் சமாஜ்வாதி கட்சியின் ஹரிக்கு ஆதரவாக ஆம்ஸ்ட்ராங் செயல்பட்டு வந்ததால் ஹரிதரனுக்கும் ஆம்ஸ்ட்ராங் மீது பகை வந்துள்ளது. ஆம்ஸ்ட்ராங் திருவள்ளூர் வரும்போது கொலை செய்ய ஆற்காடு சுரேஷின் கூட்டாளிகள் கடம்பத்தூர் பகுஜன் சமாஜ் கட்சி நிர்வாகியை வேவு பார்க்க வைத்துள்ளனர். ஆம்ஸ்ட்ராங்கை கொன்ற குற்றவாளிகளில் ஒருவரான ராமு உடன் ஹரிஹரன் நெருக்கமாக இருப்பதற்கான அவர் வைத்த வாட்ஸ்அப் ஸ்டேட்டஸ் ஆதாரங்களாக கிடைத்துள்ளன. இந்த கொலை வழக்கு தொடர்பாக மேலும் சில வழக்கறிஞர்களிடம் போலீசார் விசாரணை நடத்தி வருகின்றனர். 

Next Story

70 நாட்களுக்கு மேலாகியும் கிடைக்காத விடை; தொடர் விசாரணையில் சிபிசிஐடி

Published on 19/07/2024 | Edited on 19/07/2024
No response after more than 70 days; CBCID in further investigation

திருநெல்வேலி மாவட்டம் திசையன்விளை பகுதியைச் சேர்ந்தவர் ஜெயக்குமார் தனசிங் (வயது 60). நெல்லை மாவட்ட காங்கிரஸ் தலைவரான ஜெயக்குமாரை தீவிரமாக தேடி வந்தனர். இத்தகைய சூழலில் ஜெயக்குமார் கரைச்சுத்து புதூரில் உள்ள வீட்டின் பின்புறம் உள்ள தோட்டத்தில் உடல் பாதி எரிந்த நிலையில் 04.05.2024 அன்று சடலமாக மீட்கப்பட்டார். ஜெயக்குமார் தனசிங் எரிந்த நிலையில் சடலமாக மீட்கப்பட்டது அரசியல் வட்டாரத்தில் பரபரப்பை ஏற்படுத்தியது.

தொடர்ந்து இந்த வழக்கு சிபிசிஐடி போலீசாருக்கு மாற்றப்பட்டு பல நாட்களாக விசாரணை நடைபெற்று வருகிறது. இந்நிலையில் நேற்று இந்த கொலை சம்பவம் தொடர்பாக ஜெயக்குமாரின் மனைவி, மகன்களிடம் சிபிசிஐடி போலீசார் விசாரணை மேற்கொண்டனர். இந்த சம்பவம் நடைபெற்று 70 நாட்களாகியும் தற்போது வரை சம்பவத்தின் பின்னணி குறித்து எந்த துப்பும் கிடைக்காததால் போலீசார் விசாரணையை தீவிரப்படுத்தி உள்ளதாக கூறப்படுகிறது. இதையடுத்து நேற்று மதியம் ஜெயக்குமார் வீட்டிற்கு சென்ற சிபிசிஐடி போலீசார் இரவு 9 மணி வரை குடும்ப உறுப்பினர்களிடம் விசாரணை மேற்கொண்டனர்.