Skip to main content

மனைவியிடம் நெருக்கமின்மை; ஆண் நண்பரோடு தனிமையில் கணவர் - டிடெக்டிவ் யாஸ்மின் புலனாய்வு: 08

Published on 05/07/2023 | Edited on 05/07/2023

 

Lady Detective Yasmin  Case Explanation  08

 

தன்பாலின ஈர்ப்பாளர் பற்றியும் அவரை மையமிட்டு நடந்த துப்பறிந்த வழக்கு ஒன்றை கையாண்டது பற்றியும் நம்மிடம் துப்பறிவாளர் யாஸ்மின் விவரிக்கிறார்.

 

தன்பாலின ஈர்ப்பு என்பதும் இயற்கையான ஒன்றுதான். ஆனால் நம்முடைய சமுதாயத்தில் அது பலரால் ஏற்றுக்கொள்ளப்படுவதில்லை. இப்போது காலம் மாறி வருகிறது. ஆண்கள், பெண்கள் என்று இருபாலருக்கும் இதுபோன்ற உறவுகள் இருக்கும். ஒரு பெண் எங்களிடம் புகார் கொடுக்க வந்தார். தன்னுடைய கணவர் தன் மீது மிகுந்த பாசம் கொண்டவர் என்றும், தன்னை நன்றாக கவனித்துக்கொள்வார் என்றும், ஆனால் உடலுறவில் அவருக்கு ஆர்வம் இல்லாமல் இருக்கிறது என்றும் கூறினார். வேறு யாருடனோ தன் கணவருக்குத் தொடர்பிருக்க வாய்ப்புண்டு என்று அவர் நினைத்தார். 

 

தன் கணவரின் மீது சந்தேகம் இருப்பதால் நாங்கள் விசாரிக்க வேண்டும் என்றார். அவருடைய கணவர் தினமும் காலையில் காய்கறி மண்டிக்கு சென்றார். வாரம் ஒருமுறை அவர்களுடைய தோட்டத்துக்குச் சென்றார். அவருடைய நடவடிக்கைகளில் சந்தேகத்துக்கு இடமில்லாமல் இருந்தது. அவர்களுடைய தோட்டத்தில் வேலை செய்யும் நண்பர் ஒருவருடன் மட்டும் நெருக்கமாக இருந்தார். தோட்டத்துக்கு செல்லும் நேரங்களில் மட்டும் வீட்டுக்கு வராமல் இருந்தார். தோட்டத்தில் அடிக்கடி இரவில் தங்க ஆரம்பித்தார். ஒரு பெண்ணிடம் பேசுவது போலவே அந்த நண்பரிடமும் பேசினார். இருவரும் தன்பாலின ஈர்ப்பாளர்களாய் தனிமையில் இணைந்து இருப்பது தெரிந்தது.

 

உண்மையை அவருடைய மனைவியிடம் நாங்கள் சொல்லிவிட்டோம். எதுவாக இருந்தாலும் பாதிக்கப்பட்டவர்கள் ஏற்றுக்கொள்ளும் வகையில் தான் முடிந்தவரை எங்களுடைய ரிப்போர்ட் இருக்கும். அவருடைய கணவர் இதை துரோகம் என்று நினைத்து செய்யவில்லை என்றாலும் ஒரு வகையில் அது துரோகம் தான். உடல்ரீதியாக மட்டுமல்லாமல் மனரீதியாகவும் இறுதி வரை துணையாக இருப்பது தான் மனிதர்களுக்கான தேவை. அது சிலருக்கு தன்பாலின ஈர்ப்பின் மூலமும் அந்த துணையின் மூலமும் நடக்கிறது. இந்த வழக்கில் நாம் பார்த்த ஆணை போன்றவர்கள், திருமணம் செய்த பெண்ணுக்கு இதைத் தெரியப்படுத்தாமல் ஏமாற்றுவதை விட அந்த பெண்ணை திருமணமே செய்துகொள்ளாமல் இருப்பது சரியான முடிவாக இருக்கும்.

 

 

Next Story

கணவன் மனைவி பிரச்சனை; கிடைத்த கேப்பில் புகுந்து விளையாடிய பாஸ் - டிடெக்டிவ் மாலதியின் புலனாய்வு: 34

Published on 20/01/2024 | Edited on 20/01/2024
detective-malathis-investigation-34

தான் கையாண்ட துப்பறியும் வழக்குகள் குறித்து முதல் பெண் துப்பறிவாளர் மாலதி நம்மிடையே பகிர்ந்து வருகிறார். அந்த வகையில் வெளிநாட்டில் சண்டைபோட்டுக் கொண்டு தமிழ்நாட்டிற்கு வந்துவிட்ட தன் மனைவியை கண்காணிக்கச் சொன்ன கணவனைப் பற்றியும், அதில் கிடைத்த அதிர்ச்சியான தகவல்களை பற்றியும் விவரிக்கிறார்.

வெளிநாட்டிலிருந்து எங்களை தொடர்பு கொண்டார் ஒருவர், தன்னுடைய மனைவி தன்னுடன் சண்டையிட்டுக் கொண்டு தமிழ்நாட்டிற்கு அவளுடைய சொந்த ஊருக்கு வந்துவிட்டாள். அங்கே என்ன செய்கிறாள் என்று தெரிந்து கொள்ள வேண்டும் என்றார். அத்தோடு, தனக்கும் தன் மனைவிக்கும் கல்யாணம் ஆனதிலிருந்து அடிக்கடி சண்டை வரும், அப்போது வெளிநாட்டில் தனக்கு வேலை வழங்கிய பாஸ் தான் தலையிட்டு சரி செய்து விடுவார். அதனால் கொஞ்ச காலம் அமைதியாக இருப்பாள், பிறகு சண்டையை ஆரம்பிப்பாள். இப்பொழுது பெரிதாய் சண்டை போட்டுக் கொண்டு ஊருக்கு வந்துவிட்டாள் என்றார். 

அவரிடம் விவரங்களை வாங்கிக்கொண்டு அந்த பெண்ணை கண்காணிக்க ஆரம்பித்தோம். இங்கே வந்ததிலிருந்து அந்த பெண் ரொம்ப பிசியாக பரபரப்பாகவே இருந்து வந்தாள். ஏனெனில் அவளுடைய சகோதரனின் திருமணம் நடைபெறப்போகிறது, அதற்கான வேலைகளில் இருந்தாள். நாங்களோ இந்த பெண்ணின் மீது எந்த தவறும் இல்லை போல, வெளிநாட்டில் இருக்கும் கணவன் தான் சந்தேகப்படுகிறானோ என்று கூட ஆரம்பத்தில் நினைத்தோம்.

இருந்தாலும் நம்முடைய கிளைண்ட் என்ன கேட்கிறார்களோ அதை செய்து தருவது தான் நம்முடைய வேலை என்பதால், அந்த பெண்ணை அவளுடைய சகோதரனின் திருமணம் வரை ஃபாலோ செய்து விவரங்களைத் தரலாம் என்று முடிவெடுத்து வைத்திருந்தோம்.

அவளுடைய தம்பியின் திருமணத்திற்கு வந்திருந்த ஒருத்தரை அந்த பெண்ணோ விழுந்து விழுந்து கவனித்திருக்கிறார். கிளம்பும் போதும் ரோடு வரை வந்து வழி அனுப்பி வைக்கிறாள். அடுத்த நாளே அந்த நபரை ஒரு ஹோட்டலில் சென்று சந்திக்கிறாள். அவரோடு அந்த இரவு முழுவதும் அந்த ஹோட்டலில் தங்குகிறாள். வெளியே வரவில்லை. மறுநாள் காலையில் வெளியே அவருடன் வந்தவள் சில பகுதிகளுக்கு சென்று சுற்றிவிட்டு மீண்டும் ஹோட்டலில் தங்கிவிட்டு மறுநாள் வீட்டிற்கு போகிறாள்.

இந்த தகவலை வெளிநாட்டிலிருக்கும் அந்த பெண்ணின் கணவரிடம் சொன்னோம். அவரோ அந்த நபரின் புகைப்படத்தை பார்க்க விரும்பினார். அனுப்பி வைத்தோம். அதில் தான் அவர் சொன்னது ஆச்சரியத்தை அளித்தது. அந்த நபர் இவரின் பாஸ், வெளிநாட்டில் கணவன் மனைவியிடையே சண்டை ஏற்பட்டால் யார் அந்த பெண்ணுக்கு கவுன்சிலிங்க் கொடுப்பாரோ, அதே பாஸ் தான் இங்கே இவளோடு இருக்கிறார்.

இவ்வளவுக்கும் அந்த பாஸுக்கு கல்யாணமாகி, கல்லூரிக்கு போகும் வயதில் மகள் இருக்கிறாள் என்கிற தகவல் எல்லாம் பின்னால் தெரிந்து கொண்டோம். நாம் திரட்டிய தகவல், ஆதாரங்களை நமது கிளைண்டிடம் கொடுத்தோம். அதை வைத்து அவர் விவாகரத்து அப்ளை பண்ணி டைவர்ஸ் வாங்கிக் கொண்டார்.

இதன் வழியாக தெரிந்து கொள்ள வேண்டியது என்னவென்றால், கணவன் மனைவிக்குள் சண்டை வரும் பொழுது குடும்ப உறுப்பினர்களைத் தாண்டி மற்றவர்களிடம் கொண்டு செல்லும் போது அது பல்வேறு வகையில் சிக்கலை உருவாக்கும். கவனமுடன் கையாள வேண்டும். 

Next Story

காதலன் ஏமாற்றியதாக புகார்; காதலிக்கு காத்திருந்த ட்விஸ்ட் - டிடெக்டிவ் மாலதியின் புலனாய்வு: 30

Published on 31/10/2023 | Edited on 31/10/2023

 

detective-malathis-investigation-30

 

காதலித்து ஏமாற்றினால் ஆண் தான் பிரச்சனை செய்வார்கள் என்று கேள்விப்பட்டிருக்கிறோம். ஆனால் சில சமயங்களில் பெண்களும் வீடு புகுந்து மிரட்டுகிற செயல் எல்லாம் நடக்கத்தான் செய்கிறது. அப்படியான ஒரு சம்பவத்தையும் அதில் பெண் தரப்பை விசாரித்தது குறித்து முதல் பெண் துப்பறிவாளர் மாலதி நம்மோடு பகிர்ந்து கொள்கிறார்.

 

தன்னுடைய மகன் காதலித்ததாகவும், பின் தன்னை விட்டு விலகி விட்டதாகவும் ஒரு பெண் தன்னுடைய வீடு தேடி வந்து குடும்பத்தினரின் முன்னிலையில் மிரட்டிச் சென்றதால் அந்தப் பெண் எப்படிப் பட்டவர் என்பதையும் தன்னுடைய மகன் மீது தப்பு இருக்கிறதா அல்லது அந்த பெண் மீது தவறு இருக்கிறதா என்பதைக் கண்டறிய வேண்டும் என்று நம்மை அணுகினர். ஒரு வேளை தன் மகன் மீது தான் தவறு என்றால் அந்த பெண்ணை திருமணம் செய்து வைக்கிற முடிவிலும் அவர்கள் இருந்தார்கள் என்பதையும் குறிப்பிட்டார்கள்.

 

அந்த பெண்ணை பின் தொடர்ந்தோம். மிகவும் பொருளாதார ரீதியில் பின் தங்கிய குடும்பம். அம்மா இல்லை, அப்பா மட்டுமே மேலும் மாற்றுத்திறனாளியான அக்காவும் இருந்தாள். அந்த குடும்பத்தில் இந்த பெண்ணின் வருமானத்தைக் கொண்டு தான் வாழ்ந்து வந்தார்கள். அதனால் அவர்களுக்கு தன்னுடைய வருமானம் திருமணத்திற்கு பிறகும் போய்ச் சேர வேண்டும். அதே சமயத்தில் தானும் நல்ல வாழ்க்கை வாழ வேண்டும் என்று நம்மிடம் விசாரிக்கச் சொன்ன குடும்பத்து பையனை விரும்பி இருக்கிறாள். அவளது நோக்கமெல்லாம் நல்லது தான். இன்றைய காலத்து அனைத்து பெண்களும் நினைப்பது தான்.

 

ஆனால் காதலர்களுக்குள் முரண் வந்ததும் அதை சரி செய்யாமல் உடனடியாக இன்னொரு பையனுடனும் பழக ஆரம்பித்திருக்கிறாள். மிகவும் நெருக்கமான உறவாகத்தான் பழகவும் செய்திருக்கிறாள். அதே சமயம் இவனையும் மிரட்டி திருமணம் செய்து கொள்ள விரும்புகிறாள் என்ற ரிப்போர்ட்டை பையனின் குடும்பத்திற்கு கொடுத்தோம். பிறகு அவர்களே பேசி ஒரு முடிவை எடுத்துக் கொண்டார்கள். 

 

பெண்கள் தங்களுக்கு என்ன வேண்டும், வேண்டாம் என்பதில் உறுதியாக இருக்கும் பட்சத்தில் அதை பெறுவதற்கு நியாயமான முறையினை கையாள வேண்டுமே தவிர இது போன்ற மிரட்டுதல், அடிபணிய வைத்தல் போன்றவற்றை செய்யக்கூடாது. அது நிலைத்திருக்காது.